“23–29 noviembre. Eter 12–15: “Rik’in li paab’aal natz’aqob’resiik ru chixjunil li k’a’aq re ru,” ” Kim, Taaqehin—Choq’ re li Tzoleb’aal reheb’ li Kok’al: Lix Hu laj Mormon 2020 (2020)
“23–29 noviembre. Eter 12–15,” Kim, Taaqehin—Choq’ re li Tzoleb’aal reheb’ li Kok’al: 2020
Laj Eter naxmuq rib’ sa’ xtehelal jun pek, xb’aan laj Gary Ernest Smith
23–29 noviembre
Eter 12–15
“Rik’in li paab’aal natz’aqob’resiik ru chixjunil li k’a’aq re ru”
Naq yooqat chirilb’al ru Eter 12–15 che’wanq li kok’al nakatzoleb’ sa’ laa k’a’uxl. Li na’leb’ re kok’ k’anjel wankeb’ sa’ li tusleb’ aatin a’in naru chamusiq’ankil rik’in jalaneb’ chik na’leb’ li te’tenq’anq chixb’aanunkil li k’a’ru aajel ru choq’ reheb’ li kok’al sa’ laa tzoleb’aal.
Xtz’iib’ankil li nakak’oxla
Xkanab’ankileb’ chi wotzok
Tenq’aheb’ li kok’al chixk’oxlankileb’ seraq’ chirixeb’ kristiaan sa’eb’ li loq’laj hu li ke’xk’ut xnimal xpaab’aaleb’. Sa’ Eter 12:11–22 neke’tawman junjunq li eetalil.
Xk’utb’al li tzol’leb’: Kok’al toj ka’ch’ineb’ xyu’am
Li paab’aal a’an xpaab’ankil li ink’a’ nokoru chirilb’al.
Laj Moroni kixwotz junjunqeb’ li seraq’ chirixeb’ kristiaan ke’xb’aanu xninqal k’a’aq re ru sa’ xk’ab’a’ lix paab’aaleb’. K’oxla chan ru naq naru nakawoksiheb’ li seraq’ a’an re xk’utb’al chiruheb’ li kok’al k’a’ru li paab’aal.
Kok’ k’anjel naru chi b’aanumank
-
Sa’ Eter 12:6, yaab’asi choq’ reheb’ li kok’al “li paab’aal a’an li k’a’aq re ru yo’oninb’il ut moko ilb’il ta” ut kanab’eb’ chixka’sutinkil li ch’ol aatin a’an aawik’in. Ye reheb’ li kok’al k’a’ru li nakapaab’ us ta ink’a’ aawilom ru, ut tenq’aheb’ li kok’al chixk’oxlankileb’ xkomoneb’ li eetalil. Li b’ich “Li paab’aal” (B’ichleb’aal choq’ reheb’ li Kok’al, 50–51) malaj junaq chik li b’ich na’aatinak ajwi’ chirix li paab’aal.
-
K’uteb’ jalam-uuch li te’reetali li seraq’ chirix li paab’aal k’eeb’ileb’ sa’ Eter 12:13–15, 20–21 (chi’ilmanq Libro de obras de arte del Evangelio, ajl 78, 85, ut li perel re kok’ k’anjel re li xamaan a’in). Kanab’eb’ li kok’al chixyeeb’al aawe k’a’ru neke’ril sa’eb’ li jalam-uuch ut k’a’ru neke’xnaw chirixeb’ li esil a’an. Aatinan rik’ineb’ li kok’al chirix chan ru naq eb’ li kristiaan a’an ke’xk’ut xpaab’aaleb’ ut k’a’ru kik’ulman sa’ xk’ab’a’ lix paab’aaleb’.
-
B’aanu jun b’atz’unk re q’ehink rik’ineb’ li kok’al. K’eheb’ xna’leb’ chirixeb’ li tiikil kristiaan neke’yeeman resil sa’ Eter 12:13–15, 19–20 toj reetal naq eb’ li kok’al te’xq’ehi ani a’an. Chirix a’an kanab’eb’ li kok’al chi b’atz’unk wi’chik ut te’xk’e xhoonaleb’ re yehok na’leb’ chirixeb’ li kristiaan ajwi’ a’an (malaj jalaneb’ chik kristiaan tiikeb’ chi paab’ank) naq eb’ lix komoneb’ li kok’al yooqeb’ chixq’ehinkil. Ch’olob’ li nawulak chawu chirix lix paab’aaleb’ li kristiaan a’an.
Li Jesukristo naru nikinixtenq’a chixkawob’resinkil inmetz’ew.
Wan naq eb’ li kok’al neke’xnumsi hoonal b’ar wi’ neke’reek’a naq q’uneb’ xmetz’ew, jo’ laj Moroni. Tenq’aheb’ chixtzolb’al li kixtzol laj Moroni—naq li Kolonel naru “tixk’e li k’a’ru q’un xmetz’ew choq’ kawilal” (Eter 12:27).
Kok’ k’anjel naru chi b’aanumank
-
Ch’olob’ chiruheb’ li kok’al jun k’anjel li naraj jwal naab’al li metz’ew re xb’aanunkil. Kanab’eb’ chixwotzb’al resil k’a’aq re ru li toj maji’ wan xmetz’eweb’ re xb’aanunkil anajwan. Chan raj ru nakawu qametz’ew re xb’aanunkileb’ li k’anjel a’an? Ch’olob’ naq wan ajwi’ li musiq’ejil k’anjel tento taqab’aanu, a’b’an wan naq naqeek’a xq’unal qametz’ew sa’ musiq’ej. A’an li kireek’a laj Moroni chirix lix tz’iib’ahom chiruheb’ li perel ch’iich’ oor. Yaab’asi Eter 12:27 choq’ reheb’ li kok’al. K’a’ru kixyeechi’i li Qaawa’ reheb’ li neke’reek’a xq’unal xmetz’ew?
-
Wotz junaq aanumsihom b’ar wi’ li Kolonel xatxtenq’a malaj xtenq’a anihaq chik chixb’aanunkil k’a’ruhaq jwal ch’a’aj. Ch’olob’ xyaalal chiruheb’ li kok’al naq wi neke’xsik’ lix tenq’, li Jesus naru naxtenq’aheb’ chi kawuk xmetz’eweb’, us ta neke’reek’a naq q’uneb’ xmetz’ew.
Xk’utb’al li tzol’leb’: Kok’al ak ninqeb’
Li paab’aal a’an xpaab’ankil li ink’a’ nokoru chirilb’al.
Eb’ li kok’al nakatzoleb’ yookeb’ chixk’eeb’al xk’ojob’ankil lix nawom xch’ooleb’. Li na’leb’ kixk’e laj Moroni chirix li paab’aal, li natawman sa’ Eter 12:6, naru naxtenq’aheb’.
Kok’ k’anjel naru chi b’aanumank
-
Ch’olob’ naq li profeet aj Eter kixyal xk’utb’al chiruheb’ laj Jaredita “xninqal ru ut sachb’a-ch’oolejil na’leb’,” a’b’an ink’a’ ke’xpaab’ li k’a’ru kixye. Kanab’eb’ li kok’al chirilb’al ru Eter 12:5 re xsik’b’al k’a’ut naq ink’a’ ke’paab’an. B’ar wan junjunq reheb’ li k’a’aq re ru li naraj li qaChoxahil Yuwa’ naq te’qapaab’ us ta ink’a’ neke’qil ru? Ilomaq ru sa’ komonil Eter 12:6. K’a’ru kixk’ut laj Moroni chiruheb’ li kristiaan li ink’a’ neke’xpaab’ li musiq’ejil yaal xb’aan naq ink’a’ neke’ril ru?
-
K’ut chiru junaq li ch’ina al jun jalam-uuch chi ink’a’ te’ril xkomoneb’ li kok’al, ut kanab’ li ch’ina al chixch’olob’ankil chiruheb’ xkomoneb’ li kok’al. Wi wan hoonal, kanab’eb’ xkomoneb’ chik li kok’al chixb’aanunkil ajwi’ a’an rik’ineb’ jalan jalanq jalam-uuch. Chirix a’an kanab’eb’ chirilb’al ru Eter 12:6 ut chixtawb’al li ch’ol aatin a’in: “li paab’aal a’an li k’a’aq re ru yo’oninb’il ut moko ilb’il ta.” Chan ru naqak’ut li qapaab’aal chirix li Kristo us ta ink’a’ naqil ru?
-
Kanab’eb’ li kok’al chirilb’al ru li ch’ol aatin a’in sa’ Eter 12:6: “Maajun eerilom nekek’ul toj chirix naq yalb’il rix eepaab’aal.” Tenq’aheb’ li kok’al chixtawb’al ru naq, wi noko’ab’in chiruheb’ li taqlahom, tooruuq chixnawb’al naq tz’aqal yaal. Kanab’eb’ chixk’oxlankil junaq na’leb’ re li evangelio li naraj wi’ li Dios naq taawanq xnawom qach’ool, jo’ xtojb’al li lajetqil, xsantob’resinkil li hilob’aal kutan, malaj xyu’aminkil li Aatin re Chaab’il Na’leb’. Chirix a’an tz’iib’a Re xtawb’al jun xnawom ch’oolej chirix , tento . Aatinan chirix chan ru naq laa’at nakak’anjela laa paab’aal re xtawb’al xnawom aach’ool chirixeb’ li yaalil na’leb’ a’in, ut xkomoneb’ chik li yaalil na’leb’ re li evangelio.
Li oyb’enink a’an chanchan jun li chapleb’ re li waam.
Tenq’aheb’ li kok’al nakatzoleb’ chixtawb’al ru naq naru “taqayo’oni chi ch’olch’o qach’ool jun ruchich’och’ li chaab’il wi’chik” sa’ xk’ab’a’ li qapaab’aal chirix li Kristo (Eter 12:4).
Kok’ k’anjel naru chi b’aanumank
-
Wotz rik’ineb’ li kok’al lix ch’olob’ankil yo’onink li natawman sa’ “Yo’onink” (K’utul Raqal reheb’ li Loq’laj Hu). Jo’ naxye lix ch’olob’ankil a’an ut Eter 12:4, 32, k’a’ru li tento taqoyb’eni? (chi’ilmanq ajwi’ Moroni 7:40–42). Tenq’aheb’ li kok’al chixk’oxlankileb’ aatin li juntaq’eeteb’ rik’in yo’onink, ut aatineb’ ajwi’ li neke’xch’olob’ xjunpak’alil li aatin yo’onink. Wotz rik’ineb’ a’an junjunqeb’ li yaal re li evangelio li neke’xk’e aayo’onihom, ut kanab’eb’ chixb’aanunkil ajwi’ a’an.
-
K’ut xjalam-uuch (malaj yiib’ chiru li pizarron) jun li jukub’ ut jun li chapleb’. K’a’ut naq eb’ li jukub’ neke’raj ru li chapleb’? K’a’ raj ru tixk’ul jun jukub’ maak’a’ xchapleb’? Ilomaq ru sa’ komonil Eter 12:4 ut patz’ reheb’ li kok’al chan ru naq li yo’onink chanchan jun li chapleb’. Kanab’eb’ li kok’al chixyiib’ankileb’ xjalam-uuch jun jukub’ ut jun chapleb’ re naq te’k’utuq chiruheb’ lix junkab’al chirix li yo’onink.
Li Jesukristo naru nikinixtenq’a chixkawob’resinkil inmetz’ew.
Naq eb’ li kok’al yookeb’ chi k’iik, neke’wulak chixk’eeb’al reetal chi us lix q’unal xmetz’eweb’. Oksiheb’ li raqal a’an re xk’utb’al chiruheb’ chan ru naq li Kolonel naru “tixk’e li k’a’ru q’un xmetz’ew choq’ kawilal” (Eter 12:27).
Kok’ k’anjel naru chi b’aanumank
-
Kanab’eb’ li kok’al chirilb’al ru Eter 12:23–25 re xsik’b’al k’a’ut naq yoo chaq xk’a’uxl laj Moroni. Patz’ reheb’ ma wanjenaq jun sutaq reek’ahomeb’ chi jo’kan. Chirix a’an kanab’eb’ chirilb’al ruheb’ li raqal 26–27 re xsik’b’al chan ru naq li Qaawa’ kixwaklesi xch’ool laj Moroni. K’a’ru naru naqab’aanu re naq li Qaawa’ tooxtenq’a chi kawuk naq naqeek’a xq’unil qametz’ew? Wotz junaq aanumsihom b’ar wi’ li Kolonel xatxtenq’a chi kawuk re xb’aanunkil k’a’ruhaq ch’a’aj.
-
Kanab’eb’ li kok’al chixyiib’ankil xjalam-uuch k’a’ruhaq q’un xmetz’ew ut k’a’ruhaq kaw xmetz’ew. Chirix a’an kanab’eb’ chixtz’iib’ankil chiruheb’ lix jalam-uuch junjunqeb’ li aatin ut ch’ol aatin sa’ Eter 12:23–29 li te’xk’ut chiruheb’ chan ru naq li Kolonel naru nokoxtenq’a chixkawob’resinkileb’ lix q’unal qametz’ew. Waklesi xch’ooleb’ li kok’al chixk’oxlankil junaq xq’unal xmetz’eweb’ ut chirix a’an chixsik’b’al xtenq’ li Qaawa’ re xkawob’resinkil a’an.
Xb’oqb’aleb’ chi tzolok sa’ kab’l
K’e xb’oqb’aleb’ li kok’al chixtz’iib’ankil junaq li yaal li neke’raj raj wi’ xtawb’al xnawomeb’ xch’ool. Tenq’aheb’ chixkanab’ankil jun xjayalihomeb’ re xk’anjelankil lix paab’aaleb’ re naq te’xtaw xnawom xch’ooleb’ chirix li yaal a’an.
Xchaab’ilob’resinkil li qak’utum
K’e aach’ool chixtawb’al ru xch’ooleb’ li kok’al nakatzoleb’. “Sik’ chan ru taataw ru b’ar neke’chal chaq, k’a’ru nawulak chiruheb’, k’a’ru xseeb’aleb’, ut k’a’ru rajomeb’ li ani tzolb’ileb’ aab’aan. Patz’ li patz’om reheb’, ab’i lix sumenkileb’ chi us, ut k’e reetal li neke’xye ut neke’xb’aanu li yookeb’ chi tzolok sa’ li jar paay chi na’ajej wankeb’ wi’. Patz’ reheb’ xna’ xyuwa’eb’ chirixeb’. Sa’ xb’een chixjunil, tijon re xk’ulb’al li na’leb’ li ka’ajwi’ k’eeb’il xb’aan li Musiq’ej” (Li k’utuk jo’ li Kolonel, 7).