“23–29 noviembre. Eter 12–15: “Rik’in li paab’aal natz’aqob’resiik ru chixjunil li k’a’aq re ru,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“23–29 noviembre. Eter 12–15,” Kim, Taaqehin—Choq’ reheb’ li komon ut li junkab’al: 2020
Laj Eter naxmuq rib’ sa’ xtehelal jun pek, xb’aan laj Gary Ernest Smith
23–29 noviembre
Eter 12–15
“Rik’in li paab’aal natz’aqob’resiik ru chixjunil li k’a’aq re ru”
Xtz’iib’ankil li nakak’oxla naru tixb’oq xkomon chik li k’utb’esinb’il na’leb’ ut naru tixkawob’resi lix nawom aach’ool. Nakatxtenq’a ajwi’ chixjultikankil li na’leb’ nakak’ul, re xwotzb’al rik’ineb’ laa was aawiitz’in sa’ junaq kutan chalel.
Xtz’iib’ankil li nakak’oxla
“Xninqaleb’ ru ut sachb’a-ch’oolejil” lix profeetil aatin laj Eter chiruheb’ laj Jaredita (Eter 12:5). A’an “kixye chixjunil li k’a’aq re ru, chalen chaq xtiklajik li winq” (Eter 13:2). A’an kiril chi rub’elaj “lix kutankil li Kristo” ut li Ak’ Jerusalen re roso’jikeb’ li kutan (Eter 13:4). Ut a’an ki’aatinak chirix “xyo’oninkil jun ruchich’och’ li chaab’il wi’chik; relik chi yaal, jun na’ajej sa’ xnim uq’ li Dios” (Eter 12:4). A’b’anan, eb’ laj Jaredita ke’xtz’eqtaana li raatin, ut li rajb’al ke’xtz’eqtaana wi’ juntaq’eet rik’in li rajb’al neke’tz’eqtaanaman wi’ lix profeetil aatineb’ lix moos li Dios sa’ li kutan a’in—“xb’aan naq moko ke’ril ta” (Eter 12:5). Na’ajman ru li paab’aal re xpaab’ankileb’ li yeechi’ihom malaj li tijom chirix li ink’a’ naru naqil, jo’ chanchan naq ki’ajman ru li paab’aal choq’ re laj Eter re taa’aatinaq rik’in profeetil aatin chirix “xninqal ru ut sachb’a-ch’oolejil na’leb’ ” chiru jun tenamit maak’a’eb’ xpaab’aal. Ki’ajman ru li paab’aal choq’ re laj Moroni re xpaab’ankil naq li Qaawa’ taaruuq tixjal “xq’unal xmetz’ew chi tz’iib’ak” choq’ kawilal (chi’ilmanq Eter 12:23–27). A’an a’in li paab’aal li nokoxk’e chi wank “chi chapcho, xaqxooqo junelik, numtajenaq junelik li chaab’il k’anjel qik’in, k’amb’ilo chixnimankil xloq’al li Dios” (Eter 12:4). Ut a’an a’in li paab’aal “natz’aqob’resiik wi’ ru chixjunil li k’a’aq re ru” (Eter 12:3).
Li na’leb’ re xtzolb’aleb’ li loq’laj hu aajunes
Li paab’aal chirix li Jesukristo naru taak’amoq sa’ li xninqal ru sachb’a-ch’oolej.
Naab’aleb’ li kristiaan sa’ li kutan a’in, jo’eb’ laj Jaredita sa’ xkutankil laj Eter, neke’raj rilb’al li eetalil rub’elaj naq te’xpaab’ li Dios ut lix wankil. A’b’anan, laj Moroni kixk’ut naq “li paab’aal a’an li k’a’aq re ru yo’oninb’il ut moko ilb’il ta” ut naq “maajun eerilom nekek’ul toj chirix naq yalb’il rix eepaab’aal” (Eter 12:6).
K’e reetal rajlal sut nakataw li aatin “paab’aal” sa’ Eter 12, ut tz’iib’a li nakatzol chirix li paab’aal. Sik’eb’ lix sumenkileb’ li patz’om jo’eb’ a’in: K’a’ru li paab’aal? K’a’ru li naruuchini jun yu’amej wan wi’ xnaab’alil li paab’aal? Taaruuq ajwi’ taatz’iib’a li nakak’oxla chirix xnawom aach’ool xak’ul “chirix naq yalb’il rix aapaab’aal” (Eter 12:6).
Chi’ilmanq ajwi’ Hebreos 11; Alma 32.
Li Jesus naxk’e qe “jun qayo’onihom q’axal chaab’il wi’chik.”
Rochb’een li xninqal ru na’leb’ chirix li paab’aal, sa’ Eter 12 wan ajwi’ naab’al li aatin chirix li yo’onink—maare tatruuq chixk’eeb’al reetal rajlal sut natawman li aatin “yo’onihom.” K’a’ru naraj naxye yo’onihom choq’ aawe? K’a’ut naq aajel ru choq’ re laj Eter naq “tixyo’oni jun ruchich’och’ li chaab’il wi’chik”? (chi’ilmanq Eter 12:2–5). Chan ru naq lix evangelio li Jesukristo naxk’e aawe “jun aayo’onihom q’axal chaab’il wi’chik”? (Eter 12:32).
Chi’ilmanq ajwi’ Moroni 7:40–41; Dieter F. Uchtdorf, “El poder infinito de la esperanza,” Liahona, noviembre 2008, 21–24; Predicad mi Evangelio, 123.
Li Jesukristo naru naxjal xq’unal qametz’ew choq’ kawilal.
Naq naqileb’ ru li xnimal ru raatin laj Moroni, naru nasach sa’ qach’ool naq a’an yoo chaq lix k’a’uxl chirix “xq’unal xmetz’ew chi tz’iib’ak” ut kixxuwa naq eb’ li kristiaan te’reetz’u li raatin (chi’ilmanq Eter 12:23–25). A’b’an li Dios kixye naq a’an “tixk’e li k’a’ru q’un xmetz’ew choq’ kawilal” choq’ reheb’ li tuulaneb’ xch’ool (raqal 27), ut li musiq’ejil wankilal sa’eb’ lix tz’iib’ahom laj Moroni naxk’ut xyaalal naq li Qaawa’ kixb’aanu li k’a’ru kixyeechi’i.
Chirix rilb’al ru Eter 12:23–29, k’oxlaheb’ li hoonal naq li Dios xatxtenq’a chixk’eeb’al reetal lix q’unal aametz’ew ut xatxkawob’resi us ta q’un aametz’ew. Maare a’in ajwi’ jun chaab’il hoonal re xk’oxlankil lix q’unal aametz’ew li ch’a’ajkilanb’ilat wi’ anajwan. K’a’ru nakaweek’a naq tento taab’aanu re xtuulanob’resinkil aawib’ chiru li Qaawa’ ut re xk’utb’al laa paab’aal chirix a’an re naq taak’ul lix yeechi’ihom naq “tixk’e li k’a’ru q’un xmetz’ew choq’ kawilal”? (Eter 12:27).
Naq nakak’oxlaheb’ li raqal a’in, li na’leb’ a’in re li Elder Neal A. Maxwell maare taaruuq tatxtenq’a: “Naq naqil ru sa’eb’ li loq’laj hu resileb’ “lix q’unaleb’ xmetz’ew” li winq, yoo ajwi’ chi aatinak chirix lix q’unal li metz’ew li ak qe sa’ li yu’am a’in, sa’ li wan wi’ xwankil li tib’elej rik’in li musiq’ej chi rajlal (chi’ilmanq Eter 12:28–29). Lix q’unal li metz’ew na’aatinak ajwi’ chirix lix q’unal qametz’ew chiqajunqal, li tento taqaq’ax ru (chi’ilmanq Tzol’leb’ ut Sumwank 66:3; Jakob 4:7)” (Lord, Increase Our Faith [1994], 84).
Chi’ilmanq ajwi’ “Gracia,” Temas del Evangelio, topics.ChurchofJesusChrist.org.
Xtz’eqtaanankileb’ li profeet naxk’am li musiq’ejil sachk.
Na’ilman sa’ resil lix tenamiteb’ naq xiwxiw li wank jo’ rey sa’ xb’eeneb’ laj Jaredita. Tz’aqal yaal a’in choq’ re laj Koriantumr, xb’aan naq naab’aleb’ li “winq ninqeb’ xmetz’ew … ke’xsik’ xsachb’al” (Eter 13:15–16). Sa’ Eter 13:15–22, k’e reetal li kixb’aanu laj Koriantumr re xkolb’al rib’, ut li kixye li profeet aj Eter naq tixb’aanu ruuchil a’an. Naq nakawil ru lix hu laj Eter toj sa’ xraqik, k’oxla li naru nachal xb’aan xtz’eqtaanankileb’ li profeet. K’a’ru nak’ulman rik’ineb’ li kristiaan naq “lix Musiq’ li Qaawa’ naxkanab’ xyalb’al xq’e rik’ineb’ ”? (Eter 15:19).
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Eter 12:7–22
Naq nekerileb’ ru li raqal a’in sa’ komonil, taaruuq teenumsi wi’chik junjunq li esilal chirix li paab’aal li ak xeril sa’ lix Hu laj Mormon. A’in taaruuq tixtikib’ li aatinak chirix lix wankil li paab’aal sa’ li resilal lee junkab’al malaj sa’ lee yu’am laa’ex—k’oxla xtz’iib’ankil resil a’in wi maji’ aab’aanuhom.
Eter 12:27
Kʼaʼut naq li Qaawaʼ naxkʼe xq’unal li qametz’ew? K’a’ru li tento taqab’aanu laa’o re naq taawanq “li k’a’ru q’un xmetz’ew choq’ kawilal”? K’a’ru li naxb’aanu li Kolonel?
Eter 12:41
Ma wan k’a’ruhaq chaab’il naru taab’aanu re xtzolb’aleb’ laa kok’al re “te’xsik’ li Jesus”? Jun ch’ina k’anjel naru taab’aanu a’an xmuqb’al jun xjalam-uuch li Jesus ut xkanab’ankileb’ li komon sa’ laa junkab’al “chixsik’b’al” ut chixtawb’al li jalam-uuch. Chan ru naqasik’ li Jesus, ut chan ru too’osob’tesiiq naq taqataw?
Eter 13:13–14; 15:19, 33–34
Maare taawulaq chiruheb’ li komon sa’ laa junkab’al xjuntaq’eetankil li kixk’ul laj Eter rik’in li ke’xk’ul laj Mormon ut laj Moroni (chi’ilmanq Mormon 6; 8:1–10). Chan ru naq juntaq’eeteb’? Chan ru naq lix b’eenikeb’ laj Nefita toj sa’ li sachk juntaq’eet rik’in lix b’eenikeb’ laj Jaredita? (juntaq’eeta Eter 15:19 rik’in Moroni 8:28). K’a’ruheb’ li yaalil na’leb’ naqatzol li naru toohe’xtenq’a re ink’a’ taqak’ul li ke’xk’uleb’ a’an?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Kanab’eb’ chi patz’ok. Ak rehebʼ li kokʼal naq neke’raj tzolok. Wa naq taak’oxla tana’ naq maak’a’ rilom lix patz’omeb’ rik’in li k’a’ru yookat chixk’utb’al. Ruuchil a’an, ileb’ li patz’om jo’ hoonal re k’utuk. Lix patz’omeb’ a’aneb’ reetalil naq yoo’on wankeb’ li kok’al re tzolok—rik’ineb’ naru taak’e reetal k’a’ru xk’a’uxleb’ laa kok’al ut chan ru neke’reek’a chirix li yookeb’ chixtzolb’al (chi’ilmanq Li k’utuk jo’ li Kolonel, 25–26).
Sachol ch’oolej lix profeetil aatin laj Eter, xb’aan laj Walter Rane