19–25 octubre. 3 Nefi 27–4 Nefi: “Moko kiru ta kiwan junaq tenamit li sa wi’chik xch’ool,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
19–25 octubre. 3 Nefi 27–4 Nefi,” Kim, Taaqehin—Choq’ reheb’ li komon ut li junkab’al: 2020
Lix tij li Kristo, xb’aan laj Derek Hegsted
19–25 octubre
3 Nefi 27–4 Nefi
“Moko kiru ta kiwan junaq tenamit li sa wi’chik xch’ool”
Li Qaawa’ kixtaqlaheb’ lix tzolom chixtz’iib’ankil li k’a’ru ke’xk’ul (chi’ilmanq 3 Nefi 27:23–24). Naq nakattzolok, tz’iib’a li musiq’ejil na’leb’ nakak’ul.
Xtz’iib’ankil li nakak’oxla
Eb’ lix k’utum li Jesukristo maawa’eb’ yal ch’ina-usil na’leb’ re xk’oxlankil. Xninqaleb’ wi’chik ru chiru a’an—wankeb’ re xjalb’al li qayu’am. Li hu 4 Nefi naxk’e jun sachb’a-ch’oolejil eetalil chirix a’an, naxk’ut chan ru naq lix evangelio li Kolonel naru chixjalb’al xch’ool jun tenamit chi tz’aqal tz’aqal. Chirix lix k’ulunik li Jesus sa’ xyanqeb’, kiraqe’ li wech’ok-ib’ ke’wan wi’ laj Nefita rik’ineb’ laj Lamanita chiru k’iila cient chihab’. Li wiib’ chi tenamit na’nookeb’ ru xb’aan li wech’ok-ib’ ut li q’etq’etil, ke’ok jo’ “junajeb’, ralal xk’ajoleb’ li Kristo” (4 Nefi 1:17), ut “kiwan chixjunil li k’a’aq re ru reheb’ sa’ komonil sa’ xyanqeb’ ” (4 Nefi 1:3). “Lix rahom li Dios … kiwan sa’ xch’ooleb’ li tenamit,” ut “moko kiru ta kiwan junaq tenamit li sa wi’chik xch’ool sa’ xyanq chixjunileb’ li tenamit li yo’ob’tesinb’ileb’ xb’aan ruq’ li Dios” (4 Nefi 1:15–16). Chi jo’ka’in naq eb’ lix k’utum li Kolonel ke’xjaleb’ xch’ool laj Nefita ut laj Lamanita. Chan ru yookeb’ chixjalb’al laa ch’ool laa’at?
Li na’leb’ re xtzolb’aleb’ li loq’laj hu aajunes
Lix Iglees li Jesukristo k’ab’a’inb’il rik’in xk’ab’a’ a’an.
Naq eb’ lix tzolom li Kolonel ke’ok chixxaqab’ankil lix Iglees chiru li ch’och’, ke’wan jun xpatz’omeb’ li maare wankeb’ li te’k’oxlanq re naq moko aajel ta ru—k’a’ru taawanq choq’ lix k’ab’a’ li Iglees? (chi’ilmanq 3 Nefi 27:1–3). K’a’ru xatzol chirix lix aajelil ru li k’ab’a’ej a’in rik’in lix sumehom li Kolonel sa’ 3 Nefi 27:4–12? Sa’ 1838 li Qaawa’ kixk’utb’esi lix k’ab’a’ lix Iglees sa’ li kutan a’in (chi’ilmanq Tzol’leb’ ut Sumwank 115:4). Tz’il rix li junjunq chi aatin sa’ li k’ab’a’ej a’an. Chan ru nokohe’xtenq’a li aatin a’in chixnawb’al aniho, k’a’ru naqapaab’, ut chan ru toowanq?
Chi’ilmanq ajwi’ Russell M. Nelson, “Tz’aqal xk’ab’a’ li Iglees,” Jolomil ch’utub’aj-ib’ re octubre 2018; M. Russell Ballard, “La importancia de un nombre,” Liahona, noviembre 2011, 79–82.
Naq tinsaqob’resi ru li rajom inch’ool, taanimanq intiikilal jo’ tzolom.
K’a’ raj ru taaye wi ta li Kolonel tixpatz’ raj aawe, jo’ kixpatz’ reheb’ lix tzolom, “K’a’ru li nekeraj wik’in?” (3 Nefi 28:1). K’oxlan chirix a’in naq nakawil ru resil li k’a’ru ke’xk’ul lix tzolom li Kolonel sa’ 3 Nefi 28:1–11. K’a’ru nakatzol chirix li rajom xch’ooleb’ li tzolom rik’in chan ru ke’xsume lix patz’om? Li Awa’b’ej Dallin H. Oaks kixk’ut: “Re taaruuq taqataw li qeechanihom re junelik, taawanq rajom qach’ool chi k’anjelak re xk’ulb’al li na’ajman ru re wank jo’ anihaq li ani wan chi junelik. … Taawanq rajom qach’ool chi wank jo’ [li Jesukristo]” (“El deseo,” Liahona, mayo 2011, 44–45). K’a’ru naru taab’aanu re xnimob’resinkil xtiikilal li rajom aach’ool? (Re xtawb’al xkomon chik li na’leb’ chirix li “jalaak k’anjelanb’il sa’ xtib’eleb’ ” li oxib’ chi tzolom, chi’ilmanq 3 Nefi 28:37 ut “Jaltesinb’il junxaqalil,” K’utul Raqal reheb’ li Loq’laj Hu.)
Li jalok-ch’oolej rik’in li Jesukristo ut lix evangelio nak’amok sa’ li junajil ut li sahil ch’oolejil.
Ma naru nakak’oxla chan raj ru li wank chiruheb’ li chihab’ chirix lix k’ulunik li Kolonel? Chan ru ke’xk’uula li tenamit li choxahil tuqtuukilal chiru k’iila chihab’—haye’ 200 chihab’? Naq nakattzolok sa’ 4 Nefi 1:1–18, k’oxla reetalinkil malaj xtz’iib’ankil li k’a’ru ke’xsik’ ru xb’aanunkil li tenamit re te’kanaaq sa’ li osob’tesinb’il wanjik a’an.
K’oxla li naru taab’anu re xtenq’ankil laa junkab’al, laa teep, malaj laa k’aleb’aal re taanimanq li junajil ut sahil ch’oolejil wankex wi’, jo’ ke’xb’aanu li tenamit sa’ 4 Nefi. B’arwan reheb’ lix k’utum li Jesukristo naru taayu’ami chi chaab’ilaq chik re xb’aanunkil a’in? K’a’ru naru taab’aanu re xtenq’ankil laa was aawiitz’in chixtawb’aleb’ ru ut chixyu’aminkileb’ li tzol’leb’ a’in?
Li maa’usilal nak’amok sa’ li jachok-ib’ ut li rahil ch’oolejil.
Rik’in xnumik li hoonal, li tenamit a’in chanchan re Sion, li yeeb’il resil sa’ 4 Nefi (chi’ilmanq ajwi’ Moises 7:18) ki’ok chi po’e’k. Naq nakawil ru 4 Nefi 1:19–49, sik’eb’ li k’oxlahom ut li b’aanuhom li ke’xk’e chi po’e’k li tenamit a’in. Ma nakawil xkomoneb’ li k’oxlahom malaj b’aanuhom a’in aawik’in laa’at?
Chi’ilmanq ajwi’ “Capítulo 18: Cuidaos del orgullo,” Enseñanzas de los Presidentes de la Iglesia: Ezra Taft Benson (2014), 251–264.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
3 Nefi 27:13–21
Eb’ li raqal a’in te’ruuq chixtenq’ankileb’ li komon sa’ li junkab’al chixtawb’al ru k’a’ru kiraj xyeeb’al li Kolonel naq kixye “lin evangelio.” Chirix rilb’al ru ut aatinak chirixeb’ li raqal a’in, taaruuq taapatz’ re li junjunq komon sa’ li junkab’al naq te’xye chi k’osb’il ru k’a’ru li evangelio sa’ jun ajwi’ li ch’ol aatin.
3 Nefi 27:23–26
Ma yooko chixtz’iib’ankil li k’a’ru “kiqil ut kiqab’i”—sa’ junesal malaj jo’ junkab’al? K’a’ut naq aajel ru xtz’iib’ankil resil li k’a’ru re musiq’ej?
3 Nefi 27:30–31
Re xtenq’ankileb’ li komon sa’ li junkab’al chixtawb’al ru li sahil ch’oolejil ch’olob’anb’il xb’aan li Kolonel sa’eb’ li raqal a’in, taaruuq teeb’aanu jun b’atz’unk b’ar wi’ eb’ li komon sa’ li junkab’al neke’xmuq rib’ ut jun reheb’ li komon naxyal xtawb’aleb’. A’in taaruuq taak’amoq sa’ jun seraq’ chirix k’a’ut naq aajel ru xtawb’al chixjunileb’ li komon sa’ li junkab’al re naq “maajun reheb’ sachenaq.” Chan ru naru taqatenq’aheb’ li komon sa’ li qajunkab’al chi kanaak chi kaweb’ xch’ool sa’ li evangelio malaj chi sutq’iik wi ak xe’xkanab’?
3 Nefi 28:17–18, 36–40
K’a’ru naru taqatzol rik’in li kixb’aanu laj Mormon naq ink’a’ kixtaw ru chixjunil chirix li jalaak ke’xk’uleb’ li oxib’ chi tzolom aj Nefita? K’a’ru naru taqab’aanu naq wan li ink’a’ naqataw ru chirix jun na’leb’ re li evangelio? Li Awa’b’ej Dieter F. Uchtdorf kixk’ut: “[K’oxlanb’ilex xb’aan] li Dios. A’an taarab’i ut tixsume laa patz’om. Lix sumenkil laa tij taachalq chi uxb’il jo’ tixk’oxla a’an, ut sa’ li kutan tixk’oxla a’an, ut chi jo’kan, tento taatzol rab’inkil xyaab’ xkux” (“Xk’ulb’al xnawom aach’ool chirix li Saqen ut li Yaal,” Jolomil ch’utub’aj-ib’ re octubre 2014).
4 Nefi 1:15
Re xch’inankil li wechok-ib’ na’ux sa’ lee rochoch, maare li komon sa’ li junkab’al te’ruuq chixk’eeb’al xjayalihomeb’ naq mas wi’chik te’xra rib’ chirib’ileb’ rib’ chiru li xamaan a’in. Naq naraqe’ li xamaan, tz’ilomaq rix sa’ komonil chan ru xeb’aanu a’an ut aatinanqex chirix li jalaak sa’ lee junkab’al rik’in xnimob’resinkil li rahom xek’ut cherib’il eerib’ chiru li xamaan.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Sik’ li k’utb’esinb’il na’leb’ wulaj wulaj. Kok’ aj xsa’, li k’utb’esinb’il na’leb’ nachal “chi junjunqil li raqal” (2 Nefi 28:30). Naq nakak’oxlaheb’ li raqal li yookat chixtzolb’al, te’chalq tana’ sa’ laa k’a’uxl li na’leb’ ut li eek’ahom. Maak’oxla li tzolok chirix li evangelio jo’ jun k’anjel “taak’e xhoonal chixb’aanunkil,” a’b’anan jo’ jun k’anjel junelik yookat chixb’aanunkil (chi’ilmanq Li k’utuk jo’ li Kolonel, 12).
Li Jesus rik’ineb’ li oxib’ chi tzolom aj Nefita, xb’aan laj Gary L. Kapp