li Jesus naq kixk’ut rib’ chiruheb’ laj Nefita

Re taaruuq teenaw, xb’aan laj Gary L. Kapp

14–20 diciembre

Moroni 10

“Chalqex rik’in li Kristo, ut chitz’aqloq eere eeru rik’in”

Maare junjunqeb’ li kok’al sa’ laa tzoleb’aal yooqeb’ chixk’ulb’al xna’leb’eb’ sa’ xtzolb’al lix Hu laj Mormon sa’ kab’l. Chan ru naru nakawoksiheb’ li na’leb’ a’an re xwaklesinkileb’ xch’ool chixjunileb’ li kok’al chirilb’aleb’ ru li loq’laj hu sa’ kab’l?

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Numsi jun lix Hu laj Mormon sa’ xyanqeb’ li kok’al. Naq li junjunq chi kok’al tixk’ul li hu, kanab’ chixwotzb’al k’a’ruhaq nawulak chiru chirix lix Hu laj Mormon—jun esil jwal nawulak chiru, jun xnawom ch’oolej, malaj junaq numsihom naq xtzolok chi sa’, sa’ kab’l malaj sa’ li iglees.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Moroni 10:3–5

Naru ninnaw injunes naq tz’aqal yaal lix Hu laj Mormon.

Sik’ chan ru naru nakatenq’aheb’ li kok’al chixk’ulub’ankil lix b’oqom laj Moroni re xpatz’b’al re li Dios ma tz’aqal yaal lix Hu laj Mormon.

Kok’ k’anjel naru chi b’aanumank

• K’ut jun jalam-uuch b’ar wi’ laj Moroni yoo chixmuqb’aleb’ li perel ch’iich’ oor (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al), ut kanab’eb’ li kok’al chixwotzb’al li k’a’ru neke’ril. Kanab’eb’ chixk’utb’aleb’ li perel ch’iich’ oor, ut ch’olob’ naq sa’eb’ li perel ch’iich’ oor a’an ke’tz’iib’aman li aatin wankeb’ anajwan sa’ lix Hu laj Mormon. Kanab’eb’ li kok’al chixk’oxlankil naq a’aneb’ laj Moroni ut naq neketz’iib’ak chiru li perel ch’iich’ oor ut neke’xmuq rub’el ch’och’. B’ichahomaq sa’ komonil “Li perel ch’iich’ ” (B’ichleb’aal reheb’ li Kok’al, 61).

• K’e chiruheb’ jun lix Hu laj Mormon ut yaab’asi Moroni 10:4. Aatinan chirix naq naru naqapatz’ re li Dios ma tz’aqal yaal lix Hu laj Mormon, ut naq a’an tixtaqla chaq li Santil Musiq’ej chixch’olob’ankil xyaalal chiqu. Naru ajwi’ nakawoksi “Ch’ol 54: Li k’a’ru yeechi’inb’il sa’ lix Hu laj Mormon” (Eb’ li Esilal sa’ lix Hu Laj Mormon, 156, malaj li video sa’ ChurchofJesusChrist.org). Aatinan chirix chan ru naq li Santil Musiq’ej xatxtenq’a chixtawb’al xnawom aach’ool chirix lix Hu laj Mormon. Tenq’aheb’ li kok’al chixtawb’al ru k’a’ru na’eekaman naq li Musiq’ej naxk’ut li yaal. B’icha jun li b’ich chirix xtawb’al li yaal, jo’ “Tintzol, tink’oxla, tintijoq” (B’ichleb’aal choq’ reheb’ li Kok’al, 66).

Moroni 10:8–20

Li qaChoxahil Yuwa’ naxk’eheb’ inmusiq’ejil maatan.

Laj Moroni kixch’olob’eb’ li maatan naxk’e li Dios reheb’ li ralal xk’ajol naq neke’wan xpaab’aal chirix a’an. Naru nakatenq’aheb’ li kok’al chi wank xpaab’aaleb’ chirix naq li Dios tixk’e musiq’ejil maatan reheb’.

Kok’ k’anjel naru chi b’aanumank

• Tz’iib’aheb’ li ajl 9 toj sa’ 16 chiruheb’ kok’ setb’il hu ut laneb’ rix li kok’ hu jo’ li maatan. Kanab’eb’ li kok’al chixk’eeb’al xhoonaleb’ re xteeb’aleb’ li “maatan.” Naq yooqeb’ chixb’aanunkil a’an, ilomaqeb’ ru sa’ komonil li raqal re Moroni 10:9–16 li neke’xk’uli rib’ rik’ineb’ li ajl, ut tenq’aheb’ li kok’al chixtawb’aleb’ li junjunq chi musiq’ejil maatan. Ch’olob’ naq a’aneb’ li maatan naxk’e li qaChoxahil Yuwa’ reheb’ li ralal xk’ajol re naq tooruuq chixtenq’ankil qib’ chiqib’il qib’ ut chixb’aanunkil lix k’anjel.

• Kanab’eb’ li kok’al chi aatinak chiru junpaat chirixeb’ li maatan xk’ulumeb’ li jwal neke’wulak chiruheb’. Aatinan rik’ineb’ li kok’al chirixeb’ li musiq’ejil maatan li nakak’e reetal naq li qaChoxahil Yuwa’ xk’e chaq reheb’ a’an, jo’ li maatan re li paab’aal, li chaab’il na’leb’, lix nawom ch’oolej, li chaab’ilal, ut li seeb’al re tzolok.

Moroni 10:32

Li Jesukristo naraj naq tinxik rik’in a’an.

K’oxla chan ru taatenq’aheb’ li kok’al chixtawb’al ru k’a’ru naraj naxye “chalk rik’in li Kristo.”

Kok’ k’anjel naru chi b’aanumank

• Sa’ Moroni 10:32, yaab’asi choq’ reheb’ li kok’al: “Chalqex rik’in li Kristo, ut chitz’aqloq eere eeru rik’in,” ut kanab’eb’ li kok’al chixka’sutinkil li ch’ol aatin aawik’in. Kanab’eb’ chixmutz’b’al li ru naq yooqat chixk’eeb’al jun xjalam-uuch li Jesus sa’ junaq na’ajej sa’ li tzoleb’aal. Chirix a’an ye reheb’ naq te’xte li ru, ut te’xsik’ li jalam-uuch ut naq te’xch’utub’ rib’ chixsutam a’an. Aatinan rik’ineb’ li kok’al chirix chan ru naru nokochal rik’in li Kristo (chi’ilmanq, jo’ eetalil, Eb’ lix Raqalil li Paab’aal 1:3–4). Ka’suti li ch’ina k’anjel a’in, ut kanab’eb’ li kok’al chixk’eeb’al li jalam-uuch sa’ junaq na’ajej re li tzoleb’aal.

• Tenq’aheb’ li kok’al chirutz’u’ujinkil ru kok’ setb’il hu jo’ aamej li te’xye “Ninra li Dios chi anchal inmetz’ew, ink’a’uxl, ut inkawilal” (chi’ilmanq Moroni 10:32). Chan ru naqak’ut chiru li Dios naq naqara?

reetalil li k‘utuk

Xk’utb’al li tzol’leb’: Kok’al ak ninqeb’

Moroni 10:3–5

Naru ninnaw li yaal rik’in xwankil li Santil Musiq’ej.

Li Dios naraj naq chiqajunil taqanaw naq tz’aqal yaal lix Hu laj Mormon. Tenq’aheb’ li kok’al chixtawb’al ru lix yeechi’ihom li Dios naq “tixk’utb’esi cheru li yaal chirix, rik’in lix wankil li Santil Musiq’ej.”

Kok’ k’anjel naru chi b’aanumank

• Tz’iib’aheb’ chiru li pizarron li aatin Teeril, Chijultiko’q eere, Chetz’il rix sa’ eech’ool ut Chepatz’. Kanab’eb’ li kok’al chixtawb’aleb’ li aatin a’an sa’ Moroni 10:3–4. K’a’ru li tento taqil ru, taqajultika, taqatz’il rix sa’ qach’ool, ut taqapatz’ re xtawb’al malaj xkawob’resinkil lix nawom qach’ool chirix lix Hu laj Mormon? Kanab’eb’ li kok’al chixsik’b’al xjuntaq’eetileb’ li raqal a’an ut li b’ich “Tintzol, tinkʼoxla, tintijoq” (B’ichleb’aal choq’ reheb’ li Kok’al, 66).

• Tenq’aheb’ li kok’al chixjultikankil junjunq eenumsihom sa’ komonil naq yookex chixtzolb’al lix Hu laj Mormon. Wotz laa week’ahom chirix lix Hu laj Mormon, jo’ ajwi’ chan ru naq xataw malaj xakawob’resi lix nawom aach’ool chirix naq yaal. Kanab’eb’ li kok’al chixwotzb’aleb’ li reek’ahomeb’ ut lix nawom xch’ooleb’.

• Aatinan chirix junaq hoonal b’ar wi’ naq li Santil Musiq’ej xch’olob’ xyaalal k’a’ruhaq chawu. Ch’olob’ k’a’ru xaweek’a ut chan ru naq xanaw naq a’an li Santil Musiq’ej. Tenq’aheb’ li kok’al chi tzolok sa’eb’ li raqal a’in chirix chan ru naq li Musiq’ej nokoraatina: Jwan 14:26–27; Tzol’leb’ ut Sumwank 6:15,23; 8:2–3; 9:7–9; 11:12–14.

Moroni 10:8–19

Li qaChoxahil Yuwa’ naxk’eheb’ musiq’ejil maatan we.

Wankeb’ naab’aleb’ li kristiaan sa’eb’ li kutan a’in li “neke’xtz’eqtaana xyaalaleb’ li maatan naxk’e li Dios” (Moroni 10:8) Tenq’aheb’ li kok’al chirilb’al naq eb’ li maatan a’an toj wankeb’ sa’eb’ li kutan a’in.

Kok’ k’anjel naru chi b’aanumank

• Tz’iib’aheb’ xk’ab’a’eb’ li maatan yeeb’ileb’ sa’ Moroni 10:9–16 chiruheb’ kok’ setb’il hu, ut k’eheb’ sa’ jun li ch’ina kaxon re maatan. Tz’iib’aheb’ li ajl 9 toj sa’ 16 chiru li pizarron ut kanab’eb’ li kok’al chixk’eeb’aleb’ xhoonal re xsik’b’al ru junaq li setb’il hu sa’ li ch’ina kaxon ut xlaq’ab’ankil chiru li pizarron rik’in li ajl b’ar wi’ tento taawanq. K’a’ru naqatzol chirixeb’ li na’leb’ a’an sa’eb’ li raqal 8 ut 17–18?

• Seraq’i jun esilal chirix li relik chi kutankil lix Hu laj Mormon (chi’ilmanq “Ch’ol 3: Li anjel Moroni ut eb’ li perel ch’iich’ oor,” Eb’ li Esilal sa’ li Tzol’leb’ ut Sumwank, 13–16). Tenq’aheb’ li kok’al chixtawb’aleb’ li maatan neke’yeeman sa’ Moroni 10:9–16 li kixk’e li Dios re laj Jose Smith re naq taarisi chaq chi kutankil lix Hu laj Mormon. K’a’ut naq li qaChoxahil Yuwa’ naraj naq te’qapaab’ li musiq’ejil maatan sa’eb’ li kutan a’in?

Moroni 10:32–33

Li Jesukristo naraj naq laa’in tinchalq rik’in a’an.

Chan ru taak’e xb’oqb’aleb’ li kok’al “chi chalk rik’in li Kristo, ut chi tz’aqlok reheb’ ruheb’ rik’in”?

Kok’ k’anjel naru chi b’aanumank

• Tz’iib’a chiru li pizarron jun patz’om jo’ K’a’ru naraj naxye chalk rik’in li Kristo? Tenq’aheb’ li kok’al chixsik’b’al xsumenkil sa’ Moroni 10:32–33. B’aanuhomaq sa’ komonil jun xtusulal li k’a’ru naraj li Kristo naq taqab’aanu ut li k’a’ru naxyeechi’i xb’aanunkil choq’ qe.

• Wotzeb’ li raqal malaj li seraq’ jwal neke’wulak chawu sa’ lix Hu laj Mormon li nakate’xtenq’a chi chalk rik’in li Kristo, ut kanab’eb’ li kok’al chixb’aanunkil ajwi’ a’an. Yaab’asi wi’chik rik’ineb’ li kok’al li raatin li profeet aj Jose Smith wan sa’ Xtikib’ankil lix Hu laj Mormon li naxye naq “jun li winq q’axal wi’chik taaruuq chixjilosinkil rib’ rik’in li Dios rik’in xpaab’ankil li na’leb’ wan chi sa’, chiru k’a’ruhaq chik chi hu.” Wotz lix nawom aach’ool chirix chan ru naq nak’ulman a’an sa’ laa yu’am.

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixpatz’b’al sa’ tij jun xnawomeb’ xch’ool kaw chirix lix Hu laj Mormon, ut chirix a’an chixwotzb’al lix nawom xch’ooleb’ rik’in junaq komon sa’eb’ lix junkab’al malaj rik’in junaq ramiiweb’.

Xchaab’ilob’resinkil li qak’utum

Waklesi ch’oolej chi wotzok. Li kok’al toj ka’ch’ineb’ xyu’am wan naq chaab’il lix na’leb’eb’ chirix li evangelio. Rik’in xwotzb’al li neke’xk’oxla neke’kawresiik chi aatinak rik’ineb’ li ramiiw chirix li evangelio (chi’ilmanq Li k’utuk jo’ li Kolonel, 30).

perel re kok’ k’anjel: lix Hu laj Mormon nak’utuk chirix li Jesukristo