“26 octubre–1 noviembre. Mormon 1–6: “Nawaj raj naq tinruuq chixq’unb’esinkil eech’ool chejunilex … re naq teejal eek’a’uxl,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“26 octubre–1 noviembre. Mormon 1–6,” Kim, Taaqehin—Choq’ reheb’ li komon ut li junkab’al: 2020
Laj Mormon naxk’oseb’ ru li perel ch’iich’, xb’aan laj Tom Lovell
26 octubre–1 noviembre
Mormon 1–6
“Nawaj raj naq tinruuq chixq’unb’esinkil eech’ool chejunilex … re naq teejal eek’a’uxl”
Naq nakawil ru Mormon 1–6, k’oxla li k’a’ru nakatzol rik’in lix b’aanuhom laj Mormon. Tz’iib’a li nakatmusiq’aak chixb’aanunkil.
Xtz’iib’ankil li nakak’oxla
Laj Mormon ink’a’ kiraj xk’eeb’al “chi tz’aqal li esilal” chirix li maa’usilal ut li hoyok kik’ li kiril sa’ xyanqeb’ laj Nefita (Mormon 2:18; chi’ilmanq ajwi’ Mormon 5:8). A’b’anan, tz’aqal li k’a’ru kixtz’iib’a sa’ Mormon 1–6 re xjultikankil qe lix nimal li t’ane’k naru te’t’ane’q wi’ jun tenamit tiik xch’ool. Sa’ xyi li nimla maa’usilal a’an, maajun kiru raj chixyeeb’al naq wan xmaak laj Mormon rik’in naq tawajenaq ut kub’enaq xch’ool. A’b’anan, maak’a’ naxye li k’a’ru kiril ut kixnumsi, maajun wa kisach sa’ xch’ool lix nimal li ruxtaan li Dios, ut lix paab’aal naq rik’in li jalb’a-k’a’uxlej naru xk’ulb’al li uxtaan a’an. Ut us ta lix tenamit ke’xtz’eqtaana lix tz’aam ut lix b’oqom laj Mormon naq te’xjal xch’ool, a’an kixnaw naq toj wankeb’ naab’aleb’ chik li tento tixq’unb’esiheb’ xch’ool. “Relik chi yaal,” chan, “nintzʼiibʼak re chixjunilebʼ lix maril li ruchichʼochʼ.” Sa’ jalan chik aatin, a’an kitz’iib’ak choq’ aawe laa’at (chi’ilmanq Mormon 3:17–20). Ut li raatin choq’ aawe, sa’ li kutan a’in, juntaq’eet rik’in li aatin kiru raj chixkolb’aleb’ laj Nefita sa’ lix kutankileb’ a’an: “Teepaab’ lix evangelio li Jesukristo. … Teejal eek’a’uxl ut teekawresi eerib’ chi xaqliik chiru lix raqleb’aal aatin li Kristo” (Mormon 3:21–22).
Li na’leb’ re xtzolb’aleb’ li loq’laj hu aajunes
Naru naq tinwanq chi tiik inch’ool us ta li maa’usilal wan chinsutam.
Sa’ xtiklajik li xb’een ch’ol re li hu Mormon, taak’e reetal lix nimla jalanil laj Mormon rik’ineb’ li tenamit wankeb’ chixsutam. Naq nakawil ru Mormon 1, k’oxla xtz’ilb’al rix lix jalanileb’ lix na’leb’ ut li rajom xch’ool laj Mormon rik’ineb’ xna’leb’eb’ ut rajom xch’ooleb’ lix tenamit. K’oxla li k’a’ru kixk’ul a’an ut li ke’xk’ul lix tenamit xb’aan a’an (taataw jun na’leb’ chirix a’an sa’eb’ li raqal 14–15). K’a’ru nakatzol li nakatxmusiq’a chi wank chi tiik aach’ool sa’ jun ruchich’och’ re maa’usilal?
Naq nakawil ru Mormon 2–6, sik’ chan ru naq laj Moroni kixk’ut lix paab’aal chirix li qaChoxahil Yuwa’ ut li Jesukristo us ta wan li maa’usilal chixsutam.
Li pleet, xb’aan laj Jorge Cocco
Li rahil ch’oolej jo’ naraj li Dios nak’amok sa’ li jalaak li tz’aqal ut li nakana.
Naq laj Mormon kirileb’ lix tenamit chi raho’k sa’ xch’ooleb’, kiroyb’eni naq te’xjal xk’a’uxleb’. A’b’anan “li raho’k ch’oolej xb’aaneb’ maawa’ re xjalb’aleb’ xk’a’uxl” (Mormon 2:13)—maawa’ li rahil ch’oolej jo’ naraj li Dios li nak’amok sa’ li yaalil jalaak (chi’ilmanq 2 Korintios 7:8–11). Ruuchil a’an, eb’ laj Nefita ke’reek’a li rahil ch’oolejil re li ruchich’och’ (chi’ilmanq Mormon 2:10–11). Re xtawb’al ru xjalanil li rahil ch’oolejil jo’ naraj li Dios rik’in li rahil ch’oolejil re li ruchich’och’, k’oxla xyiib’ankil jun tusulal b’ar wi’ naru taatz’iib’a li nakatzol sa’ Mormon 2:10–15 chirixeb’ li wiib’ paay chi rahil ch’oolejil a’in. Li tusulal maare taak’utunq jo’ a’in:
|
Li rahil ch’oolejil jo’ naraj li Dios |
Li rahil ch’oolejil re li ruchich’och’ |
|---|---|
Li rahil ch’oolejil jo’ naraj li Dios Chalk rik’in li Jesus (raqal 14) | Li rahil ch’oolejil re li ruchich’och’ Xmajewankil li Dios (raqal 14) |
Li rahil ch’oolejil jo’ naraj li Dios | Li rahil ch’oolejil re li ruchich’och’ |
Li rahil ch’oolejil jo’ naraj li Dios | Li rahil ch’oolejil re li ruchich’och’ |
Naq nakatk’oxlak chirix li nakatzol, k’oxla chan ru naq a’an naru tixjal lix yalb’al aaq’e chi numtaak sa’ xb’een li maak ut chi wank jo’ li qaChoxahil Yuwa’ ut li Kolonel.
Chi’ilmanq ajwi’ Dieter F. Uchtdorf, “Pueden hacerlo ahora!” Liahona, noviembre 2013, 55–57.
Junelik tento tink’e reetal li ruq’ li Dios sa’ inyu’am.
Laj Mormon kitz’iib’ak chirix jun xmajelaleb’ laj Nefita li kiril: ink’a’ ke’xk’e reetal chan ru naq osob’tesinb’ileb’ xb’aan li Qaawa’. Li Awa’b’ej Henry B. Eyring kixtz’aama qe “naq taqataw chan ru xk’eeb’al reetal ut xjultikankil lix chaab’ilal xch’ool li Dios. … Tijonqex ut k’oxlanqex, ut chepatz’ a’in: Ma xtaqla li Dios jun esil li wan choq’ we laa’in? Ma xwil li ruq’ a’an sa’ inyu’am malaj sa’ xyu’ameb’ lin kok’al? … Ninch’olob’ xyaalal naq a’an nokoxra ut nokorosob’tesi, q’axal wi’chik chiru li naqak’e reetal” (“¡Oh recordad, recordad!,” Liahona, noviembre 2007, 67, 69).
Naq nakawil ru Mormon 3:3, 9, taaruuq tatk’oxlaq chirix chan ru yookat chixk’eeb’al reetal lix wankil li Dios sa’ laa yu’am. K’a’ruheb’ li osob’tesink neke’chal naq nakak’e reetal lix wankil? K’a’ru taqak’ul wi ink’a’ taqak’e reetal a’an? (chi’ilmanq Mormon 2:26).
Xaxqo li Jesukristo chi teeto xtel re ink’ulb’al.
Eb’ laj Nefita ke’xtz’eqtaana li raatin laj Mormon, a’b’an a’an kiroyb’eni naq lix tz’iib’ahom tatxtenq’a laa’at. Naq nakawil ru Mormon 5:8–24 ut 6:16–22, k’a’ru nakatzol chirix li na’ux xb’aan li maak? K’a’ru nakatzol sa’eb’ li raqal a’in chirix li neke’reek’a li qaChoxahil Yuwa’ ut li Jesukristo chawix, us ta naq nakatmaakob’? Chan ru aaweek’ahom li Jesukristo chi nach’ok aawik’in chi teetookeb’ xtel? K’a’ru eek’asinb’ilat chixb’aanunkil xb’aan a’in?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Mormon 1:2
K’a’ru naraj naxye li “seeb’al chi k’ehok eetal”? Naru taataw aana’leb’ sa’ lix tz’iib’ahom li Elder David A. Bednar “Prestos para Observar” (Liahona, diciembre 2006, 15–20). Chan ru ki’osob’tesiik laj Mormon rik’in li maatan naq seeb’ chi k’ehok eetal? Chan ru naru toorosob’tesi laa’o?
Mormon 1:1–6, 15; 2:1–2
Ma neke’xtaw ru li kok’al sa’ laa junkab’al naq naru te’xk’ul xnimal li musiq’ejil chaab’ilal ut wankilal, us ta toj ka’ch’ineb’ xyu’am? Lix b’aanuhom laj Mormon naru chixtenq’ankileb’. K’oxla xyiib’ankil jun tusulal li naxk’ut li k’a’ru kixk’ul laj Mormon naq toj ka’ch’in ut sa’ lix ch’ajomil sa’ Mormon 1:1–6, 15 ut 2:1–2. Naq nakat-aatinak chirix lix chaab’ilal ut lix numsihom laj Mormon, ye resileb’ lix chaab’ilaleb’ laa kok’al li neke’xwaklesi aach’ool laa’at ut xch’ooleb’ xkomoneb’ chik li wankeb’ chixsutameb’.
Mormon 2:18–19
K’a’ruheb’ li aatin kiroksi laj Mormon re xyeeb’al resil li ruchich’och’ kiwan wi’? Chan ru kixk’uula xyo’onihom us ta wan xnimal li maa’usilal chixsutam? Chan ru naru taqab’aanu a’an jo’ junkab’al?
Mormon 3:12
K’a’ru kireek’a laj Mormon chirixeb’ li kristiaan wankeb’ chixsutam, us ta aj maakeb’? K’a’ru naru taqab’aanu re taawanq li qarahom jo’ chanchan lix rahom a’an?
Mormon 5:2
K’a’ut naq wan naq naqab’ay qib’ chi tijok chiru li qaChoxahil Yuwa’ naq wan li qach’a’ajkilal? K’a’ru naru naqab’aanu re xkanab’ankil qib’ chiru li qaChoxahil Yuwa’?
Mormon 5:16–18
Re xtenq’ankil laa junkab’al chixk’eeb’al reetal k’a’ru naraj naxye li ch’ol aatin “k’amb’ileb’ jo’ xmulel q’olom chiru li iq’ ” (raqal 16), pej jun perel li hu sa’ kok’ jachal ut kanab’eb’ li komon sa’ li junkab’al chirapusinkileb’. Ch’olob’ chiruheb’ naq lix mulel li q’olom a’an li rix jun li iyaj, ut naq jwal seeb’ jo’kan naq li iq’ naru tixk’am yalaq ta b’ar. Chan ru naq li “wank chi maak’a’ li Kristo ut li Dios sa’ li ruchich’och’ ” (raqal 16) a’an chanchan wank jo’ xmulel q’olom chiru li iq’?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
K’ut li tzol’leb’ chi ch’olch’o ru ut chi saqen ru. Li evangelio ch’ina us xb’aan naq saqen ru (chi’ilmanq Tzol’leb’ ut Sumwank 133:57). Sa’ xna’aj rajsinkil ru laa junkab’al rik’in li k’utum q’axal utz’u’ujinb’il, sik’ ru naq li k’a’ru taak’ut jayalinb’il sa’ li saq ruhil tzol’leb’ moko ch’a’aj ta.
Lix sachb’a-ch’oolejil hu laj Mormon, xb’aan laj Joseph Brickey