eb’ laj Nefita neke’ril li kutan maak’a’ wi’ li q’ojyin

Jun kutan, jun q’ojyin, ut jun kutan, xb’aan laj Jorge Cocco

7–13 septiembre

3 Nefi 1–7

“Taqsi aajolom ut chiwanq xsahil aach’ool”

Wi nakawaj xkomon aana’leb’ naq nakakawresi aawib’ re k’utuk, sik’ sa’ “Xkomon chik li k’anjeleb’aal re xtzolb’aleb’ li kok’al” ut “Xb’aanunkil li nak’anjelak choq’ reheb’ li kok’al li toj ka’ch’ineb’ xyu’am” sa’ xtiklajik li k’anjeleb’aal a’in.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixwotzb’al li najultiko’ reheb’ chirix li xe’xtzol sa’ li xamaan xnume’ chirixeb’ li eetalil kixye laj Samuel aj Lamanita li tixtenq’aheb’ li kristiaan chixnawb’al naq ak xyo’la chik li Jesus. Ye reheb’ li kok’al naq li kutan anajwan tex’aatinaq chirixeb’ li kristiaan ke’ilok re li eetalil a’an.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

3 Nefi 1:4–15, 19–21

Kik’utun chaq jun ak’ chahim naq kiyo’la li Jesukristo.

Li seraq’ sa’ li Ak’ Chaq’rab’ chirix lix yo’lajik li Kolonel jwal nawb’il ru, eb’ li kok’al ajwi’ neke’xnaw ru. Li xamaan a’in a’an jun chaab’il hoonal re xk’utb’al chiruheb’ li kok’al sa’ laa tzoleb’aal li sachb’a-ch’oolej ke’ril laj Nefita naq kiyo’la li Jesus.

Kok’ k’anjel naru chi b’aanumank

• Rub’elaj li tzolok, k’e jun li chahim chiru li tz’ak sa’ li tzoleb’aal. Kanab’eb’ li kok’al chixsik’b’al k’a’ruhaq ak’ chiru li tz’ak. Ye reheb’ li kok’al naq eb’ laj Nefita ke’ril jun li ak’ chahim sa’ choxa naq kiyo’la li Jesus. K’os ru li seraq’ li natawman sa’ 3 Nefi 1:4─15 ut 19─21. Naru ajwi’ nakawoksi li “Ch’ol 41: Eb’ li reetalil lix yo’lajik li Kristo” (Eb’ li Esilal sa’ lix Hu laj Mormon, 114─116, malaj li video sa’ ChurchofJesusChrist.org).

• K’ut chiruheb’ li kok’al jun xjalam-uuch xyo’lajik li Kolonel (chi’ilmanq Libro de obras de arte del Evangelio, ajl 30), ut b’ichahomaq jun li b’ich re Ralankil, jo’ li “B’ich re Ralankil” (B’ichleb’aal choq’ reheb’ li Kok’al, 32–33). Tenq’aheb’ li kok’al chixtawb’al ru naq eb’ laj Nefita mas najt wankeb’ chiru li na’ajej b’ar wi’ kiyola’ li Jesus, a’b’an ke’xnaw naq kiyo’la a’an xb’aaneb’ li eetalil ke’ril. Ch’olob’ xyaalal naq us ta laa’o ink’a’ kiqil lix yo’lajik li Kolonel, li Santil Musiq’ej naru nokoxtenq’a chixnawb’al naq eb’ li esil sa’eb’ li loq’laj hu chirix a’an tz’aqal yaaleb’.

3 Nefi 1:20

Li neke’xye li profeet junelik natz’aqlok ru.

Li Qaawa’ kixye re laj Nefi, “Tink’ut chiru li ruchich’och’ naq tintz’aqob’resi ru chixjunil li xintaqla chi yeemank rik’in xtz’uumaleb’ re lin santil profeet” (3 Nefi 1:13).

Kok’ k’anjel naru chi b’aanumank

• K’uteb’ jalam-uuch li te’reetali chan ru naq li Dios na’aatinak rik’ineb’ li profeet, jo’ rik’in laj Noe (Libro de obras de arte del Evangelio, ajl 7─8; chi’ilmanq Genesis 6─7) ut laj Samuel aj Lamanita (Libro de obras de arte del Evangelio, ajl 81; chi’ilmanq Helaman 14:1─7). Kanab’eb’ li kok’al chixwotzb’al k’a’ru neke’xnaw chirixeb’ li seraq’ a’an.

• Il ru rik’ineb’ li kok’al 3 Nefi 1:20 ut wotz lix nawom aach’ool chirix naq li raatineb’ li profeet junelik neke’tz’aqlok ru. K’e xb’oqb’aleb’ li kok’al chirab’inkil li profeet sa’ li jolomil ch’utub’aj-ib’ chal re.

3 Nefi 5:13

Naru nintaaqe li Jesukristo.

Laj Mormon kixye: “Laa’in jun xtzolom li Jesukristo.” Chan ru naru nakatenq’aheb’ li kok’al chirilb’aleb’ rib’ jo’ xtzolom ajwi’ li Jesukristo?

Kok’ k’anjel naru chi b’aanumank

• Il ru 3 Nefi 5:13, ut kanab’eb’ li kok’al chixka’sutinkil li ch’ol aatin “Laa’in jun xtzolom li Jesukristo.” K’ut chiruheb’ naq jun xtzolom li Jesukristo naxyal xtaaqenkil a’an. Wotz junjunq k’a’aq re ru kixb’aanu laj Mormon re wank jo’ li Jesus, jo’ xk’utb’al li raatin li Dios ut ab’ink chiruheb’ lix taqlahom (chi’ilmanq 3 Nefi 5:13─18). Tenq’aheb’ li kok’al chixk’oxlankil chan ru naru neke’wan jo’ tzolom.

• Tenq’aheb’ li kok’al chixyiib’ankil xjalam-uucheb’ li ruq’ chiru jun perel li hu ut chixsetb’al. Tz’iib’a “Laa’in jun xtzolom li Jesukristo” chiru li setb’il hu, ut kanab’eb’ chixyiib’ankil junpak’al chik xjalam-uuch k’a’aq re ru li naru neke’xb’aanu re wank jo’ tzolom (maare te’raj ru xtenq’ankileb’ re xtawb’al junaq na’leb’). B’ichahomaq sa’ komonil jun li b’ich li na’aatinak chirix li Kolonel, jo’ “Chinwanq raj joʼ li Jesus” (B’ichleb’aal choq’ reheb’ li Kok’al, 40–41).

reetalil li k‘utuk

Xk’utb’al li tzol’leb’: Kok’al ak ninqeb’

3 Nefi 1:4–21

Lix yeechi’ihom li Dios, k’eeb’ileb’ xb’aan lix profeet, junelik neke’tz’aqob’resiman ru.

Li seraq’ natawman sa’ 3 Nefi 1:4−21 Naru natenq’an chixkab’lankil lix paab’aaleb’ li kok’al chirix naq li Dios junelik naxtz’aqob’resi ru lix yeechi’ihom.

Kok’ k’anjel naru chi b’aanumank

• Kanab’eb’ li kok’al chixjuntaq’eetankil lix yeechi’ihom laj Samuel aj Lamanita li natawman sa’ Helaman 14:1−7 rik’in lix tz’aqob’resinkil ru wan sa’ 3 Nefi 1:19−21. Ch’olob’ xyaalal naq lix yeechi’ihom li Dios, yeeb’ileb’ xb’aaneb’ lix profeet, junelik neke’tzaqob’resiman ru.

• Il ru rik’ineb’ li kok’al li seraq’ natawman sa’ 3 Nefi 1:4−10. Patz’ reheb’ li kok’al chan raj ru xe’reek’a wi ta a’aneb’ jun reheb’ li xe’paab’an sa’eb’ chaq li kutan a’an. Kanab’eb’ li kok’al chirilb’al ru lix raqik li seraq’ sa’eb’ li raqal 11−15 ut chixyeeb’al chan ru naru xtz’aqob’resinkil ru li ch’ol aatin a’in: “Li na’leb’ sa’ li seraq’ a’in, a’an …” Chan ru naru naqak’utb’esi li qoyb’enihom rik’in li Dios naq wan qak’a’uxl malaj t’anenaq qach’ool?

• Wotz k’a’ruhaq xyeechi’ihom qe li yo’yookil profeet. K’a’ru naru naqab’aanu re xk’utb’esinkil li qapaab’aal naq li raatin li profeet kichal chaq rik’in li Dios?

3 Nefi 2:11–12; 3:13–14, 24–26

Jwal kawo wi’chik naq naqach’utub’ qib’.

Ki’ajman ru naq ke’xch’utub’ rib’ laj Nefita re xkolb’aleb’ rib’. Chan ru naru nakatenq’aheb’ li kok’al chirilb’al naq li xch’utub’ankileb’ rib’ rik’ineb’ amiiw tiikeb’ xch’ool naru ajwi’ naxk’e xmetz’eweb’ sa’ musiq’ej?

Kok’ k’anjel naru chi b’aanumank

• Il ru rik’ineb’ li kok’al eb’ li raqal a’in ut kanab’eb’ chixsik’b’al k’a’ut naq ke’xch’utub’ rib’ laj Nefita, jo’ ajwi’ eb’ li osob’tesihom ke’xk’ul: 3 Nefi 2:11−12 ut 3:13−14, 24−26. K’a’ut naq aajel ru naq laa’o “taqach’utub’ qib’ ” sa’eb’ li qajunkab’al ut sa’ li iglees? Chan ru naq lix ch’utub’ankil qib’ naru naxk’e qakawilal sa’ musiq’ej?

• Oksi jun li ch’ina k’anjeleb’aal re xk’utb’al naq mas kawo wi’chik sa’ komonil chiru naq wanko qajunes. Qayehaq, kanab’eb’ li kok’al chixyalb’al xtoqb’al jun li che’ ut chirix a’an jun ch’uut li che’, malaj xpejb’al jun perel li hu ut chirix a’an jun ch’uut li hu. Chan ru naq chanchano li che’ malaj li perel hu? Chan ru naru naqakawresi qib’ chiqib’il qib’ naq naqach’utub’ qib’ sa’eb’ li qajunkab’al malaj sa’ li iglees?

• Ch’olob’ naq li Jesus yoo chixch’utub’ankileb’ lix tenamit sa’ li Iglees anajwan rik’in li k’anjel re xjultikankil li evangelio (chi’ilmanq 3 Nefi 5:24−26). K’e xb’oqb’al jun li misioneer wan sa’ xmision malaj junaq li misioneer re li teep chixwotzb’al xnumsihom li naxk’utb’esi chan ru neke’xkawob’resi rib’ li kristiaan naq neke’ch’utub’aak sa’ li Iglees.

3 Nefi 4:30–33; 5:12–26; 6:14; 7:15–26

Laa’in jun xtzolom li Jesukristo.

Chan ru naru nakatenq’aheb’ li kok’al chirilb’aleb’ rib’ jo’ xtzolom li Jesukristo, jo’ laj Mormon? (chi’ilmanq 3 Nefi 5:13).

Kok’ k’anjel naru chi b’aanumank

• K’ut xjalam-uuch jun lix Hu laj Mormon (jo’ li Libro de obras de arte del Evangelio, ajl 73) Kanab’ li junjunq chi kok’al chixk’eeb’aleb’ xhoonal re xka’sutinkil li kixye laj Mormon sa’ 3 Nefi 5:13: “Laa’in jun xtzolom li Jesukristo.” K’a’ru naraj naxye wank jo’ xtzolom li Jesukristo? (chi’ilmanq Tzol’leb’ ut Sumwank 41:5).

• K’uub’ ru li tzoleb’aal sa’ wiib’ kok’ ch’uut ut kanab’eb’ li junjunq chi ch’uut chirilb’al ru jun reheb’ li reetalil li tzolomil: eb’ laj Lamanita jalb’ileb’ xch’ool (chi’ilmanq 3 Nefi 4:30─33; 6:14), laj Mormon (chi’ilmanq 3 Nefi 5:12─26) ut laj Nefi (chi’ilmanq 3 Nefi 7:15─26). Chan ru naq eb’ li kristiaan a’an, a’aneb’ tz’aqal xtzolom li Jesukristo? K’a’ru naru naqab’aanu re xtaaqenkil lix b’aanuhomeb’?

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixk’oxlankil k’a’ruhaq te’xb’aanu chiru li xamaan a’in re wank jo’ xtzolom li Kristo. Waklesi xch’ooleb’ chixtz’iib’ankil ut chixwotzb’al rik’ineb’ lix junkab’al.

Xchaab’ilob’resinkil li qak’utum

K’ut jun raqal reheb’ li loq’laj hu. Sik’ ru junaq raqal sa’eb’ li loq’laj hu li nim xwankil choq’ aawe (malaj kanab’ junaq li ch’ina al chixsik’b’al ru junaq) ut k’e sa’ junaq na’ajej sa’ li tzoleb’aal b’ar wi’ naru te’ril li kok’al junelik. Naru taakanab’ aran chiru k’iila xamaan ut naru taajultika jo’q’ehaq.

perel re kok’ k’anjel: eb’ li kristiaan ke’rileb’ li reetalil xyo’lajik li Kristo