Xtiqb’al li aatin A

Chan ru naq li Musiq’ej naxk’ut chiwu naq tz’aqal yaal lix Hu laj Mormon?

Maare ak xawab’i resil lix yeechi’ihom laj Moroni choq’ reheb’ chixjunil li neke’ril ru lix Hu laj Mormon: “Wi texpatz’oq rik’in x’anchalil eech’ool, chi tiik eerajom, chi wank eepaab’aal chirix li Kristo, a’an tixk’utb’esi cheru li yaal chirix, rik’in lix wankil li Santil Musiq’ej ” (Moroni 10:4). A’b’anan, k’a’ pe ru naraj naxye xnawb’al li yaal “rik’in lix wankil li Santil Musiq’ej”? Chan ru naru taanaw naq yoo chi aatinak aawik’in li Santil Musiq’ej?

Chijultiko’q aawe naq jalan wi’ chan ru nokoraatina li Santil Musiq’ej rik’in chan ru noko’aatinak chiqib’il qib’. A’ut, laa Choxahil Yuwa’ naraj aatenq’ankil chixtzolb’al chan ru xk’eeb’al reetal li Musiq’ej. A’an xk’e aawe lix Hu laj Mormon, b’ar wi’ junjunq li moos tiikeb’ xch’ool ke’xtz’iib’a resil xnumsihomeb’ rik’in lix yaab’ xkux li Qaawa’.

Qayehaq, laj Nefi kixye reheb’ li ras naq li Qaawa’ kiraatinaheb’ “rikʼin jun li chʼina xyaabʼ kuxej qʼun naʼaatinak,” us ta maare maawa’ jun xyaab’ kuxej li na’ab’iman sa’ xxikeb’. Jo’kan ajwi’, laj Nefi kixye naq eb’ li ras “numenaq reek’ahomeb’ ” ut ink’a’ ke’ru “chireek’ankil li raatin” (1 Nefi 17:45, tiqb’il xkawil li aatin). Laj Enos kixye naq re xsumenkil lix tij, “lix yaab’ xkux li Qaawa’ ” kichal “sa’ xk’a’uxl” (Enos 1:10). Ut k’oxlaheb’ li aatin a’in li neke’xye resil li xyaab’ kuxej kichal chaq sa’ choxa naq li Kolonel kixk’utb’esi rib’ sa’ li ch’och’ Naab’alil chirix xwaklijik chi yo’yo: “Moko josq’ ta lix yaab’ kuxej, chi moko kaw na’aatinak; a’b’anan ut, … ki’ok toj tz’aqal sa’ raameb’, ut kixk’e chi xamnak lix ch’ooleb’ ” (3 Nefi 11:3).

Maare ak xanumsi k’a’ruhaq li chanchaneb’ a’in, malaj ut maare jalan li xak’ul. Naab’al paay chan ru na’aatinak li Santil Musiq’ej, ut jalan jalanq paay chan ru naru nachal qik’in chiqajunqal. Ut naq wan li Musiq’ej sa’ li qayu’am, k’iila paay chan ru naq taqil chi k’anjelak qik’in. Li apostol aj Pablo ki’aatinak chirix “li naruuchin li Musiq’ej”—eb’ li eek’ahom re “rahok, sahil ch’oolej, tuqtuukilal, kuyuk, chaab’ilal, usilal, paab’ank, tuulanil, kuyuk ib’,” ut wankeb’ chik xkomon (Galatas 5:22–23).

Wahe’ junjunqeb’ chik li tzol’leb’ ut esil sa’ lix Hu laj Mormon chirix li Santil Musiq’ej. Naq nakawileb’ ru, maare taak’e reetal naq li Santil Musiq’ej ak yoo chi aatinak aawik’in mas wi’chik chiru li xak’oxla, re xch’olob’ankil xyaalal chawu naq lix Hu laj Mormon a’an li raatin li Dios.

Li b’antioxink ut li sahil ch’oolejil

Natikla lix Hu laj Mormon rik’in jun xchaq’al ru k’utb’esinb’il matk’ kiril li profeet aj Lehi. Sa’ li k’utb’esinb’il matk’ a’in, kikehe’ re jun li hu ut kiyehe’ re naq taaril ru. “Naq toj yoo chirilb’al li tz’iib’anb’il,” naxye li esil, “kinujob’resiik rik’in lix Musiq’ li Qaawa’.” Xb’aan li kixk’ul, laj Lehi kixnima ru li Dios xb’aan “lix wankilal, ut lix chaab’ilal, ut li ruxtaan,” ut “kisaho’ li raam, ut kinujak anchal lix ch’ool” (1 Nefi 1:12, 14–15).

Ma aanumishom laa’at li k’a’ru chanchan a’in? Naq yookat chirilb’al ru lix Hu laj Mormon, ma xnujak jun sutaq laa ch’ool rik’in b’antioxihom chirix li rusilal ut li ruxtaan li Dios? Ma xsaho’ jun sutaq laa waam xb’aan jun raqal sa’ lix Hu laj Mormon? Eb’ li eek’ahom a’in, a’aneb’ lix wankil li Musiq’ej, li yoo chixch’olob’ankil xyaalal chawu naq eb’ li aatin yookat chirilb’al ru neke’chal rik’in li Dios ut neke’xk’ut lix yaalil na’leb’.

Jun jalb’il ch’oolej

Chirix lix chaq’al ru aatin kixjultika chirix lix tojb’al rix li maak xb’aan li Jesukristo (chi’ilmanq Mosiah 2–4), li rey aj Benjamin kiraj xnawb’al rik’in lix tenamit ma “neke’xpaab’ li aatin li kixye chaq reheb’.” Ke’xsume naq ke’xpaab’ li raatin. K’a’ut? “Xb’aan lix Musiq’ li Qaawa’ Q’axal Nim Xwankil, li xk’anjela jun li nimla jalok qe, malaj re li qach’ool, jo’kan naq maak’a’ chik li qajom re xb’aanunkil li maa’usilal; re b’an xb’aanunkil rajlal li chaab’ilal” (Mosiah 5:1–2).

Maare xak’e reetal k’a’ruhaq chanchan a’in sa’ laa ch’ool naq xawil ru lix Hu laj Mormon. Qayehaq, maare xat-eek’asiik chixchaab’ilob’resinkil aawib’, chirisinkil aawib’ rik’in li maak, malaj chixb’aanunkil jun usilal choq’ re anihaq chik. A’an a’in li musiq’ejil ch’olob’ahom yookat chixsik’b’al naq musiq’anb’il li hu xb’aan li Dios. Jo’ kixk’ut laj Mormon, “Yalaq k’a’ru nab’oqok ut naq’unb’esink ch’oolej chixb’aanunkil li chaab’il, ut chixraab’al li Dios, ut chi k’anjelak chiru, a’an musiq’anb’il xb’aan li Dios” (Moroni 7:13; chi’ilmanq ajwi’ 2 Nefi 33:4, 10; Alma 19:33; Eter 4:11–12).

Jun kutanob’resinb’il k’a’uxlej

Naq laj Alma kiraj xtenq’ankileb’ laj Tzoramita “chixyalb’al rix li raatin” ut chixnawb’al xjuneseb’ rib’ ma yaal li kixch’olob’, a’an kixjuntaq’eeta li raatin li Dios rik’in jun iyaj: “Wi nekek’e xna’aj re taaruuq chi awmank jun li iyaj sa’ lee ch’ool,” chan, “taa’ok chi siipook sa’ lee ch’ool; ut naq nekereek’a li siipook a’in, tex’ok chixyeeb’al sa’ lee ch’ool—Tento naq chaab’ilaq li iyaj a’in, malaj ut naq chaab’il li aatin, xb’aan naq na’ok chixnimob’resinkil li waam; relik chi yaal, na’ok chixkutanob’resinkil innawom, relik chi yaal, na’ok chi tamk xsahil choq’ we” (Alma 32:27–28).

Laa’at “nakak’e xna’aj ” li aatin re lix Hu laj Mormon sa’ laa ch’ool naq nakakanab’ chixjalb’al laa yu’am ut chixb’eresinkil li nakasik’ ru xb’aanunkil. Ut chan ru naq eb’ li aatin a’in “te’xnimob’resi laa waam” ut “te’xkutanob’resi aanawom”? Maare taak’e reetal naq kaw chik aametz’ew sa’ musiq’ej. Maare taaweek’a xkomon chik li rahok ut chaab’ilal choq’ reheb’ laa was aawiitz’in. Maare taak’e ajwi’ reetal naq mas wi’chik nakataweb’ ru li k’a’aq re ru, k’a’jo’ wi’chik li musiq’ejil k’a’aq re ru—chanchan naq yoo chi lemtz’unk jun li saqen sa’ laa k’a’uxl. Ut maare taak’oxla naq li tzol’leb’ nak’utman sa’ lix Hu laj Mormon “na’ok chi tamk xsahil.” Eb’ li eek’ahom jo’eb’ a’in naru tate’xtenq’a chixtawb’al ru naq xak’ul chi yaal jun musiq’ejil nawom chirix li yaal, jo’ kixye laj Alma: “Ma ink’a’ ut tz’aqal yaal a’in? Ninye eere, yaal, xb’aan naq a’an saqen; ut yalaq k’a’ru saqen, a’an chaab’il, xb’aan naq naru xk’eeb’al reetal, jo’kan naq tento teenaw naq chaab’il” (Alma 32:35).

Ink’a’ na’ajman naq taawiib’anq aach’ool

A’aneb’ a’in yal junjunq paay chan ru na’aatinak li Musiq’ej. Wankeb’ naab’al paay chik. Maakanab’ xsik’b’aleb’ li hoonal re rab’inkil lix yaab’ xkux li Musiq’ej, ut rajlal taak’ul lix ch’olob’ahom naq yaal lix Hu laj Mormon.

Li Awa’b’ej Russell M. Nelson kixye: “Ink’a’ na’ajman naq taawiib’anq aach’ool chirix li yaal. Ink’a’ na’ajman naq ink’a’ taanaw ani taapaab’. Rik’in li k’utb’esinb’il na’leb’, naru taanaw choq’ aawe aajunes naq lix Hu laj Mormon a’an raatin li Dios, naq laj Jose Smith a’an jun profeet, ut naq a’an a’in lix Iglees li Qaawa’. Maak’a’ naxye k’a’ru xna’leb’eb’ jalan, maajun naru chirisinkil lix nawom aach’ool ut aak’a’uxl chirix li yaal” (“Li k’utb’esinb’il na’leb’ choq’ re li Iglees ut choq’ re qayu’am,” Jolomil ch’utub’aj-ib’ re abril 2018).