“2–8 noviembre. Mormon 7–9: “Nekexwaatina chanchan naq wankex chiwu,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“2–8 noviembre. Mormon 7–9,” Kim, Taaqehin—Choq’ reheb’ li komon ut li junkab’al: 2020
Laj Moroni natz’iib’ak chiruheb’ li perel ch’iich’ oor, xb’aan laj Dale Kilborn
2–8 noviembre
Mormon 7–9
“Nekexwaatina chanchan naq wankex chiwu”
Ke’wan xpaab’aal laj Mormon ut laj Moroni naq lix tz’iib’ahomeb’ te’xmusiq’aheb’ li ani te’wanq sa’ roso’jikeb’ li kutan. Naq nakawil ru Mormon 7–9, tz’iib’a li na’leb’ nakak’ul chirix chan ru naru taayu’ami li k’a’ru yookat chixtzolb’al.
Xtz’iib’ankil li nakak’oxla
Laj Mormon ut laj Moroni ke’xnaw chan ru nareek’a li junaatalil sa’ jun ruchich’och’ aj maak. Choq’ re laj Moroni, q’axal ch’a’aj li junaatalil chirix naq kikam lix yuwa’ sa’ pleet ut ke’sache’ laj Nefita. “Laa’in ajwi’ injunes ninkana,” kixtz’iib’a. “Maak’a’ ani wochb’een chi moko b’ar tinxik” (Mormon 8:3, 5). Maare chanchan naq maak’a’ li yo’onihom, a’b’an laj Moroni kixtaw yo’onihom sa’ lix nawom xch’ool chirix li Kolonel, ut rik’in xnawb’al naq “lix junelikil aajom li Qaawa’ taatololnaq chi uub’ej” (Mormon 8:22). Ut laj Moroni kixnaw naq taawanq jun aajel ruhil k’anjel choq’ re lix Hu laj Mormon sa’ li junelikil ajom a’an—li esil yoo chixchoyb’al chi anchal xch’ool, li esil li “taalemtz’unq chaq sa’ li q’ojyin” sa’ junaq kutan, ut tixk’ameb’ naab’aleb’ li kristiaan “chixnawb’al chirix li Kristo” (Mormon 8:16; 9:36). Sa’ xk’ab’a’ lix paab’aal chirix li k’a’ru yeechi’inb’il, laj Moroni kiru chixyeeb’al reheb’ li te’rileb’ ru li aatin sa’ junaq kutan chalel, “nekexwaatina chanchan naq wankex chiwu” ut “ninnaw naq taawanq eerik’in li waatin” (Mormon 8:35; 9:30). Anajwan wankeb’ li raatin qik’in, ut lix k’anjel li Qaawa’ yoo chi tololnak chi uub’ej, xb’aan naq laj Mormon ut laj Moroni ink’a’ ke’xkanab’ lix k’anjeleb’, us ta naq sa’ junaatalil ke’wan.
Li na’leb’ re xtzolb’aleb’ li loq’laj hu aajunes
Tento tinpaab’ li Jesukristo ut “tinchap wib’ ” chiru lix evangelio.
Eb’ li roso’jik aatin kixtz’iib’a laj Mormon, li neke’tawman sa’ Mormon 7, tz’iib’anb’ileb’ choq’ reheb’ li ralal xk’ajoleb’ laj Lamanita sa’ roso’jikeb’ li kutan, a’b’an wankeb’ li yaalil na’leb’ sa’ a’an choq’ qe chiqajunil. K’a’ru naxk’ut li raatin laj Mormon chawu chirix li Jesukristo ut lix evangelio? K’a’ut naq laj Mormon kixsik’ ru li esil a’in re xraqb’aleb’ lix tz’iib’ahom?
Mormon 7:8–10; 8:12–22; 9:31–37
K’a’jo’ xnimal xloq’al lix Hu laj Mormon.
Li Awa’b’ej Russell M. Nelson kixpatz’: “Wi k’eeb’ileb’ raj eere li diamante malaj li lemtz’il q’ol malaj keeb’il eere lix Hu laj Mormon, b’arwan li teesik’ ru? Relik chi yaal, b’arwan li nim wi’chik lix tz’aq choq’ eere?” (“Lix Hu laj Mormon: K’a’ru raj xjalanil laa yu’am chi maak’a’ li hu a’an?” Jolomil ch’utub’aj-ib’ re octubre 2017).
Laj Mormon ut laj Moroni ke’xnaw naq li esil yookeb’ chixk’uulankil nimaq xloq’al sa’ li qakutan laa’o, jo’kan naq naab’al li ke’xmayeja re xk’uub’ankil ut re xkolb’al rix. Naq nakawil ru Mormon 7:8–10; 8:12–22; ut 9:31–37, k’oxlan chirix k’a’ut naq nim xloq’al li esil a’an sa’ li qakutan. Naru taataw xkomon chik aana’leb’ chirix a’in sa’ 1 Nefi 13:38–41; 2 Nefi 3:11–12; ut Tzol’leb’ ut Sumwank 33:16; 42:12–13. K’a’ru xak’ul laa’at li xatxtenq’a chixnawb’al naq nim xloq’al lix Hu laj Mormon?
Eb’ lix tz’iib’ahomeb’ li profeet sa’ lix Hu laj Mormon wankeb’ rilom qik’in laa’o.
Lix Hu laj Mormon kitzʼiibʼaman choqʼ re li qakutan.
Li Jesukristo kixk’ut chiru laj Moroni li yooq chi k’ulmank naq taak’utmanq lix Hu laj Mormon (chi’ilmanq Mormon 8:34–35), ut xb’aan li kiril laj Moroni, a’an kixtz’iib’aheb’ li kawil tijom choq’ re li qakutan. Naq nakawil ru Mormon 8:26–41 ut 9:1–30, k’oxla ma wan reetalileb’ li k’oxlahom ut b’aanuhom a’in sa’ laa yu’am laa’at. K’a’ru taaruuq taajal?
Qayehaq, sa’ Mormon 9:1–30 wan li raatin laj Moroni li na’aatinak chirix lix maak’a’il li paab’aal chirix li Jesukristo sa’ li qakutan li kiril chi rub’elaj. K’oxla xtz’iib’ankil li nakatzol rik’in li raatin chirix a’in:
-
Li nachal wi ink’a’ naqapaab’ li Kristo (eb’ li raqal 1–6, 26)
-
Lix aajelil ru xpaab’ankil jun Dios re k’utb’esinb’il na’leb’ ut sachb’a-ch’oolej (eb’ li raqal 7–20)
-
Lix na’leb’ laj Moroni choq’ qe (eb’ li raqal 21–30)
K’a’ru nakatzol rik’in laj Moroni li naru tatxtenq’a chixnach’ob’resinkil jalaneb’ chik rik’in li qaChoxahil Yuwa’ ut li Jesukristo?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Mormon 7:5–7, 10; 9:11–14
K’a’ru neke’xk’ut li raqal a’in chiqu chirix lix k’uub’anb’il na’leb’ li qaChoxahil Yuwa’ ut k’a’ut naq naqaj ru jun aj Kolol qe?
Mormon 7:8–10
K’a’ru xqatzol sa’ lix Hu laj Mormon sa’ li chihab’ a’in li xtenq’an chixkawob’resinkil li qapaab’aal chirix li Santil Hu? Re xtikib’ankil jun aatinak chirix a’in, taaruuq teeril sa’ komonil junjunqeb’ li raqal sa’ lix Hu laj Mormon ut sa’ li Santil Hu li neke’xk’ut li na’leb’ li neke’xk’am rib’, jo’ Alma 7:11–13 ut Isaias 53:3–5 malaj 3 Nefi 15:16–24 ut Jwan 10:16.
Mormon 8:1–9
Chan raj ru li wank sa’ junaatalil jo’ kixk’ul laj Moroni? K’a’ru nasach wi’ qach’ool chirix li k’anjel kixb’aanu?
Mormon 8:12, 17–21; 9:31
K’oxlahomaq rilb’aleb’ ru li raqal a’in jo’ junkab’al toja’ naq teeril ru li aatin a’in re li Elder Jeffrey R. Holland: “Chixjunileb’ li naxk’e li Dios chi k’anjelak wankeb’ xmajelal, ka’ajwi’ li Ralal Junaj Chirib’il ink’a’. … Naq nakawil li k’a’ru moko tz’aqal ta re ru, chijultiko’q aawe naq li majelal maawa’ rik’in lix santilal li k’anjel” (“Creo,” Liahona, mayo 2013, 94). K’a’ut naq xiwxiw ka’ajwi’ xk’eeb’al reetal lix majelaleb’ li qas qiitz’in, jo’eb’ ajwi’ xmajelaleb’ li ani ke’tz’iib’ank re lix Hu laj Mormon?
Mormon 8:36–38
K’a’ru naraj naxye xk’ulb’al sa’ qab’een lix k’ab’a’ li Jesukristo? K’a’ut naq maare taaxutaanaq anihaq chixk’ulb’al sa’ xb’een lix k’ab’a’ li Jesukristo? Chan ru naq laa’o nokoru chi wank chi kaw qach’ool sa’ xch’olob’ankil lix nawom qach’ool chirix li Kolonel?
Mormon 9:16–24
Wankeb’ jar paay chi k’a’aq re ru neke’ajman ru re xyalb’al ma yaal junaq na’leb’ re li ciencia malaj re xk’uub’ankil jun paay chi tzakemq. Jo’ junkab’al, k’oxlahomaq xyalb’al rix junaq na’leb’ malaj xk’uub’ankil jun paay chi tzakemq nawulak cheru rub’elaj naq teeril ru Mormon 9:16–24. Naq nekerileb’ ru li raqal a’an (k’ehomaq reetal chi us eb’ li raqal 20–21), sik’ li jar paay chi k’a’aq re ru naxk’eheb’ chi uxmank li sachb’a-ch’oolej. K’a’ruheb’ li sachb’a-ch’oolej naru naqil chiqasutam sa’ li ruchich’och’ ut sa’ li qajunkab’al?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Oksiheb’ li k’anjeleb’aal k’eeb’il xb’aan li Iglees. Wi wankeb’ aapatz’om chirix li evangelio, li k’a’ru q’axal us re xsumenkileb’ a’an li tijok, eb’ li loq’laj hu, li raatineb’ li yo’yookil profeet, ut xkomoneb’ chik li hu puktesinb’ileb’ xb’aan li Iglees (chi’ilmanq Li k’utuk jo’ li Kolonel, 17–18, 23–24).
Laj Mormon naq yoo chixk’osb’aleb’ ru li perel ch’iich’, xb’aan laj Jon McNaughton