laj Moroni natz’iib’ak chiruheb’ li perel ch’iich’ oor

Li xMinerva Teichert (1888–1976), Laj Moroni: Lix ch’otojik aj Nefita, 1949–1951, óleo en masonite, 34¾ x 47 pulgadas. Museo de Arte, Universidad de Brigham Young, 1969

7–13 diciembre

Moroni 7–9

“Li Kristo chiwaklesinq aawe”

Li xtzolb’al Moroni 7–9 rik’in tijok tixb’oq lix wankil li Santil Musiq’ej. A’an tatxtenq’a chixtawb’al ru li neke’raj ru li kok’al sa’ laa tzoleb’aal.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Jultika reheb’ li kok’al lix b’oqb’aleb’ chixb’aanunkil k’a’ruhaq chiru li tzolok sa’ li xamaan xnume’ malaj k’a’ruhaq xe’xtzol rik’ineb’ lix junkab’al sa’ kab’l chiru li xamaan a’in. Kanab’eb’ chixwotzb’al li k’a’ru xe’xtzol.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Moroni 7:33

Wi wan inpaab’aal, naru ninb’aanu yalaq k’a’ru naraj li Dios naq tinb’aanu.

Eb’ li kok’al li wankeb’ xpaab’aal chirix li Jesukristo ut wankeb’ xyo’onihom sa’ lix wankil naru neke’xb’aanu xninqal k’a’aq re ru naq te’k’anjelaq chiru a’an.

Kok’ k’anjel naru chi b’aanumank

• Yaab’asi Moroni 7:33 ut kanab’eb’ li kok’al chi xaqliik naq te’rab’i li aatin “tineepaab’.” Ch’olob’ naq naqak’ut li qapaab’aal chirix li Jesukristo naq noko’ab’in chiruheb’ lix taqlahom. Tenq’aheb’ li kok’al chixyiib’ankil chiru li pizarron jun xtusulaleb’ li k’a’aq re ru naraj li Jesus naq te’xb’aanu, jo’ ab’ink chiruheb’ lix na’ xyuwa’ malaj xyeeb’al li yaal. Ch’olob’ xyaalal naq li qapaab’aal chirix li Jesukristo naru nokoxtenq’a chi ab’ink chiruheb’ li taqlahom.

• K’e chi kutankil junjunqeb’ xjalam-uuch junaq kristiaan sa’ lix Hu laj Mormon (malaj jalaneb’ chik li loq’laj hu) li yoo chixb’aanunkil k’a’ruhaq aajel ru xb’aan naq kiwan xpaab’aal chirix li Jesukristo (chi’ilmanq, jo’ eetalil, Libro de obras de arte del Evangelio, ajl 19, 70, 78, 81). Tenq’aheb’ li kok’al chixseraq’inkil li esil eetalinb’il sa’ li jalam-uuch. Ye reheb’ naq xb’aan naq eb’ li kristiaan a’an ke’wan xpaab’aal chirix li Jesukristo, kik’eeman xwankileb’ re xb’aanunkil li k’a’ru kiraj ru a’an naq te’xb’aanu.

Moroni 7:41

Xpaab’ankil li Jesukristo naru naxk’e inyo’onihom.

Wankeb’ naab’aleb’ li kristiaan sa’ li ruchich’och’ li neke’reek’a naq maak’a’eb’ xyo’onihom. Chan ru naru nakatenq’aheb’ li kok’al nakatzoleb’ chixtawb’al xyo’onihomeb’ rik’in li Jesukristo?

Kok’ k’anjel naru chi b’aanumank

• Il ru ut ch’olob’ Moroni 7:41 chiruheb’ li kok’al, ut kanab’eb’ chixtaqsinkileb’ li ruq’ naq te’rab’i k’a’ruhaq kixye laj Mormon li tento taawanq wi’ qayo’onihom. Aatinaheb’ li kok’al chirix li yo’onink li nakaweek’a laa’at sa’ xk’ab’a’ li Jesukristo.

• Kanab’eb’ li kok’al chixk’oxlankil anihaq neke’xnaw ru li yoo chi nume’k sa’ junaq ch’a’ajkilal. Kanab’eb’ li kok’al chixyiib’ankil junaq jalam-uuch choq’ re li kristiaan a’an li naru naxjultika re naq tento taawanq xyo’onihom rik’in li Jesukristo.

Moroni 7:47

“Li tz’aqal rahok a’an li saq ruhil rahok narahok wi’ li Kristo.”

B’ar wan reheb’ laa numsihom sa’ laa yu’am li naru naxtenq’aheb’ li kok’al chixtzolb’al wank sa’ xyaalal rik’ineb’ li ras riitz’in ut xraab’aleb’?

Kok’ k’anjel naru chi b’aanumank

• Kanab’eb’ li kok’al chixka’sutinkil li ch’ol aatin a’in aawik’in: “Li tz’aqal rahok a’an li saq ruhil rahok narahok wi’ li Kristo” (Moroni 7:47). Tenq’aheb’ li kok’al chixk’oxlankil chan ru naq li Jesukristo kixk’ut lix rahom choq’ reheb’ li ras riitz’in (naru roksinkileb’ li jalam-uuch, jo’eb’ li wankeb’ sa’ Libro de obras de arte del Evangelio, ajl 55, 83, 84). Chan ru naq naxk’ut chiqu lix rahom choq’ qe? Ani naru naqak’ut wi’ li qarahom jo’ kixb’aanu li Jesus? Re rilb’al jun eetalil, k’ut li video “Mi hermano Hyrum” (ChurchofJesusChrist.org).

• Kanab’eb’ li kok’al chixyiib’ankileb’ xjalam-uucheb’ a’an naq yookeb’ chixk’utb’al xrahomeb’ choq’ re anihaq. Ye reheb’ naq naru neke’xk’e lix jalam-uuch b’ar wi’ te’ril ut te’xjultika xraab’aleb’ li ras riitz’ineb’ jo’ naxb’aanu li Jesus.

reetalil li k‘utuk

Xk’utb’al li tzol’leb’: Kok’al ak ninqeb’

Moroni 7:21–22, 25, 33

Nin’osob’tesiik naq wan inpaab’aal chirix li Jesukristo.

Laj Mormon kiraj naq eb’ li kristiaan te’xnaw naq eb’ li sachb’a-ch’oolej ink’a’ ke’oso’ naq kiraqe’ lix k’anjel li Kolonel sa’ ruchich’och’. Wi ta wanq qapaab’aal chirix li Jesukristo, tooruuq, rik’in lix tenq’, chixb’aanunkil yalaq k’a’aq re ru li taaraj a’an naq taqab’aanu—jo’eb’ ajwi’ li sachb’a-ch’oolej.

Kok’ k’anjel naru chi b’aanumank

• Tenq’aheb’ li kok’al chixtusb’al rajlil chiru li pizarron junjunqeb’ li “k’a’ru us” neke’qak’ul sa’ xk’ab’a’ lix evangelio li Jesukristo, jo’ li junelik junkab’al, li q’ajk rik’in li qaChoxahil Yuwa’, ut xk’ulb’al xkuyb’aleb’ li qamaak. Chirix a’an kanab’eb’ li kok’al chirilb’al ru Moroni 7:21–22 ut 25 re xsik’b’al chan ru naru naqak’ul chixjunileb’ li k’a’ru us a’an. Chan ru naru naqak’ut li qapaab’aal chirix li Jesukristo ut eb’ lix yeechi’ihom?

• Yaab’asi Moroni 7:33 choq’ reheb’ li kok’al ut k’e xb’oqb’aleb’ chi ab’ink re naq te’xtaw k’a’ru naru naqab’aanu naq wan qapaab’aal chirix li Jesukristo. Wi naru, wotz aanumsihom b’ar wi’ naq li paab’aal xatxtenq’a chixb’aanunkil li k’a’ru naraj li Dios naq taab’aanu. Tenq’aheb’ li kok’al chixk’oxlankil k’a’aq re ru xe’xk’ul sa’eb’ lix yu’am ut chixwotzb’aleb’. Chan ru naq li paab’aal chirix li Kristo kixk’ut xwankil sa’eb’ li numsihom a’in?

Moroni 7:40–41; 9:25–26

Naru taawanq inyo’onihom rik’in li Jesukristo, a’ ajwi’ chiruheb’ li ch’a’ajkil yale’k-ix.

Laj Mormon ut laj Moroni ke’xnumsi ninqi ch’a’ajkilal, a’b’an ke’xtaw xyo’onihomeb’ rik’in li Kolonel Jesukristo. Chan ru naru nakatenq’aheb’ li kok’al chixtawb’al xyo’onihomeb’ rik’in li Kristo naq t’anenaqaqeb’ xch’ool?

Kok’ k’anjel naru chi b’aanumank

• Tenq’aheb’ li kok’al chixyeeb’al junjunqeb’ li ch’a’ajkilal li te’xt’an raj xch’ooleb’ li kristiaan malaj te’risi raj xyo’onihomeb’. Kanab’eb’ li kok’al chirilb’al ru Moroni 7:40–41 ut 9:25–26, re xsik’b’al k’a’ruhaq li naru naxtenq’a anihaq li t’anenaq xch’ool. Ye reheb’ chan ru naq li Jesukristo ut lix evangelio nakate’xtenq’a chiruheb’ li ch’a’ajkil hoonal.

• Kanab’eb’ li kok’al chixtz’iib’ankil jun li hu choq’ re anihaq t’anenaq xch’ool re xtenq’ankil chixtawb’al xyo’onihom rik’in li Kristo, jo’ kixb’aanu laj Mormon choq’ re li ralal sa’ Moroni 9:25–26. Waklesi xch’ooleb’ li kok’al chiroksinkileb’ sa’eb’ lix hu aatin ut ch’ol aatin wankeb’ sa’eb’ li raqal a’in.

• Nujob’resi jun li lemil sek’ rik’in ha’ ut kuteb’ wiib’ k’a’aq re ru chi sa’—jun li taakanaaq sa’ xb’een li ha’ ut jun chik li taakanaaq chaq taq’a. Juntaq’eeta li k’a’aq re ru nanumxik rik’in jun kristian wan xyo’onihom rik’in li Kristo. Ilomaq ru sa’ komonil Moroni 9:25. Chan ru naq li Kristo “nokoxwaklesi” naq nokonume’ sa’eb’ li ch’a’ajkil yale’k-ix? Tenq’aheb’ li kok’al chixk’oxlankil chan ru naru neke’xk’uula li Kolonel ut eb’ lix k’utum neke’waklesin ch’oolej “sa’ lix k’a’uxleb’ chi junelik.”

Moroni 7:45–48

“Li tz’aqal rahok a’an li saq ruhil rahok narahok wi’ li Kristo.”

Lix chaab’ilob’resinkil li maatan re li tz’aqal rahok a’an jun jayalihom re chixjunil li yu’am. Chan ru naru nakawaklesi xch’ooleb’ li kok’al chixsik’b’al li saq ruhil rahok narahok wi’ li Kristo?

Kok’ k’anjel naru chi b’aanumank

• Kanab’eb’ li kok’al chixwotzb’al li neke’xk’oxla naq naraj naxye li aatin “tz’aqal rahok.” Kanab’ jun li ch’ina al chirilb’al ru Moroni 7:45. (Wi wan junjunqaq reheb’ li aatin sa’ li raqal a’an ch’a’aj xtawb’al ru, tenq’aheb’ li kok’al chixsik’b’aleb’ sa’ jun tusleb’ aatin.) Kanab’eb’ li kok’al chi aatinak chirixeb’ kristiaan neke’xnaw ru li neke’wan choq’ chaab’il eetalil re li tz’aqal rahok. K’a’ut naq li tz’aqal rahok nak’ab’a’iman “li saq ruhil rahok narahok wi’ li Kristo”? (Moroni 7:47). K’a’ru naxk’ut chiqu li raqal 48 chirix chan ru naru nokonujob’resiik rik’in li tz’aqal rahok? Waklesi xch’ooleb’ li kok’al chixpatz’b’al li tz’aqal rahok sa’ tij chiru li xamaan a’in, ut chixsik’b’al chan ru naru neke’xk’ut li tz’aqal rahok choq’ reheb’ li ras riitz’in.

• Tenq’aheb’ li kok’al chixk’oxlankil chan ru naq li Jesus kixk’ut li tz’aqal rahok (chi’ilmanq, jo’ eetalil, Lukas 23:34; Jwan 8:1–11; Eter 12:33–34). Chan ru naru taqab’aanu jo’ kixb’aanu a’an?

• Kanab’eb’ li kok’al chixtz’iib’ankileb’ xk’ab’a’ kristiaan neke’xnaweb’ ru chiruheb’ kok’ setb’il hu ut chixk’eeb’aleb’ sa’ jun li b’oolx malaj jun ch’ina sek’. Kanab’eb’ chixk’amb’al li sek’ sa’eb’ li rochoch, chixsik’b’al ru jun reheb’ li k’ab’a’ej rajlal kutan, ut chixb’aanunkil k’a’ruhaq li tixk’ut xrahomeb’ choq’ re li kristiaan a’an. Sa’ jun tzolok chalel, kanab’eb’ chixwotzb’al xnumsihomeb’ naq xe’k’anjelak chiruheb’ li kristiaan a’an.

reetalil li tzolok

Xb’oqb’aleb’ chi tzolok sa’ kab’l

Waklesi xch’ooleb’ li kok’al chixk’oxlankil anihaq li yoo chixsik’b’al xnimal xpaab’aal malaj xyo’onihom rik’in li Jesukristo. K’e xb’oqb’aleb’ li kok’al chixwotzb’al rik’in li kristiaan a’an k’a’ruhaq xtzol sa’ li tzoleb’aal chiru li kutan a’in.

Xchaab’ilob’resinkil li qak’utum

Waklesiheb’ xch’ool chi oxloq’ink. Jun na’leb’ aajel ru sa’ li oxloq’ink a’an xk’oxlankil li qaChoxahil Yuwa’ ut li Jesukristo. Naru nakajultika reheb’ li kok’al naq te’oxloq’inq rik’in xb’ichankil malaj xtz’uyinkil jun li b’ich, malaj rik’in xk’utb’al jun xjalam-uuch li Jesus.

perel re kok’ k’anjel: li tz’aqal rahok a’an li saq ruhil rahok narahok wi’ li Kristo