li Jesus natijok rik’ineb’ laj Nefita

Lix tij li Kristo, xb’aan laj Derek Hegsted

19–25 octubre

3 Nefi 27–4 Nefi

“Moko kiru ta kiwan junaq tenamit li sa wi’chik xch’ool”

Naq nakawil ru 3 Nefi 27–4 Nefi, k’oxlaheb’ numsihom, k’oxlahom, raqal sa’eb’ li loq’laj hu, ut seraq’ li te’xtenq’aheb’ raj li kok’al chixtawb’al ruheb’ li na’leb’ sa’eb’ li ch’ol a’an.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Tenq’aheb’ li kok’al chixjultikankil li xe’xtzol sa’eb’ li xamaan xe’nume’ chirix li k’a’ru kixk’ut li Jesus chiru li tenamit sa’ li ch’och’ Naab’alil. Ch’olob’ naq lix Hu laj Mormon naxye qe chan ru ke’osob’tesiik li tenamit naq ke’ab’in chiru li kixk’ut li Jesus chiruheb’.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

3 Nefi 27:1–22

Laa’in komon re lix Iglees li Jesukristo.

Chan ru naq li raatin li Kolonel choq’ reheb’ lix tzolom naru naxtenq’aheb’ li kok’al chixtawb’al ru lix aajelil ru li wank jo’ komon sa’ lix Iglees li Jesukristo?

Kok’ k’anjel naru chi b’aanumank

• Kanab’eb’ li kok’al chixyeeb’aleb’ xk’ab’a’ sa’ junjunqal. K’a’ut naq aajel ru li qak’ab’a’? Ye reheb’ naq eb’ lix tzolom li Jesus ke’raj xnawb’al k’a’ru li k’ab’a’ej te’xk’e re lix Iglees li Kristo. Yaab’asi choq’ reheb’ lix sumehom li Kolonel sa’ 3 Nefi 27:7. K’a’ru li k’ab’a’ej kixye li Jesus naq tixk’am lix Iglees?

• Yiib’ junjunq kok’ eetalil li naru te’xk’e chiruheb’ lix t’ikr li kok’al ut te’xk’am sa’ kab’l, li tixye “Laa’in komon re lix Iglees li Jesukristo reheb’ laj Santil Paab’anel sa’ Roso’jikeb’ li Kutan.” Kanab’eb’ li kok’al chixb’onb’al li eetalil. B’icha rik’ineb’ li kok’al “Lix Iglees li Jesukristo” (B’ichleb’aal choq’ reheb’ li Kok’al, 48). Ye k’a’ut naq wan aab’antioxihom naq laa’at komon re li Iglees, ut patz’ reheb’ li kok’al k’a’ut naq wan xb’antioxihomeb’ chirix li Iglees.

• Tenq’aheb’ li kok’al chixyiib’ankil li jorb’a-k’a’uxlej wan sa’ li perel re kok’ k’anjel re li xamaan a’in. Ch’olob’ naq li Jesus naraj naq lix Iglees k’ojk’ooq sa’ xb’een lix evangelio, ut oksi li perel re kok’ k’anjel re aatinak rik’ineb’ li kok’al chirix li naraj naxye a’an.

4 Nefi 1:2–3, 15–17

Xyu’aminkil li evangelio naxk’e xsahil inch’ool.

Lix sahileb’ xch’ool li tenamit nach’olob’aman sa’ 4 Nefi naru naxtenq’aheb’ li kok’al chi tzolok chirix li sahil ch’oolej nachal xb’aan xyu’aminkil li evangelio.

Kok’ k’anjel naru chi b’aanumank

• Kanab’eb’ li kok’al chi aatinak chirix k’a’ru nak’ehok xsahileb’ xch’ool. Re aatinak rik’ineb’ li kok’al chirix lix sahileb’ xch’ool li tenamit sa’ 4 Nefi, il ruheb’ ch’ol aatin aajeleb’ ru sa’eb’ li raqal 2–3 ut 15–17. Naru ajwi’ nakawil ru li “Ch’ol 48: Tuqtuukilal sa’ li ch’och’ America” (Eb’ li Esilal sa’ lix Hu laj Mormon, 136–137, malaj li video sa’ ChurchofJesusChrist.org). Aatinan chirix naq eb’ li tenamit ke’wan xsahileb’ xch’ool xb’aan naq ke’jala xch’ool rik’in li Qaawa’, ke’xyu’amiheb’ li taqlahom ut ke’xra rib’ chirib’ileb’ rib’.

• K’uteb’ xjalam-uuch kristiaan saheb’ xch’ool. Ch’olob’ naq li tenamit sa’ 4 Nefi ke’wan chiru 200 chihab’ sa’ sahil ch’oolejil xb’aan naq chixjunileb’ ke’xyal xq’e chixyu’aminkil li evangelio. Tenq’aheb’ li kok’al chixk’oxlankileb’ junjunq li taqlahom li naru neke’xpaab’. Qayehaq, naru nakawil ru choq’ reheb’ 4 Nefi 1:15 re xk’utb’al chiruheb’ naq eb’ li kristiaan ink’a’ ke’pleetik chirib’ileb’ rib’. Kanab’eb’ li kok’al chixk’utb’esinkil ab’ink chiruheb’ li taqlahom li xe’xk’oxla. B’ichahomaq sa’ komonil jun li b’ich li na’aatinak chirix li sahil ch’oolejil nachal xb’aan xyu’aminkil li evangelio, jo’ “Naq yooko chi tenq’ank” (B’ichleb’aal choq’ reheb’ li Kok’al, 108).

• Yaab’asiheb’ ch’ol aatin re 4 Nefi 1:24–29, 34–35, ut 43 li neke’xch’olob’ k’a’ru kik’ulman naq junjunqeb’ laj Nefita ke’xkanab’ xpaab’ankileb’ li taqlahom. Naq taab’aanu a’an, kanab’eb’ li kok’al chixk’utb’al rahil ch’oolej sa’ xnaq’eb’ ru naq te’rab’i k’a’ruhaq ra xch’ool. Ch’olob’ xyaalal naq xpaab’ankileb’ li taqlahom nak’amok sa’ li sahil ch’oolej.

reetalil li k‘utuk

Xk’utb’al li tzol’leb’: Kok’al ak ninqeb’

3 Nefi 27:3–8

Laa’in komon re lix Iglees li Jesukristo.

K’oxla chan ru taatenq’aheb’ li kok’al nakatzoleb’ chixk’eeb’aleb’ reetal li xninqal ru osob’tesihom neke’chal xb’aan wank jo’ komon re lix Iglees li Jesukristo.

Kok’ k’anjel naru chi b’aanumank

• Tenq’aheb’ li kok’al chirilb’al ru 3 Nefi 27:3 re xsik’b’al li patz’om ke’xye li tzolom re li Jesus. Chirix a’an kanab’eb’ chixsik’b’al lix sumenkil sa’ 3 Nefi 27:5–8. A’ yaal li neke’xye li raqal a’an, k’a’ut naq aajel ru xk’ab’a’ li Iglees?

• Kanab’eb’ li kok’al chixk’oxlankil li jalan jalanq ch’uut li wankeb’ wi’, jo’ lix junkab’aleb’ malaj li Tzoleb’aal reheb’ li Kok’al. Kanab’eb’ chixyeeb’al aawe k’a’ru nawulak chiruheb’ xb’aan naq wankeb’ sa’ li ch’uut. Kanab’eb’ li kok’al chatenq’ankil chixtz’iib’ankil li junjunq chi aatin re lix k’ab’a’ li Iglees chiru junjunq setb’il hu. Chirix a’an junajiheb’ ru li setel hu, ut kanab’eb’ li kok’al chixtusub’ankileb’ ru li aatin. K’a’ruheb’ li osob’tesihom qak’ulum xb’aan naq laa’o komon re lix Iglees li Jesukristo reheb’ laj Santil Paab’anel sa’ Roso’jikeb’ li Kutan?

3 Nefi 27:13–22

Lix Iglees li Jesukristo k’ojob’anb’il sa’ xb’een lix evangelio.

Li Kolonel kixch’olob’ lix evangelio sa’ 3 Nefi 27. Chan ru naq li raatin a’an naru naxtenq’aheb’ li kok’al chixtawb’al ru k’a’ru li evangelio?

Kok’ k’anjel naru chi b’aanumank

• Ch’olob’ chiruheb’ li kok’al naq li aatin evangelio naraj naxye “chaab’il esilal” (chi’ilmanq li K’utul Raqal reheb’ li Loq’laj Hu, “Evangelio (li kaahib’ chi)”). Tenq’aheb’ li kok’al chixsik’b’al sa’ 3 Nefi 27:13–15 k’a’ruhaq li te’xk’oxla naq a’an chaab’il esil. K’a’ut naq jwal nokob’antioxin chirix xnawb’al ru lix evangelio li Jesukristo?

• Tz’iib’aheb’ na’leb’ re li evangelio chiru li pizarron jo’ paab’aal, jalb’a-k’a’uxlej, kub’iha’, li Santil Musiq’ej ut kuyuk toj sa’ roso’jik. Kanab’eb’ li kok’al chixsik’b’al sa’ 3 Nefi 27:19–21 eb’ li aatin a’an malaj li aatin chanchaneb’ a’an sa’ xch’olob’ahom li Jesus chirix lix evangelio.

• Kanab’eb’ li kok’al chixk’oxlankil naq wan jun ramiiweb’ li naxpatz’ reheb’ k’a’ru neke’xpaab’ jo’ komon re li Iglees. Tenq’aheb’ chixtawb’aleb’ li yaalalil sa’ 3 Nefi 27:13–21 li naru neke’xwotz re xk’osb’al ru li naqapaab’.

• Kanab’eb’ li kok’al chisik’b’al ru jun reheb’ li yaal re li evangelio kixk’ut li Kolonel sa’ 3 Nefi 27:13–21 chirix li k’a’ru neke’raj xtzolb’al. Tenq’aheb’ chiroksinkileb’ li esil wan toj rub’el li perel malaj li K’utul Raqal reheb’ li Loq’laj Hu re xtawb’al junaq raqal malaj wiib’ sa’eb’ li loq’laj hu li na’aatinak chirix li yaal a’an. Kanab’eb’ chixwotzb’al li raqal chirib’ileb’ rib’, rochb’een li xe’xtzol chirix a’an. K’a’ut naq jwal nokob’antioxin chirix xnawb’al ru lix evangelio li Jesukristo?

4 Nefi

Xyu’aminkil li evangelio naxk’e xsahil inch’ool.

Xb’aan naq ke’jala xch’ool chirix li Jesukristo ut lix evangelio, eb’ li tenamit wankeb’ resil sa’ 4 Nefi ke’ru chi wank sa’ tuqtuukilal ut junajil. K’a’ru naru neke’xtzol li kok’al chirixeb’ li seraq’ a’an?

Kok’ k’anjel naru chi b’aanumank

• Kawresiheb’ kok’ setb’il hu rik’ineb’ ch’ol aatin li wankeb’ sa’ 4 Nefi 1:2–3, 5, ut 15–17 li neke’xch’olob’ li osob’tesihom ke’xk’ul li tenamit (jo’ “maak’a’ li wech’ok-ib’ sa’ li ch’och’ ”). K’eheb’ li kok’ setb’il hu sa’ jun li sek’ ut kanab’eb’ li kok’al chixxokb’al jun ut te’ril ru. Waklesi xch’ooleb’ li kok’al chixtawb’al lix ch’ol aatin sa’eb’ li raqal re 4 Nefi. K’a’ru naqatzol sa’eb’ li ch’ol aatin a’an? K’a’ru xjuntaq’eetil naqil sa’eb’ li raqal a’an ut lix ch’olob’ankil Sion li natawman sa’ Moises 7:18?

• Re xtenq’ankileb’ li kok’al chixb’aanunkil li nak’utman sa’ 4 Nefi 1:15–16, seraq’i reheb’ resilal hoonal b’ar wi’ naq eb’ li kristiaan yookeb’ xjosq’il rik’ineb’ li ras riitz’in. Kanab’eb’ chixk’utb’esinkil chan raj ruhaq li hoonal a’an wi te’xyal raj wank chi “maak’a’ li wech’ok-ib’.” K’a’ut naq moko ch’a’aj ta xq’axb’al ru li wech’ok-ib’ naq wan qik’in lix “rahom li Dios” sa’ li qach’ool?

• Il ru rik’ineb’ li kok’al eb’ li raqal a’in ut kanab’eb’ chixsik’b’al xyaalal naq eb’ laj Nefita ut eb’ laj Lamanita ink’a’ chik ke’wan xtuqtuukilal chi moko xsahileb’ xch’ool: 4 Nefi 1:20, 24–29, 34–35, ut 43. Chan ru naru neke’q’axman ruheb’ li xiwxiw a’an? Re xtenq’ankileb’ li kok’al chixtawb’al chan ru naru naqaq’ax ru wulak chi q’etq’et, il wi’chik ru Enseñanzas de los Presidentes de la Iglesia: Ezra Taft Benson (2014), 260–261.

reetalil li tzolok

Xb’oqb’aleb’ chi tzolok sa’ kab’l

Waklesi xch’ooleb’ li kok’al chixsik’b’al ru jun k’a’aq re ru te’xb’aanu re naq mas taawanq wi’chik tuqtuukilal ut sahil ch’oolej sa’ li rochocheb’, ut chixwotzb’al rik’ineb’ lix junkab’al.

Xchaab’ilob’resinkil li qak’utum

Tenq’aheb’ lix na’ xyuwa’eb’ li kok’al. “Eb’ li na’b’ej yuwa’b’ej a’aneb’ laj k’utunel re li evangelio q’axal aajeleb’ ru choq’ reheb’ li ralal xk’ajol—a’aneb’ li teneb’anb’ileb’ jo’ ajwi’ li wankeb’ xnimaleb’ xwankil chixtenq’ankileb’ li ralal xk’ajol (chi’ilmanq Deuteronomio 6:6–7). Naq nakatzoleb’ li kok’al sa’ Iglees, sik’ rik’in tijok chan ru taatenq’aheb’ lix na xyuwa’ sa’ lix k’anjeleb’ li aajel ru” (Li k’utuk jo’ li Kolonel, 25).

perel re kok’ k’anjel: laa’in komon re lix Iglees li Jesukristo