“14–20 septiembre. 3 Nefi 8–11: “Waklinqex ut chalqex wik’in,” ” Kim, Taaqehin—Choq’ re li Tzoleb’aal reheb’ li Kok’al: Lix Hu laj Mormon 2020 (2020)
“14–20 septiembre. 3 Nefi 8–11,” Kim, Taaqehin—Choq’ re li Tzoleb’aal reheb’ li Kok’al: 2020
Laa’in lix saqen li ruchich’och’, xb’aan laj James Fullmer
14–20 septiembre
3 Nefi 8–11
“Waklinqex ut chalqex wik’in”
Il ru 3 Nefi 8–11 rik’ineb’ li kok’al nakatzoleb’ sa’ laa k’a’uxl. Li na’leb’ sa’ li tusleb’ aatin a’in naru nakate’xtenq’a rik’in lix kawresinkil aawib’.
Xtz’iib’ankil li nakak’oxla
Xkanab’ankileb’ chi wotzok
K’e chi kutankil jun xjalam-uuch naq kixk’utb’esi rib’ li Jesukristo sa’ li ch’och’ America, jo’ li natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Kanab’eb’ li kok’al chixk’utb’al li k’a’ru neke’ril sa’ li jalam-uuch ut chixwotzb’al k’a’ruhaq neke’xnaw chirix li seraq’ naxk’utb’esi.
Xk’utb’al li tzol’leb’: Kok’al toj ka’ch’ineb’ xyu’am
Li Jesukristo nikinixb’oq chi chalk rik’in.
Maare moko taaruuq ta taawotz rik’ineb’ li kok’al chixjunil lix ch’olob’ankil xk’ulunik li Kolonel sa’ xyanqeb’ lix tenamit laj Nefi, a’b’an naru nakatenq’aheb’ chireek’ankil lix rahom kixk’ut choq’ reheb’ li tenamit sa’ 3 Nefi 8−11.
Kok’ k’anjel naru chi b’aanumank
-
Seraq’i reheb’ li kok’al resileb’ li kaq-sut-iq’ ut li aak’ab’ neke’ch’olob’aman sa’ 3 Nefi 8, chi eek’anb’il re naq ink’a’ taaxib’esiheb’ malaj taak’eheb’ xxiw. Naru nakawoksi li “Ch’ol 42: Eb’ li reetalil lix kamik li Kristo” (Eb’ li Esilal sa’ lix Hu laj Mormon, 117−119, malaj li video sa’ ChurchofJesusChrist.org). Patz’ reheb’ li kok’al k’a’ raj ru xe’reek’a wi ta xe’wan chaq sa’ li kaq-sut-iq’ ut aak’ab’ a’an. Ch’olob’ naq eb’ li kaq-sut-iq’ ut li aak’ab’ a’aneb’ reetalil naq li Jesus kikam, ut k’ut jun xjalam-uuch lix k’eeb’al chiru li krus (chi’ilmanq Libro de obras de arte del Evangelio, ajl 57). Chirix a’an il ru 3 Nefi 9:13. K’a’ru kixye li Jesus naq tixb’aanu choq’ reheb’ li te’xjal xk’a’uxl? Tenq’aheb’ li kok’al chixtawb’al ru naq li aatin “k’irtesink” wan sa’ li raqal a’an naraj naxye naq li Jesus tixkuyeb’ xmaak.
-
K’e chi kutankil li jalam-uuch natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naq yooqat chixch’olob’ankil rik’in aawaatin lix k’ulunik li Kolonel waklijenaq chi yo’yo sa’ xyanqeb’ laj Nefita ut laj Lamanita. Ileb’ ru kok’ raqal sa’ 3 Nefi 11 li taatenq’anq reheb’ chireek’ankil lix loq’alil li kik’ulman aran. Kanab’eb’ chixmutz’b’aleb’ li ru ut chixk’oxlankil k’a’ raj ru te’reek’a wi ta te’wanq xhoonal chirilb’al li Jesus. Malaj ut, k’ut li xb’een k’asal re li video “Mi gozo es completo” (ChurchofJesusChrist.org). Ye reheb’ li kok’al k’a’ru nakaweek’a laa’at naq nakawileb’ ru ut nakak’oxlaheb’ li seraq’ a’an. Ch’olob’ xyaalal naq li Jesus naraj naq chiqajunil toochalq rik’in a’an ut taqeek’a lix rahom. Tz’aqob’resi ru li perel re kok’ k’anjel rik’ineb’ li kok’al.
Li Jesus naxkol rix lix tenamit jo’ jun li kaxlan naxkoleb’ rix li ral.
Lix jalam-uuch jun kaxlan naxch’utub’eb’ li ral naru naxk’uteb’ chiru li kok’al chirix li k’ojob’ank ch’oolej ut li kolb’a-ix naxyeechi’i li Kolonel wi nokochal rik’in a’an.
Kok’ k’anjel naru chi b’aanumank
-
K’ut xjalam-uuch jun kaxlan naq yoo chirilb’aleb’ li ral. Il ru 3 Nefi 10:6 ut ye reheb’ li kok’al chan ru naq li kaxlan naxb’oqeb’ li ral ut naxkoleb’ rix rub’el lix xik naq wan li k’a’ru xiwxiw. Tz’ilomaq rix chan ru naq li Jesus chanchan chik li kaxlan ut laa’o li ral. Chan ru naru nokochal rik’in a’an ut naqataw xkolb’al qix?
-
K’e jun xjalam-uuch li Jesus chiru li tz’ak. Kanab’eb’ li kok’al chi b’eek sa’ li tzoleb’aal naq yooqat chixyaab’asinkil 3 Nefi 10:4. Ye reheb’ naq te’nach’oq rik’in lix jalam-uuch li Jesus naq te’rab’i li aatin “kexinch’utub’ ” malaj “naxch’utub’eb’.” Ka’suti li ch’ina k’anjel a’an naq yooqat chixyaab’asinkileb’ li raqal 5 ut 6. Wotz rik’ineb’ li kok’al chan ru naq laa’at nakasik’ li Kolonel re xtawb’al xkolb’al aawix, ut ch’olob’ xyaalal naq tixkol qix chiruheb’ li musiq’ejil xiwxiw naq naqapaab’eb’ lix taqlahom.
Li Jesukristo naraj naq taakub’eeq inha’.
Eb’ li kok’al li nakatzoleb’ yookeb’ chixkawresinkil rib’ choq’ re li kub’iha’. Lix k’utum li Kristo sa’eb’ li raqal a’an naru naxtenq’aheb’ chixnawb’al k’a’ut naq aajel ru li kub’iha’.
Kok’ k’anjel naru chi b’aanumank
-
Il ru 3 Nefi 11:21−26 ut kanab’eb’ li kok’al chi xaqliik rajlal sut naq te’rab’i li aatin “kub’sink ha’.” Ch’olob’ naq li Jesus kixk’ut chan ru tento taakub’siiq qaha’. K’ut jun xjalam-uuch jun li ch’ina al li yoo chi kub’eek xha’ (chi’ilmanq (Libro de obras de arte del Evangelio, ajl 104). Wi eb’ li kok’al ak rilomeb’ jun kub’iha’, kanab’eb’ chixch’olob’ankil li xe’ril. Ani xb’aanunk re li kub’iha’ ut chan ru naq xb’aanu?
-
Rub’elaj li tzolok, k’e xb’oqb’al xyuwa’ junaq li ch’ina al chi wulak sa’ li tzoleb’aal ut chixwotzb’al rik’ineb’ li kok’al k’a’ut naq aajel ru naq taakub’siiq qaha’ chi sub’b’il xb’aan anihaq wan li tijonelil rik’in. Naru ajwi’ naxch’olob’ chiruheb’ li kok’al k’a’ru taak’ulmanq naq te’kub’siiq xha’ ut li osob’tesiik te’xk’ul. Waklesi xch’ool chiroksinkil 3 Nefi 11:23−26 re xch’olob’ankil li raatin.
Xk’utb’al li tzol’leb’: Kok’al ak ninqeb’
Naq wankin sa’ aak’ab’, li Jesukristo naru nawan choq’ insaqen.
Jun esil nim xwankil sa’eb’ li ch’ol a’an, a’an naq li Jesukristo a’an xsaqen li ruchich’och’ ut naq naru nawan choq’ saqen sa’ li qayu’am.
Kok’ k’anjel naru chi b’aanumank
-
Ilomaq ru sa’ komonil 3 Nefi 8:5−7, 11−23 ut 10:9−13 (wi naru, kanab’ sa’ q’ojyin li tzoleb’aal naq yooqex chirilb’al ru a’an). Taak’e xyanq naq yooqex chirilb’aleb’ ru li raqal ut taapatz’ reheb’ li kok’al k’a’ raj ru xe’reek’a wi ta xe’ril li ke’k’ulman. Il ru rik’ineb’ li kok’al junjunqeb’ li aatin kixye li Jesukristo reheb’ li tenamit naq ke’wan sa’ aak’ab’ (chi’ilmanq 3 Nefi 9:13−14, 18). K’a’ut naq li Jesukristo kixk’ab’a’i rib’ jo Xsaqen li Ruchich’och’? K’a’ru ke’b’oqe’ li tenamit ut laa’o chixb’aanunkil re naq li Jesus taawanq choq’ qasaqen? (chi’ilmanq 3 Nefi 9:20−22).
-
K’ut chiruheb’ li kok’al jun reetalil li ruchich’och’ ut tenq’aheb’ chixtawb’al Jerusalen ut li ch’och’ America. Ch’olob’ naq li sachok nach’olob’aman sa’ 3 Nefi 8 a’an jun eetalil choq’ re li tenamit America naq li Jesukristo kik’ehe’ chiru li krus aran Jerusalen. Ilomaq ru sa’ komonil 3 Nefi 11:1−15 ut kanab’eb’ li kok’al chixyeeb’al aawe naq te’xtaw k’a’ruhaq sa’eb’ li raqal li taatenq’anq reheb’ chireek’ankil lix rahom li Dios. Wotz li raqal 37, ut ch’olob’ xyaalal naq li Kolonel naxraheb’ chixjunil li kok’al. Wotz lix nawom aach’ool chirix lix yaalalil li yookat chirilb’al ru.
Chi junjunqil, xb’aan laj Walter Rane
Naru nintzol xk’eeb’al reetal lix yaab’ xkux li Dios sa’ lin yu’am.
Sa’ xtiklajik li tenamit ink’a’ ke’xtaw ru li xyaab’ kuxej ke’rab’i sa’ choxa. K’a’ru naru neke’xtzol li kok’al chirix k’uluk k’utb’esinb’il na’leb’ sa’ li seraq’ a’an?
Kok’ k’anjel naru chi b’aanumank
-
Il ru 3 Nefi 11:1−4 rik’ineb’ li kok’al, rik’in xk’eeb’al xyanq re roksinkileb’ li patz’om jo’ “K’a’ut nekek’oxla naq li kristian ink’a’ ke’xtaw ru li xyaab’ kuxej?” Chirix a’an, kanab’eb’ chirilb’aleb’ ru li raqal 5−7 re xsik’b’al k’a’ru ke’xb’aanu li kristiaan li kitenq’ank reheb’ chixtawb’al ru li xyaab’ kuxej sa’eb’ li raam. Chan ru naru naqayal rab’inkil li Dios naq nokoraatina sa’ li qaam rik’in li Santil Musiq’ej?
-
Oksi xsonil jun li b’ich malaj jun xb’icheb’ li kok’al chi ka’ch’in xyaab’ re naq ch’a’ajaq rab’inkil. Patz’ reheb’ li kok’al ma neke’xtaw ru li naxye li b’ich. Chirix a’an tenq’aheb’ li kok’al chixsik’b’al xch’olob’ankil chan ru li xyaab’ kuxej li kichal chaq sa’ choxa sa’ 3 Nefi 11:3. K’a’ut naq li Dios moko nokoraatina ta rik’in jun xyaab’ kuxej “josq’ ” malaj “kaw”? Kʼaʼru naru taabʼaanu re naq taawab’i chi mas us wi’chik?
Xb’oqb’aleb’ chi tzolok sa’ kab’l
Kanab’eb’ li kok’al chixseraq’inkil re anihaq resil lix k’ulunik li Jesus sa’ li ch’och’ America—wi naru, re anihaq toj maji’ naxnaw chirix a’an.
Xchaab’ilob’resinkil li qak’utum
Yiib’ ru li ch’i’ilenk rik’in rahok. “Wan naq eb’ li kok’al neke’xb’aanu k’a’ruhaq li naxram ru li tzolok sa’ li tzoleb’aal. Naq na’uxman a’in, chiwanq aakuyum, aarahom, ut aanawom chirix li k’a’ru nach’a’ajko’ wi’ li ch’ina al. ... Wi li ch’ina al li naxb’aanu li ajtesink-ib’ wan xch’a’ajkilal sa’ xyu’am, aatinan rik’in li especialista en discapacidad sa’ li teep malaj li oqech, malaj ula’ani li perel web disabilities.ChurchofJesusChrist.org re xtawb’al chan ru naru taatenq’a” (Li k’utuk jo’ li Kolonel, 26).