laj Jose, li xMaria, ut li k’uula’al Jesus sa’ xna’ajeb’ li xul

K’e reetal lix Karneer li Dios, xb’aan laj Walter Rane

21–27 diciembre

Li Ralankil

“Aʼan taachalq saʼ li ruchichʼochʼ re xtojbʼal rix lix tenamit”

Wan naq nawulak chiruheb’ li kok’al aatinak chirix chan ru neke’xninq’ehi li Ralankil. K’oxla li k’a’ru naru taab’aanu re xtenq’ankileb’ chixjayalinkileb’ rib’ rik’in li Jesukristo ut lix b’antioxihomeb’ chirix lix yo’lajik.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixyiib’ankileb’ xjalam-uuch malaj aatinak chirix k’a’ruhaq neke’xb’aanu lix junkab’aleb’ sa’eb’ li kutan re li Ralankil re xtenq’ankileb’ chixjultikankil li Jesukristo.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

1 Nefi 11:13–22; Mosiah 3:5–8; Alma 7:9–13; Helaman 14:1–6; 3 Nefi 1:15, 19–21

Li Jesukristo kiyo’la re wank choq’ inKolonel.

Ma neke’xnaw li kok’al nakatzoleb’ k’a’ru naqaninq’ehi sa’ li Ralankil? Chan ru naru nakatenq’aheb’ chixtawb’al ru k’a’ut naq naninq’ehiman ru lix yo’lajik li Jesukristo?

Kok’ k’anjel naru chi b’aanumank

• Aatinan chirix lix yo’lajik li Jesus ut k’eheb’ chi kutankil xjalam-uuch a’an (jo’ li wankeb’ sa’ Libro de obras de arte del Evangelio, ajl 28, 29, 30, 31). Kanab’eb’ li kok’al chixwotzb’al li neke’xnaw. Oksi li perel re kok’ k’anjel re li xamaan a’in re xk’utb’al chiruheb’ li kok’al naq eb’ li kristiaan ke’wan sa’ xkutankil lix Hu laj Mormon ke’wan xnawom chirix li Jesus.

• Il ruheb’ ch’ol aatin aajeleb’ ru sa’ Alma 7:11–12 re xk’utb’al chiruheb’ li kok’al li kixb’aanu li Jesukristo choq’ qe laa’o. Ye k’a’ut naq nakab’antioxi naq li Jesukristo kiyo’la ut ye laa week’ahom chirix lix mayej aj tojol-ix.

• K’uteb’ jalam-uuch li neke’reetali lix mayej li Kolonel re xtojb’al rix li maak, jo’ re li rahilal kixk’ul sa’ Getsemani, lix kamik chiru krus, ut lix waklijik chi yo’yo (chi’ilmanq Libro de obras de arte del Evangelio, ajl 56, 57, 58, 59). Kanab’eb’ li kok’al chixyeeb’al aawe k’a’ru neke’ril sa’eb’ li jalam-uuch. Tenq’aheb’ chixtawb’al ru naq li qaChoxahil Yuwa’ kixtaqla chaq li Jesukristo sa’ li ruchich’och’ re xk’ulb’al rahilal xb’aaneb’ li qamaak, kamk sa’ qak’ab’a’, ut wakliik chi yo’yo, re naq tooruuq chi q’ajk chi wank rik’in a’an.

• B’icha jun li b’ich rik’ineb’ li kok’al li taa’aatinaq chirix lix yo’lajik li Jesus jo’ “Kixtaqla li Ralal” malaj “Sa’ xwa’leb’aal xul” (B’ichleb’aal choq’ reheb’ li Kok’al, 20, 26). Ye reheb’ li kok’al ch’ol aatin reheb’ li b’ich li neke’xch’olob’ li osob’tesihom wan choq’ qe sa’ xk’ab’a’ lix yo’lajik li Jesus.

2 Nefi 25:23, 26

Lix Hu laj Mormon naxch’olob’ xyaalal li Jesukristo.

Naq nakachoy xtzolb’al lix Hu laj Mormon chiru li chihab’ a’in, jultika reheb’ li kok’al naq li hu a’in, a’an “Jun chik ch’olob’anb’il esil chirix li Jesukristo,” tz’iib’anb’il re qatenq’ankil chi chalk rik’in a’an.

Kok’ k’anjel naru chi b’aanumank

• Chap chi kutankil jun lix Hu laj Mormon re naq eb’ li kok’al te’ril. Yaab’asi lix k’ab’a’ ut k’ut chi ru’uj aawuq’ li aatin “Jun chik ch’olob’anb’il esil chirix li Jesukristo.” Kanab’eb’ li kok’al chixk’eeb’aleb’ xhoonal re xchapb’al li hu, ut tenq’aheb’ chixtawb’al xk’ab’a’ li Kolonel sa’ li rix. Ye reheb’ li kok’al li nakaweek’a chirix lix Hu laj Mormon ut chan ru nakatxtenq’a chi tzolok chirix li Jesukristo.

• K’e reheb’ li kok’al jun xjalam-uuch li Jesus, ut kanab’eb’ ajwi’ chixyiib’ankil xjalam-uuch a’an. Kanab’eb’ chixchapb’al chi kutankil lix jalam-uucheb’ rajlal sut naq te’rab’i xk’ab’a’ li Kristo naq yooqat chixyaab’asinkil 2 Nefi 25:23, 26. Ch’olob’ xyaalal naq lix Hu laj Mormon kitz’iib’aman re qatenq’ankil re naq “taqapaab’ li Kristo” (2 Nefi 25:23).

• Wotz rik’ineb’ li kok’al jun reheb’ li raqal malaj seraq’ li jwal nawulak chawu chi sa’ lix Hu laj Mormon li nakatxtenq’a chi tzolok chirix li Jesukristo. Patz’ reheb’ li kok’al b’ar wan li seraq’ jwal nawulak chiruheb’ sa’ lix Hu laj Mormon ut tenq’aheb’ chirilb’al chan ru naq eb’ li esil a’in nokohe’xtenq’a chi tzolok chirix li Kolonel ut chi nach’ok rik’in a’an. Rilb’aleb’ junjunqeb’ li jalam-uuch neke’tawman sa’ Eb’ li Esilal sa’ lix Hu laj Mormon naru naxtenq’aheb’ chixjultikankileb’ li esil.

reetalil li k‘utuk

Xk’utb’al li tzol’leb’: Kok’al ak ninqeb’

1 Nefi 11:13–22; Mosiah 3:5–8; Alma 7:10–13; Helaman 14:1–6; 3 Nefi 1:15, 19–21

Li Jesukristo kiyo’la re wank choq’ inKolonel.

K’oxlan chirix chan ru us xtenq’ankileb’ li kok’al chixtawb’al ru x’aajelil ru lix yo’lajik li Kristo ut k’a’ru naraj naxye a’an choq’ reheb’.

Kok’ k’anjel naru chi b’aanumank

• K’e re li junjunq chi kok’al jun li raqal sa’eb’ li loq’laj hu li natawman sa’ li perel re kok’ k’anjel re li xamaan a’in. Kanab’eb’ li kok’al chirilb’al ru lix raqaleb’, chixyeeb’al ani li profeet yoo chi aatinak aran, ut chixwotzb’al jun na’leb’ kixnaw li profeet a’an chirix li Jesukristo. Wi na’ajman ru, tenq’aheb’ malaj kanab’eb’ chi k’anjelak sa’ ch’uut.

• Tz’iib’a chiru li pizarron junjunqeb’ na’leb’ ke’k’ulman chirix lix yo’lajik li Jesus, jo’ li neke’ch’olob’aman sa’ Lukas 2:4–14; Mateo 2:1–2; ut 3 Nefi 1:15, 19–21. Tenq’aheb’ li kok’al chixtz’ilb’al rixeb’ li raqal reheb’ li loq’laj hu a’an re xk’eeb’al reetal ma Belen ke’k’ulman a’an, malaj sa’ li ch’och’ America, malaj sa’ xkab’ichal li na’ajej. K’a’ut naq naqab’antioxi li hu jo’ jun xkab’ aj ch’olob’anel chirix lix yo’lajik li Jesukristo ut lix k’anjel jo’ aj Kolonel?

• Il ru Alma 7:10–13 rik’ineb’ li kok’al. K’a’ru naqatzol sa’eb’ li raqal a’an chirix lix yo’lajik li Jesus? Chirix lix choxahilal? Chirix lix k’anjel sa’ li ruchich’och’? Kanab’eb’ li kok’al chixwotzb’al k’a’ut naq neke’reek’a xb’antioxihom chirix li Jesukristo, ut wotz laa’at lix nawom aach’ool chirix a’an.

2 Nefi 25:23, 26; 33:4, 10

Lix Hu laj Mormon naxch’olob’ xyaalal li Jesukristo.

Chirix lix Hu laj Mormon, li profeet aj Jose Smith kixye naq “jun li winq q’axal wi’chik taaruuq chixjilosinkil rib’ rik’in li Dios rik’in xpaab’ankil li na’leb’ wan chi sa’, chiru k’a’ruhaq chik chi hu” (Xtikib’ankil lix Hu laj Mormon). Chan ru naru nakatenq’aheb’ li kok’al chixtawb’al ru li yeechi’ihom a’an?

Kok’ k’anjel naru chi b’aanumank

• K’e junjunqeb’ li raqal a’in reheb’ li kok’al: 2 Nefi 25:23, 26; 33:4, 10. Kanab’eb’ li kok’al chirilb’al ru lix raqal ut chixsik’b’al k’a’ru kiraj li profeet aj Nefi, li wan sa’ lix Hu laj Mormon, naq taqanaw. Ye reheb’ naq te’xtz’iib’a chiru li pizarron li k’a’ru neke’xtaw. Ch’olob’ naq li na’leb’ a’in naxch’olob’ lix aajel ruhil ajom lix Hu laj Mormon. Kanab’eb’ li kok’al chixk’utb’esinkil chirib’ileb’ rib’ chan raj ru te’xch’olob’ chiru jun ramiiweb’ jun lix aajel ruhil ajom lix Hu laj Mormon.

• Wotz rik’ineb’ li kok’al jun reheb’ li raqal malaj seraq’ li jwal nawulak chawu sa’ lix Hu laj Mormon li nakatxtenq’a chi tzolok chirix li Jesukristo. Patz’ reheb’ li kok’al b’ar wan li seraq’ jwal nawulak chiruheb’ sa’ lix Hu laj Mormon ut tenq’aheb’ chirilb’al chan ru naq eb’ li esil a’an nokohe’xtenq’a chi tzolok chirix li Kolonel ut chi nach’ok rik’in a’an. Ye reheb’ li kok’al chan ru naq lix Hu laj Mormon nakatxteq’a chixnawb’al naq li Jesus a’an li Kristo. Waklesi xch’ooleb’ li kok’al chixk’oxlankil jun raqal malaj seraq’ sa’ lix Hu laj Mormon li naxkawob’resi lix paab’aaleb’ chirix li Jesukristo. K’e xb’oqb’aleb’ chixwotzb’al a’an rik’in junaq ramiiweb’ malaj komon sa’eb’ lix junkab’al li ink’a’ naxnaw ru lix Hu laj Mormon.

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixwotzb’al rik’ineb’ lix junkab’al chan ru naq lix Hu laj Mormon naxtenq’aheb’ chixtzolb’al xkomon xna’leb’eb’ chirix li Kristo. Waklesi xch’ooleb’ chixwotzb’al junaq raqal malaj seraq’ sa’ lix Hu laj Mormon jo’ xkomon lix nawomeb’ xch’ool.

Xchaab’ilob’resinkil li qak’utum

Jwal neke’wulak li esil chiruheb’ li kok’al. Eb’ li esil jwal chaab’ileb’ re xtenq’ankileb’ li kok’al chixtzolb’al ut chixjultikankileb’ li yaalil na’leb’. Naq yooqat chixwotzb’aleb’ li esil chirix xyo’lajik li Jesus, k’oxla xwotzb’al ajwi’ esilal re laa yu’am li xate’xtenq’a chixkawob’resinkil laa paab’aal chirix li Kolonel.

perel re kok’ k’anjel: eb’ li profeet sa’ lix Hu laj Mormon ke’k’utuk chirix lix k’anjel li Jesukristo