“9–15 noviembre. Eter 1–5: “Teepej li tz’apleb’ t’ikr a’an re xmaak’a’il eepaab’aal,” ” Kim, Taaqehin—Choq’ re li Tzoleb’aal reheb’ li Kok’al: Lix Hu laj Mormon 2020 (2020)
“9–15 noviembre. Eter 1–5,” Kim, Taaqehin—Choq’ re li Tzoleb’aal reheb’ li Kok’al: 2020
Eb’ laj Jaredita neke’el chaq Babel, xb’aan laj Albin Veselka
9–15 noviembre
Eter 1–5
“Teepej li tz’apleb’ t’ikr a’an re xmaak’a’il eepaab’aal”
Naq yooqat chixjultikankil li xatzol naq xawil ru Eter 1–5, b’ar wan reheb’ li yaal nakak’oxla xtenq’ankileb’ wi’ li kok’al chixtawb’aleb’? Maare wankeb’ li na’leb’ sa’ li tusleb’ aatin a’in li te’k’anjelaq aawe.
Xtz’iib’ankil li nakak’oxla
Xkanab’ankileb’ chi wotzok
K’ut jun xjalam-uuch li ras laj Jared (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Kanab’eb’ li kok’al chixwotzb’al k’a’ru neke’xnaw chirix a’an.
Xk’utb’al li tzol’leb’: Kok’al toj ka’ch’ineb’ xyu’am
Lin Choxahil Yuwa’ narab’iheb’ ut naxsumeheb’ lin tij.
Li esil chirix li ras laj Jared naxk’ut naab’al na’leb’ chirix chan ru naq li Dios naru nokoxtenq’a naq nokotijok.
Kok’ k’anjel naru chi b’aanumank
-
K’e xb’oqb’aleb’ junjunq li komon re li teep li neke’xnaw junaq chik aatinob’aal jalan re te’xye junjunq ch’ol aatin sa’ li aatinob’aal a’an sa’ li tzoleb’aal (malaj oksi junaq li video sa’ jalan chik aatinob’aal). Kanab’eb’ li kok’al chixk’oxlankil naq neke’aatinak sa’ jalan chik aatinob’aal, ut ye reheb’ naq jwal ch’a’aj xtawb’al ru naq moko noko’aatinak ta sa’ jun ajwi’ li aatinob’aal. Rik’in a’an naru nakaweetali li seraq’ re li najt xteramil kab’l re Babel wan sa’ Genesis 11:1–9 ut Eter 1:33. Il ru Eter 3:13 ut 15, ut ch’olob’ naq li ras laj Jared kixpatz’ sa’ tij naq a’an ut eb’ li ramiiw ut lix junkab’al te’ruuq chixtawb’al ru li raatinob’aaleb’ chirib’ileb’ rib’ (chi’ilmanq Eter 1:34–37). Il ru ut tenq’aheb’ li kok’al chixtawb’al ru lix sumehom li Qaawa’ re lix tij sa’ Eter 1:25. Naru ajwi’ nakawoksi li “Ch’ol 50: Eb’ laj Jaredita ke’el chaq Babel” (Eb’ li Esilal sa’ lix Hu laj Mormon, 143–144, malaj li video sa’ ChurchofJesusChrist.org).
-
Kanab’eb’ li kok’al chixk’oxlankil naq yookeb’ chixyiib’ankil jun li k’amonel jukub’, jo’ nayeeman sa’ Eter 2:16–17. Ch’olob’ li ch’a’ajkilal ke’xtaw laj Jaredita rik’ineb’ lix k’amonel jukub’ (chi’ilmanq Eter 2:19), ut patz’ reheb’ li kok’al k’a’ raj ru te’xb’aanu chirixeb’ li ch’a’ajkilal a’an. Il ru Eter 2:18–19 re xk’utb’al chiruheb’ li kok’al chan ru naq li ras laj Jared kixk’ameb’ li ch’a’ajkilal a’an rik’in li Qaawa’ sa’ tij. Ch’olob’ xyaalal naq junelik naru nokotijok naq wankeb’ qapatz’om malaj qach’a’ajkilal.
-
Seraq’i sa’ junpaat li wan sa’ Eter 2:19–3:6 re xch’olob’ankil chan ru naq li Qaawa’ kixsumeheb’ lix patz’om li ras laj Jared chirixeb’ li k’amonel jukub’. K’eheb’ waqlaju chi pek sa’ li tzoleb’aal, ut kanab’eb’ li kok’al chirajlankileb’ naq yooqeb’ chixtawb’al. K’ut li jalam-uuch wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut kanab’eb’ li kok’al chixseraq’inkil aawe li esil (chi’ilmanq ajwi’ li perel re kok’ k’anjel re li xamaan a’in).
Kinyo’ob’tesiik jo’ chanru xjalam-uuch li Dios.
Naq li ras laj Jared kiril li Qaawa’, kixtzol naq “chixjunileb’ li winq ke’yo’ob’tesiik jo’ chanru xjalam-uuch a’an” (Eter 3:15).
Kok’ k’anjel naru chi b’aanumank
-
K’ut jun xjalam-uuch li Kolonel ut kanab’eb’ li kok’al chixk’utb’al jalan jalanq xcha’al lix tib’el. Ch’olob’ naq rik’in naq li ras laj Jared kiril li Jesukristo kixtzol naq juntaq’eet qilob’aal rik’in li Jesus. Naq taak’ut junaq xcha’al lix tib’el sa’ li jalam-uuch, kanab’eb’ li kok’al chixk’utb’al ajwi’ li cha’alil a’an sa’ lix tib’eleb’. Ch’olob’ naq kooyo’ob’tesiik re naq juntaq’eet noko’ilok rik’in li qaChoxahil Yuwa’ ut rik’in li Jesukriso.
-
B’ichahomaq sa’ komonil jun li b’ich li na’aatinak chirix li qatib’el, jo’ “Jolom, xbʼeen tel, xbʼeen aq, oqej” (B’ichleb’aal choq’ reheb’ li Kok’al, 129). Tenq’aheb’ li kok’al chi aatinak chirix k’a’ut naq neke’reek’a xb’antioxihom xb’aan li jalan jalanq xch’a’alil lix tib’eleb’.
Yoʼobʼtesinbʼilo joʼ xjalam-uuch li Dios.
Xk’utb’al li tzol’leb’: Kok’al ak ninqeb’
Naru nink’ul intenq’ankil rik’in li k’utb’esinb’il na’leb’.
Chan ru naru nakatenq’aheb’ li kok’al chi tzolok chirix li k’utb’esinb’il na’leb’ rik’in li kixb’aanu li ras laj Jared? K’a’ru chi numsihom naru nakawotz b’ar wi’ naq li Qaawa’ xatxtenq’a chixtawb’al xyiib’ankil laa ch’a’ajkilal malaj laa patz’om?
Kok’ k’anjel naru chi b’aanumank
-
Rub’elaj li tzolok, tz’iib’a li ch’ol aatin “Waklin, surisi aawib’, ut chunlan” sa’ jalan jalanq aatinob’aal chiruheb’ kok’ setb’il hu (naru nakawoksi jun jaltesinel aatinob’aal sa’ internet malaj xtenq’ anihaq naxnaw junaq chik aatinob’aal jalan). K’e jun li ch’ina hu re li junjunq chi kok’al, ut kanab’eb’ chixyalb’al xb’aanunkil li naxye. Oksi a’in re aatenq’ankil chixch’olob’ankil li kiwaklesin xch’ool li ras laj Jared chi tijok sa’ Eter 1:33–37. Ilomaqeb’ ru sa’ komonil li raqal a’an ut k’e xb’oqb’aleb’ li kok’al chirab’inkil chi us li nareek’a li Dios choq’ re li ras laj Jared ut choq’ reheb’ li ramiiw ut xjunkab’al. K’a’ru naqatzol sa’eb’ li raqal a’in chirix li tijok?
-
Patz’ re li junjunq chi kok’al naq te’ril ru jun reheb’ li raqal a’in, ut tenq’aheb’ chixsik’b’al jun xpatz’om malaj xch’a’ajkilal li ras laj Jared: Eter 1:33–35; Eter 1:36–37; ut Eter 2:18–20. K’a’ru kixb’aanu li ras laj Jared chirixeb’ li ch’a’ajkilal malaj patz’om a’an? Chan ru naq kitenq’aak xb’aan li Qaawa’ rik’ineb’ a’an? Kanab’eb’ li kok’al chixk’oxlankileb’ li ch’a’ajkilal neke’raj wi’ xtenq’ankileb’. Chan ru naru neke’xb’aanu li kixb’aanu li ras laj Jared re xtawb’al xyiib’ankil lix ch’a’ajkilaleb’? Wotz junaq aanumsihom b’ar wi’ naq xattijok re xpatz’b’al aatenq’ ut li Qaawa’ xatxtenq’a.
Kinyo’ob’tesiik jo’ chanru xjalam-uuch li Dios.
Eb’ li kok’al nakatzoleb’ te’xtaw k’iila b’alaq’il esil chirix li Dios, chirixeb’ ajwi’ a’an, ut chirix lix tib’eleb’. Eb’ li raqal a’an naxk’e li hoonal re xk’utb’aleb’ li junelik yaal chirixeb’ li na’leb’ a’an.
Kok’ k’anjel naru chi b’aanumank
-
Il ru Eter 3:6–16 rik’ineb’ li kok’al ut tenq’aheb’ chixyiib’ankil xtusulal li kixtzol li ras laj Jared rik’in li Qaawa’ sa’ li hoonal a’an. K’a’ut naq aajel ru xnawb’aleb’ li na’leb’ a’an? Qayehaq, chan ru nokoxtenq’a li nawom naq yo’ob’tesinb’ilo jo’ chanru xjalam-uuch li Qaawa’ rik’in chan ru naqil li qatib’el?
-
Tz’iib’a tib’elej ut musiq’ej chiru li pizarron. Kanab’eb’ li kok’al chixwotzb’al chan ru jun li tib’elej (wan qatz’uumal,qakik’el, ut wank chik xkomon), ut tz’iib’aheb’ lix sumehomeb’ chiru li pizarron. Ilomaq ru sa’ komonil Eter 3:4–17 ut kanab’eb’ li kok’al chixk’eeb’al reetal li neke’xtzol chirix li qamusiq’ejil junxaqalil. Ch’olob’ xyaalal naq li qatib’el ut li qamusiq’ “ke’yo’ob’tesiik jo’ chanru xjalam-uuch li Jesus” (Eter 3:15).
Oxibʼ chi aj yehol nawom neke’xchʼolobʼ xyaalal lix Hu laj Mormon.
Laj Moroni kixye profeetil aatin chirixeb’ li oxib’ chi aj yehol nawom li te’tenq’anq chixk’ojob’ankil lix yaalalil lix Hu laj Mormon. Naru nakawoksi li profeetil aatin a’an re xkawob’resinkil lix nawom xch’ooleb’ li kok’al ut xmusiq’ankileb’ re wank choq’ aj yehol nawom chirix lix Hu laj Mormon jo’ chanru naru chiruheb’.
Kok’ k’anjel naru chi b’aanumank
-
Tz’iib’a chiru li pizarron junjunqeb’ li aatin aajeleb’ ru wankeb’ sa’ Eter 5:2–4, jo’ li perel ch’iich’, wankil, yaal, aj yehol nawom, ut ch’olob’anb’il xyaalal. Il ruheb’ li raqal a’an rik’ineb’ li kok’al ut kanab’eb’ chixkanab’ankil rilb’al ru naq te’wulaq b’ar wi’ wan jun reheb’ li aatin wan chiru li pizarron ut chi aatinak chirix k’a’ut naq aajeleb’ ru li aatin a’an. Re xk’utb’al chiruheb’ li kok’al chirixeb’ li oxib’ chi aj yehol nawom, naru ajwi’ nakatsik’ok’ sa’ li “Ch’ol 7: Eb’ aj yehol nawom neke’rileb’ li perel ch’iich’ oor” (Eb’ li Esilal sa’ li Tzol’leb’ ut Sumwank, 31–33) ut “Lix Ch’olob’ahomeb’ li Oxib’ chi aj Yehol Nawom” sa’ lix Hu laj Mormon. K’a’ut naq kiraj li Dios naq oxib’ li kristiaan te’rileb’ li perel ch’iich’ oor?
-
Ye reheb’ li kok’al chan ru naq nakanaw naq lix Hu laj Mormon tz’aqal yaal. Kanab’eb’ li kok’al chixwotzb’al k’a’ut naq neke’xnaw naq tz’aqal yaal. Tenq’aheb’ chixk’oxlankil chan ru naru neke’wan choq’ aj yehol nawom chirix lix Hu laj Mormon, ut waklesi xch’ooleb’ chixwotzb’al lix nawom xch’ooleb’ rik’in junaq kristiaan chiru li xamaan a’in.
Xb’oqb’aleb’ chi tzolok sa’ kab’l
K’e xb’oqb’aleb’ li kok’al chixk’oxlankil k’a’ruhaq li naru neke’xpatz’ wi’ xtenq’ li qaChoxahil Yuwa’, jo’ kixb’aanu li ras laj Jared. Waklesi xch’ooleb’ chixsik’b’al lix tenq’ rik’in li tijok.
Xchaab’ilob’resinkil li qak’utum
K’utun sa’eb’ li kok’ k’anjel. Naq eb’ li kok’al yooqeb’ chixb’aanunkileb’ li kok’ k’anjel, jo’ li b’onok malaj k’anjelak sa’ junaq li perel re kok’ k’anjel, laa’at naru nakawoksi li hoonal re xjultikankileb’ li yaal neke’k’utman sa’eb’ li kok’ k’anjel a’an.