“31 agosto–6 septiembre. Helaman 13–16: “Sahil esilal re nimla sahil ch’oolejil,” ” Kim, Taaqehin—Choq’ re li Tzoleb’aal reheb’ li Kok’al: Lix Hu laj Mormon 2020 (2020)
“31 agosto–6 septiembre,” Kim, Taaqehin—Choq’ re li Tzoleb’aal reheb’ li Kok’al: 2020
Laj Samuel aj Lamanita sa’ xb’een li xaqxookil tz’ak, xb’aan laj Arnold Friberg
31 agosto–6 septiembre
Helaman 13–16
“Sahil esilal re nimla sahil chʼoolejil”
Re xkawresinkil aawib’ re k’utuk, il ru Helaman 13─16 ut k’oxlan chirix b’ar wankeb’ li kok’ k’anjel tixtenq’aheb’ chi us li kok’al chixtzolb’aleb’ li yaal sa’eb’ li ch’ol a’an.
Xtz’iib’ankil li nakak’oxla
Xkanab’ankileb’ chi wotzok
K’ut jun xjalam-uuch laj Samuel aj Lamanita ut kanab’eb’ li kok’al chixwotzb’al k’a’ruhaq neke’xnaw chirix a’an. Qayehaq, ma naru neke’aatinak chirix li esil b’ar wi’ laj Samuel nak’utuk sa’ xb’een li xaqxookil tz’ak malaj chirixeb’ li eetalil kixye naq te’k’utunq naq li Jesus taayo’laaq?
Xk’utb’al li tzol’leb’: Kok’al toj ka’ch’ineb’ xyu’am
Li Musiq’ej naru nokoraatina sa’ li qach’ool.
Naq laj Samuel aj Lamanita kitaqlaak chi jultikank aatin chiruheb’ laj Nefita, li qaChoxahil Yuwa’ kixtenq’a chixnawb’al sa’ lix ch’ool li k’a’ru tento tixye.
Kok’ k’anjel naru chi b’aanumank
-
K’ut chiruheb’ li kok’al naq us ta noko’aatinak rik’ineb’ li qas qiitz’in rik’ineb’ aatin, li Santil Musiq’ej naru nokoraatina rik’ineb’ eek’ahom sa’ li qach’ool. Kanab’eb’ chixk’eeb’al li ruq’ chiruheb’ li raam rajlal sut naq taayab’asi li aatin “ch’oolej” sa’ Helaman 13:2─5. Tenq’aheb’ chirutz’u’ujinkileb’ kok’ huhil aamej li te’xye: “Li Musiq’ej nikinraatina sa’ lin ch’ool.”
-
Ye reheb’ li kok’al naq chirix naq te’kub’eeq xha’ ut te’k’ojob’aaq, te’xk’ul li maatan re li Santil Musiq’ej re xtenq’ankileb’ chixnawb’al k’a’ru naraj li qaChoxahil Yuwa’ naq te’xb’aanu ut te’xye. Tenq’aheb’ chixk’oxlankileb’ k’a’aq re ru li naru naxye li Santil Musiq’ej reheb’, ut kanab’eb’ chixwotzb’al k’a’ru te’xb’aanu re xtaaqenkileb’ lix musiq’ahom a’an.
Eb’ li profeet neke’k’utuk chirix li Jesukristo.
Li seraq’ chirix laj Samuel aj Lamanita a’an jun xchaq’al ru hoonal re xk’utb’al chiruheb’ li kok’al naq chixjunileb’ li profeet neke’k’utuk chirix li Jesukristo.
Kok’ k’anjel naru chi b’aanumank
-
K’ut lix jalam-uuch laj Samuel aj Lamanita wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut aatinan rik’ineb’ li kok’al, rik’ineb’ aatin moko ch’a’ajeb’ ta, chirix lix numsihom a’an wan resil sa’ Helaman 13─16. Naru ajwi’ nakawoksi “Ch’ol 40: Laj Samuel aj Lamanita naxye resil li Jesukristo” (Eb’ li Esilal sa’ lix Hu laj Mormon, 111─113, malaj li video sa’ ChurchofJesusChrist.org). Kanab’eb’ li kok’al chixwotzb’al li neke’xnaw chirix laj Samuel aj Lamanita.
-
B’ichahomaq sa’ komonil li xwuq ch’ol re li b’ich “Lix Hu laj Mormon naxk’ut” (B’ichleb’aal choq’ reheb’ li Kok’al, 62). Wotz k’a’ruhaq nawulak chawu chirix laj Samuel, ut kanab’eb’ li kok’al chixwotzb’al k’a’ru nawulak chiruheb’ chirix li esil.
-
Muqeb’ jalam-uuch sa’ li tzoleb’aal li te’reetali li eetalil kixch’olob’ laj Samuel jo’ profeet sa’ Helaman 14:2─7 ut 20─25. Il ru junaq ch’ol aatin li tixch’olob’ jun reheb’ li eetalil ut kanab’eb’ li kok’al chixtawb’al lix jalam-uuch li eetalil a’an. Ch’olob’ naq eb’ li eetalil a’an ke’xtenq’aheb’ laj Nefita chixnawb’al chirix li Jesukristo. Ch’olob’ xyaalal naq, jo’ laj Samuel, chixjunileb’ li profeet neke’ch’olob’an chirix li Jesukristo.
Li profeet naxk’am qab’e rik’in li Jesukristo.
Osob’tesinb’ilin naq nintaaqe li profeet.
Li qaChoxahil Yuwa’ xk’ehom chaq qe jun profeet re qatenq’ankil chixnawb’al li rajom ut re xtaaqenkil lix k’uub’anb’il na’leb’. Noko’osob’tesiik naq naqab’i raatin li profeet ut naqataaqe.
Kok’ k’anjel naru chi b’aanumank
-
Tenq’aheb’ li kok’al chixyiib’ankil jun ch’ina xaqxookil tz’ak rik’ineb’ li hu. Rik’in roksinkil jun ch’ina b’atz’uul malaj muñeek re reetalinkil laj Samuel, kanab’eb’ li kok’al chixk’eeb’aleb’ xhoonal re xtenq’ankil “laj Samuel” chi taqe’k sa’ xb’een li tz’ak re k’utuk chiruheb’ li tenamit chirix li Jesukristo. (Chi’ilmanq ajwi’ li perel re kok’ k’anjel re li xamaan a’in.) Wotzeb’ ch’ol aatin re Helaman 16:1 ut 5 re xch’olob’ankil naq junjunqeb’ li kristiaan ke’xpaab’ laj Samuel ut ke’kub’siik xha’. Oksiheb’ ch’ol aatin re Helaman 16:2 ut 6 re xk’utb’al naq wankeb’ chik kristiaan ink’a’ ke’paab’an ut ke’josq’o chiru laj Samuel. Ch’olob’ xyaalal naq osob’tesinb’ileb’ li kristiaan neke’taaqenk re li profeet.
-
K’e chi kutankil jun xjalam-uuch li Kolonel ut kanab’ jun ch’ina al chireetalinkil li profeet ut chixb’eresinkileb’ xkomoneb’ li kok’al sa’ li tzoleb’aal naq yooqeb’ chixb’ichankil junjunaq raqal re li b’ich “Jun li profeet” (B’ichleb’aal choq’ reheb’ li Kok’al, 58–59) malaj junaq chik li b’ich chirixeb’ li profeet. Chirix a’an kanab’ li ch’ina al nareetali li profeet chixk’amb’al xb’eheb’ li kok’al toj chiru xjalam-uuch li Kolonel. Ch’olob’ xyaalal naq wi naqataaqe li profeet, a’an tooxb’eresi rik’in li Jesukristo. Wotz junjunq li k’a’aq re ru xk’utum li qaprofeet chirix li Jesus toje’. Chan ru naru naqataaqe lix naxye a’an?
Xk’utb’al li tzol’leb’: Kok’al ak ninqeb’
Li Musiq’ej naru nokoraatina sa’ li qach’ool.
Sa’ jun kutan, eb’ li kok’al nakatzoleb’ te’raj ru xnawb’al chan ru xb’aanunkil li kixb’aanu laj Samuel: xwotzb’al li esil tixk’e li Qaawa’ sa’ li raameb’.
Kok’ k’anjel naru chi b’aanumank
-
K’ut jun xjalam-uuch laj Samuel aj Lamanita (jo’ li natawman sa’ Kim, Taaqehin—Choq’ reheb’ li komon ut li junkab’al), ut patz’ reheb’ li kok’al chan ru naq kixnaw laj Samuel k’a’ru tixye naq yoo chaq chi jultikank aatin sa’ xb’een xtz’akil li tenamit. Kanab’eb’ chixsik’b’al xsumenkil a’an sa’ Helaman 13:2─4. Aatinan chirix junaq hoonal b’ar wi’ naq li Santil Musiq’ej xatxtenq’a chixnawb’al sa’ laa ch’ool k’a’ru kiraj li Dios naq taaye malaj taab’aanu. Kanab’eb’ li kok’al chixwotzb’al junaq xnumsihomeb’ chanchan ajwi’ a’an.
-
K’ut jun xjalam-uuch li yo’yookil profeet naq na’aatinak sa’ li jolomil ch’utub’aj-ib’. Ye reheb’ li kok’al naq li Dios naxye re li profeet k’a’ru tento tixye qe, jo’ naq kixye re laj Samuel li k’a’ru tento tixye reheb’ laj Nefita. Aatinanqex sa’ komonil chirixeb’ k’a’aq re ru xyehom li profeet li xatxmusiq’a laa’at malaj eb’ li kok’al.
Eb’ li profeet neke’k’utuk chirix li Jesukristo.
Li rajom li raatin laj Samuel a’an xch’olob’ankil xyaalal li Jesukristo ut xk’eeb’al xb’oqb’aleb’ li tenamit chixjalb’al xk’a’uxleb’ ut chi chalk rik’in a’an. Eb’ li profeet sa’eb’ li kutan a’in neke’xb’aanu ajwi’ li k’anjel a’an.
Kok’ k’anjel naru chi b’aanumank
-
Kanab’eb’ jun jachal reheb’ li kok’al chirilb’al ru Helaman 14:2─6 ut chixyiib’ankileb’ xjalam-uuch li eetalil re lix yo’lajik li Jesus. Kanab’eb’ li jun jachal chik chirilb’al ru Helaman 14:20─28 ut chixyiib’ankileb’ xjalam-uuch li eetalil re lix kamik li Jesus. Chirix a’an, patz’ re xkab’ichal li ch’uut naq te’xwotz lix jalam-uucheb’. Ilomaq ru sa’ komonil Helaman 14:11─12 ut k’e xb’oqb’aleb’ li kok’al chi ab’ink re xtawb’al k’a’ut naq laj Samuel kixye profeetil aatin chirixeb’ li eetalil a’an. Chan ru nokotzolok chirix li Jesukristo sa’eb’ li kutan a’in?
-
Ch’olob’ naq jo’ laj Samuel aj Lamanita kik’utuk chirix li Jesukristo, eb’ li yo’yookil profeet neke’xb’aanu ajwi’ a’an anajwan. Wotz junaq aatin re li jolomil ch’utub’aj-ib’ toje’ xnume’ b’ar wi’ li yo’yookil profeet kixch’olob’ xyaalal li Kristo. Kanab’eb’ li kok’al chixwotzb’al k’a’ru xk’utum li profeet chiruheb’ chirix li Jesukristo.
Osob’tesinb’ilin naq nintaaqe li profeet.
Li qaChoxahil Yuwa’ xk’ehom chaq qe jun profeet re qatenq’ankil chixnawb’al li rajom ut chixtaaqenkil lix k’uub’anb’il na’leb’. Noko’osob’tesiik naq naqab’i raatineb’ li profeet ut neke’qataaqe.
Kok’ k’anjel naru chi b’aanumank
-
Yaab’asi Helaman 16:1 ut 5 ut kanab’eb’ li kok’al chi xaqliik naq te’rab’i k’a’ruhaq ke’xb’aanu li tenamit naq ke’xpaab’ li raatin laj Samuel. Chirix a’an yaab’asiheb’ li raqal 2 ut 6, ut kanab’eb’ li kok’al chi chunlaak naq te’rab’i k’a’ruhaq ke’xb’aanu li tenamit naq ink’a’ ke’paab’an. Chan ru naru naqak’ut naq naqapaab’eb’ li raatin li yo’yookil profeet?
-
K’ut jun xjalam-uuch li yo’yookil profeet ut kanab’eb’ li kok’al chixwotzb’al k’a’ruhaq neke’xnaw chirix a’an. Wotz chan ru naq laa’at yookat chixyalb’al xtaaqenkil lix k’utum ut chan ru naq osob’tesinb’ilat xb’aan a’an.
Xb’oqb’aleb’ chi tzolok sa’ kab’l
Kanab’eb’ li kok’al chi tzolok chirix k’a’ruhaq xyehom li profeet ut chixwotzb’al sa’ li tzoleb’aal sa’ li xamaan chal re.
Xchaab’ilob’resinkil li qak’utum
Waklesiheb’ xch’ool li kok’al naq te’patz’inq. “Ileb’ li patz’om neke’xb’aanu [li kok’al] jo’ jun chaab’il hoonal, ink’a’ jo’ jun ramleb’ sa’ li tzolok. … Eb’ li patz’om a’an neke’xk’e aana’leb’ jwal aajel ru chirix li neke’xk’oxla, li k’a’ru neke’raj xnawb’al, ut chan ru neke’xk’ul li k’a’aq re ru neke’xtzol” (chi’ilmanq Li k’utuk jo’ li Kolonel, 25─26).