laj Moroni natz’iib’ak chiruheb’ li perel ch’iich’ oor

Laj Moroni natz’iib’ak chiruheb’ li perel ch’iich’ oor, xb’aan laj Dale Kilborn

2–8 noviembre

Mormon 7–9

“Nekexwaatina chanchan naq wankex chiwu”

Naq yooqat chirilb’al ru Mormon 7–9, k’oxla k’a’ru li mas nakawaj naq te’xnaw li kok’al nakatzoleb’. K’uub’ aana’leb’ re xk’utb’aleb’ li yaalil na’leb’ li nakaweek’a naq te’rosob’tesi lix yu’ameb’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Numsi jun lix hu laj Mormon sa’ xyanqeb’ li kok’al. Kanab’eb’ li kok’al, naq taawulaq li hu rik’ineb’, chixwotzb’al jun na’leb’ xtzolomeb’ chi sa’. Wi neke’raj ru xtenq’, jultika reheb’ li k’a’ru toje’ xe’xtzol sa’ li tzoleb’aal.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Mormon 7:8–10

Lix Hu laj Mormon ut li Santil Hu neke’xch’olob’ xyaalal li Jesukristo.

Laj Mormon kixk’ut naq lix Hu laj Mormon kitz’iib’aman re qatenq’ankil chixpaab’ankil li Santil Hu ut naq eb’ li neke’paab’ank re li Santil Hu te’xpaab’ lix Hu laj Mormon.

Kok’ k’anjel naru chi b’aanumank

• K’ut chiruheb’ li kok’al li perel re xjolomil aatin sa’ lix Hu laj Mormon, ut k’uteb’ lix jolomil aatin naq yooqex chixyaab’asinkil, ut ye chi kaw li aatin jun chik. Tenq’aheb’ li kok’al chixk’oxlankileb’ jalan chik hu li neke’k’utuk chirix li Jesus. K’ut chiruheb’ naq sa’ li Santil Hu wan li Najter ut Ak’ Chaq’rab’. Tenq’aheb’ li kok’al chixyeeb’al “Najter Chaq’rab’, Ak’ Chaq’rab’ ” naq taak’ut li Santil Hu, ut “Jun chik ch’olob’anb’il esil” naq taak’ut lix Hu laj Mormon.

• K’e chi kutankil jun reetalil ch’och’ malaj li perel re kok’ k’anjel re li tusleb’ aatin a’in, rochb’een li Santil Hu ut jun lix Hu laj Mormon. Oksiheb’ li hu a’an re xk’utb’al chiruheb’ li kok’al naq li Santil Hu a’an jun resil lix k’utum li Jesus aran Jerusalen ut xsutameb’, ut naq lix Hu laj Mormon a’an jun resil lix k’utum sa’ li ch’och’ America.

• Sik’ ru junjunq resilal li kik’ulman ut li yaal li neke’xch’olob’ xyaalal li Santil Hu ut lix Hu laj Mormon, jo’ lix yo’lajik, lix kamik, ut lix waklijik chi yo’yo li Jesus. K’uteb’ jalam-uuch wankeb’ sa’ li Libro de obras de arte del Evangelio li te’reetaliheb’ li ke’k’ulman ut eb’ li yaal. Kanab’eb’ li kok’al chixch’olob’ankil k’a’ru neke’ril sa’ li jalam-uuch, ut ye reheb’ naq li Santil Hu jo’ ajwi’ lix Hu laj Mormon neke’xk’ut li k’a’aq re ru a’an.

Mormon 8:3

Naru ninsik’ ru li k’a’ru us, us ta naweek’a naq injunes wankin.

Laj Moroni a’an lix ch’otojik laj Nefita li tiik xch’ool, a’b’an kiwan chi tiik chiru lix nawom xch’ool. Tenq’aheb’ li kok’al chi tzolok rik’in lix b’aanuhom laj Nefi.

Kok’ k’anjel naru chi b’aanumank

• Il ru Mormon 8:3, ut ch’olob’ naq laj Moroni xjunes kiwan, ut toj chi jo’kan kixpaab’eb’ li taqlahom, jo’ ajwi’ li taqlahom re xchoyb’al xtz’iib’ankil lix Hu laj Mormon. Aatinan chirix junaq hoonal b’ar wi’ laa’at xatwan chi tiik us ta xaweek’a naq aajunes xatwan.

• Chirix k’oxlak chirix lix b’aanuhom laj Moroni, wotz resil junjunq hoonal b’ar wi’ jun li ch’ina al tento tixsik’ ru li us malaj li ink’a’ us, us ta maa’ani yoo chi ilok re. K’a’ raj ru kixb’aanu laj Moroni?

• B’icha jun li b’ich rik’ineb’ li kok’al chirix xsik’b’al ru li us, jo’ “Saqaq aawu” (B’ichleb’aal choq’ reheb’ li Kok’al, 81). K’a’ut naq aajel ru xsik’b’al ru li us chixjunil li hoonal, us ta wankex eejunes?

Mormon 9:7–21

Li Dios a’an “jun Dios re sachb’a-ch’oolej.”

Tenq’aheb’ li kok’al chixtawb’al ru naq eb’ li sachb’a-ch’oolej aajeleb’ ru sa’ lix k’anjel li Dios ut naq li Dios tixk’eheb’ chi uxmank li sachb’a-ch’oolej naq te’wanq xpaab’aal lix tenamit.

Kok’ k’anjel naru chi b’aanumank

• Ch’olob’ naq jun sachb’a-ch’oolej a’an li naxb’aanu li Dios re xk’utb’al lix wankil ut rosob’tesinkil li qayu’am (chi’ilmanq li K’utul Raqal reheb’ li Loq’laj Hu, “Sachb’a-ch’oolej”). Ileb’ ru aatin ut ch’ol aatin sa’ Mormon 9:11–13, 17 li te’xch’olob’ junjunqeb’ lix sachb’a-ch’oolej li Dios. Tenq’aheb’ li kok’al chixk’oxlankileb’ xkomoneb’ li sachb’a-ch’oolej neke’tawman sa’eb’ li loq’laj hu (naru neke’oksiman li jalam-uuch wankeb’ sa’ li Libro de obras de arte del Evangelio, jo’eb’ li ajl 26, 40, 41, ut 83). Ch’olob’ xyaalal naq li Dios kixk’eheb’ chi uxmank li sachb’a-ch’oolej sa’ li najter kutan ut naq toj yoo ajwi’ chixk’eeb’aleb’ chi uxmank li sachb’a-ch’oolej sa’eb’ li kutan a’in.

• Wotz jun aanumsihom b’ar wi’ laa’at xawil junaq sachb’a-ch’oolej sa’eb’ li kutan a’in sa’ li Iglees malaj sa’ laa yu’am. Wotz xnawom aach’ool naq li Dios a’an “jun Dios re sachb’a-ch’oolej” (Mormon 9:11).

reetalil li k‘utuk

Xk’utb’al li tzol’leb’: Kok’al ak ninqeb’

Mormon 7:8–10

Lix Hu laj Mormon ut li Santil Hu neke’xch’olob’ xyaalal li Jesukristo.

Laj Mormon kixk’ut naq lix “evangelio li Kristo … taak’ojob’amanq chiqu” sa’ li Santil Hu jo’ ajwi’ sa’ lix Hu laj Mormon. K’oxla chan ru taak’ut chiruheb’ li kok’al naq xkab’ichaleb’ li loq’laj hu a’an aajeleb’ ru choq’ qe.

Kok’ k’anjel naru chi b’aanumank

• Tz’iib’a li raatinul Mormon 7:9 chiru li pizarron, a’b’an kanab’eb’ chi yamyo xna’ajeb’ li aatin a’in ut a’an. Tz’iib’aheb’ ajwi’ chiru li pizarron a’in = lix Hu laj Mormon ut a’an = li Santil Hu. Kanab’eb’ li kok’al chirilb’al ru Mormon 7:9 chi kaw xyaab’eb’ xkux ut chiroksinkileb’ li ch’ol aatin wan chiru li pizarron re xnujob’resinkileb’ li yamyo. K’a’ru naqatzol chirix li Santil Hu ut lix Hu laj Mormon sa’ li raqal a’an?

• K’e chi kutankil jun lix Hu laj Mormon ut jun li Santil Hu. Seraq’i junjunqeb’ li esil wankeb’ sa’ li junjunq chi hu, k’uteb’ xjalam-uuch wi nakataweb’ (chi’ilmanq li Libro de obras de arte del Evangelio). Kanab’eb’ li kok’al chixk’utb’al chi ru’uj ruq’eb’ li hu b’ar wi’ na’el chaq li esil. Kʼaʼut naq naqaj ruheb’ li wiib’ chi hu a’an?

• Tz’iib’a li junjunq chi aatin re li xwaqxaq raqalil li paab’aal chiru kok’ setb’il hu. K’e reheb’ li junjunq chi kok’al jun malaj wiib’ chi aatin, ut kanab’eb’ chi k’anjelak sa’ komonil re xtusub’ankileb’ li aatin chi ch’olch’o ru. Chirix a’an kanab’eb’ chixka’sutinkil li raqalil re paab’aal k’iila sut. K’a’ru naxk’ut chiqu?

  lix Hu laj Mormon sa’ k’iila paay aatinob’aal

  Lix Hu laj Mormon naxch’olob’ xyaalal li Jesukristo.

Mormon 8:1–7

Naru ninsik’ ru li k’a’ru us, us ta naq naweek’a naq injunes wankin.

Li rajom laj Moroni re “xtz’aqob’resinkil ru lix taqlahom lix yuwa’,” us ta ak kamenaq chaq lix yuwa’, naru naxmusiq’aheb li kok’al chi ab’ink chiruheb’ lix taqlahom li Dios.

Kok’ k’anjel naru chi b’aanumank

• Il ru Mormon 8:1–7 rik’ineb’ li kok’al ut kanab’eb’ chixwotzb’al k’a’ raj ru xe’reek’a wi ta a’aneb’ laj Moroni. Kanab’eb’ chirilb’aleb’ wi’chik ru li raqal 1, 3, ut 4 re xtawb’al k’a’ru kitaqlaak laj Moroni chixb’aanunkil. Chan ru naq laj Moroni kixtz’aqob’resi ru “lix taqlahom lix yuwa’ ”? Chan ru naru nokowan jo’ laj Moroni?

• Kanab’eb’ li kok’al chixtz’iib’ankil resil jun hoonal b’ar wi’ tento te’xsik’ ru li us malaj li ink’a’ us naq maa’ani yoo chi ilok reheb’. K’e lix na’leb’eb’ sa’ jun li sek’ ut kanab’eb’ li kok’al chixk’eeb’aleb’ xhoonal re xxokb’al junaq ut xwotzb’al k’a’ raj ru te’xb’aanu re wank jo’ laj Moroni.

Mormon 8:24–26; 9:7–26

Li Dios a’an “jun Dios re sachb’a-ch’oolej.”

Wankeb’ naab’aleb’ li kristiaan sa’eb’ li kutan a’in li ink’a’ neke’xpaab’ naq toj neke’k’ulman li sachb’a-ch’oolej. Oksiheb’ lix k’utum laj Moroni sa’eb’ li raqal a’an re xk’utb’al chiruheb’ li kok’al naq wi wan qapaab’aal, naru naqil li Dios chixb’aanunkil li sachb’a-ch’oolej sa’ qayu’am.

Kok’ k’anjel naru chi b’aanumank

• K’ut chiruheb’ li kok’al xtusulal xyuhil jun xtib’el wa. K’a’ raj ru taak’ulmanq wi ink’a’ neke’xk’e junaq xyuhil aajel ru? Kanab’eb’ li kok’al chixsik’b’al sa’ Mormon 8:24 ut 9:20–21 li “xyu” aajel ru li tento taawanq qik’in rub’elaj naq li Dios taaruuq chixb’aanunkileb’ li sachb’a-ch’oolej. Wotzeb’ reetalil sachb’a-ch’oolej—ninq malaj kok’—li aawilom laa’at sa’ li Iglees malaj sa’ laa yu’am. Kanab’eb’ li kok’al chixwotzb’aleb’ lix numsihomeb’ a’an.

• K’uub’eb’ ru li kok’al sa’ wiib’ ch’uut. Kanab’eb’ li junjunq chi ch’uut chixsik’b’aleb’ reetalil li sachb’a-ch’oolej sa’ junjunq malaj sa’ chixjunileb’ li raqal a’in reheb’ li loq’aj hu: Mormon 8:24; 9:11–13, 16–18, 21–25. K’a’ raj ru naru naqaye re anihaq li ink’a’ naxpaab’ naq toj neke’uxman li sachb’a-ch’oolej? (chi’ilmanq Mormon 9:9, 15–21).

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixpatz’b’al re junaq li komon sa’ lix junkab’aleb’ naq te’xch’olob’ junaq sachb’a-ch’oolej li kixkawresi xnawomeb’ xch’ool.

Xchaab’ilob’resinkil li qak’utum

Eb’ li kok’al naru neke’xnaw ru lix wankil li Musiq’ej. K’ut chiruheb’ li kok’al naq li eek’ahom re tuqtuukilal, re rahok, ut re q’ixnal neke’reek’a naq neke’aatinak malaj neke’b’ichan chirix li Jesukristo ut lix evangelio neke’chal rik’in li Santil Musiq’ej (chi’ilmanq Li k’utuk jo’ li Kolonel, 11).

perel re kok’ k’anjel: lix Hu laj Mormon ut li Santil Hu neke’xch’olob’ xyaalal li Kolonel