laj Alma yoo chixkub’sinkileb’ xha’ li tenamit sa’ li ha’ Mormon

Li xMinerva Teichert (1888–1976), Laj Alma nakub’sin ha’ sa’ li ha’ Mormon, 1949–1951, óleo en masonite, 35⅞ x 48 pulgadas. Museo de Arte, Universidad de Brigham Young, 1969

30 noviembre–6 diciembre

Moroni 1–6

“Re te’kanaaq sa’ li tiikil b’e”

Rub’elaj xk’uub’ankileb’ li kok’ k’anjel re xtzolb’aleb’ li kok’al, tzol Moroni 1–6 rik’in tijok re xsik’b’aleb’ li na’leb’ ut eb’ li raqal li taaweek’a naq aajel ru naq te’xtaw ru.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixwotzb’al li yookeb’ chixtzolb’al chirix laj Moroni. Naru nakawoksi li “Ch’ol 53: Laj Moroni ut eb’ lix k’utum” (Eb’ li Esilal sa’ lix Hu laj Mormon, 154–155, malaj li video sa’ ChurchofJesusChrist.org) re xtenq’ankileb’ chixjultikankil.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Moroni 4–5

Nink’ul li loq’laj wa’ak re xk’utb’al naq junelik tinjultika li Jesukristo.

Li loq’laj wa’ak naru nawan choq’ jun loq’laj musiq’ejil numsihom—a’ ajwi’ choq’ reheb’ li kok’al toj ka’ch’ineb’ xyu’am. Chan ru naru nakatenq’aheb’ li kok’al nakatzoleb’ chiroksinkil li hoonal re li loq’laj wa’ak re xk’oxlankil li Jesus?

Kok’ k’anjel naru chi b’aanumank

• K’ut jun xjalam-uucheb’ kristiaan li yookeb’ chixk’ulb’al li loq’laj wa’ak (chi’ilmanq Libro de obras de arte del Evangelio, ajl 108). Kanab’eb’ li kok’al chixyeeb’al aawe k’a’ru nak’ulman sa’ xhoonalil li loq’laj wa’ak. K’a’ru tento yooqo chixb’aanunkil sa’ xhoonalil li loq’laj wa’ak?

• K’e xb’oqb’aleb’ wiib’ li komon re li teep chi wulak sa’ li tzoleb’aal re te’xyaab’asi choq’ reheb’ li kok’al Moroni 4:3 ut 5:2, ut te’xwotz k’a’ut naq neke’xk’ul li loq’laj wa’ak rajlal xamaan. Kanab’eb’ chixyeeb’al reheb’ li kok’al k’a’ru naru neke’xb’aanu re xtenq’ankileb’ rib’ chixk’oxlankil li Jesus sa’ li loq’laj wa’ak ut chixjultikankil junelik.

• B’ichahomaq jun li b’ich li tixtenq’aheb’ li kok’al chixk’oxlankil li Jesus, jo’ “Tuqtuuko, chʼanchʼooko” (B’ichleb’aal choq’ reheb’ li Kok’al, 11). Kanab’eb’ li kok’al chixk’utb’esinkil chan ru te’chunlaaq rik’in oxloq’ jo’ te’xb’aanu raj sa’ li loq’laj wa’ak.

Moroni 6:1–3

Naru ninkawresi wib’ re taakub’eeq inha’.

Lix ch’olob’ank kixb’aanu laj Moroni chirixeb’ li kristiaan li ke’kub’e xha’ sa’ lix kutankil chaq a’an naru naxtenq’aheb’ li kok’al chixkawresinkileb’ rib’ re xk’ulb’al li aajel ruhil k’ojob’anb’il k’anjel a’an sa’eb’ li kutan a’in.

Kok’ k’anjel naru chi b’aanumank

• Yaab’asiheb’ ch’ol aatin sa’ Moroni 6:1–3 li neke’xk’ut ani naru neke’kub’e xha’. Ch’olob’eb’ li aatin li maare ink’a’ te’xtaw ru li kok’al. Qayehaq, jun xch’olob’ankil li ch’ol aatin “yot’b’ileb’ xch’ool ut chi tuulaneb’ xmusiq’,” a’an reek’ankil rahil ch’oolej xb’aaneb’ li qamaak (Moroni 6:2). Aatinan chirix chan ru naq xakawresi aawib’ laa’at re taakub’eeq aaha’, malaj ut, kanab’ anihaq li toje’ xkub’e xha’ chixch’olob’ankil chan ru naq xkawresi rib’. Tenq’aheb’ li kok’al chixk’oxlankil chan ru naru neke’xkawresi rib’ re te’kub’eeq xha’ sa’ junaq kutan.

• K’eheb’ chi kutankil xjalam-uucheb’ kristiaan neke’kub’e xha’ (chi’ilmanq Libro de obras de arte del Evangelio, ajl 103, 104), ut kanab’eb’ li kok’al chi aatinak chirix li neke’ril sa’eb’ li jalam-uuch. Tenq’aheb’ chirilb’aleb’ chi us li wan aran, jo’ li ha’ ut li saqi t’ikr. Patz’ reheb’ li kok’al k’a’ut naq nakub’e qaha’, ut ch’olob’ k’a’ut naq kikub’e aaha’ laa’at.

Moroni 6:4–6, 9

Osob’tesinb’ilin naq ninxik sa’ li iglees.

Ma neke’xtaw ru li kok’al nakatzoleb’ k’a’ut naq nokoxik sa’ li iglees rajlal xamaan? Moroni 6 naxye xyaalal x’aajelil ru.

Kok’ k’anjel naru chi b’aanumank

• Patz’ reheb’ li kok’al k’a’ut nawulak chiruheb’ xik sa’ li iglees, ut tenq’aheb’ chixyeeb’al junjunqeb’ k’a’aq re ru naqab’aanu aran. Yaab’asi choq’ reheb’ li k’a’aq re ru a’an sa’ Moroni 6:4–6, 9, ut kanab’eb’ chixk’utb’esinkil junjunqeb’ reheb’ li k’a’aq re ru a’an malaj chixyiib’ankileb’ xjalam-uucheb’ naq yookeb’ chixb’aanunkil a’an (jo’ li tijok, jultikank, b’ichank, ut xk’ulb’al li loq’laj wa’ak).

• Tenq’aheb’ li kok’al chixb’ichankil jun li b’ich chirix li xik sa’ iglees. Ye reheb’ li kok’al k’a’ut naq nawulak chawu xik sa’ li iglees ut chan ru naq nakatrosob’tesi a’an.

reetalil li k‘utuk

Xk’utb’al li tzol’leb’: Kok’al ak ninqeb’

Moroni 2–6

Li Santil Musiq’ej a’an jun loq’laj maatan.

Sa’ Moroni 2–6 na’aatinak naab’al sut chirix li Santil Musiq’ej. Chan ru naru nakawoksiheb’ li ch’ol a’an re xtenq’ankileb’ li kok’al chixtawb’al ru chan ru naq naru neke’tenq’aak xb’aan li Santil Musiq’ej?

Kok’ k’anjel naru chi b’aanumank

• Kanab’eb’ li kok’al chixtawb’al chixjunileb’ li raqal sa’ Moroni 2–6 li neke’aatinak chirix li Santil Musiq’ej malaj li Musiq’ej. Ilomaq ru sa’ komonil chixjunileb’ li raqal a’an ut kanab’eb’ li kok’al chixtz’iib’ankil chiru li pizarron li neke’xtzol chirix li Santil Musiq’ej. Chan ru naq li Santil Musiq’ej naru nokoxtenq’a?

• Seraq’i reheb’ li kok’al resil junaq hoonal b’ar wi’ xaweek’a xwankil li Santil Musiq’ej, maare sa’ li iglees malaj sa’ junaq chik na’ajej. Ch’olob’ chan ru xanaw naq a’an li Santil Musiq’ej ut chan ru naq xatxtenq’a. Kanab’eb’ li kok’al chixwotzb’al junaq xnumsihomeb’ rik’in li Santil Musiq’ej ut waklesi xch’ooleb’ chixsik’b’al lix wankil a’an.

  jun saaj ixq naxk’ul jun rosob’tesinkil

  Li maatan re li Santil Musiq’ej nak’eeman rik’in li k’ehok uq’ej sa’ jolomej.

Moroni 4–5

Nink’ul li loq’laj wa’ak re xk’utb’al naq junelik tinjultika li Jesukristo.

Naq eb’ li kok’al te’xtaw ru lix santilal li loq’laj wa’ak, k’a’jo’ wi’chik naq te’ril rik’in oxloq’ ut te’reek’a naq nach’ wankeb’ rik’in li Dios sa’ li k’ojob’anb’il k’anjel a’an.

Kok’ k’anjel naru chi b’aanumank

• Tz’iib’aheb’ ch’ol aatin sa’ Moroni 4:3 ut 5:2 chiru jalan jalanq kok’ setb’il hu, ut kanab’eb’ li kok’al chixtusb’aleb’ ru li ch’ol aatin. Jo’ neke’xye li raqal a’an, k’a’ut naq aajel ru li loq’laj wa’ak?

• Kanab’eb’ li kok’al chixk’oxlankil naq jun ramiiweb’ taawulaq sa’ li ch’utam re loq’laj wa’ak xb’een sut. Chan raj ru te’xch’olob’ chiru li ramiiw k’a’ru li loq’laj wa’ak ut k’a’ut naq naqak’ul a’an? Waklesi xch’ooleb’ chiroksinkil Moroni 4:3 ut 5:2 naq te’xch’olob’ a’an.

• Kanab’eb’ li kok’al chixwotzb’aleb’ k’a’aq re ru neke’xb’aanu lix junkab’aleb’ sa’ li loq’laj wa’ak re wank rik’in oxloq’ ut re xjultikankil li Jesukristo. K’a’ru chik lix na’leb’eb’ wan? Kanab’eb’ chixsik’b’al ru jun reheb’ li na’leb’ a’an ut chixkanab’ankil jun xteneb’ankileb’ re roksinkil chi us li hoonal re xjultikankil li Kolonel sa’ li loq’laj wa’ak.

Moroni 6:4–6, 9

Nokoxik sa’ li iglees re xk’ulb’al li loq’laj wa’ak ut xtenq’ankil qib’ chiqib’il qib’.

Li raatin laj Moroni naru naxtenq’aheb’ li kok’al nakatzoleb’ chixtawb’al xnimal rajomeb’ chi xik sa’ li iglees rajlal xamaan.

Kok’ k’anjel naru chi b’aanumank

• Tz’iib’a K’a’ut naq nokochal sa’ li iglees? chiru li pizarron, ut kanab’eb’ li kok’al chixtz’iib’ankil xsumenkil. Kanab’eb’ chixsik’b’al xkomon xsumenkileb’ sa’ Moroni 6:4–6, 9 ut chixtz’iib’ankileb’ chiru li pizarron. Kanab’eb’ li kok’al chixwotzb’al chan ru naq neke’osob’tesiik xb’aan xik sa’ li iglees. Kanab’eb’ chixk’utb’esinkil chan raj ru naq te’xch’olob’ chiru junaq ramiiweb’ re jalan chik paab’aal k’a’ut naq neke’xb’antioxi naq komoneb’ sa’ li Iglees.

• K’uteb’ jalam-uuch malaj xk’ab’a’eb’ chaab’il tzakemq. K’a’ut naq aajel ru naq taqach’olani li qatib’el? Ilomaq ru sa’ komonil Moroni 6:4 ut patz’ reheb’ li kok’al k’a’ru naraj naxye li ch’ol aatin “ch’olaniik xb’aan lix chaab’il aatin li Dios.” Chan ru naq nokoxch’olani li raatin li Dios?

• Kanab’ jun ch’ina al chirilb’al ru li raatin li Elder Jeffrey R. Holland, ut aatinanqex chirix li naxk’ut chirix chan ru naru naqach’olani qib’ chiqib’il qib’: “Lix k’ihaleb’ li neke’chal sa’ iglees ink’a’ neke’chal yal re xtzolb’al junjunq li ak’ na’leb’ chirix li evangelio malaj re rilb’aleb’ li ramiiweb’, us ta aajel ru chixjunil a’an. Neke’chal b’an re reek’ankil li Musiq’ej. Neke’raj li tuqtuukilal. Neke’raj naq taakawob’resiiq lix paab’aaleb’ ut naq taa’ak’ob’resiiq lix yo’onihomeb’. Sa’ jalan chik aatin, neke’raj ch’olaniik xb’aan lix chaab’il aatin li Dios, neke’raj kawob’resiik xb’aan lix wankilal li choxa” (chi’ilmanq “Venido de Dios como maestro,” Liahona, julio 1998, 27). Chan ru naru nokotenq’an chixch’olaninkil qib’ chiqib’il qib’ sa’ li iglees?

reetalil li tzolok

Xb’oqb’aleb’ chi tzolok sa’ kab’l

Waklesi xch’ooleb’ li kok’al chi aatinak rik’ineb’ lix junkab’al chirix k’a’ut naq nawulak chiruheb’ xik sa’ li iglees rajlal xamaan.

Xchaab’ilob’resinkil li qak’utum

Tenq’aheb’ li na’b’ej yuwa’b’ej. Yal aaq’e chixtawb’al ru, rik’in li tij, chan ru taatenq’aheb’ xna’ xyuwa’ li kok’al nakatzoleb’. Chan ru naru nakatenq’a lix yalb’aleb’ xq’e re xk’utb’al li evangelio chiruheb’ lix kok’al. Qayehaq, naru tat-aatinaq rik’ineb’ li na’b’ej yuwa’b’ej chirix li k’a’ru neke’raj ru ut li nawulak chiruheb’ lix kok’al, malaj naru taawotz rik’ineb’ li k’a’ru yookeb’ chixtzolb’al lix kok’al sa’ laa tzoleb’aal (chi’ilmanq Li k’utuk jo’ li Kolonel, 25).

perel re kok’ k’anjel: nink’ul li loq’laj wa’ak re xjultikankil li Jesukristo