“30 noviembre–6 diciembre. Moroni 1–6: “Re te’kanaaq sa’ li tiikil b’e,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“30 noviembre–6 diciembre. Moroni 1–6,” Kim, Taaqehin—Choq’ reheb’ li komon ut li junkab’al: 2020
Li xMinerva Teichert (1888–1976), Laj Alma nakub’sin ha’ sa’ li ha’ Mormon, 1949–1951, óleo en masonite, 35⅞ x 48 pulgadas. Museo de Arte, Universidad de Brigham Young, 1969
30 noviembre–6 diciembre
Moroni 1–6
“Re te’kanaaq sa’ li tiikil b’e”
Laj Moroni kixtz’iib’a li kiroyb’eni naq “maare taawanq xloq’al … sa’ junaq kutan chalel” (Moroni 1:4). K’a’ru nakataw sa’ Moroni 1–6 li wan xloq’al choq’ aawe? Tz’iib’a li nakataw, ut k’oxla xwotzb’al rik’in anihaq li maare tixtaw ajwi’ naq wan xloq’al choq’ re.
Xtz’iib’ankil li nakak’oxla
Chirix xchoyb’al lix tz’iib’ahom lix yuwa’ chirixeb’ laj Nefita ut chirix xk’osb’al ru li esil reheb’ laj Jaredita, laj Moroni kixk’oxla naq ak raqenaq chik lix k’anjel (chi’ilmanq Moroni 1:1). K’a’ chik ru kiru raj chi yeemank chirixeb’ li wiib’ chi tenamit li ke’sachman chi tz’aqal? A’b’an laj Moroni kiril li kutan wanko wi’ (chi’ilmanq Mormon 8:35), ut kimusiq’aak “chixtz’iib’ankil junjunq chik li k’a’aq re ru, re naq maare taawanq xloq’al … sa’ junaq kutan chalel” (Moroni 1:4). A’an kixnaw naq chal re jun nimla q’etok paab’ank sa’ chixjunil li ruchich’och’, rochb’een a’an li sachok na’leb’ chirixeb’ li k’ojob’anb’il k’anjel re li tijonelil ut chirix li paab’ank. Maare xb’aan a’in naq a’an kixtz’iib’a li saqen ruhil na’leb’ chirix li loq’laj wa’ak, li kub’iha’, xk’eeb’al li maatan re li Santil Musiq’ej, ut li osob’tesink re ch’utlaak rik’in ech aj paab’anelil “re te’kanaaq sa’ li tiikil b’e, re … te’xkanab’ rib’ ka’ajwi’ chiru lix k’ulub’ejil li Kristo, a’an aj yoob’anel ut aj choyonel re lix paab’aaleb’ ” (Moroni 6:4). Eb’ li chaq’al ru na’leb’ jo’eb’ a’in nokohe’xk’e chixb’antioxinkil naq li Qaawa’ kixkol lix yu’am laj Moroni re naq kiru “chixtz’iib’ankil junjunq chik li k’a’aq re ru” (Moroni 1:4).
Li na’leb’ re xtzolb’aleb’ li loq’laj hu aajunes
Eb’ lix tzolom li Jesukristo neke’kana chi tiik chi paab’ank, us ta neke’xnumsi li ch’a’ajkilal.
Choq’ re junjunqeb’, moko ch’a’aj ta li wank chi tiik chi paab’ank naq sa wankeb’ ut maak’a’ li ch’a’ajkilal. A’b’an, jo’ xtzolom li Jesukristo, tento tookanaaq chi tiik chi paab’ank naq naqak’ul ajwi’ li ch’a’ajkilal ut lix yalb’al qix. Naq nakawil ru Moroni 1, k’a’ru nawulak chawu chirix lix tiikilal laj Moroni sa’ xpaab’ankil li Qaawa’ ut sa’ xb’aanunkil li b’oqb’il wi’? Chan ru naru taataaqe lix b’aanuhom a’an?
Tento te’b’aanumanq li k’ojob’anb’il k’anjel re li tijonelil jo’ chanru taqlanb’il xb’aan li Qaawa’.
Naq kik’anjelak sa’ ruchich’och’, li Kolonel kixk’ul ut kixk’anjela loq’laj k’ojob’anb’il k’anjel, jo’ li kub’iha’ (chi’ilmanq Mateo 3:13–17; JJS, Jwan 4:1–3 [sa’ xraqik li K’utul Raqal reheb’ li Loq’laj Hu]), li k’ojob’ank sa’ li tijonelil (chi’ilmanq Markos 3:13–19), ut li loq’laj wa’ak (chi’ilmanq Mateo 26:26–28). A’b’an, xmaak li Nimla Q’etok Paab’ank, naab’aleb’ sa’ li kutan a’in sachso xna’leb’eb’ chirix chan ru tento te’b’aanumanq li k’ojob’anb’il k’anjel—jo’ ajwi’ chirix ma neke’ajman ru. Sa’ Moroni 2–6, laj Moroni naxtz’iib’a li aajel ruhil na’leb’ chirix junjunq reheb’ li k’ojob’anb’il k’anjel re li tijonelil, li naru te’xtenq’a chixtuqub’ankil li sachok na’leb’ a’an. K’a’ruheb’ li na’leb’ nakak’ul naq nakattzolok chirixeb’ li k’ojob’anb’il k’anjel sa’eb’ li ch’ol a’in? Wahe’ junjunqeb’ li patz’om li maare tate’xtenq’a chi tzolok:
-
Li k’ojob’ank choq’ komon (Moroni 2; 6:4).K’a’ru nakatzol rik’in lix ch’olob’ahom li Kolonel sa’ Moroni 2:2 chirix li k’ojob’ank choq’ komon? K’a’ru naraj naxye naq nakak’oxla naq “k’anjelanb’ileb’ ut ch’ajob’resinb’ileb’ xb’aan lix wankil li Santil Musiq’ej”? (Moroni 6:4).
-
Li k’ojob’ank sa’ li tijonelil (Moroni 3).K’a’ru nakataw sa’ li ch’ol a’in li naru tixtenq’a junaq chixkawresinkil rib’ re taak’ojob’aak sa’ li tijonelil? K’a’ru nakataw li tixtenq’a junaq chixb’aanunkil jun li k’ojob’ank?
-
Li loq’laj wa’ak (Moroni 4–5; 6:6).K’e reetaleb’ li yeechi’ihom sa’eb’ li tij re li loq’laj wa’ak (chi’ilmanq Moroni 4:3; 5:2), ut k’oxlan chirix k’a’ru yookat chixb’aanunkil re xpaab’ankil laa yeechi’ihom. K’a’ru naru taab’aanu naq mas wi’chik taak’e xb’oqb’al lix wankil li Musiq’ej naq yookat chi tz’aqonk sa’ li loq’laj wa’ak?
-
Li kub’iha’ (Moroni 6:1–3).K’a’ru naru taab’aanu re naq toj yooqat chixb’aanunkil chixjunil li na’ajman ru re xk’ulb’al li kub’iha’ jo’ chanru tz’iib’anb’il sa’eb’ li raqal a’in, us ta ak kub’enaq aaha’? K’a’ru neke’xye aawe li raqal a’in chirix k’a’ru naraj naxye li wank jo’ komon sa’ lix Iglees li Jesukristo?
Rik’in li k’a’ru xatzol, ma taajal chan ru nakatk’oxlak chirixeb’, nakattz’aqon sa’eb’, malaj nakawresiheb’ jalan re xk’ulb’aleb’ li k’ojob’anb’il k’anjel a’in? K’a’ut naq aajel ru naq eb’ li k’ojob’anb’il k’anjel a’in te’k’anjelamanq “jo’ chanru lix taqlahom li Kristo”? (Moroni 4:1).
Chi’ilmanq ajwi’ “K’ojob’anb’il k’anjel,” Li K’utul Raqal reheb’ li Loq’laj Hu.
Li Jesus kixk’ut chan ru te’b’aanumanq li k’ojob’anb’il k’anjel.
Eb’ lix tzolom li Jesukristo neke’xk’oxla lix chaab’ilal li raameb’ chirib’ileb’ rib’.
Yaal naq chiqajunil tento “taqak’anjela li qakolb’al” qajunes (Mormon 9:27), a’ut laj Moroni kixk’ut ajwi’ naq li “ch’utlaak chi kok’ aj xsa’ ” rik’ineb’ li qech aj paab’anel naru tooxtenq’a chi “kanaak sa’ li tiikil b’e” (Moroni 6:4–5). Naq nakawil ru Moroni 6:4–9, k’oxlaheb’ li osob’tesink neke’chal rik’in li “k’ehe’k sa’ ajl sa’ xyanq li tenamit re lix iglees li Kristo” (Moroni 6:4). K’a’ru naru taab’aanu re naq li nakak’ul laa’at ut li neke’xk’ul laa was aawiitz’in chanchanaq li ch’olob’anb’il xb’aan laj Moroni, maak’a’ naxye ma jolominelat malaj ink’a’?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. A’in junjunq li na’leb’ naru taab’aanu.
Moroni 1; Moroni 6:3
K’a’ru naraj naxye “xtz’eqtaanankil xyaalal li Kristo?” (Moroni 1:2–3). Chan ru naru naqak’ut naq “k’eek’o qach’ool chi k’anjelak chiru toj sa’ roso’jik”? (Moroni 6:3). Wotz resileb’ li ani nakanaw ru li k’eek’ookeb’ xch’ool chi k’anjelak chiru.
Moroni 4:3; Moroni 5:2
Rik’in rilb’aleb’ ru li tij re li loq’laj wa’ak jo’ junkab’al, taaruuq tex’aatinaq chirix chan ru xk’ulb’al li loq’laj wa’ak rik’in xnimal chik li oxloq’ink. Maare eb’ li komon sa’ li junkab’al te’ruuq chi aatinak chirixeb’ li ch’ol aatin neke’tawman sa’eb’ li tij li jwal neke’wulak chiruheb’. Te’ruuq ajwi’ chixtz’iib’ankil li neke’xk’oxla chirixeb’ li ch’ol aatin a’an, malaj chixyiib’ankil jalam-uuch li neke’tenq’an reheb’ chixk’oxlankil li Kolonel. Te’ruuq chixk’amb’al chaq li xe’xtz’iib’a sa’ li ch’utam re li loq’laj wa’ak re xtenq’ankileb’ chixjayalinkil lix k’oxlahomeb’ rik’in li Kolonel. Ye re laa junkab’al k’a’ru nakaweek’a chirix li loq’laj wa’ak ut lix mayej li Kolonel.
Moroni 6:1–4
K’a’ru naraj naxye naq “yot’b’il qach’ool ut tuulan li qamusiq’ ”? (Moroni 6:2). Chan ru naq a’in nokoxtenq’a chixkawresinkil qib’ choq’ re li kub’iha’? Chan ru naru tooxtenq’a chirix naq ak kub’enaq qaha’?
Moroni 6:4–9
Jo’ chanru naxye sa’eb’ li raqal a’in, k’a’ruheb’ junjunq li osob’tesink li neke’chal naq “nokok’ehe’ sa’ ajl sa’ xyanq li tenamit re lix iglees li Kristo”? (Moroni 6:4). K’a’ut naq naqaj ru li Iglees?
Moroni 6:8
K’a’ru naxk’ut li raqal a’in chirix li jalb’a-k’a’uxlej? K’a’ru naraj naxye xsik’b’al xkuyb’al li qamaak “chi anchal qajom”? (Moroni 6:8). K’oxla xb’ichankil jun b’ich chirix li kuyuk maak, jo’ “Chinaatenq’a re tinkuyeb’ lix maak” (B’ichleb’aal choq’ reheb’ li Kok’al, 52).
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Sik’eb’ li reetalil lix rahom li Dios. Li Elder M. Russell Ballard kixye, “Li evangelio a’an jun evangelio re rahok—rahok choq’ re li Dios ut choq’ re li qas qiitz’in” (“El amor de Dios y sus creaciones,” Liahona, julio 1988, 58). Naq nakawileb’ ru li loq’laj hu, k’oxla xtz’iib’ankil resil malaj xb’onb’aleb’ li eetalil li neke’xk’ut rahom li Dios choq’ aawe ut choq’ re chixjunileb’ li ralal xk’ajol.
Laj Moroni sa’ li ochoch pek, xb’aan laj Jorge Cocco