laj Mormon naq yoo chi tz’iib’ak chiruheb’ li perel ch’iich’ oor

Laj Mormon naxk’oseb’ ru li perel ch’iich’, xb’aan laj Tom Lovell

26 octubre–1 noviembre

Mormon 1–6

“Nawaj raj naq tinruuq chixq’unb’esinkil eech’ool chejunilex … re naq teejal eek’a’uxl”

Maare ch’a’ajaq chiruheb’ li kok’al xtawb’al ru chi tz’aqal li k’a’ru kik’ulman, li yeeb’il resil sa’ Mormon 1–6, a’b’an toj chi jo’kan naru neke’xtzol xna’leb’ sa’ lix seraq’ laj Mormon chirix wank chi tiik sa’ jun ruchich’och’ aj maak. Chan ru naru nakawoksi lix numsihom a’an re xk’utb’al chiruheb’ li kok’al chan ru wank chi tiik sa’ li evangelio?

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

K’a’ru neke’xnaw li kok’al chirix laj Mormon? Kanab’eb’ chixwotzb’al li neke’xnaw malaj li xe’xtzol rik’ineb’ lix junkab’al. K’e chi kutankil jun xjalam-uuch laj Mormon jo’ li natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Mormon 1:1–3

Naru ninwan chi tiik inch’ool jo’ laj Mormon.

Us ta eb’ li kok’al nakatzoleb’ toj kok’eb’, naru neke’xchaab’ilob’resi musiq’ejil seeb’al ut wank chi tiik.

Kok’ k’anjel naru chi b’aanumank

• Yaab’asi Mormon 1:1–3 choq’ reheb’ li kok’al, malaj oksi li “Ch’ol 49: Laj Mormon ut eb’ lix k’utum” (Eb’ li Esilal sa’ lix Hu laj Mormon, 138–142, malaj li video sa’ ChurchofJesusChrist.org). K’e xb’oqb’aleb’ chi ab’ink re naq te’xnaw jarub’ chihab’ wan chaq re laj Moroni naq laj Ammaron kixk’e jun xk’anjel. Chirix a’an kanab’eb’ chixk’utb’al rik’ineb’ li ru’uj ruq’ jarub’ lix chihab’. Re xtenq’ankileb’ li kok’al chixk’oxlankil lix saajil laj Mormon, k’ut chiruheb’ xjalam-uuch anihaq wan re lajeeb’ chihab’. Tenq’aheb’ chixtawb’al ru lix chaab’ilal laj Mormon kiril laj Ammaron naq toj ka’ch’in chaq xyu’am, ut ch’olob’ xyaalal naq eb’ li kok’al naru neke’wan jo’ laj Mormon naq yooqeb’ chixtaaqenkil li Jesukristo.

• B’aanuhomaq junaq li b’atz’unk b’ar wi’ naq eb’ li kok’al te’xka’suti li kok’ eek’asink-ib’ li taab’aanu laa’at. Chirix a’an k’uteb’ xjalam-uuch k’a’aq re ru kixb’aanu chaq li Jesus ut aatinan chirix chan ru naru naqataaqe (chi’ilmanq Libro de obras de arte del Evangelio, ajl 33–35, 41–42). Aatinanqex chirix chan ru naq laj Mormon kixtaaqe li Jesukristo—qayehaq, naq kixk’ut li evangelio, naq kixwaklesi xch’ooleb’ li kristiaan chi ab’ink chiru li Dios, ut naq kixraheb’ li ras riitz’in.

Mormon 3:3, 9

Lin Choxahil Yuwa’ naxk’e naab’al li wosob’tesinkil.

Lix k’utum laj Mormon naru naxtenq’aheb’ li kok’al chixk’eeb’aleb’ reetal li osob’tesihom xk’ehom li qaChoxahil Yuwa’ reheb’.

Kok’ k’anjel naru chi b’aanumank

• Yaab’asi Mormon 3:3 ut 9 choq’ reheb’ li kok’al, ut ch’olob’ naq eb’ laj Nefita ink’a’ ke’xk’e reetal naq ke’osob’tesiik xb’aan li qaChoxahil Yuwa’. Tenq’aheb’ li kok’al chixk’oxlankil li osob’tesihom xk’ehom li qaChoxahil Yuwa’ reheb’. K’uteb’ jalam-uuch malaj k’a’aq chik re ru re xk’eeb’aleb’ xna’leb’. K’a’ru naru naqab’aanu sa’ li kutan a’in re xk’utb’al naq naqab’antioxiheb’ li qosob’tesinkil naxk’e li qaChoxahil Yuwa’?

• Tenq’aheb’ li kok’al chixk’oxlankileb’ li osob’tesihom xk’ehom li qaChoxahil Yuwa’ reheb’, ut kanab’eb’ chixyiib’ankil xjalam-uucheb’ junjunqeb’ re li osob’tesihom a’an. Kanab’eb’ chixt’uyub’ankil lix jalam-uucheb’ sa’ junaq na’ajej sa’eb’ li rochoch b’ar wi’ naru te’ril ut te’xjultika naq neke’osob’tesiik chi naab’al paay ru xb’aan li qaChoxahil Yuwa’. Naru ajwi’ nakakanab’eb’ chixk’utb’aleb’ li osob’tesihom neke’chal rik’in li qaChoxahil Yuwa’ naq yooqex chixb’ichankil lix b’een raqal li b’ich “B’antiox, at Yuwa’ ” (B’ichleb’aal choq’ reheb’ li Kok’al, 9).

Mormon 3:12

Lin Choxahil Yuwa’ naraj naq chixjunil tinraheb’.

Chan ru naru nakatenq’aheb’ li kok’al nakatzoleb’ chixtawb’aleb’ rajom chireek’ankil lix rahom li Dios choq’ reheb’ li wankeb’ chixsutameb’?

Kok’ k’anjel naru chi b’aanumank

• Kanab’eb’ li junjunq chi kok’al chixyiib’ankil xjalam-uuch junaq li kristiaan chiru li pizarron ut chixyeeb’al chan ru naq eb’ li kristiaan xe’xyiib’ xjalam-uucheb’ jalan jalanqeb’ chiruheb’ lix komon. Yiib’ jun nimla aamej sa’ xsutameb’ chixjunileb’ li jalam-uuch. Tenq’aheb’ li kok’al chixtawb’al ru naq li qaChoxahil Yuwa’ naraj naq te’qara chixjunileb’ li kristiaan. Il ru Mormon 3:12 rik’in xjultikankil wi’chik li aatin “rahom” ut “kinraheb’.” K’a’ru kixb’aanu laj Mormon re xk’utb’al lix rahom choq’ reheb’ li ras riitz’in?

• B’ichahomaq sa’ komonil jun li b’ich chirix xraab’aleb’ li qas qiitz’in, jo’ “Chiqara li qas qiitz’in” (B’ichleb’aal choq’ reheb’ li Kok’al, 39), naq yooqat chixk’utb’al xjalam-uucheb’ kok’al re chixjunil li ruchich’och’. Ch’olob’ xyaalal lix rahom li Dios choq’ reheb’ chixjunileb’ li ralal xk’ajol. Tz’aqob’resi ru li perel re kok’ k’anjel re li xamaan a’in rik’ineb’ li kok’al.

reetalil li k‘utuk

Xk’utb’al li tzol’leb’: Kok’al ak ninqeb’

Mormon 1:1–3; 2:1, 23–24; 3:1–3, 12, 17–22

Naru ninwan chi tiik inch’ool jo’ laj Mormon.

Laj Mormon toj saaj chaq naq laj Ammaron kixk’e reetal naq a’an naru tixk’ulub’a lix teneb’ankil re rilb’aleb’ li loq’laj tz’iib’. K’a’ruheb’ li tiikil na’leb’ nakawil laa’at rik’ineb’ li kok’al nakatzoleb’?

Kok’ k’anjel naru chi b’aanumank

• Kanab’eb’ li junjunq chi kok’al chirilb’al ru jun reheb’ li raqal a’in, ut tenq’aheb’ chixwotzb’al li neke’xtzol chirix laj Mormon: Mormon 1:1–3; 2:1, 23–24; ut 3:1–3, 12, 20–22. Chirix a’an wotz li chaab’ilal re tiikilal nakawil sa’ xyu’ameb’ li junjunq chi kok’al.

• K’ut jun xjalam-uuch laj Mormon (chi’ilmanq li jalam-uuch natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Tenq’aheb’ li kok’al chirilb’al naq sa’ xk’ab’a’ naq laj Mormon kixk’ulub’a lix teneb’ankil ut kaw lix ch’ool re xk’amb’al ut xk’uulankil lix tz’iib’ahomeb’ laj Nefita, sa’eb’ li kutan a’in wan qik’in lix Hu laj Mormon. Aatinan rik’ineb’ li kok’al chirix k’a’ru naraj naxye xk’ulub’ankil li teneb’aak ut li kawil ch’oolej. K’e xb’oqb’aleb’ chixk’oxlankil sa’ xch’ooleb’ chan ru naru neke’xk’ulub’an lix teneb’ankileb’.

  laj Mormon naq toj saaj chaq

  Laj Mormon, naq wan chaq re lajeeb’ chihab’, xb’aan laj Scott M. Snow

Mormon 2:8–15; 5:10–11

Li rahil ch’oolej jo’ naraj li Dios nak’amok sa’ li yaalil jalaak.

Laj Mormon kiril naq eb’ laj Nefita aj maak ke’reek’a xrahileb’ xch’ool, a’b’an ink’a’ jo’ li nak’amok sa’ li jalb’a-k’a’uxlej (chi’ilmanq Mormon 2:13). Chan ru naru nakatenq’aheb’ li kok’al chixtawb’al ru lix jalanil li rahil ch’oolejil re li ruchich’och’ ut li rahil ch’oolejil jo’ naraj li Dios li nak’amok sa’ li jalb’a-k’a’uxlej?

Kok’ k’anjel naru chi b’aanumank

• Tz’iib’aheb’ li jolomil aatin a’in chiru li pizarron: Rahil ch’oolejil nak’amok sa’ li jalb’a-k’a’uxlej ut Rahil ch’oolejil li ink’a’ nak’amok sa’ li jalb’a-k’a’uxlej. Kanab’eb’ junjunq li kok’al chixk’eeb’aleb’ xhoonal re rilb’aleb’ ru li raqal sa’ Mormon 2:8, 10–15. Tenq’aheb’ chixtz’iib’ankil chiru li pizarron li k’a’ru neke’xtzol chirix li rahil ch’oolejil, rub’el li ch’ol aatin naxch’olob’ a’an. Chan ru naru taqanaw chi tz’aqal naq li rahil ch’oolejil naqeek’a xb’aaneb’ li qamaak tooxk’am chi jalaak?

• K’e xb’oqb’al jun li komon sa’ li obispil malaj xna’ xyuwa’ junaq reheb’ li kok’al chixwotzb’al sa’ li tzoleb’aal chan ru naq li rahil ch’oolejil jo’ naraj li Dios naru nokoxtenq’a chi jalaak re wulak jo’ li qaChoxahil Yuwa’ ut li Jesukristo. K’a’ut naq aajel ru xk’eeb’al reetal ma yooko chireek’ankil li rahil ch’oolejil jo’ naraj li Dios malaj li rahil ch’oolejil re li ruchich’och’? Kanab’eb’ li kok’al chixsik’b’al sa’ Mormon 2:12 k’a’ut naq li jalb’a-k’a’uxlej tento raj tixk’eheb’ li “qaam … chi saho’k” (Mormon 2:12).

Mormon 3:12

Naru naweek’a lix rahom li Dios choq’ reheb’ li was wiitz’in.

Wan naq moko ch’a’aj ta xraab’al li ani narahok qe ut chanchaneb’ ajwi’ laa’o, a’b’an laj Mormon kixk’ut naq rik’in xtenq’ li qaChoxahil Yuwa’, naru naqaraheb’ li ani jalan neke’xpaab’ ut jalan neke’xb’aanu chiqu laa’o.

Kok’ k’anjel naru chi b’aanumank

• Tenq’a jun li ch’ina al chirilb’al ru Mormon 3:12 ut kanab’eb’ li kok’al chixtz’iib’ankil jun li ch’ol aatin li tixk’os ru li xe’xtzol rik’in laj Mormon chirix xraab’aleb’ li qas qiitz’in. Kanab’eb’ li kok’al chixwotzb’al li k’a’ru xe’xtz’iib’a. Chan ru naru naqeek’a lix rahom li Dios choq’ reheb’ li qas qiitz’in? (chi’ilmanq Moroni 7:48). K’a’ru naru naqab’aanu re xk’utb’al qarahom choq’ reheb’ li kristiaan wankeb’ sa’ li qatzoleb’aal ut li qajunkab’al?

• Kanab’eb’ li kok’al chixtz’aqob’resinkil ru li perel re kok’ k’anjel re li xamaan a’in. Tenq’aheb’ chixk’oxlankil chan ru naru neke’xye’ li ruq’eb’ re rahok choq’ reheb’ li jalaneb’ chiqu laa’o.

reetalil li tzolok

Xb’oqb’aleb’ chi tzolok sa’ kab’l

Waklesi xch’ooleb’ li kok’al chixk’eeb’al li perel re kok’ k’anjel re li xamaan a’in sa’ junaq na’ajej sa’ li rochocheb’ re naq te’xjultika naq te’xk’ut lix rahom choq’ reheb’ li ras riitz’in. K’eheb’ xhoonal sa’ junaq chik li tzolok chalel re te’xwotz resil li xe’xb’aanu.

Xchaab’ilob’resinkil li qak’utum

Jaleb’ li kok’ k’anjel re naq ch’olch’ooq ru choq’ reheb’ lix chihab’eb’ li kok’al nakatzoleb’. Eb’ li kok’al toj ka’ch’ineb’ xyu’am neke’raj ru xch’olob’ankil chi us li na’leb’ ut neke’tzolok rik’ineb’ li k’utum moko ch’a’ajeb’ ta. Naq eb’ li kok’al yooqeb’ chi k’iik, te’ruuq chi tenq’ank chi us ut maare chi jo’kan moko ch’a’ajaq ta chik chiruheb’ xwotzb’al li neke’xk’oxla. K’eheb’ xhoonal li kok’al a’ yaal jarub’ chihab’ wan reheb’ re wotzok, ch’olob’ank xyaalal, ut tz’aqonk, ut tenq’aheb’ naq neke’raj xtenq’. (Chi’ilmanq Li k’utuk jo’ li Kolonel, 25─26.)

perel re kok’ k’anjel: naru ninraheb’ chixjunileb’