laj Alma najultikan aatin

Xk’utb’al li tz’aqal yaal tzol’leb’, xb’aan laj Michael T. Malm

8–14 junio

Alma 8–12

“Li Jesukristo taachalq chixtojb’al rix lix tenamit”

Naq nakawil ru li k’a’ru ke’xk’ut laj Alma ut laj Amulek chiru lix tenamit laj Ammoniah, k’a’ru nakaweek’a naq aajelaq ru choq’ reheb’ li kok’al nakatzoleb’?

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixch’olob’ankil k’a’ru neke’xb’aanu li misioneer ut chi aatinak chirix anihaq neke’xnaw ru li yoo chi k’anjelak sa’ xmision. K’a’ru neke’xk’ut li misioneer chiruheb’ li kristiaan? Tenq’aheb’ li kok’al chirilb’al ru naq laj Alma ut laj Amulek a’aneb’ chaq misioneer li ke’xwotz li evangelio reheb’ lix tenamit laj Ammoniah.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Alma 8

Naru ninwotz li evangelio.

Laj Alma kib’eek chiru chixjunil li ch’och’ re xjultikankil li evangelio, ut laj Amulek kijultikan sa’ lix tenamit reheb’ li ramiiw ut eb’ li rech kab’al. Chan ru naru nakamusiq’aheb’ li kok’al chixtaaqenkil lix b’aanuhomeb’ a’an ut chixwotzb’al li evangelio rik’ineb’ li ras riitz’in?

Kok’ k’anjel naru chi b’aanumank

• Ilomaq ru sa’ komonil li xb’een jachal re li “Ch’ol 22: Lix taqlanb’il k’anjel aj Alma sa’ Ammoniah” (Eb’ li Esilal sa’ lix Hu laj Mormon, 58─63; chi’ilmanq ajwi’ li video sa’ ChurchofJesusChrist.org). Kanab’eb’ li kok’al chi wank sa’ ka’kab’il ut chixq’alunkileb’ li ruq’ ut chixk’oxlankil naq a’aneb’ laj Amulek ut laj Alma, li ke’xk’ut li evangelio sa’ wiib’al, naq yooqeb’ chixb’ichankil jun li b’ich chirix xk’anjeleb’ li misioneer, jo’ “Nawaj tinwanq choq’ jun li misioneer” (B’ichleb’aal choq’ reheb’ li Kok’al, 90).

• Tenq’aheb’ li kok’al chixyeeb’al jun li yaal re li evangelio naab’al sut, jo’ “Lix Hu laj Mormon nach’olob’an chirix li Kristo” malaj “Ninnaw naq li Jesus nikinixra.” Jo’ xkomon li ch’ina k’anjel, naru nakatenq’aheb’ li kok’al chixtz’aqob’resinkil ru li perel re kok’ k’anjel re’ li xamaan a’in. Jo’ xkomon li ch’ina k’anjel, naru nakatenq’aheb’ li kok’al chixtz’aqob’resinkil ru li perel re kok’ k’anjel re’ li xamaan a’in.

• Kanab’eb’ li kok’al chixseraq’inkil aawe k’a’ruhaq ke’xwotz rik’in junaq li komon sa’eb lix junkab’al malaj junaq amiiw, jo’ jun b’atz’uul malaj junaq li saa’us. Tenq’aheb’ chixyiib’ankil jun xtusulal li k’a’aq re ru aajeleb’ ru li naru naqawotz rik’iineb’ li qas qiitz’in chirix li Jesukristo. Ch’olob’ naq xb’aan naq li evangelio jwal aajel ru, laj Alma xko’o chixwotzb’al rik’ineb’ li kristiaan sa’ jalaneb’ chik li tenamit, re naq te’ruuq chixtzolb’al chan ru li wank rik’in sahil ch’oolejil.

Alma 8:18–22

Naru ninwan jo’ jun chaab’il amiiw.

Li k’anjel kixb’aanu laj Amulek choq’ re laj Alma a’an jun chaab’il eetalil choq’ reheb’ li kok’al re chan ru naru neke’rahok ut neke’k’anjelak chiruheb’ li ras riitz’in.

Kok’ k’anjel naru chi b’aanumank

• Kanab’ jun li ch’ina al chixk’oxlankil naq a’an laj Amulek ut jun chik li ch’ina al chixk’oxlankil naq a’an laj Alma naq laa’at yooqat chixseraq’inkil li esil wan sa’ Alma 8:18─22. Kanab’eb’ li kok’al chatenq’ankil chixseraq’inkil li esil ut kanab’eb’ jalan jalanq chi kok’al chi wank jo’ laj Alma ut jo’ laj Amulek. Chan ru naq laj Amulek a’an jun chaab’il amiiw choq’ re laj Alma? Kanab’eb’ li kok’al chi aatinak chirix chan ru naq anihaq wanjenaq jo’ jun chaab’il amiiw choq’ reheb’ a’an. K’a’ru neke’reek’a chirix a’an? K’a’ut naq li Dios naraj naq laa’aqo chaab’il aamiiw choq’ reheb’ li qas qiitz’in?

• Taw malaj yiib’ junaq jalam-uuch li taareetali li amiiwul (jo’ reheb’ wiib’ chi kristiaan neke’xq’alu rib’ malaj junaq aamej), ut set chi kok’ putz’ re jorb’a-k’a’uxlej. Chirix li junjunq chi setb’il hu re li jorb’a-k’a’uxlej, tz’iib’a k’a’ruhaq ke’xb’aanu laj Alma ut laj Amulek re wank choq’ chaab’il amiiw malaj k’a’aq re ru naru naqab’aanu re wank choq’ chaab’il amiiw. Kanab’eb’ li kok’al chixk’eeb’aleb’ xhoonal re xsik’b’al jun xcha’al ut xk’eeb’al sa’ li jorb’a-k’a’uxlej naq laa’at yooqat chirilb’al ru li tz’iib’anb’il chirix. Tenq’aheb’ chixk’oxlankileb’ kristiaan li naru neke’wan choq’ ramiiweb’. Ch’olob’ xyaalal naq li Jesukristo a’an tz’aqal jun chaab’il amiiw nawan qe.

wiib’ kok’ ixqa’al neke’se’ek

Naru nokowan choq’ chaab’il amiiw choq’ reheb’ li qas qiitz’in.

Alma 11:43–44

Chirix li kamk, tinwakliiq wi’chik chi yo’yo.

Laj Amulek kixk’ut chiruheb’ lix tenamit laj Ammoniah chirix li wakliik chi yo’yo. Chan ru naru nakatenq’aheb’ li kok’al nakatzoleb’ chixtawb’al ru k’a’ru naraj naxye waklijenaq chi yo’yo?

Kok’ k’anjel naru chi b’aanumank

• Oksi laa wuq’ re reetalinkil jun li musiq’ej ut jun li ramleb’ uq’ re reetalinkil li tib’elej. Isi laa wuq’ sa’ li ramleb’ uq’ re xk’utb’esinkil chiruheb’ li kok’al naq li qamusiq’ ut li qatib’el neke’xjach rib’ sa’ xhoonalil li kamk. Chirix a’an ch’ik wi’chik laa wuq’ sa’ li ramleb’ uq’ re xk’utb’esinkil naq li qamusiq’ ut li qatib’el te’xjunaji wi’chik rib’ sa’ li wakliik chi yo’yo. Kanab’eb’ li kok’al chixk’eeb’aleb’ xhoonal chiroksinkil ut chirisinkil li ramleb’ uq’ naq laa’at taawil ru Alma 11:43. K’e chi kutankil jun xjalam-uuch xMaria ut li Jesukristo waklijenaq chi yo’yo (Libro de obras de arte del Evangelio, ajl 59), ut ch’olob’ xyaalal naq sa’ xk’ab’a’ li Jesukristo chiqajunil toowakliiq chi yo’yo.

• Kanab’eb’ li kok’al chixyiib’ankileb’ xjalam-uuch li ramiiweb’ malaj xjunkab’aleb’, jo’ ajwi’ lix komoneb’ lix junkab’al chik. Naq yooqeb’ chixwotzb’al lix jalam-uucheb’, k’ut chawuq’ li junjunq chi amiiw malaj komon sa’ lix junkab’aleb’ li xe’xyiib’ xjalam-uucheb’ ut ch’olob’ naq a’an taawakliiq chi yo’yo. Ch’olob’ xyaalal naq sa’ xk’ab’a’ li Jesus naru toowanq rik’ineb’ li qajunkab’al chi junelik.

reetalil li k‘utuk

Xk’utb’al li tzol’leb’: Kok’al ak ninqeb’

Alma 8–10

Naru ninwotz li evangelio.

Laj Alma ut laj Amulek ke’xwotz li evangelio, us ta jwal ch’a’aj choq’ reheb’. Chan ru naru naq lix paab’aaleb’ ut lix kawileb’ xch’ool tixmusiq’aheb’ li kok’al nakatzoleb’?

Kok’ k’anjel naru chi b’aanumank

• Rik’in laa waatin, k’os ruheb’ li ke’k’ulman sa’ Alma 8─10. Sik’eb’ ru junjunq reheb’ li na’leb’ sa’ li kik’ulman li taaruuq chixtenq’ankileb’ li kok’al chixwotzb’al li evangelio, jo’ li yalok q’e (chi’ilmanq Alma 8:8─13), ch’olob’ank chirix li Kristo (chi’ilmanq Alma 9:26─27) uk wank sa’ ka’kab’il (chi’ilmanq Alma 10:7─11). Kanab’eb’ li kok’al chirilb’aleb’ ru junjunq raqal sik’b’ileb’ ru ut chixyeeb’al k’a’ru neke’xtzol chirix xwotzb’al li evangelio. K’a’ut naq aajel ru xyeeb’al reheb’ li qas qiitz’in resil li evangelio?

• Kanab’eb’ li kok’al chixwotzb’al xnumsihomeb’ b’ar wi’ xe’xwotz li evangelio rik’in anihaq, malaj wotz jun aanumsihom laa’at. Naq yooqex chixb’ichankil jun li b’ich chirix lix k’anjeleb’ li misioneer, jo’ “Taqak’am raatin li Qaawa’ ” (B’ichleb’aal choq’ reheb’ li Kok’al, 92─93), k’e xb’oqb’aleb’ li kok’al chi ab’ink chi us re xtawb’aleb’ chan ru naru neke’xkawresi rib’ re xwotzb’al li evangelio. K’a’ut naq li qaChoxahil Yuwa’ naraj naq taqawotz li evangelio? Tenq’aheb’ li kok’al chixk’uub’ankil xjayalihomeb’ re xwotzb’al li evangelio rik’ineb’ li ramiiw, jo’ xk’eeb’al junaq lix Hu laj Mormon reheb’ malaj xk’eeb’al xb’oqb’aleb’ sa’ junaq li ch’ina k’anjel sa’ li Iglees. K’eheb’ xhoonal re xk’utb’esinkil k’a’ raj ru te’xye malaj te’xb’aanu sa’eb’ li hoonal a’an.

Alma 11–12

Lix k’uub’anb’il na’leb’ li Dios a’an jun k’uub’anb’il na’leb’ re tojb’al-ix.

Chan ru taawoksi Alma 11–12 rik’ineb’ li kok’al re “xk’eeb’aleb’ chixnaw chirix li k’uub’anb’il na’leb’ re li tojb’al’ix”? (Alma 12:30).

Ch’ina k’anjel naru nab’aanuman

• Tz’iib’a chiru li pizarron junjunqeb’ li na’leb’ chirix li k’uub’anb’il na’leb’ re tojb’al-ix natawman sa’ Alma 11─12, jo’ lix t’anik laj Adan ut xEva, lix tojb’al rix li maak xb’aan li Jesukristo, li jalb’a-k’a’uxlej, li kamk, li wakliik chi yo’yo, ut li raqb’a-aatin. Il ruheb’ junjunq li raqal sa’ Alma 11 malaj 12 li neke’aatinak chirixeb’ li na’leb’ a’an, ut k’eheb’ xhoonal li kok’al re xyiib’ankil jun jalam-uuch li taareetali li junjunq chi na’leb’ a’an. K’a’ru lix k’anjel li Kolonel sa’ li k’uub’anb’il na’leb’ a’an? Chirix a’an kanab’eb’ li kok’al chiroksinkileb’ lix jalam-uuch re xk’oxlankil naq yookeb’ chi k’utuk chiru jun amiiw chirix lix k’uub’anb’il na’leb’ li Dios.

Alma 12:10

Wi ink’a’ ninkawob’resi li waam, naru nink’ul xkomon li raatin li Dios.

Sa’ xtzolb’aleb’ li musiq’ejil yaal, lix wanjik li qaam juntaq’eet x’aajelil ru rik’in lix seeb’al li qak’a’uxl.

Kok’ k’anjel naru chi b’aanumank

• Ilomaq ru sa’ komonil Alma 12:10 ut aatinanqex chirix k’a’ru naraj naxye “xkawob’resinkil” li qaam. K’a’ut naq jun aamej kawob’resinb’il jwal ch’a’aj naq tixtaw xna’leb’ rik’in li Dios?

• Re xk’utb’esinkil li na’leb’ a’an, k’ut chiruheb’ li kok’al jun li esponja ut jun li pek, ut patz’ reheb’ b’ar wan reheb’ a’an tixtz’ub’ li ha’ chi chaab’il. Chan ru naru naqak’ut chiru li Qaawa’ naq naqaj naq q’unaq li qaam jo’ li esponja?

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixsik’b’aleb’ hoonal re xwotzb’al li evangelio malaj re xtenq’ankil anihaq chiru li xamaan a’in.

Xchaab’ilob’resinkil li qak’utum

Wotz lix nawom aach’ool sa’ li tzoleb’aal. Jun xnawom ch’oolej moko xninqal ta na’leb’ naraj jo’ a’in: “Ninnaw naq li qaChoxahil Yuwa’ nekexxra chi junjunqalex” malaj “Sa naweek’a naq nintzolok chirix li Jesukristo.” (Chi’ilmanq ajwi’ Li k’utuk jo’ li Kolonel, 11.)

perel re kok’ k’anjel: naru ninwan jo’ misioneer