“9–15 noviembre. Eter 1–5: “Teepej li tz’apleb’ t’ikr a’an re xmaak’a’il eepaab’aal,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“9–15 noviembre. Eter 1–5,” Kim, Taaqehin—Choq’ reheb’ li komon ut li junkab’al: 2020
Eb’ laj Jaredita neke’el chaq Babel, xb’aan laj Albin Veselka
9–15 noviembre
Eter 1–5
“Teepej li tz’apleb’ t’ikr a’an re xmaak’a’il eepaab’aal”
Li hu re laj Eter a’an jun resilaleb’ laj Jaredita, li ke’k’ulun sa’ li yeechi’inb’il ch’och’ k’iila cient chihab’ ma ke’wulak laj Nefita. Li Dios kixmusiq’a laj Moroni chiroksinkil lix tz’iib’ahom laj Eter sa’ lix Hu laj Mormon xb’aan naq wan rilom qik’in sa’ li qakutan. Chan ru nakaweek’a naq wan rilom rik’in laa yu’am laa’at?
Xtz’iib’ankil li nakak’oxla
Us ta yaal naq lix na’leb’ li Dios taqenaq wi’chik chiru li qe, ut junelik aajel ru naq taqakanab’ qib’ chiru li rajom a’an, a’an naxwaklesi ajwi’ qach’ool chi k’oxlak ut chi k’anjelak qajunes qib’. A’an jun na’leb’ kixtzol laj Jared ut li ras. Qayehaq, li na’leb’ re xik sa’ jun ak’ ch’och’ “li sik’b’il ru sa’ xb’een chixjunil li ch’och’ ” kitikla sa’ xch’ool laj Jared, ut li Qaawa’ “kixtoq’ob’a ru” ut kixye re naq tixk’e li k’a’ru kixpatz’, ut kixye, “Ut chi jo’kan tinb’aanu aawe xb’aan naq chiru li k’iila kutan a’in kat-elajin chiwu” (chi’ilmanq Eter 1:38–43). Ut naq li ras laj Jared kixk’e reetal naq q’axal q’ojyin sa’eb’ li k’amonel jukub’ li te’xik wi’ sa’ li yeechi’inb’il ch’och’, li Qaawa’ kixkanab’ chixk’oxlankil chan ru xtuqub’ankil ru li ch’a’ajkilal a’an, ut kiroksi jun patz’om li k’aynaqo laa’o chixpatz’b’al re a’an: “K’a’ru teeraj naq tinb’aanu?” (Eter 2:23). Li naqatzol arin, a’an naq ink’a’ taqak’oxla naq li Dios tooxtaqla sa’ chixjunil li k’a’aq re ru. Naru taqawotz rik’in a’an li qak’oxlahom ut li qana’leb’, ut a’an toorab’i ut tixye naq us a’an, malaj ut tixk’e jalan chik qana’leb’. Wan naq ka’ajwi’ ramrookeb’ chiqu li osob’tesink naqasik’ xb’aan “li tz’apleb’ t’ikr re xmaak’a’il qapaab’aal,” ut wi naru “taqapej li tz’apleb’ t’ikr a’an” (Eter 4:15), maare taasachq raj qach’ool rik’in li wan xch’ool li Qaawa’ chixb’aanunkil choq’ qe.
Li na’leb’ re xtzolb’aleb’ li loq’laj hu aajunes
Naq nintz’aamank chiru li Qaawa’, a’an tixtoq’ob’a wu.
Eter 1:33–43 naxye resileb’ oxib’ li tij kixk’e li ras laj Jared. K’a’ru nakatzol rik’in chan ru li Qaawa’ kixsume li junjunq chi tij a’an? K’oxlan chirix jun hoonal naq li Qaawa’ xtoq’ob’a aawu naq xattz’aaman chiru rik’in tijok. Maare taawaj xtz’iib’ankil resil li numsihom a’an ut xwotzb’al rik’in anihaq chik li maare naraj ru rab’inkil lix nawom aach’ool.
Naru tink’ul li k’utb’esinb’il na’leb’ choq’ re inyu’am.
Li Awa’b’ej Russell M. Nelson kixye: “Nin’elajink cheru naq teekawresi lee wankilal chixk’ulb’al li k’utb’esinb’il na’leb’. … Sik’omaq ru xb’aanunkil li k’anjel aajel ru choq’ re xk’ulb’al li Santil Musiq’ej ut rab’inkil li Musiq’ej chi kok’ aj xsa’ ut chi saqen ru” (“Li k’utb’esinb’il na’leb’ choq’ re li Iglees ut choq’ re qayu’am,” Jolomil ch’utub’aj-ib’ re abril 2018).
Naq nakatzol Eter 2; 3:1–6; ut 4:7–15, k’a’ruheb’ li yaalil na’leb’ nakataw li nakate’xtenq’a re taanaw chan ru xsik’b’al li k’utb’esinb’il na’leb’ choq’ aawe? Taaruuq taareetaliheb’ lix patz’om malaj lix k’a’uxl li ras laj Jared ut li k’a’ru kixb’aanu rik’in jun b’on, ut rik’in jalan chik b’on taaruuq taareetali chan ru li Qaawa’ kixtenq’a ut kixk’e chi nawmank li rajom a’an. K’a’ru naxtoch’ aach’ool chirix chan ru naq li ras laj Jared ki’aatinak rik’in li Qaawa’, ut k’a’ru nakatzol rik’in a’in chirix chan ru xk’ulb’al chi us wi’chik li k’utb’esinb’il na’leb’ sa’ laa yu’am?
Li Qaawa’ tinixkawresi re tinq’ax ru li “nimla chamal ha’ ” re inyu’am.
Re wulak sa’ li yeechi’inb’il ch’och’, kiwan jun nimla ch’a’ajkilal chiruheb’ laj Jaredita: a’an xq’axb’al ru li “nimla chamal ha’ ” (Eter 2:25). Wan naq chaab’il li ch’ol aatin “nimla chamal ha’ ” re xch’olob’ankil chan ru naqeek’a chirixeb’ lix yalb’al qix ut li qach’a’ajkilal. Ut wan naq, jo’ ke’xk’uleb’ laj Jaredita, ka’ajwi’ rik’in xq’axb’al ru li “nimla chamal ha’ ” re li qayu’am, naru taqatz’aqob’resi ru li rajom li Dios choq’ qe. Ma nakawil li k’a’ru juntaq’eet rik’in laa yu’am sa’ Eter 2:16–25? Chan ru xatxkawresi li Qaawa’ re xnumsinkileb’ laa ch’a’ajkilal? K’a’ru li maare yoo chixpatz’b’al aawe naq taab’aanu anajwan re xkawresinkil aawib’ choq’ re li naraj naq taab’aanu sa’ junaq kutan chalel?
Yo’ob’tesinb’ilin laa’in jo’ xjalam-uuch li Dios.
Sa’ xb’een li tzuul Xelem, k’iila na’leb’ kixtzol li ras laj Jared chirix li Dios ut chirix a’an xjunes rib’. K’a’ru nakatzol sa’ Eter 3 chirix chan ru li Dios sa’ musiq’ej ut sa’ tib’elej? Chan ru naq eb’ li yaalil na’leb’ a’in nakate’xtenq’a chixtawb’al ru li choxahilal ut li wankilal li wan aawik’in?
Chiqajunilo ralal xk’ajolo li Dios.
Li ras laj Jared, ma a’an li xb’een kristiaan ki’ilok re li Qaawa’?
Li Dios kixk’ut rib’ chiruheb’ jalan chik profeet rub’elaj naq kixk’ut rib’ chiru li ras laj Jared (jo’ eetalil, chi’ilmanq Moises 7:4, 59). Jo’kan ut, k’a’ut naq kixye li Qaawa’ re, “Maajun wa xink’ut wib’ chiru li winq”? (Eter 3:15). Li Elder Jeffrey R. Holland kixch’olob’ chi jo’ka’in: “Li Kristo kixye re li ras laj Jared, “Maajun wa xink’ut wib’ chiru li winq chi jo’ka’in, chi ink’a’ tikib’anb’il inb’aan, ka’ajwi’ uxb’il xb’aan lix paab’aal li ani na’ilok we” ” (Christ and the New Covenant [1997], 23).
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Eter 1:34–37
K’a’ru naqatzol rik’ineb’ li raqal a’in chirix li tijok choq’ reheb’ li qas qiitz’in? K’a’ chik li yaalil na’leb’ chirix li tijok neke’k’utman sa’eb’ li raqal a’in?
Eter 2:16–3:6
K’a’ru naxk’ut lix b’aanuhom li ras laj Jared chiqu chirix chan ru taqataw xsumenkileb’ li qach’a’ajkilal ut li qapatz’om? Maare eb’ li komon sa’ li junkab’al te’ruuq chixwotzb’al hoonal naq xe’xsik’ ut xe’xk’ul xsumenkileb’ lix patz’om rik’in li Qaawa’.
Eter 4:11–12
Chirix rilb’aleb’ ru li raqal a’in, eb’ li komon sa’ li junkab’al te’ruuq chixtz’iib’ankil junjunq li k’a’aq re ru re wulaj wulaj li wankeb’ xwankil sa’ xb’een laa junkab’al (jo’ li k’a’ru nekeril sa’ kaxlan mu, li son nekerab’i, li b’atz’unk nekeb’aanu, malaj jalaneb’ chik li kristiaan) chiru kok’ setb’il hu ut te’xk’eheb’ sa’ jun sek’. Toja’ naq te’ruuq chixk’eeb’aleb’ xhoonal chixxokb’al jun reheb’ li kok’ setb’il hu ut chi aatinak chirix ma “naxq’unb’esiheb’ xch’ool chixb’aanunkil li chaab’il” (Eter 4:12) li tz’iib’anb’il aran. K’a’ru eek’asinb’ilex chixjalb’al sa’ lee junkab’al?
Eter 5
Taaruuq taamuq k’a’ruhaq malaj li kok’ kab’ sa’ jun kaax ut taakanab’ jun komon sa’ li junkab’al chi ilok chi sa’, ut chixyeeb’al kok’ aatin reheb’ li jun siir chik re te’xq’ehi k’a’ru wan chi sa’. Naq nekeril ru Eter 5 sa’ komonil, aatinanqex chirix k’a’ut naq aajel ru naq li Qaawa’ naroksiheb’ laj yehol nawom sa’ lix k’anjel. Chan ru naru taqawotz lix nawom qach’ool chirix lix Hu laj Mormon rik’ineb’ li qas qiitz’in?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Yo’oon wanqat junelik. “Li hoonal re k’utuk moko k’uub’k’uukeb’ ta neke’nume’ sa’ junpaat, jo’kan naq aajel ru roksinkileb’ chi us naq neke’chal. … Qayehaq, naru naq jun ch’ajom rik’in k’a’ruhaq ch’a’aj tento xtuqub’ankil sa’ xyu’am yo’oon wan re xtzolb’al chan ru xk’ulb’al li na’leb’ chi k’utb’esinb’il” (Li k’utuk jo’ li Kolonel, 16).
Ma wan chik k’a’ru xawil? xb’aan laj Marcus Alan Vincent