laj Jose, li xMaria, ut li k’uula’al Jesus sa’ xna’ajeb’ li xul

K’e reetal lix Karneer li Dios, xb’aan laj Walter Rane

21–27 diciembre

Li Ralankil

“Aʼan taachalq saʼ li ruchichʼochʼ re xtojbʼal rix lix tenamit”

Li Ralankil a’an jun hoonal re xk’oxlankil ut xb’antioxinkil lix yo’lajik li qaKolonel, Jesukristo. Chiru li xamaan a’in, naq nakawil ru resil ut naq nakak’oxla lix yo’lajik ut lix yu’am, k’oxla chan ru naq xtzolb’al lix Hu laj Mormon chiru li chihab’ a’in xkawob’resi lix nawom aach’ool chirix naq a’an aj Kolol re li ruchich’och’. Tz’iib’aheb’ li na’leb’ nakak’ul.

Xtz’iib’ankil li nakak’oxla

Chalen laj Nefi toj laj Moroni, chixjunileb’ li profeet sa’ lix Hu laj Mormon k’eek’ookeb’ xch’ool chirix li santil ajom tz’iib’anb’il chi k’osb’il ru sa’ li perel re xjolomil aatin re li hu: “Re te’q’unb’esiiq xch’ool [chixjunileb’] naq li Jesus a’an li Kristo.” Jun profeet kiril li Jesus jo’ jun musiq’ej naq maji’ nayo’la, ut jun chik kiril lix yo’lajik ut lix k’anjel sa’ k’utb’esinb’il matk’. Jun kixxaqab’ rib’ sa’ xb’een jun xaqxookil tz’ak re xyaab’asinkileb’ li reetalil lix yo’lajik ut lix kamik, ut jun chik kixwiq’ib’ rib’ chiru naq waklijenaq chi yo’yo, ut kixch’e’eb’ li k’ob’olal sa li ruq’, li roq, ut xk’atq xsa’. Chixjunqaleb’ ke’xnaw li aajel ruhil yaal a’in: “Maajun chik b’e wan chi moko chan chik ru taaruuq taakole’q wi’ li winq, ka’ajwi’ chi tojb’il rix xmaak xb’aan xkik’el li Jesukristo, li … taachalq re xtojb’al rix li ruchich’och’ ” (Helaman 5:9).

Jo’kan naq sa’eb’ li kutan a’in re Ralankil, naq eb’ laj paab’anel chiru li ruchich’och’ neke’xninq’ehi lix chaab’ilal ut lix rahom li Dios naq kixtaqla li Ralal, k’oxla chan ru naq lix Hu laj Mormon xkawob’resi laa paab’aal chirix li Kristo. Naq nakatk’oxlak chirix lix yo’lajik, k’oxlan chirix k’a’ut naq kik’ulun arin ut chan ru naq lix k’ulunik xjal laa yu’am. Toja’ naq tatruuq chixnumsinkil li tz’aqal sahilal re li Ralankil—li maatan naxk’e aawe li Jesukristo.

reetalil li tzolok aajunes

Li na’leb’ re xtzolb’aleb’ li loq’laj hu aajunes

1 Nefi 11:13–36; Mosiah 3:5–10; Helaman 14:1–13; 3 Nefi 1:4–22

Li Jesukristo kik’ulun sa’ ruchich’och’ re taawanq choq’ inKolonel.

Wankeb’ naab’al li neke’ril ru resil lix yo’lajik li Kolonel sa’ li Ak’ Chaq’rab’ chiru xq’ehil li Ralankil, a’b’an naru ajwi’ te’tawmanq li chaab’il profeetil aatin chirix a’in sa’ lix Hu laj Mormon. Qayehaq, neke’tawman li profeetil aatin chirix lix yo’lajik ut lix k’anjel li Kolonel sa’ 1 Nefi 11:13–36; Mosiah 3:5–10; Helaman 14:1–13; ut 3 Nefi 1:4–22. K’a’ruheb’ li na’leb’ chirix li Jesukristo li nachal aawik’in naq nakawileb’ ru li raqal a’an ut naq nakatk’oxlak chirix k’a’ru xyaalalil li reetalil lix yo’lajik? Chan ru naq lix nawom xch’ooleb’ li najteril profeet sa’ li ch’och’ America neke’xkawob’resi lix nawom aach’ool laa’at chirix li Kristo ut lix k’anjel a’an?

Chi’ilmanq ajwi’ Mateo 1:18–25; 2; Lukas 2.

2 Nefi 2:6; Alma 7:7–13; 11:40; Helaman 5:9; 14:16–17

Li Jesukristo a’an aj Tojol rix chixjunileb’ li winq.

Ink’a’ raj taqaninq’ehi lix yo’lajik li Jesukristo wi ta maak’a’ lix mayej re xtojb’al rix li maak, li nokoxkol wi’ chiru li maak ut li kamk, li naxk’ojob’ wi’ qach’ool sa’ li qach’a’ajkilal, ut li nokoxtenq’a wi’ “chi tz’aqlok qe qu rik’in” (Moroni 10:32). K’a’ru xatzol sa’ lix Hu laj Mormon chiru li chihab’ a’in chirix lix wankil li Kolonel re xtojb’al aawix? Ma wankeb’ li seraq’ malaj li k’utum li jultikeb’ aawe? K’oxla li neke’xk’ut li raqal a’in chawu chirix lix k’anjel li Kolonel re xtojb’al qix: 2 Nefi 2:6; Alma 7:7–13; 11:40; ut Helaman 5:9; 14:16–17. K’a’ru eek’asinb’ilat chixb’aanunkil re xk’utb’al aab’antioxihom chiru a’an? (Sa’ Navidad.ComeUntoChrist.org wankeb’ junjunq li na’leb’ li naru tate’xtenq’a chixtikib’ankil.)

1 Nefi 6:4; 19:18; 2 Nefi 25:23, 26; 33:4, 10

Lix Hu laj Mormon naxch’olob’ xyaalal li Jesukristo.

“Jun chik Ch’olob’anb’il Esil chirix li Jesukristo” maawa’ ka’ajwi’ jun chik k’ab’a’ej choq’ re lix Hu laj Mormon; naxk’ut xyaalal lix choxahil k’anjel. K’oxla li nakatzol rik’ineb’ li raqal a’in reheb’ li loq’laj hu chirix lix k’anjel lix Hu laj Mormon re xch’olob’ankil xyaalal li Kristo: 1 Nefi 6:4; 19:18; ut 2 Nefi 25:23, 26; 33:4, 10.

Naru nakatz’iib’a sa’ jun diario chan ru naq xtzolb’al lix Hu laj Mormon chiru li chihab’ a’in xatxnach’ob’resi rik’in li Kristo. Eb’ li ch’ol aatin a’in maare naru tate’xtenq’a chixtikib’ankil laa tz’iib’ahom:

• “Jun ak’ na’leb’ xintzol chirix li Kolonel sa’ li chihab’ a’in, a’an naq …”

• “Rilb’al ru [jun raqal chirix li Kolonel] xjal chan ru naq laa’in …”

• “Li kristiaan [malaj seraq’] mas nawulak chiwu sa’ lix Hu laj Mormon kixk’ut chiwu naq li Kolonel …”

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.

1 Nefi 11:13–23; Mosiah 3:5–10; Helaman 14:1–13; 3 Nefi 1:4–22

Eb’ li kok’al maare taawulaq chiruheb’ xyiib’ankileb’ xjalam-uuch li k’a’ru neke’rab’i naq nakayaab’asiheb’ li seraq’ chirix lix yo’lajik ut lix k’anjel li Kristo sa’ 1 Nefi 11:13–23; Mosiah 3:5–10; Helaman 14:1–13; ut 3 Nefi 1:4–22. Chirix a’an, laa kok’al te’ruuq chixka’sutinkileb’ li seraq’ rik’ineb’ li jalam-uuch xe’xyiib’.

“Li Jesukristo a’an li maatan”

Re xtenq’ankil laa junkab’al chixk’oxlankil li maatan kixk’e qe li Dios naq kixtaqla li Ralal, tatruuq chixlanb’al jun xjalam-uuch li Jesukristo jo’ jun maatan re Ralankil. Eb’ li komon sa’ li junkab’al taaruuq te’aatinaq chirixeb’ li maatan xe’xk’ul sa’ Ralankil li mas xe’wulak chiruheb’ malaj li maatan mas te’raj xk’ulb’al. Chirix a’an taaruuq te’risi xlanb’al lix jalam-uuch li Kristo ut te’ruuq chi aatinak chirix chan ru naq li Kristo a’an jun maatan nim xloq’al choq’ qe. Li video “Él es la dádiva” (ChurchofJesusChrist.org) naru texxtenq’a chi aatinak chiru chan ru naru teetaw, teek’uula, ut teewotz li maatan re li Kolonel jo’ junkab’al chiru li Ralankil a’in.

Maare taak’anjelaq ajwi’ re laa junkab’al xk’oxlankil jun “maatan” te’raj raj xk’eeb’al re li Kolonel, jo’ xyalb’aleb’ xq’e re naq chaab’ilaqeb’ xch’ool chirib’ileb’ rib’ malaj xyalb’aleb’ xq’e chi numtaak sa’ xb’een junaq majelal. Naru taaye reheb’ li komon sa’ li junkab’al naq te’xtz’iib’a lix na’leb’eb’, te’xlaneb’ jo’ maatan, ut te’xk’eheb’ chixsutam jun xjalam-uuch li Kolonel.

Li Musiq’ej re li Ralankil

Maare taawulaq cheru xk’uub’ankil kok’ k’anjel naru teeb’aanu jo’ junkab’al sa’eb’ li kutan rub’elaj li Ralankil re naq teereek’a lix Musiq’ li Kristo, jo’ k’anjelak chiru anihaq malaj xb’ichankileb’ sa’ komonil li b’ich re Ralankil. (Re xtawb’al eena’leb’, chi’ilmanq navidad.ComeUntoChrist.org.)

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li qak’utum

Patz’on chirixeb’ li b’oqb’al chi k’anjelak. “Naq nakatpatz’ok chirix jun b’oqb’al chi k’anjelak, nakak’ut chiruheb’ li komon [sa’ laa junkab’al] naq yookat chixk’oxlankileb’, ut chixk’oxlankil chan ru neke’osob’tesiik xyu’ameb’ xb’aan li evangelio. Jo’kan ajwi’ nakakanab’eb’ chixwotzb’al li k’a’ru xe’xk’ul sa’ xyu’am, li nakawob’resink re xk’eek’ookilaleb’ xch’ool ut naxkanab’eb’ chixtenq’ankil rib’ chirib’ileb’ rib’ sa’ xyu’aminkil li evangelio” (Li k’utuk jo’ li Kolonel, 35).

jun li anjel naxk’ut li xMaria chiru laj Nefi sa’ k’utb’esinb’il matk’

Lix k’utb’esinb’il matk’ laj Nefi chirix li xMaria, xb’aan li xJudith A. Mehr