“7–13 diciembre. Moroni 7–9: “Li Kristo chiwaklesinq aawe,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“7–13 diciembre. Moroni 7–9,” Kim, Taaqehin—Choq’ reheb’ li komon ut li junkab’al: 2020
Li xMinerva Teichert (1888–1976), Laj Moroni: Lix ch’otojik aj Nefita, 1949–1951, óleo en masonite, 34¾ x 47 pulgadas. Museo de Arte, Universidad de Brigham Young, 1969
7–13 diciembre
Moroni 7–9
“Li Kristo chiwaklesinq aawe”
Naq nakattzolok sa’ Moroni 7–9, k’e reetal li na’leb’ tixk’e li Santil Musiq’ej, ut tz’iib’a li naxye aawe. A’an naru chixk’utb’al chawu li tento taanaw jo’ ajwi’ li tento taab’aanu.
Xtz’iib’ankil li nakak’oxla
Rub’elaj naq laj Moroni kixchoy li tz’iib’anb’il esil naqanaw ru anajwan jo’ lix Hu laj Mormon rik’in xraqikil li raatin, a’an kixwotz oxib’ lix tz’iib’ahom laj Mormon, lix yuwa’: jun aatin tz’iib’anb’il choq’ reheb’ “li neke’taaqenk re li Kristo saʼ tuqtuukilal” (Moroni 7:3) ut wiib’ li hu kixtaqla laj Mormon re laj Moroni. Maare laj Moroni kiroksiheb’ li oxib’ esil a’in sa’ lix Hu laj Mormon xb’aan naq kiril chi rub’elaj naq juntaq’eetaq li ch’a’ajkilal sa’ li qakutan rik’in li wan sa’ xkutankil a’an. Naq ke’tz’iib’aak li aatin a’an, li tenamit aj Nefita yoo chi t’ane’k sa’ jun q’etok paab’ank. Naab’al reheb’ ak “xsach chiruhebʼ li rahok chiribʼilebʼ ribʼ ” ut ke’sahila xch’ool rik’in “chixjunil, kaʼajwiʼ rikʼin li chaabʼil inkʼaʼ ” (Moroni 9:5, 19). A’ut laj Mormon toj kiwan xyo’onihom—ut a’in naxk’ut chiqu naq li yo’onink ink’a’ naraj naxye naq ink’a’ naqak’e reetaleb’ li ch’a’ajkilal re li ruchich’och’; naraj naxye b’an naq wan qapaab’aal chirix li qaChoxahil Yuwa’ ut li Jesukristo, li ninqeb’ wi’chik lix wankilaleb’ a’an chiruheb’ li ch’a’ajkilal a’an. Naraj naxye “xchapb’al qib’ chiru chixjunil li kʼaʼru us” (Moroni 7:19). Naraj naxye xkanab’ankil chi wank sa’ li qak’a’uxl lix tojb’al rix li maak xb’aan li Jesukristo, “ut xyo’oninkil lix loq’al ut li junelik yu’am” (Moroni 9:25). Ut toj sa’ li chaq’al ru kutan re li xkab’ xk’ulunik li Kristo, naraj naxye naq maajo’q’e taqakanab’ “li k’anjel wan chiqab’aanu re toonumtaaq saʼ xbʼeen laj xikʼ ilonel re chixjunil li tiikilal” (Moroni 9:6).
Li na’leb’ re xtzolb’aleb’ li loq’laj hu aajunes
Lix saqen li Kristo nikinixtenq’a chixtz’ilb’al rix b’ar wan li us ut li ink’a’ us.
Nujenaq li ruchich’och’ anajwan rik’ineb’ li xninqal ru esil; chan ru naru taqanaw b’ar wan reheb’ li us, ut b’arwan reheb’ li ink’a’ us? Li raatin laj Mormon sa’ Moroni 7 naxk’e junjunqeb’ li na’leb’ naru taqoksi re naq ink’a’ “tootz’iloq ix chi ink’a’ us” (Moroni 7:18). Naq nakattzolok sa’ Moroni 7:12–20, sik’eb’ li yaalil na’leb’ li naru tate’xtenq’a chixnawb’al k’a’ru tatxnach’ob’resi rik’in li Dios ut k’a’ru ink’a’. Taaruuq taawoksiheb’ li yaalil na’leb’ a’in re aatenq’ankil chixtz’ilb’aleb’ rix li esil ut numsihom naqak’ul chiru li xamaan a’in re taanaw ma neke’xq’unb’esi aach’ool chixb’aanunkil li us malaj ink’a’ (chi’ilmanq Moroni 7:13).
Chi’ilmanq ajwi’ “Juzgar a los demás,” Temas del Evangelio, topics.ChurchofJesusChrist.org; K’utul Raqal reheb’ li Loq’laj Hu, “Saqen, Lix saqen li Kristo.”
Rik’in paab’aal chirix li Kristo, naru “tinchap wib’ chiru chixjunil li k’a’ru us.”
Chirix xk’utb’al chan ru xk’eeb’al reetal b’ar wan li us ut li ink’a’ us, laj Mormon kixpatz’ jun na’leb’ li wan rilom rik’in li qakutankil laa’o: “Chan ru naru naq teechap eeribʼ chiru chixjunil li kʼaʼru us?”—ut k’a’jo’ wi’chik naq atawaal ru li aaleek xb’aan laj tza (Moroni 7:20). Lix sumehom laj Mormon naru taatawmanq sa’ rela’ li ch’ol 7. Naq nakawileb’ ru li raqal 20–48, sik’eb’ li yaalil na’leb’ li nakate’xtenq’a chixk’eeb’al reetal “chixjunil li kʼaʼru us” li wan aawe xb’aan li Jesukristo. Chan ru naq xpaab’ankil a’an nakatxtenq’a chixsik’b’al li k’a’ru us? Chan ru naru “taachap aawib’ ” chiru xkomon chik li k’a’ru us?
Chi’ilmanq ajwi’ Eb’ lix Raqalil li Paab’aal 1:13.
“Li tzʼaqal rahok aʼan li saq ruhil rahok narahok wiʼ li Kristo.”
Li Awa’b’ej Dallin H. Oaks kixye: “Lix yaalalil naq li tz’aqal rahok maajo’q’e na’oso’, ut lix yaalalil naq li rahok nim wi’chik xwankil chiru yalaq chaab’il b’aanuhom, us ta q’axal nim … a’an xb’aan naq li tz’aqal rahok, “li saq ruhil rahok narahok wi’ li Kristo” (Moro. 7:47), maawa’ jun b’aanuhom, a’an b’an jun wanjik malaj chan ru naq nokowan. … Li tz’aqal rahok, a’an jun wanjik na’ok wi’ jun kristiaan” (“El desafío de lo que debemos llegar a ser,” Liahona, enero 2001, 42). Naq nakawil ru Moroni 7:44–48, k’oxla chan ru naq laj Mormon naxch’olob’ li tz’aqal rahok, ut k’e reetal li na’leb’ tixk’e li Santil Musiq’ej aawe; a’an naru tatxtenq’a chixtawb’al chan ru tatchaab’ilo’q. K’a’ut naq aajel ru li paab’aal ut li yo’onink re taqak’ul li maatan re li tz’aqal rahok?
Ma naru taa’isiiq chaq wik’in li saq ru ch’oolejil ut li chaab’il yu’amej?
Rik’in li aatin kixye laj Mormon chirixeb’ li yib’ ruhil maak reheb’ laj Nefita, wankeb’ li neke’k’oxlank re naq eb’ li xe’muxe’ ru xtib’eleb’ chi minb’ileb’ ru malaj xe’maakoniik xe’xq’et li chaq’rab’ re saq ru ch’oolej. A’b’anan, li Elder Richard G. Scott kixk’ut naq moko yaal ta a’an. A’an kixye, “Ninch’olob’ chi tiik ru li waatin naq wi wan ani narahob’tesink aawe, namaakonink aawe, malaj naxb’aanu li k’a’ru tento raj naq ink’a’ taa’uxq, chi ink’a’ ajb’il aab’aan, moko aawe ta li maak a’an, ut maak’oxla naq wan aamaak” (“Cómo Sanar Las Trágicas Heridas Del Abuso,” Liahona, julio 1992, 36).
Naru nintaw inyo’onihom rik’in li Kristo, maak’a’ naxye k’a’ru nink’ul.
Chirix xyeeb’al resil li maa’usilal kiril, laj Mormon kixye re li ralal naq miraho’ xch’ool. K’a’ru naxk’e xkawilal aach’ool sa’ li raatin laj Mormon chirix li yo’onink? K’a’ru xyaalalil choq’ aawe naq li Kristo “tatxwaklesi”? K’a’ru chirix li Kristo ut k’a’ruheb’ li na’leb’ re lix evangelio li “neke’wan sa’ laa k’a’uxl” ut neke’xk’e aayo’onihom?? (Moroni 9:25).
Chi’ilmanq ajwi; Dieter F. Uchtdorf, “La esperanza de la luz de Dios,” Liahona, mayo 2013, 70, 75–77.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Moroni 7:5–11
Jo’ yeeb’il sa’ Moroni 7:5–11, k’a’ut naq aajel ru xb’aanunkil li us rik’in ajwi’ jun tiikil ajom? Chan ru naru taqanaw wi yooko chi tijok ut chi ab’ink chiruheb’ lix taqlahom li Dios “chi anchal li qajom”? (raqal 6).
Moroni 7:12–19
Chan ru naru naq li raatin laj Mormon tooxtenq’a chixsik’b’al ru li us chirix chan ru naqanumsi li qahoonal ut ani aj-ik’in naqanumsi? Tatruuq chixkanab’ankileb’ li komon sa’ laa junkab’al chi sik’ok sa’ lee rochoch ut “te’xchap rib’ chiru” (Moroni 7:19) li k’a’ru naxtenq’aheb’ “chixb’aanunkil li chaab’il, chixraab’al li Dios, ut chi k’anjelak chiru” (Moroni 7:13). K’e xnimankileb’ ru xb’aan li k’a’ru us neke’xtaw.
Moroni 7:29
Chirix rilb’al ru li raqal a’in, eb’ li komon sa’ li junkab’al taaruuq te’aatinaq chirixeb’ li sachb’a-ch’oolej xe’ril malaj chan chik ru xe’ril li ruq’ li Dios sa’ xyu’ameb’.
Moroni 8:5–26
K’a’ru ink’a’ ke’xtaw ru chirix lix tojb’al rix li maak xb’aan li Kristo eb’ laj Nefita li yookeb’ chixk’ub’sinkileb’ xha’ li kok’al? K’a’ru naqatzol chirix lix tojb’al rix li maak sa’eb’ lix k’utum laj Mormon?
Moroni 8:16–17
K’a’ru naraj naxye naq wan qik’in li “tz’aqal rahok”? Chan ru nokoxtenq’a chi numtaak sa’ xb’een li qaxiw? Chan ru nokoxtenq’a chixk’utb’al li yaal chi kaw qach’ool? Chan ru taqanimob’resi?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Oksiheb’ li b’ich re xk’eeb’al xb’oqb’al li Musiq’ej ut re xk’utb’al li tzol’leb’. “Li b’ichank k’a’jo’ naq wan xwankil chiqeek’asinkil re too’ok sa’ xnimal chik li musiq’ejil wank” (“Xtikib’ankil xb’aan li Xb’eenil Awa’b’ejil,” Eb’ li B’ich, x). Jun b’ich chirix li rahok, jo’ “Li rahok cherib’il eerib’ ” (Eb’ li B’ich, 201), taaruuq tixchaab’ilob’resi jun seraq’ sa’ junkab’al chirix li tz’aqal rahok sa’ Moroni 7:44–48.
Xjalam-uuch li Kristo laj Kolonel, xb’aan laj Heinrich Hofmann