eb’ laj k’amonel jukub’ reheb’ laj Jaredita sa’ xb’een li palaw

Laa’in texintaqsi chaq wi’chik sa’ xchamal li palaw, xb’aan laj Jonathan Arthur Clarke

16–22 noviembre

Eter 6–11

“Re naq taaruuq taak’ehe’q xraqik li maa’usilal”

Li na’leb’ wankeb’ sa’ li tusleb’ aatin a’in moko a’aneb’ ta na’leb’ li tento taab’aanu. Li rajomeb’ a’an rajsinkil laa k’a’uxl ut xk’eeb’al xb’oqb’al li musiq’anb’il na’leb’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Oksiheb’ jalam-uuch wankeb’ sa’ li tusleb’ aatin re li xamaan a’in ut re li xamaan xnume’ sa’ Kim,Taaqehin—Choq’ reheb’ li komon ut li junkab’al re xtenq’ankileb’ li kok’al chixjultikankil li xe’xtzol chirixeb’ laj Jaredita naq ke’xq’ax ru li palaw. K’eheb’ xhoonal re xwotzb’al li k’a’ru neke’xnaw.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Eter 6:2–12

Li qaChoxahil Yuwa’ naru naxk’ojob’ inch’ool naq wan inxiw.

K’a’jo’ tana’ xxiwajel choq’ reheb’ laj Jaredita naq “ke’qujleek chiru xb’oolam li palaw chiru li iq’ ” (Eter 6:5). A’b’anan, li Qaawa’ kixkoleb’ rix ut kixtenq’aheb’. Chan ru naru nakatenq’aheb’ li kok’al chixsik’b’al li Qaawa’ naq wanqeb’ xxiw?

Kok’ k’anjel naru chi b’aanumank

• Oksiheb’ aatin ut ch’ol aatin re Eter 6:2–12 re xch’olob’ankil chiruheb’ li kok’al lix xikikeb’ laj Jaredita chiru li palaw. Kanab’eb’ li kok’al chixk’oxlankil naq neke’ok sa’eb’ li jukub’ ut naq lix jukub’eb’ neke’eek’asiik ut neke’muqe’ xb’aaneb’ xb’oolam li ha’. K’a’ raj ru taqeek’a naq wanqo sa’ junaq li jukub’ sa’eb’ li josq’il ha’? K’a’ru naru naqab’aanu naq naqeek’a qaxiw? Ilomaqeb’ ru sa’ komonil li raqal 7 ut 9 re rilb’al li ke’xb’aanu laj Jaredita naq ke’reek’a xxiw.

• Seraq’i chirix junaq hoonal b’ar wi’ laa’at xaweek’a aaxiw ut li qaChoxahil Yuwa’ xk’ojob’ aach’ool. Wotz rik’ineb’ li kok’al jun li b’ich malaj jun li son li nakatxtenq’a chi “b’antioxink ut xnimankil” li Qaawa’ Eter 6:9) xb’aan lix tenq’. Kanab’eb’ li kok’al chixyeeb’al aawe b’ar wankeb’ li b’ich re li Tzoleb’aal reheb’ li Kok’al jwal neke’wulak chiruheb’, ut b’ichahomaq junjunqeb’ sa’ komonil.

• Oksi li perel re kok’ k’anjel re li xamaan a’in re xtenq’ankileb’ li kok’al chixyiib’ankileb’ k’amonel jukub’ rik’in hu. Ch’olob’ naq eb’ li k’amonel jukub’ ke’xtenq’aheb’ laj Jaredita chixkolb’aleb’ rix naq ke’sute’ xb’aan li ha’ (chi’ilmanq Eter 6:7, 10). K’a’ru xk’ehom qe li qaChoxahil Yuwa’ re xkolb’al qix sa’ li qab’eenik re q’ajk rik’in a’an?

Eter 6:9, 12, 30; 7:27; 10:2

Naru nawan inb’antioxihom.

Chirix naq ke’wulak sa’ li yeechi’inb’il ch’och’, laj Jaredita ke’b’antioxin toj reetal naq “ke’el xya’aleb’ ru xb’aan xsahileb’ xch’ool” (Eter 6:12). Chan ru naru nakawaklesi xch’ooleb’ li kok’al nakatzoleb’ chixtawb’al jun musiq’ej re b’antioxink?

Kok’ k’anjel naru chi b’aanumank

• Yaab’asi choq’ reheb’ li kok’al ch’ol aatin re Eter 6:9 ut 12 re xk’utb’al chiruheb’ chan ru naq eb’ laj Jaredita ke’xk’ut xb’antioxihomeb’ chiru li Qaawa’ xb’aan naq ke’tenq’aak chi wulak sa’ li yeechi’inb’il ch’och’. Kanab’eb’ li kok’al chixyeeb’al li k’a’ru neke’b’antioxin wi’. B’ichahomaq sa’ komonil, jo’ ke’xb’aanu laj Jaredita, jun li b’ich re b’antioxink, jo’ “Bʼantiox, at Yuwaʼ ” (B’ichleb’aal choq’ reheb’ li Kok’al 9).

• Yaab’asi choq’ reheb’ li kok’al Eter 10:2 re xk’utb’al naq toj naab’al chihab’ chik chirix, eb’ laj Jaredita ke’xjultika chan ru naq ke’tenq’aak lix xe’toonileb’ xb’aan li Qaawa’ chixq’axb’al ru li palaw. Tenq’aheb’ li kok’al chixk’oxlankil chan ru naq osob’tesinb’ileb’ xb’aan li Qaawa’. Chirix a’an kanab’eb’ chixyiib’ankileb’ xjalam-uuch re naq taajutiko’q reheb’ li osob’tesink a’an (malaj tenq’aheb’ chixsik’b’al ru sa xyanqeb’ li jalam-uuch taak’am laa’at, maare re junaq li hu re li Iglees).

Eter 7:24–27

Osob’tesinb’ilin naq nintaaqe li profeet.

Jo’ naxk’ut lix hu laj Eter chi saqen ru, naq eb’ laj Jaredita ke’xtaaqe li profeet, ke’osob’tesiik, ut naq ke’xtz’eqtaanaheb’ li profeet, ke’ch’a’ajko’ ru lix yu’ameb’. K’oxla chan ru naru nakatenq’aheb’ li kok’al chirilb’al naq yaal ajwi’ a’an choq’ qe.

Kok’ k’anjel naru chi b’aanumank

• K’ut xjalam-uuch li yo’yookil profeet ut patz’ reheb’ li kok’al k’a’ru neke’xnaw chirix a’an. K’a’ru naxb’aanu jun profeet? Ch’olob’ naq eb’ laj Jaredita ke’wan ajwi’ chaq xprofeet, ut naq ke’xtaaqe, ke’osob’tesiik ut saheb’ chaq xch’ool (chi’ilmanq Eter 7:24–27). Chan ru naru taqataaqe li profeet?

• B’ichahomaq jun li b’ich sa’ komonil li na’aatinak chirixeb’ li profeet, jo’ “Jun li profeet” (B’ichleb’aal choq’ reheb’ li Kok’al, 58; chi’ilmanq ajwi’ Libro de obras de arte del Evangelio, ajl 4–27, 67–87). Aatinan rik’ineb’ li kok’al chirix li k’a’ru neke’xk’ut li profeet chiqu naq taqab’aanu (qayehaq, rilb’aleb’ ru li loq’laj hu rajlal kutan, xsantob’resinkil li hilob’aal kutan, malaj k’anjelak chiruheb’ li qas qiitz’in), ut kanab’eb’ chixk’utb’esinkil ab’ink chiruheb’ li na’leb’ a’an naq laa’at taayaab’asi “Jun li profeet!”

reetalil li k‘utuk

Xk’utb’al li tzol’leb’: Kok’al ak ninqeb’

Eter 6:2–12

Naru ninkanab’ sa’ inch’ool naq lin Choxahil Yuwa’ tinixb’eresi sa’ li junelik yu’am.

Li seraq’ chirix lix b’eenikeb’ laj Jaredita chiru li palaw naru najuntaq’eetaman rik’in li qab’eenik sa’ li yu’am sa’ ruchich’och’. Xiwxiweb’ ru sa’ kab’ichal ut na’ajman ru li paab’aal chirix naq li Qaawa’ tooxb’eresi ut tixkol qix.

Kok’ k’anjel naru chi b’aanumank

• Ilomaq ru sa’ komonil Eter 6:2–12, ut kanab’omaq rilb’al ru chi kok’ aj xsa’ re naq eb’ li kok’al te’xyiib’ xjalam-uuch li yookeb’ chirilb’al ru. Chan ru naq juntaq’eet lix b’eenikeb’ laj Jaredita rik’in li qayu’am? Tenq’aheb’ li kok’al chixk’utb’al ut chixk’eeb’al reetalil xcha’aleb’ lix jalam-uuch li neke’reetali li qayu’am. Qayehaq, eb’ laj Jaredita naru nokohe’reetali laa’o. Eb’ li k’amonel jukub’ naru neke’reetali li qochoch, li Iglees, malaj li evangelio. K’a’ru naru nareetali li iq’, li ha’, eb’ li lemtz’il pek, ut li yeechi’inb’il ch’och’?

• Tenq’aheb’ li kok’al chixtawb’aleb’ aatin ut ch’ol aatin sa’ Eter 6:2–12 li te’xk’utb’esi chan ru naq eb’ laj Jaredita ke’xkanab’ rib’ sa’ ruq’ li Dios. Wotzeb’ reetalil chan ru naq xkanab’ankil aawib’ sa’ ruq’ li Dios nakatxtenq’a chiruheb’ li hoonal ch’a’aj sa’ laa yu’am. Waklesiheb’ xch’ool li kok’al chixwotzb’aleb’ xnumsihom chanchan laa we laa’at.

  eb’ laj Jaredita ke’xk’ameb’ chaq lix ketomq

  Lix b’eenikeb’ laj Jaredita chiru li ch’och’ Asia, xb’aan li xMinerva Teichert

Eter 6:30; 7:27; 10:2

Lix jultikankil k’a’ru xb’aanuhom li Qaawa’ choq’ we naxk’e intuqtuukilal.

Li k’a’ru ke’jala wi’ eb’ li tiikil rey aj Jaredita chiruheb’ li rey aj maak a’an naq “kijultiko’ reheb’ xninqal li k’a’aq re ru kixb’aanu chaq li Qaawa’ ” choq’ reheb’ (Eter 7:27). Chan ru naru nakamusiq’aheb’ li kok’al chixjultikankil k’a’ru xb’aanuhom li Qaawa’ choq’ reheb’?

Kok’ k’anjel naru chi b’aanumank

• Kanab’eb’ li kok’al chirilb’al ru Eter 6:30; 7:27; ut 10:2 sa’ junjunqal malaj sa’ kok’ ch’uut re naq te’xtaw k’a’ruhaq juntaq’eeteb’ sa’eb’ li raqal a’an. Wotz laa week’ahom chirix li k’a’ru xb’aanuhom li Qaawa’ choq’ aawe ut kanab’eb’ li kok’al chixwotzb’al ajwi’ li reheb’.

• Wotz rik’ineb’ li kok’al chan ru naq nakayal aaq’e chixjultikankil chan ru naq li Qaawa’ nakatrosob’tesi laa’at ut laa junkab’al. Tenq’aheb’ li kok’al chixk’oxlankil chan ru naru najultiko’ reheb’ li k’a’ru xb’aanuhom li Qaawa’ choq’ reheb’. K’e reheb’ li junjunq chi kok’al jun setel li hu, ut kanab’eb’ chixk’oxlankil sa’ xch’ooleb’ ut chixtz’iib’ankil k’a’ruhaq xb’aanu li Qaawa’ choq’ reheb’ toje’. K’e xb’oqb’aleb’ re naq te’xk’aytesi rib’ chixtz’iib’ankil resil li rosob’tesihom li Qaawa’ te’xk’e reetal (chi’ilmanq “Oh recuerda, recuerda” [video, ChurchofJesusChrist.org]).

Eter 9:28–35; 11:5–8

Li Qaawa’ wan li ruxtaan naq ninjal ink’a’uxl.

Us ta naq eb’ laj Jaredita ke’xtz’eqtaana li profeet ut ke’ok jo’ aj maak, li Qaawa’ junelik kixkuyeb’ xmaak naq ke’xtuulanob’resi rib’ ut ke’xjal xk’a’uxl.

Kok’ k’anjel naru chi b’aanumank

• Ilomaq ru sa’ komonil Eter 9:28–35 ut tenq’aheb’ li kok’al chixk’oxlankil oxib’ malaj kaahib’ kok’ ch’ol aatin li te’xch’olob’ li kik’ulman sa’eb’ li raqal a’an. Chirix a’an ilomaq ru Eter 11:5–8 ut tenq’aheb’ li kok’al chixtawb’al xjuntaq’eetil li wiib’ chi seraq’ a’in. K’a’ru naqatzol sa’eb’ li seraq’ a’in?

• Kanab’eb’ li kok’al chixk’oxlankileb’ jalaneb’ chik chi kristiaan sa’ lix Hu laj Mormon li ke’xtuulanob’resi rib’ ut ke’kuye’ xmaak. Re xtenq’ankileb’ chi jultikank, oksiheb’ jalam uuch sa’ li Libro de obras de arte del Evangelio malaj sa’ Kim, Taaqehin—Choq’ reheb’ li komon ut li junkab’al. Wotz lix nawom aach’ool chirix naq li Qaawa’ naxkuy qamaak naq naqajal qak’a’uxl chi maak’a’ qab’alaq’.

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixwotzb’al rik’ineb’ lix junkab’al k’a’ruhaq xb’aanuhom li qaChoxahil Yuwa’ choq’ reheb’ a’an li neke’xb’antioxi.

Xchaab’ilob’resinkil li qak’utum

Kanab’eb’ li kok’al chiroksinkil xseeb’aleb’ xch’ool. “Naq nakatzoleb’ li kok’al, k’anab’eb’ chi yiib’ank, chi b’onok, chi tz’iib’ak, ut chi yo’ob’tesink. Eb’ li k’a’aq re ru a’in maawa’ ka’ajwi’ re sahob’resink ch’oolej—aajeleb’ b’an ru choq’ re li tzolok” (chi’ilmanq Li k’utuk jo’ li Kolonel, 25).

perel re kok’ k’anjel: li qaChoxahil Yuwa’ kixtenq’aheb’ laj Jaredita chixyiib’ankileb’ li k’amonel jukub’