“16–22 noviembre. Eter 6–11: “Re naq taaruuq taak’ehe’q xraqik li maa’usilal,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“16–22 noviembre. Eter 6–11,” Kim, Taaqehin—Choq’ reheb’ li komon ut li junkab’al: 2020
Laa’in texintaqsi chaq wi’chik sa’ xchamal li palaw, xb’aan laj Jonathan Arthur Clarke
16–22 noviembre
Eter 6–11
“Re naq taaruuq taak’ehe’q xraqik li maa’usilal”
Naq yoo chi aatinak chirix li tz’iib’anb’il esil reheb’ laj Jaredita, laj Mormon kixye naq “aajel ru naq chixjunil rehebʼ li tenamit teʼxnaw chirix li kʼaʼaq re ru tzʼiibʼanbʼil saʼ li esil aʼin” (Mosiah 28:19). Chijultiko’q aawe a’in naq nakawil ru Eter 6–11. K’a’ut naq aajeleb’ ru—malaj useb’—li k’a’aq re ru a’in choq’ aawe ut choq’ reheb’ li raarookeb’ aab’aan?
Xtz’iib’ankil li nakak’oxla
K’iila cient chihab’ chirix lix sachlijikeb’ laj Jaredita, eb’ laj Nefita ke’xtaw li po’lem kab’l re li najteril tenamit a’an. Sa’ xyanqeb’ li po’lem kab’l ke’xtaw jun tz’iib’anb’il esil—eb’ li perel ch’iich’ “tz’aqal oor okenaq” li “nujenaqeb’ rik’in tz’iib’ ” (Mosiah 8:9). Li rey sa’ xb’eeneb’ laj Nefita, laj Limhi, kixk’e reetal naq aajel ru li tz’iib’anb’il esil a’in: “Chʼolchʼo ru naq natawman jun xnimal ru muqmuukil naʼlebʼ saʼebʼ li perel chʼiichʼ aʼin,” chan (Mosiah 8:19). Sa’ li kutan a’in, wan aawik’in jun xk’osb’al ru li tz’iib’anb’il esil a’in, jaltesinb’il ru sa’ laa waatinob’aal, ut a’an lix hu laj Eter nayeeman re. A’an jun xk’osb’al ru li tz’iib’anb’il esil li “keʼraj chi numtajenaq” rilb’al ru eb’ laj Nefita, ut naq ke’ril ru, “keʼnujak rikʼin rahil chʼoolejil; aʼbʼanan kixkʼe naabʼal li naʼlebʼ rehebʼ, li keʼsahoʼ wiʼ xchʼool” (Mosiah 28:12, 18). Naq nakawil ru li resil lix k’iijikeb’ ut lix sachlijikeb’ laj Jaredita, taataw naab’aleb’ li esil wan wi’ rahil ch’oolejil. A’b’an, misach chawu li sahil ch’oolejil naru nachal rik’in xtzolb’al li aajel ruhil na’leb’ sa’ li esil a’an. Jo’ kixtz’iib’a laj Moroni, “aʼan xchaabʼilal xnaʼlebʼ li Dios naq li kʼaʼaq re ru aʼin taakʼuteʼq cheru” (Eter 8:23), xb’aan naq wi tooruuq chi tzole’k rik’in lix majelaleb’ jo’eb’ ajwi’ lix chaab’ilaleb’ laj Jaredita, “taaruuq taakʼeheʼq xraqik li maaʼusilal, ut … taaruuq taachalq xqʼehil naq laj Satanas maakʼaʼaq chik xwankil saʼ xbʼeen xchʼoolebʼ li ralal xkʼajolebʼ li winq” (Eter 8:26).
Li na’leb’ re xtzolb’aleb’ li loq’laj hu aajunes
Li Qaawa’ tinixb’eresi toj sa’ lin yeechi’inb’il ch’och’.
Taaruuq taak’ul laa musiq’ejil na’leb’ wi taajuntaq’eeta lix xikikeb’ laj Jaredita chiru li palaw rik’in laa numik chiru laa ruchich’och’il yu’am. Qayehaq, k’a’ru xk’e li Qaawa’ li naxkutanob’resi laa b’e jo’ chanchaneb’ li pek sa’eb’ lix k’amonel jukub’ laj Jaredita? K’a’ru neke’reetaliheb’ li k’amonel jukub’, malej li liq’ li “na’apunk sa’ xjayal li yeechi’inb’il ch’och’ ”? (Eter 6:8). K’a’ru nakatzol rik’in li ke’xb’aanu laj Jaredita rub’elaj, sa’, ut chirix xraqik lix xikikeb’? Chan ru yoo li Qaawa’ chab’eresinkil sa’ xjayal laa yeechi’inb’il ch’och’?
Lix b’eenikeb’ laj Jaredita chiru li ch’och’ Asia, xb’aan li xMinerva Teichert
Eter 6:5–18, 30; 9:28–35; 10:1–2
Li Qaawa’ nikinrosob’tesi naq tuulan inch’ool.
Us ta chanchan naq sa’ li resilaleb’ laj Jaredita nanumta li q’etq’etil ut li maa’usilal, wan ajwi’ reetalil li tuulanil ch’oolej sa’eb’ li ch’ol a’in—q’axal wi’chik sa’ Eter 6:5–18, 30; 9:28–35; ut 10:1–2. Wi nakak’oxlaheb’ li patz’om a’in, naru taataw aana’leb’ rik’ineb’ li raqal a’in: K’a’ut naq eb’ laj Jaredita ke’xtuulanob’resi rib’ sa’eb’ li hoonal a’in? K’a’ru ke’xb’aanu re xk’utb’al lix tuulanileb’ xch’ool? Chan ru ke’osob’tesiik xb’aan a’an? K’e reetal naq chi jo’q’ehaq, ke’mine’ ru li tenamit chi tuulano’k xch’ooleb’ xb’aan li ke’wan wi’. K’oxla li naru taab’aanu re “b’eek chi tuulan chiru li Qaawa’ ” rik’in x’anchalil aach’ool (Eter 6:17) ruuchil xtuulanob’resinkil aawib’ chi minb’il aawu (chi’ilmanq Mosiah 4:11–12; Alma 32:14–18).
Chi’ilmanq ajwi’ Tuulan xch’ool,” K’utul Raqal reheb’ li Loq’laj Hu.
Eb’ laj jolominel tiikeb’ xch’ool naru te’rosob’tesiheb’ li ani neke’xjolomi.
Eb’ li ch’ol 7–11 re lix hu laj Eter neke’xye resil numenaq 28 tasal tenamit. Us ta ink’a’ naru nayeeman resil chixjunil li kik’ulman sa’eb’ li kok’ ch’ol a’an, naru taqak’e reetal jun eetalil sa’ junpaat: rik’in li jolomink sa’ tiikilal nachal li osob’tesiik ut li usaak, ut rik’in li jolomink sa’ maa’usilal nachal li preexil ut li sache’k.
Tz’iib’anb’il rub’el a’in resil junjunqeb’ li rey li yeeb’ileb’ resil sa’eb’ li ch’ol a’in. Ileb’ ru li raqal wankeb’ rik’in li junjunq, ut k’e reetal li k’a’ru naru taatzol rik’in li ke’xb’aanu naq ke’jolomin—li us jo’ ajwi’ li ink’a’ us. Naq nakab’aanu a’an, k’oxlan chirix chan ru naq tatruuq laa’at chixk’amb’aleb’ xb’e malaj chixtenq’ankileb’ laa was aawiitz’in sa’ laa wochoch, sa’ laa tenamit, rik’in laa b’oqb’al sa’ li Iglees, ut xkomon chik.
-
Orihah—Eter 6:30–7:1
-
Xuul—Eter 7:23–27
-
Jared—Eter 8:1–7, 11–15
-
Emer ut Koriantum—Eter 9:21–23
-
Het—Eter 9:26–30
-
Xez—Eter 10:1–2
-
Riplakix—Eter 10:5–8
-
Morianton—Eter 10:10–11
-
Lib—Eter 10:19–28
-
Etem—Eter 11:11–13
K’a’ru jun li muqmuukil molam?
Naq wiib’ malaj naab’aleb’ chik li kristiaan neke’xk’uub’ xna’leb’ chixmuqb’al lix maa’usil b’aanuhom, okenaqeb’ sa’ jun muqmuukil molam. Kok’ aj xsa’ neke’xb’aanu a’in xb’aan rajomeb’ re xk’ulb’al wankilal malaj b’ihomal. Yeeb’ileb’ resil li muqmuukil molam sa’ Eter 8:7–18, ut xkomoneb’ chik naru te’tawmanq sa’ Helaman 1:9–12; 2:2–11; 6:16–30, ut Moises 5:29–33. Sa’ Eter 8:18–26, laj Moroni naxch’olob’ li k’a’ru nachal xmaakeb’ li muqmuukil molam (chi’ilmanq ajwi’ Eter 9:4–12) ut nokoxq’us naq ink’a’ taqaxaqab’eb’ xwankil.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Eter 6:2–12
Ma taawulaq raj chiru laa junkab’al xb’aanunkil jun k’utb’esink chirix lix xikikeb’ laj Jaredita sa’ xjayal li yeechi’inb’il ch’och’? Maare texruuq chiroksinkil jun na’ajej sa’ lee rochoch maak’a’ wi’ li saqen jo’ reetalil li k’amonel jukub’ ut eb’ li pook jo’ reetalileb’ li lemtz’unb’il pek. Texruuq chi aatinak chirix chan ru ke’xk’ut laj Jaredita lix paab’aaleb’ chirix li Qaawa’ naq ke’ok sa’eb’ li k’amonel jukub’, us ta ke’xnaw naq “te’sub’e’q sa’ xchamal li palaw” (Eter 6:6). Chirix rilb’al ru li raqal 9, eb’ li komon sa’ li junkab’al te’ruuq chixwotzb’aleb’ li b’ich re nimank-u mas neke’wulak chiruheb’ ut te’ruuq chixb’ichankileb’ sa’ komonil. Chan ru naru najuntaq’eetaman li qochoch rik’ineb’ li k’amonel jukub’ reheb’ laj Jaredita? K’a’ru li yeechi’inb’il ch’och’ yoo li Qaawa’ chiqab’eresinkil wi’?
Eter 6:22–23
Chiru li xamaan a’in, laa junkab’al te’ruuq chirilb’al chan ru kitz’aqob’resiik ru lix profeetil tijom li ras laj Jared chirix li preexil. K’a’ru li xoohe’xtij wi’ laj jolominel sa’ li Iglees? Chan ru naru tookehe’q sa’ preexil wi taqatz’eqtaanaheb’ li raatin?
Eter 8:23–26
Jo’ naxye sa’eb’ li raqal a’in, k’a’ut naq laj Moroni kitaqlaak chixtz’iib’ankileb’ “li k’a’aq re ru a’in” chirixeb’ li muqmuukil molam? (Eter 8:23). K’a’ru xqatzol sa’ lix hu laj Eter li naru tooxtenq’a chixk’ulb’aleb’ li osob’tesink yeeb’ileb’ resil sa’ li raqal 26?
Eter 9:11
Chan ru naq li rajom qach’ool wan rilom rik’in li naqasik’ ru xb’aanunkil? K’a’ru naru taqab’aanu jo’ junkab’al re naq wanq rajom qach’ool chixk’ulb’al li k’a’aq re ru re li Dios?
Eter 11:8
Re xtzolb’al xkomon chik chirix li ruxtaan li Qaawa’ choq’ reheb’ li neke’xjal xk’a’uxl, taaruuq taawil ru Mosiah 26:29–30; 29:18–20; Alma 34:14–16; malaj Moroni 6:8. Maare eb’ li komon sa’ li junkab’al te’ruuq chixwotzb’al reetalil li ruxtaan li Dios sa’eb’ li loq’laj hu malaj sa’ xyu’ameb’ a’an.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
K’anjela li k’a’ru nakatzol. Re xtzolb’al li evangelio, ink’a’ ka’ajwi’ na’ajman ru ilok ru hu ut k’oxlak. K’iila sut nokotzolok chi us naq naqayu’ami li yaalil na’leb’ sa’eb’ li loq’laj hu (chi’ilmanq Jwan 7:17). K’a’ru taab’aanu re xyu’aminkil li nakawil ru sa’ Eter 6–11?
Eb’ laj k’amonel jukub’ reheb’ laj Jaredita, xb’aan laj Gary Ernest Smith