Kim, Taaqehin
Xch’olob’ankil li hoonal re b’ichank

“Xch’olob’ankil li hoonal re b’ichank ut li k’anjel reheb’ li kok’al sa’ li ch’utam re li loq’laj wa’ak,” Kim, Taaqehin—Choq’ re li Tzoleb’aal reheb’ li Kok’al: Lix Hu laj Mormon 2020 (2020)

“Xch’olob’ankil li hoonal re b’ichank,” Kim, Taaqehin—Choq’ re li Tzoleb’aal reheb’ li Kok’al: 2020

Jalam-uuch
eb’ li kok’al ut laj k’utunel neke’b’ichan

Xch’olob’ankil li hoonal re b’ichank ut li k’anjel reheb’ li kok’al sa’ li ch’utam re li loq’laj wa’ak

Ex awa’b’ejil reheb’ li Tzoleb’aal reheb’ li Kok’al ut aj b’eresinel b’ich,

Eb’ li b’ich reheb’ li kok’al numtajenaq xwankileb’ re xtenq’ankileb’ li kok’al chi tzolok chirix lix k’uub’anb’il na’leb’ li qaChoxahil Yuwa’ re sahil ch’oolejil ut chirixeb’ li yaalil na’leb’ re lix evangelio li Jesukristo. Naq eb’ li kok’al neke’b’ichan chirixeb’ li na’leb’ re li evangelio, li Santil Musiq’ej naxch’olob’ xyaalalileb’ li na’leb’ a’an. Eb’ li aatin ut li son te’kanaaq sa’ xk’a’uxleb’ ut raameb’ li kok’al chiru chixjunil lix yu’ameb’.

Sik’omaq eetenq’ankil xb’aan li Musiq’ej naq nekekawresi eerib’ chixk’utb’al li evangelio rik’in li b’ichank. Wotzomaq lix nawom eech’ool chirixeb’ li yaal nekeb’icha. Tenq’ahomaqeb’ li kok’al chixk’eeb’al reetal chan ru naq li b’ichank wan rilom rik’in li yookeb’ chixtzolb’al ut chixnumsinkil sa’ rochocheb’ ut sa’ li Tzoleb’aal reheb’ li Kok’al. Eb’ li kok’al ut lix junkab’aleb’ te’osob’tesiiq xb’aan lix yalb’al eeq’e.

Nekexqara ut naqab’antioxi eere lee k’anjel nekek’e chi k’eek’o eech’ool re xkawob’resinkileb’ ut xkolb’aleb’ li qachaq’al ru kok’al.

Li Jolomil Awa’b’ejil re li Tzoleb’aal reheb’ li Kok’al

Li tenq’anel na’leb’ chirix li k’anjel reheb’ li kok’al sa’ li ch’utam re li loq’laj wa’ak

Chi b’eresinb’il xb’aan li obiisp, li k’anjel reheb’ li kok’al sa’ li ch’utam re li loq’laj wa’ak nak’ulman sa’ jun reheb’ li oxib’ po sa’ xraqik li chihab’. Jo’ awa’b’ejil re li Tzoleb’aal reheb’ li Kok’al ut aj b’eresinel b’ich, ch’utub’omaq eerib’ sa’ xtiklajik li chihab’ rik’in lix tenq’ aj k’ehol na’leb’ li obiisp li naxjolomi li Tzoleb’aal reheb’ li Kok’al re k’uub’ank na’leb’ chirix li taab’aanumanq sa’ li k’anjel. Naq ak xek’uub’ eena’leb’, sik’ xliceens re xb’aanunkil.

Tento naq li k’anjel tixk’e xhoonaleb’ li kok’al chixyeeb’al resil li k’a’ru xe’xtzol a’an ut lix junkab’aleb’ sa’ ochoch ut sa’ li Tzoleb’aal reheb’ li Kok’al chirix lix Hu laj Mormon, jo’eb’ ajwi’ li b’ich li xe’xb’icha chiru li chihab’. K’oxlahomaq rik’in tijok b’arwan reheb’ li na’leb’ re li evangelio ut li b’ich li neke’xxaqab’ xwankil li xe’xtzol. Chiru li chihab’, tz’iib’ahomaq junjunqeb’ li raatin ut lix numsihomeb’ li kok’al re naq maare naru te’roksi sa’ li k’anjel. Kanab’omaqeb’ li kok’al chixwotzb’aleb’ raqal sa’eb’ li loq’laj hu, li seraq’, ut lix nawomeb’ xch’ool sa’ li k’anjel. Naq nekek’uub’ li k’anjel a’in, k’oxlahomaq chan ru naru tixtenq’aheb’ li komon chixk’oxlankil li Kolonel ut eb’ lix k’utum.

Wi ka’ajwi’ junjunqeb’ li kok’al wan sa’ li teep malaj uq’ej, k’oxlahomaq chan ru lix junkab’aleb’ taaruuq te’tz’aqonq sa’ li k’anjel rochb’eeneb’ lix kok’al. Jun komon sa’ li obispil naru taa’aatinaq chiru junpaat re xraqb’al li ch’utam.

Naq nekek’uub’ li k’anjel, chijultiko’q eere li na’leb’ a’in:

  • Ink’a’ us xb’aanunkil li práctica choq’ re li k’anjel tixmaq’ k’iila hoonal re tzolok sa’ li Tzoleb’aal reheb’ li Kok’al malaj li junkab’al.

  • Ink’a’ us roksinkileb’ li jalam-uuch, li disfraz, ut li video sa’ li ch’utam re li loq’laj wa’ak.

Chi’ilmanq Manual 2: Administración de la Iglesia, 11.5.4.

Xch’olob’ankil li hoonal re b’ichank

5 k’asal (awa’b’ejil re li Tzoleb’aal reheb’ li Kok’al): Li tijok sa’ xtiklajik, jun raqal sa’eb’ li loq’laj hu malaj eb’ lix raqalil li paab’aal, ut jun yaab’asinb’il aatin

20 k’asal (aj b’eresinel b’ich): Hoonal re b’ichank

Li awa’b’ejil re li Tzoleb’aal reheb’ li Kok’al ut aj b’eresinel b’ich neke’xsik’eb’ ru li b’ich rajlal po re xka’jultikankileb’ li na’leb’ yookeb’ chixtzolb’aleb’ li kok’al sa’ xtzoleb’aaleb’ ut sa’ rochocheb’. Jun xtusulaleb’ li b’ich li neke’xka’jultikaheb’ li na’leb’ a’in naru neke’tawman sa’ li hu a’in. Eb’ li b’ich a’an neke’tawman ajwi’ sa’eb’ li tusleb’ aatin re Kim, Taaqehin—Choq’ re li Tzoleb’aal reheb’ li Kok’al.

Naq nakak’uteb’ li b’ich chiruheb’ li kok’al, kanab’eb’ chixwotzb’al li ak xe’xtzol chirixeb’ li seraq’ ut li tzol’leb’ li k’utb’ileb’ sa’eb’ li b’ich. Maare taawaj xtz’ilb’al rixeb’ li tusleb’ aatin re Kim, Taaqehin—Choq’ re li Tzoleb’aal reheb’ li Kok’al yookeb’ chixtzolb’aleb’ li kok’al sa’ xtzoleb’aaleb’. A’in tatxtenq’a chixk’eeb’al reetaleb’ li seraq’ ut li tzol’leb’ yookeb’ chixtzolb’al re naq naru tatk’oxlaq chirix chan ru taatenq’aheb’ chi tzolok xkomon chik rik’in li b’ichank.

Sa’ li hoonal re b’ichank, naru ajwi’ taawoksiheb’ li b’ich ak xe’xtzol li kok’al ut eb’ li b’ich neke’wulak chiruheb’. Naq yookat chixtz’ilb’al rix jun b’ich, kanab’eb’ li kok’al chixwotzb’al li neke’xk’oxla ut neke’reek’a chirixeb’ li yaalil na’leb’ sa’eb’ li b’ich.

Li B’ichleb’aal choq’ reheb’ li Kok’al a’an li tz’aqal k’anjeleb’aal choq’ re li b’ichank sa’ li Tzoleb’aal reheb’ li Kok’al. Us ajwi’ roksinkileb’ li b’ich sa’ li b’ichleb’aal Eb’ li B’ich ut sa’ li Liahona. Wan naq eb’ li kok’al maare neke’raj xb’ichankileb’ li b’ich re li tenamit wankex wi’ malaj li b’ich re li Ralankil malaj Paswa li us xb’ichankileb’ sa’ domingo ut li us jo’ xchihab’eb’ li kok’al. Yalaq paay chik chi b’ich li taa’oksimanq sa’ li Tzoleb’aal reheb’ li Kok’al, tento naq k’ulub’anb’il xb’aan li obispil (chi’ilmanq Manual 2: Administración de la Iglesia [2010], 11.2.4).

Jalam-uuch
eb’ li kok’al neke’b’ichan

Chan ru taawanq li Tzoleb’aal reheb’ li Kok’al

Rajlal xamaan, nab’aanuman a’in sa’ li Tzoleb’aal reheb’ li Kok’al:

Hoonal re b’ichank25 k’asal

Xjalb’al li k’anjel5 k’asal

Eb’ li tzoleb’aal20 k’asal

Eb’ li neke’jolomink re jun li Tzoleb’aal reheb’ li Kok’al wankeb’ wi’ naab’al li kok’al neke’ru chixk’uub’ankileb’ li kok’al sa’ wiib’ ch’uut re naq jun ch’uut wan sa’eb’ li tzoleb’aal naq li ch’uut jun chik wan sa’ li hoonal re b’ichank. Chirix a’an, li wiib’ ch’uut neke’xjal xna’ajeb’. Wi nab’aanuman a’an, eb’ laj jolominel maare tento te’xjal b’ayaq xhoonalil li junjunq k’anjel tz’iib’anb’il arin a’ yaal li na’ajman ru choq’ reheb’.

Eb’ li b’ich choq’ re li hoonal re b’ichank

Enero

Febrero

Marzo

Abril

Mayo

Junio

Julio

Agosto

  • “Li jalb’a-k’a’uxlej,” B’ichleb’aal choq’ reheb’ li Kok’al, 142

  • “Ab’i, ab’i,” B’ichleb’aal choq’ reheb’ li Kok’al, 142

  • “Jun li profeet,” B’ichleb’aal choq’ reheb’ li Kok’al, 58–59

Septiembre

Octubre

Noviembre

Diciembre

Oksi li b’ich re xk’utb’al li tzol’leb’

Nab’aanuman li hoonal re b’ichank re naq eb’ li kok’al neke’ru chixtzolb’aleb’ li yaalil na’leb’ re li evangelio. Eb’ li na’leb’ a’in naru tatxmusiq’a naq nakak’uub’ chan ru xk’utb’aleb’ li na’leb’ re li evangelio li wankeb’ sa’eb’ li b’ich sa’ li b’ichleb’aal ut sa’eb’ li b’ich choq’ reheb’ li kok’al.

Rilb’aleb’ ru li raqal reheb’ li loq’laj hu. Choq’ re naab’al reheb’ li b’ich sa’ li B’ichleb’aal choq’ reheb’ li Kok’al ut Eb’ li B’ich, tz’iib’anb’ileb’ li raqal sa’eb’ li loq’laj hu wankeb’ rilom rik’in li b’ich. Tenq’aheb’ li kok’al chirilb’aleb’ ru junjunq reheb’ li raqal a’an, ut aatinanqex chirix chan ru naq eb’ li raqal reheb’ li loq’laj hu wankeb’ rilom rik’in li b’ich. Taaruuq ajwi’ taatz’iib’a xtusulal junjunq reheb’ li raqal reheb’ li loq’laj hu sa’ li pizarron ut taakanab’eb’ li kok’al chixjuntaq’eetankil li junjunq raqal rik’in jun li b’ich malaj rik’in jun raqal re jun li b’ich.

Xnujob’resinkil li yamyo. Tz’iib’a raatinul jun raqal re li b’ich sa’ li pizarron chixkanab’ankil xtz’iib’ankil junjunq reheb’ li aatin mas aajeleb’ ru sa’ li b’ich a’an. Chirix a’an, patz’ reheb’ li kok’al naq te’xb’icha li b’ich, ut naq te’rab’iheb’ li aatin li neke’xnujob’resiheb’ li yamyo. Naq neke’xnujob’resi li junjunq yamyo, aatinan chirixeb’ li na’leb’ re li evangelio nakatzol rik’ineb’ li aatin li yookex chixnujob’resinkil.

Li raatineb’ laj jolominel re li Iglees. Kanab’eb’ li kok’al chirab’inkil li raatin jun aj jolominel re li Iglees li naxk’ut li na’leb’ re li evangelio li juntaq’eet rik’in li na’leb’ k’utb’il sa’ li b’ich. Kanab’eb’ chixtaqsinkileb’ li ruq’ naq neke’rab’i k’a’ruhaq naxtenq’aheb’ chixtawb’al li yaalil na’leb’ yookeb’ chixb’ichankil. Kanab’eb’ chixwotzb’al li k’a’ru xe’rab’i.

Jalam-uuch
aj jolominel sa’ li hoonal re b’ichank

Xwotzb’al jun xnawom ch’oolej. Wotz sa’ junpaat lix nawom aach’ool chiruheb’ li kok’al chirixeb’ li yaalil na’leb’ re li evangelio li neke’tawman sa’ li b’ich. Tenq’aheb’ li kok’al chixtawb’al ru naq rik’in li b’ichank, naru neke’xwotz lix nawom xch’ooleb’ ut neke’reek’a li Musiq’ej.

Xaqliik jo’ aj yehol nawom. Kanab’eb’ li kok’al chixk’eeb’aleb’ xhoonal re xaqliik ut xwotzb’al li neke’xtzol sa’ li b’ich li yookeb’ chixb’ichankil malaj li neke’reek’a chirixeb’ li yaalil na’leb’ k’utb’il sa’ li b’ich. Patz’ reheb’ k’a’ru neke’reek’a naq yookeb’ chi b’ichank, ut tenq’aheb’ chixk’eeb’al reetal lix wankil li Santil Musiq’ej.

Roksinkileb’ li jalam-uuch. Patz’ reheb’ li kok’al naq tate’xtenq’a chixtawb’al malaj chixyiib’ankileb’ jalam-uuch li neke’xk’ul rib’ rik’in li aajel ruhil aatin malaj ch’ol aatin sa’ li b’ich. Kanab’eb’ chixwotzb’al chan ru naq eb’ li jalam-uuch neke’xk’ul rib’ rik’in li b’ich ut li k’a’ru k’utb’il sa’ li b’ich. Qayehaq, wi yookat chixk’utb’al li b’ich “Li b’arb’ookil ch’iich’ ” (Eb’ li B’ich, 176), taaruuq taak’eheb’ li jalam-uuch sa’ li tzoleb’aal li neke’xk’ut li aajel ruhil aatin sa’ li b’ich (jo’ b’arb’ookil ch’iich’, raatin li Dios, tixk’ut li b’e, ut aaleek). Kanab’eb’ li kok’al chixxokb’aleb’ li jalam-uuch ut chixtaqsinkileb’ sa’ iq’ sa’ tz’aqal xtusulaleb’ ru naq nekeb’icha li b’ich sa’ komonil.

Roksinkil jun ch’ina k’anjeleb’aal. Taaruuq taawoksi k’a’ruhaq li tixmusiq’a li aatinak chirix jun li b’ich. Qayehaq, li b’ich “Li paab’al” (B’ichleb’aal choq’ reheb’ li Kok’al, 50–51) na’aatinak chirix jun ch’ina iyaj. Taaruuq taak’ut jun li iyaj chiruheb’ li kok’al ut taaye reheb’ naq yooko chixk’anjelankil li qapaab’aal naq naqaw jun li iyaj; li na’leb’ a’in naru tixmusiq’a jun aatinak chirix chan ru naru taqak’anjela li qapaab’aal chirix li Jesukristo, jo’ ch’olob’anb’il sa’ li b’ich.

Xkanab’ankileb’ chixwotzb’al lix numsihomeb’ a’an. Tenq’aheb’ li kok’al chixk’eeb’al reetal chan ru naq laq’lookeb’ li na’leb’ k’utb’il sa’ li b’ich rik’in li neke’xnumsi rik’ineb’ li na’leb’ a’an sa’ xyu’ameb’. Qayehaq, rub’elaj naq teeb’icha “Sa’ li santil ochoch” (B’ichleb’aal choq’ reheb’ li Kok’al, 99), taaruuq taakanab’eb’ li kok’al chixtaqsinkileb’ li ruq’ wi jun sutaq rilomeb’ jun li santil ochoch. K’e xb’oqb’aleb’ chi k’oxlak chirix li neke’reek’a naq neke’ril jun li santil ochoch naq yookeb’ chi b’ichank.

Roksinkileb’ li patz’om. Wan naab’al paay chi patz’om naru taawoksi naq yookex chi b’ichank. Qayehaq, taaruuq taapatz’ reheb’ li kok’al li k’a’ru xe’xtzol sa’ li junjunq raqal re li b’ich. Taaruuq ajwi’ taapatz’ reheb’ naq te’xk’oxlaheb’ li patz’om li neke’sumeek xb’aan li b’ich. A’in naru texxk’am sa’ jun aatinak chirixeb’ li yaalil na’leb’ k’utb’il sa’ li b’ich.

Rab’inkil lix sumenkileb’ li patz’om. Patz’ reheb’ li kok’al naq te’ab’inq re xtawb’al xsumenkileb’ li patz’om jo’ “ani?” “k’a’ru?” “b’ar?” “jo’q’e?” malaj “k’a’ut?” Qayehaq, sa’ li b’ich “Kaw lix ch’ool laj Nefi” (B’ichleb’aal choq’ reheb’ li Kok’al, 64–65) naru neke’xk’e reetal ani aj-e kipatz’e’ xxokb’al chaq li perel ch’iich’, ut b’ar, jo’q’e, chan ru, ut k’a’ut naq ki’ab’in chiru li Qaawa’. Taaruuq ajwi’ taapatz’ reheb’ li kok’al naq te’rab’iheb’ li aajel ruhil aatin malaj te’rajla rik’in ru’uj ruq’eb’ jarub’ sut naq xe’rab’i jun aatin.

Xtenq’ankileb’ li kok’al chixtzolb’aleb’ ut chixjultikankileb’ li b’ich re li Tzoleb’aal reheb’ li Kok’al

Eb’ li kok’al neke’xtzol jun b’ich naq neke’rab’i ut neke’xb’icha k’iila sut. Rajlal sut naq eb’ li kok’al te’xtzol jun ak’ b’ich, b’ichaheb’ li raatinul li b’ich choq’ reheb’—ink’a’ yal taarileb’ ru malaj taayaab’asiheb’. A’in naxtenq’aheb’ li kok’al chixtzolb’al lix ja’ajil li b’ich chi junajinb’il rik’in li raatinul. Chirix naq ak xtzolman jun li b’ich, tz’il rix wi’chik k’iila sut chiru li chihab’. Tz’iib’anb’il arin junjunq na’leb’ re xtenq’ankileb’ li kok’al chixtzolb’al ut chixtz’ilb’al rixeb’ li b’ich.

Xyiib’ankileb’ li ninqi hu. K’utb’esi li ninqi hu tz’iib’anb’ileb’ wi’ li raatinul li junjunq raqal re li b’ich malaj wankeb’ wi’ li jalam-uuch li neke’reetaliheb’ li aatin. Naq yookeb’ chi b’ichank li kok’al, muq junjunq reheb’ li aatin malaj jalam-uuch toj reetal naq neke’ru chixb’ichankil chixjunil li b’ich chi maak’a’ xtenq’eb’ li ninqi hu. Taaruuq ajwi’ taakanab’eb’ li kok’al chatenq’ankil sa’ xyiib’ankileb’ li ninqi hu.

Xk’utb’al chan ru nab’ichaman li b’ich. Re xtenq’ankileb’ li kok’al chixtzolb’al xja’ajil li b’ich, ye’ laa wuq’ chawu, ut naq yookex chi b’ichank, taqsi laa wuq’ malaj kub’si laa wuq’ a’ yaal jo’ chanru xja’ajil li b’ich.

Xka’sutinkileb’ li aatin. Kanab’eb’ li kok’al chixka’sutinkileb’ li aatin yookat chixb’ichankil laa’at. B’icha jun ch’ol aatin malaj jun tzol re li b’ich choq’ reheb’ li kok’al, ut kanab’eb’ chixka’sutinkileb’ li aatin a’an chi b’ichanb’il.

Xjalb’al chan ru nab’ichaman li b’ich. B’ichaheb’ li b’ich chi k’iila paay chan ru, jo’ chi hasb’anb’il, chi tz’uyinb’il, chixpoq’onkil xsa’ aawuq’ rik’in li b’ich, xjalb’al ma junpaat ma timil naq yookat chi b’ichank, malaj b’ichank chi chunchu malaj chi xaxqo. Taaruuq ajwi’ taayiib’ jun kaaxukuut rik’in hu ut taatz’iib’a jalan jalanq paay chan ru xb’ichankil li b’ich sa’ li junjunq pak’al. Kanab’ jun reheb’ li kok’al naq tixtolk’osi li kaaxukuut re xsik’b’al chan ru te’b’ichanq li kok’al.

B’ichank sa’ kok’ ch’uut. K’e re li junjunq tzoleb’aal malaj al jun ch’ol aatin re xb’ichankil chi xaxqo, toja’ naq te’xjal li ch’ol aatin rik’ineb’ lix komon toj reetal naq li junjunq tzoleb’aal malaj al xwan xhoonal chixb’ichankil li junjunq ch’ol aatin.

Roksinkileb’ li uq’ej. Kanab’eb’ li kok’al chixk’oxlankil chan ru reek’asinkileb’ li ruq’ re xtenq’ankileb’ chixjultikankil li raatinul jun li b’ich. Qayehaq, naq nekeb’icha li xkab’ raqal re “Raab’ilin xb’aan li Dios sa’ choxa,” (B’ichleb’aal choq’ reheb’ li Kok’al, 16–17), taaruuq taakanab’eb’ li kok’al chixkutb’aleb’ li xnaq’eb’ ru chi ru’uj ruq’eb’, chireek’asinkileb’ rib’ jo’ chanchan jun li peepem, ut chixk’eeb’aleb’ li ruq’ chirix lix xikeb’. Patz’ reheb’ naq te’xk’e ruq’eb’ sa’ xb’een li raameb’ naq neke’xb’icha: “Raab’ilin xb’aan li Dios sa’ choxa.”

Neke’b’ichan li xqa’al, neke’b’ichan li teelom. Yiib’ xjalam-uuch jun al teelom ut xjalam-uuch jun xqa’al, ut latz malaj oksi li cinta re xk’eeb’aleb’ li jalam-uuch sa’ kok’ che’. Naq nekeb’icha jun li b’ich, taqsi jun reheb’ li jalam-uuch re xk’utb’esinkil ani te’b’ichanq.

Kutuk chi sa’ li chakach. K’eheb’ junjunq li chakach malaj sek’ li wan rajleb’ sa’ li tzoleb’aal—li rajlankileb’ li chakach juntaq’eet rik’in jarub’ li raqal wankeb’ sa’ li b’ich. Kanab’ naq jun reheb’ li kok’al tixkut k’a’ruhaq chi sa’ malaj nach’ rik’in jun reheb’ li chakach malaj sek’. Kanab’eb’ li kok’al chixb’ichankil li raqal li juntaq’eet li rajl rik’in li rajl li chakach malaj sek’.

Xjuntaq’eetankil li jalam-uuch rik’in li ch’ol aatin. Tz’iib’a li junjunq tzol re jun li b’ich sa’ kok’ hu, ut taweb’ li jalam-uuch li neke’reetali li junjunq tzol. K’eheb’ li jalam-uuch sa’ jun xpak’al li tzoleb’aal ut li kok’ hu sa’ li junpak’al chik. B’ichahomaq li b’ich, ut kanab’eb’ li kok’al chixjuntaq’eetankileb’ li jalam-uuch rik’ineb’ li aatin.

Jun chik aatin: Li k’a’ru yeeb’il chirixeb’ li teep ut li obispil nak’anjelak ajwi’ choq’ reheb’ li uq’ej ut li awa’b’ejil re li uq’ej.

Isi reetalil