li Jesus naq kixk’ut rib’ chiruheb’ laj Nefita

Lix saqenkil li rilob’aal kilemtz’un chiruheb’, xb’aan laj Gary L. Kapp

28 septiembre–11 octubre

3 Nefi 17–19

“K’ehomaq reetal, nujenaq xsahil inch’ool”

Naq yooqat chirilb’al ru 3 Nefi 17–19, k’oxla b’ar wan reheb’ li raqal sa’eb’ li loq’laj hu, numsihom, kok’ k’anjel, ut seraq’ li te’xtenq’aheb’ li kok’al chixtawb’al ruheb’ li yaal wankeb’ sa’eb’ li ch’ol a’in.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

K’ut jun xjalam-uuch li Kolonel, ut kanab’eb’ li kok’al chixwotzb’al k’a’ raj ru te’reek’a wi ta te’ula’aniiq xb’aan a’an jo’ naq kirula’aniheb’ laj Nefita.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

3 Nefi 17:7, 20–25

Li Kolonel naxraheb’ chi junjunqal li ralal xk’ajol li qaChoxahil Yuwa’.

Li Jesus kixk’ut lix rahom choq’ reheb’ li kok’al naq kirosob’tesiheb’ ut kitijok chirixeb’. Chan ru naru nakatenq’aheb’ li kok’al nakatzoleb’ chireek’ankil lix rahom a’an choq’ reheb’?

Kok’ k’anjel naru chi b’aanumank

• K’os ru li seraq’ natawman sa’ 3 Nefi 17 ut k’e jun jalam-uuch chi kutankil jo’ li natawman sa’ li tusleb’ aatin re li xamaan a’in wan sa’ Kim, Taaqehin—Choq’ reheb’ li komon ut li junkab’al. Naru nakawoksi li “Ch’ol 44: Li Jesukristo kirosob’tesiheb’ li kok’al,” (Eb’ li Esilal sa’ lix Hu laj Mormon, 38─42, malaj li video sa’ ChurchofJesusChrist.org). Il ru li ch’ol aatin malaj eb’ li raqal sa’ 3 Nefi 17 li neke’aatinak chirix lix rahom li Kolonel choq’ reheb’ li tenamit (jo’eb’ li raqal 7 ut 20–25). Kanab’eb’ li kok’al chixk’eeb’aleb’ xhoonal re xchapb’al li jalam-uuch ut re xyeeb’al k’a’ru kixb’aanu li Jesus xb’aan naq naxraheb’ li tenamit.

• Oksi li perel re kok’ k’anjel re li xamaan a’in re xtenq’ankileb’ li kok’al chixyiib’ankileb’ xjalam-uucheb’ rochb’een li Jesus. Naq yooqeb’ chixb’aanunkil a’an, tenq’aheb’ chixk’oxlankil chan ru naq li Jesus naxk’ut lix rahom choq’ reheb’ a’an.

  li Jesus narosob’tesiheb’ li kok’al aj Nefita

  K’ehomaq reetal lee kok’al, xb’aan laj Gary L. Kapp

3 Nefi 18:1–12

Naru nink’oxla li Jesukristo naq nintz’aqon sa’ li loq’laj wa’ak.

Mas naab’al li k’a’aq re ru naru na’isin re xk’a’uxleb’aal li ch’ina al sa’ li loq’laj wa’ak. Chan ru naru nakatenq’aheb’ li kok’al sa’ laa tzoleb’aal chixtawb’al ru lix aajelil ru xk’oxlankil li Kolonel ut lix rahom choq’ reheb’ a’an sa’ li santil k’ojob’anb’il k’anjel a’an?

Kok’ k’anjel naru chi b’aanumank

• Kanab’eb’ li kok’al chixyeeb’al aawe k’a’ru nak’ulman sa’ li loq’laj wa’a’k. Yaab’asiheb’ li raqal re li seraq’ naq li Jesus kixjek’i li loq’laj wa’ak reheb’ laj Nefita (chi’ilmanq 3 Nefi 18:1–12), ut kanab’eb’ li kok’al chi xaqliik naq te’rab’i k’a’ruhaq juntaq’eet rik’in li naqab’aanu laa’o sa’ li loq’laj wa’ak. K’a’ru naraj li Jesukristo naq “taajultiko’q qe” malaj taqak’oxla sa’ li loq’laj wa’ak? (chi’ilmanq 3 Nefi 18:7, 11).

• Tz’uyi, b’icha, malaj toch’ xsonil jun li b’ich choq’ reheb’ li kok’al naq eb’ li kok’al yooqeb’ chixb’onb’al li jalam-uuch li te’tenq’anq reheb’ chixk’oxlankil li Kolonel sa’ li loq’laj wa’ak (chi’ilmanq li perel re kok’ k’anjel re li xamaan a’in). Waklesi xch’ooleb’ chirilb’aleb’ li jalam-uuch a’an re xtenq’ankileb’ chixk’oxlankil li Jesus naq neke’tz’aqon sa’ li loq’laj wa’ak.

3 Nefi 18:15, 20–21, 24; 19:16–17, 30

Li Jesus naxk’ut chiwu chan ru li tijok.

K’a’ru nakatzol chirix li tijok naq nakatzol 3 Nefi 17–19? Chan ru naru nakawoksi li nakatzol re xk’utb’al chiruheb’ li kok’al chan ru li tijok?

Kok’ k’anjel naru chi b’aanumank

• K’uteb’ xjalam-uuch kristiaan yookeb’ chi tijok (jo’ li neke’tawman sa’ li “Ch’ol 46: Li Jesukristo naxtzoleb’ laj Nefita ut natijok rik’ineb’ ” sa’ Eb’ li Esilal sa’ lix Hu laj Mormon, 128–130). Kanab’eb’ li kok’al chixk’utb’aleb’ sa’ li jalam-uuch na’leb’ neke’xk’ut naq eb’ li kristiaan a’an yookeb’ chi tijok. Il ru 3 Nefi 19:16–17 re xch’olob’ankil naq li Jesus kixk’ut chiqu chan ru li tijok. Kanab’eb’ li kok’al chixyeeb’al aawe k’a’ru neke’reek’a naq neke’tijok.

• Il ru 3 Nefi 18:21, ut kanab’eb’ li kok’al chixyiib’ankil xjalam-uucheb’ malaj xjalam-uuch lix junkab’aleb’ naq yookeb’ chi tijok. Waklesi xch’ooleb’ li kok’al chixb’oqb’aleb’ lix junkab’al chi tijok rik’ineb’ a’an.

• B’ichahomaq sa’ komonil jun li b’ich na’aatinak chirix li tijok, jo’ “Natijok jun ch’ina al” (B’ichleb’aal choq’ reheb’ li Kok’al, 6─7). Kanab’eb’ li kok’al chixwotzb’al li neke’xtzol sa’ li b’ich chirix li tijok. Wotz lix nawom aach’ool chirix li tijok.

reetalil li k‘utuk

Xk’utb’al li tzol’leb’: Kok’al ak ninqeb’

3 Nefi 17

Li Kolonel naxraheb’ li ralal xk’ajol li qaChoxahil Yuwa’.

Li Awa’b’ej Ezra Taft Benson kixk’ut: “Ninyeechi’i eere, ex raarookil kok’al, naq eb’ li anjel te’iloq eere ajwi’. Maare ink’a’ teerileb’ ru, a’b’an wanqeb’ a’an re eetenq’ankil, ut teereek’a lix wanjikeb’ ” (“A los niños de la Iglesia,” Liahona, julio 1989, 99).

Kok’ k’anjel naru chi b’aanumank

• Ilomaq ru sa’ komonil junjunqeb’ li raqal sa’ 3 Nefi 17 li nakak’oxla naq te’wanq xyaalal choq’ reheb’ li kok’al nakatzoleb’. Naq yooqex chirilb’al ru li junjunq chi raqal, kanab’eb’ li kok’al chixsik’b’al ru jun aatin malaj ch’ol aatin li neke’xk’oxla naq aajel ru ut chirix a’an chixyeeb’al k’a’ut naq li aatin a’an wan xyaalal choq’ reheb’. Ch’olob’ xyaalal naq li Jesus naxraheb’ chi us li kok’al ut naq xb’aan a’an naq kirosob’tesiheb’ ut kitijok chirixeb’.

• Kanab’eb’ li kok’al chixwotzb’al k’a’ raj ru xe’reek’a wi ta wankeb’ chaq sa’ xyanqeb’ li kok’al li kirosob’tesiheb’ li Kolonel. Wi naru, k’ut li video “Mi gozo es completo” (ChurchofJesusChrist.org) re xtenq’ankileb’ chixk’oxlankil li kik’ulman. K’a’ru kixb’aanu li Kolonel re xk’utb’al lix rahom? K’a’ru naru naqab’aanu re xkawresinkil qib’ re wank rik’in a’an naq taak’ulunq wi’chik?

3 Nefi 18:1–12

Naq nink’ul li loq’laj wa’ak, naru nikinnujob’resiik rik’in li Santil Musiq’ej.

Sa’ 3 Nefi 18 naru naqatzol lix aajelil ru li loq’laj wa’ak choq’ re li Kolonel. Chan ru naru nakatenq’aheb’ li kok’al chireek’ankil naq aajel ru choq’ reheb’ a’an?

Kok’ k’anjel naru chi b’aanumank

• Tenq’aheb’ li kok’al chirilb’al ru 3 Nefi 18:1–12. K’a’ru neke’xtzol chirix li loq’laj wa’ak sa’eb’ li raqal a’an? Tenq’aheb’ chirilb’al ru li tij re li loq’laj wa’ak sa’ Tzol’leb’ ut Sumwank 20:77 ut 79 ut chixtawb’aleb’ aatin ut ch’ol aatin sa’eb’ li tij a’an li neke’tawman ajwi’ sa’ 3 Nefi 18:1–12. K’a’ru naraj neke’xye li aatin ut ch’ol aatin a’an? Chan ru naru naqakawresi qibʼ re xkʼulbʼal li loqʼlaj waʼak? Kʼaʼru naqayeechi’i xbʼaanunkil, malaj noko’ok wi’ sa’ sumwank xb’aanunkil, naq naqakʼul li loq’laj wa’ak?

• B’ichahomaq sa’ komonil jun li b’ich na’aatinak chirix li oxloq’ink, jo’ “Tuqtuuko, ch’anch’ooko” (B’ichleb’aal choq’ reheb’ li Kok’al, 11). Chan ru naq xk’ulb’al li loq’laj wa’ak rik’in oxloq’ naru nokoxtenq’a chireek’ankil li Musiq’ej? Chan ru naq nokoxtenq’a chixsik’b’al ru li k’a’ru us?

3 Nefi 18:15–24; 19:6–9, 15–36

Li tijok tinixtenq’a chi nach’ok rik’in li qaChoxahil Yuwa’.

Naru naqeek’a naq li qaChoxahil Yuwa’ nach’ qik’in naq nokotijok. B’ar wan reheb’ li esil sa’ 3 Nefi 18–19 chirix li tijok tixtenq’aheb’ li kok’al nakatzoleb’ chixchaab’ilob’resinkil lix tijeb’?

Kok’ k’anjel naru chi b’aanumank

• Tz’iib’aheb’ li raqal a’in reheb’ li loq’laj hu chiruheb’ kok’ setb’il hu ut k’e reheb’ li kok’al malaj kok’ ch’uut: 3 Nefi 18:15; 3 Nefi 18:20; 3 Nefi 18:21; 3 Nefi 19:19; ut 3 Nefi 19:24. Kanab’eb’ li kok’al chirilb’aleb’ ru li raqal reheb’ li loq’laj hu ut chixsik’b’al li k’a’ru kixk’ut li Jesukristo malaj eb’ lix tzolom chirix li tijok. Kanab’eb’ chixyeeb’al sa’ li tzoleb’aal k’a’ru xe’xtzol.

• Chiru li pizarron, tz’iib’a Ninb’antioxi aawe . K’e jun k’asal xhoonaleb’ li kok’al chixk’oxlankil chan ru naru neke’xtz’aqob’resi ru li ch’ol aatin a’an. K’a’ut naq us choq’ qe b’antioxink chiru li qaChoxahil Yuwa’? Chirix a’an tz’iib’a Nintz’aama chiru li pizarron, ut ilomaq ru sa’ komonil 3 Nefi 18:18–21 ut 19:9, 23 re xsik’b’aleb’ li na’leb’ chirixeb’ li tento te’qapatz’ sa’ li tijok.

• Wotz xnawom aach’ool malaj seraq’i jun aanumsihom chirix lix wankil li tijok, ut waklesi xch’ooleb’ li kok’al chixwotzb’al xnawomeb’ xch’ool malaj xnumsihomeb’.

reetalil li tzolok

Xb’oqb’aleb’ chi tzolok sa’ kab’l

Waklesi xch’ooleb’ li kok’al chi aatinak rik’ineb’ lix na’ xyuwa’ malaj xkomoneb’ chik li kristiaan sa’eb’ lix junkab’al chirix chan ru naru neke’qataw chaab’il na’leb’ chirix li loq’laj wa’ak sa’ li domingo chal re.

Xchaab’ilob’resinkil li qak’utum

Tenq’aheb’ li kok’al toj ka’ch’ineb’ xyu’am chi tzolok sa’eb’ li loq’laj hu. Re xtenq’ankileb’ li kok’al toj ka’ch’ineb’ xyu’am chixtzolb’aleb’ li loq’laj hu, k’e aach’ool ka’ajwi’ sa’ jun li raqal reheb’ li loq’laj hu malaj ka’ajwi’ sa’ jun li ch’ol aatin aajel ru. Naru nakakanab’eb’ li kok’al chi xaqliik naq te’rab’i jun aatin malaj ch’ol aatin taaye reheb’.

perel re kok’ k’anjel: naru nink’oxla li Kolonel