laj Alma ut laj Amulek neke’el chaq sa’ li tz’alam

B’onb’il jalam-uuch naq ke’kole’ laj Alma ut laj Amulek sa’ li tz’alam, xb’aan laj Andrew Bosley

15–21 junio

Alma 13–16

“Ok sa’ xhilob’aal li Qaawa’ ”

Laa’at ka’ajwi’ b’ab’ay li hoonal nakatwan rik’ineb’ li kok’al sa’ li tzoleb’aal rajlal xamaan. Taawosob’tesi lix yu’ameb’ chi nim wi naru nakamusiq’aheb’ chixtzolb’al lix Hu laj Mormon naq moko wankeb’ ta sa’ li tzoleb’aal, mas wi’chik rik’ineb’ lix junkab’al.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

K’eheb’ xhoonal li kok’al chixwotzb’al li k’a’ru ak neke’xnaw chirixeb’ li esil wankeb’ sa’ Alma 13─16. Re xtenq’ankileb’, k’uteb’ jalam-uuch jo’ li neke’tawman sa’ Kim, Taaqehin—Choq’ reheb’ li komon ut li junkab’al malaj li “Ch’ol 22: Lix taqlanb’il k’anjel aj Alma sa’ Ammoniah” (Eb’ li Esilal sa’ lix Hu laj Mormon, 58─63).

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Alma 13:1–2, 6, 16

Li tijonelil nikinixtenq’a chi chalk chiru li Kristo.

K’oxla rik’in tijok k’a’ru neke’raj ru xtawb’al ru li kok’al sa’ laa tzoleb’aal chirix li k’a’ru kixk’ut laj Alma chirix li tijonelil sa’eb’ li raqal a’an.

Kok’ k’anjel naru chi b’aanumank

• K’e xb’oqb’aleb’ li kok’al chixyaab’asinkil aawochb’een jun xch’olob’ankil li tijonelil, jo’ “li tijonelil a’an lix wankil li Dios.”

• Teheb’ li loq’laj hu sa’ Alma 13:2 ut ye reheb’ li kok’al naq li Dios naxb’oqeb’ aj k’amol re li tijonelil “re naq eb’ li tenamit … te’ril chi uub’ej li Ralal.” Re xk’utb’esinkil chan ru naq eb’ laj k’amol re li tijonelil neke’xb’aanu a’an, k’uteb’ jalam-uuch re chan ru naq eb’ laj k’amol re li tijonelil neke’k’anjelak (chi’ilmanq Libro de obras de arte del Evangelio, ajl 38–41, 103–109), ut chirix a’an wotzeb’ esil chirix chan ru naq li Jesus kik’anjelak (chi’ilmanq Mateo 26:26─28; Markos 5:22─24, 35─43).

• Teheb’ li loq’laj hu sa’ Alma 13:6 ut ch’olob’ naq eb’ laj k’amol re li tijonelil “neke’xk’ut lix taqlahom li Dios chiruheb’ li ralal xk’ajoleb’ li winq.” Tenq’aheb’ li kok’al chixk’oxlankileb’ aj k’amol re li tijonelil neke’xnaw ru. Chan ru naq neke’xk’ut li taqlahom? Kanab’eb’ li kok’al chixyiib’ankil xjalam-uuch jun aj k’amol re li tijonelil neke’xnaw ru naq yoo chixk’utb’al chiru anihaq eb’ lix taqlahom li Dios.

saaj winq sa’ li meex re li loq’laj wa’ak

Eb’ li k’ojob’anb’il k’anjel re li tijonelil nokohe’xtenq’a chixsik’b’al li Jesukristo re xk’ulb’al xtojb’al qix.

Alma 14:18–29

Li qaChoxahil Yuwa’ nikinixkawob’resi a’ yaal lin paab’aal.

Li seraq’ chirix naq laj Alma ut laj Amulek ke’ach’ab’aak sa’ li tz’alam naru naxmusiq’aheb’ li kok’al chixsik’b’al li Qaawa’ naq neke’raj ru xtenq’ankil.

Kok’ k’anjel naru chi b’aanumank

• K’ut lix jalam-uucheb’ laj Alma ut laj Amulek wankeb’ sa’ li perel re kok’ k’anjel re li xamaan a’in naq laa’at taaseraq’i li esil wan sa’ Alma 14:18─29. Naru ajwi’ nakawil ru li “Ch’ol 22: Lix taqlanb’il k’anjel aj Alma sa’ Ammoniah” (Eb’ li Esilal sa’ lix Hu laj Mormon, 58─63, malaj li video sa’ ChurchofJesusChrist.org). Kanab’eb’ li kok’al chixkeeb’aleb’ xhoonal chixchapb’aleb’ li kok’ jalam-uuch re xseraq’inkil li esil. Jultika naq laj Alma ut laj Amulek ke’k’ehe’ xmetz’ew re eelelik sa’ li tz’alam “jo’ chanru lix paab’aaleb’ li wan rik’in li Kristo” (Alma 14:26).

• Tenq’aheb’ li kok’al chixk’oxlankil k’a’ru ke’reek’a laj Alma ut laj Amulek naq wankeb’ sa’ li tz’alam, ut kanab’eb’ chixk’utb’esinkileb’ li eek’ahom a’an (chi’ilmanq li raqal 22). Ch’olob’ naq laj Alma kixpatz’ xtenq’ankil re li Qaawa’ (chi’ilmanq li raqal 26). Ch’olob’ xyaalal naq li Dios tooxkawob’resi naq tootijoq rik’in paab’aal.

• Oksi li perel re kok’ k’anjel re li xamaan a’in re xk’utb’al chiruheb’ li kok’al junjunq chan ru naq li Dios naxkawob’resiheb’ li wankeb’ xpaab’aal. Naq eb’ li kok’al yooqeb’ chixb’onb’al li perel re kok’ k’anjel, seraq’in reheb’ chirix jun sutaq b’ar wi’ li Dios xk’e aametz’ew laa’at.

Alma 16:1–8

Osob’tesinb’ilin naq nintaaqe li profeet.

Laj Tzoram, xb’eenil aj taqlanel reheb’ li teep aj pleet aj Nefita, kixnaw naq laj Alma a’an jun saaj profeet ut kixsik’ xb’eresinkil rik’in. Sa’ xk’ab’a’ a’an, laj Tzoram ki’el chi uub’ej.

Kok’ k’anjel naru chi b’aanumank

• Wotz rik’in laa waatin li seraq’ wan sa’ Alma 16:1─8. Jultika wi’chik naq sa’ xk’ab’a’ naq laj Tzoram ut eb’ li teep aj pleet aj Nefita ke’xtaaqe li profeet aj Alma, eb’ laj Nefita ke’ru chixkolb’aleb’ li ramiiw ke’k’ehe’ chi preexil xb’aaneb’ laj Lamanita. Wotz jun aanumsihom b’ar wi’ xat-osob’tesiik xb’aan xtaaqenkil li profeet.

• K’ut jun xjalam-uuch li Awa’b’ej re li Iglees ut wotz junjunq reheb’ li k’a’aq re ru xk’utum li tento taqab’aanu. Tenq’aheb’ li kok’al chixk’oxlankil chan ru naru naqataaqe li Jesus rik’in xb’aanunkil li k’a’ru naxk’ut chiqu lix profeet.

• K’uteb’ xjalam-uuch profeet (chi’ilmanq Libro de obras de arte del Evangelio, ajl 6–9, 14, 18, 26–27) naq yooqat chixb’ichankil rik’ineb’ li kok’al jun li b’ich na’aatinak chirixeb’ li profeet, jo’ “Jun li profeet” (B’ichleb’aal choq’ reheb’ li Kok’al, 58─59). Aatinan chirixeb’ li ch’ol aatin wankeb’ sa’ li b’ich li neke’xk’ut k’a’ut tento te’qataaqe li profeet.

reetalil li k‘utuk

Xk’utb’al li tzol’leb’: Kok’al ak ninqeb’

Alma 13:1–19

Li tijonelil nikinixtenq’a chi chalk rik’in li Kristo.

Naq nakawil ru Alma 13:1─19, k’a’ru nakataw li naxnimob’resi laa woxloq’ chirix li tijonelil? K’a’ru nakaweek’a naq taawotz rik’ineb’ li kok’al nakatzoleb’? Eb’ li na’leb’ a’in naru nakawoksiheb’.

Kok’ k’anjel naru chi b’aanumank

• Il ru rik’ineb’ li kok’al Alma 13:10 ut 13 re xsik’b’al chan ru tento taawanq jun aj k’amol re li tijonelil. Kanab’eb’ chixk’oxlankileb’ kristiaan neke’xnaw ru li neke’reetali li wank chi jo’kan.

• Tenq’aheb’ li kok’al chixyiib’ankil jun xtusulaleb’ li k’ojob’anb’il k’anjel neke’qak’ul rik’in li tijonelil (chi’ilmanq “K’ojob’anb’il k’anjel” sa’ Leales a la Fe, 134–135). Kanab’ anihaq chirilb’al ru Alma 13:16. Chan ru naq eb’ li k’ojob’anb’il k’anjel a’an nokohe’xtenq’a “re naq taqil chi uub’ej li Jesukristo re xk’ulb’al risinkil li qamaak”?

• Patz’ reheb’ li kok’al ma neke’xnaw chan ru naq li tijonelil kixk’ul choq’ xk’ab’a’ li Tijonelil re Melkisedek. Tenq’aheb’ chixtawb’aleb’ xsumenkil sa’ Alma 13:14─19 ut Tzol’leb’ ut Sumwank 107:1─4. K’a’ru naqatzol rik’in laj Melkisedek chirix chan ru tento taa’oksimanq li tijonelil?

Alma 14:18–29

Li qaChoxahil Yuwa’ nikinixkawob’resi a’ yaal lin paab’aal.

Laj Alma ut laj Amulek ke’wan sa’ tz’alam chiru naab’al kutan rub’elaj naq li Qaawa’ kirach’ab’eb’. Li esil a’an naru naxtenq’aheb’ li kok’al chixtzolb’al naq lix yalb’aleb’ rix maare maak’a’aq xyiib’ankil sa’ junpaat, a’b’an li Qaawa’ tixk’e xmetz’eweb’ “jo’ chanru lix paab’aaleb’ ” (Alma 14:26).

Kok’ k’anjel naru chi b’aanumank

• Tz’iib’aheb’ patz’om chiru li pizarron re xtenq’ankileb’ li kok’al chixsik’b’al xch’olob’ankil sa’ Alma 14:18─29, jo’ K’a’ru ke’xb’aanu laj raqol aatin re laj Alma ut laj Amulek sa’ li tz’alam? malaj Chan ru ke’xk’ut xpaab’aaleb’ chirix li Jesukristo? Kanab’eb’ li kok’al chirilb’al jun malaj wiib’ li raqal sa’ junjunqal re xsik’b’aleb’ xsumenkil li patz’om.

• Kanab’eb’ li kok’al chixyiib’ankileb’ xjalam-uuch li seraq’ wan sa’ Alma 14:18─29 ut chirix a’an kanab’eb’ chiroksinkileb’ li jalam-uuch a’an re xseraq’inkil li esil a’an. Chan ru naru nokowan jo’ laj Alma ut laj Amulek?

• Wotz jun aanumsihom b’ar wi’ laa’at xak’ut aapaab’aal chirix li Qaawa’ ut a’an xk’e aakawob’resinkil re xq’axb’al malaj xkuyb’al jun lix yalb’al aawix. Waklesiheb’ xch’ool li kok’al chixwotzb’aleb’ xnumsihom chanchan laa we laa’at.

Alma 15:3–12

Li evangelio naru naxjaleb’ li aamej.

Laj Tzeesrom kixka’pak’ali chi kaw laj Alma ut laj Amulek sa’ xtiklajik, a’b’an lix nawom xch’ooleb’ kireek’asi li raam ut kixmusiq’a chixjalb’al xch’ool. Naq nakatzoleb’ li raqal a’an, k’e reetal chan ru naq lix numsihom laj Tzeesrom naru naxmusiq’aheb’ li kok’al nakatzoleb’.

Kok’ k’anjel naru chi b’aanumank

• Il wi’chik rik’ineb’ li kok’al li xe’xtzol sa’ li xamaan xnume’ chirix laj Tzeesrom. Ilomaq ru sa’ komonil Alma 15:3─12 re xnawb’al chan ru naq kixjal rib’.

• Kanab’eb’ li kok’al chixk’oxlankil naq xe’xnaw ru laj Tzeesrom naq maji’ naxjal xk’a’uxl. K’a’ raj ru te’xye re re xtenq’ankil chixpaab’aankil li evangelio? Naru neke’xjuntaq’eeta li te’xye raj re rik’in li ke’xk’ut laj Alma ut laj Amulek chiru laj Tzeesrom (chi’ilmanq Alma 11:40─46; 15:6─11). K’a’ut naq xnawb’aleb’ li yaal a’an naru naxtenq’a anihaq re taaraj xjalb’al rib’?

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixk’oxlankil k’a’ruhaq naru neke’xb’aanu chiru li xamaan a’in re xk’utb’al lix paab’aaleb’ chirix li Qaawa’. Waklesiheb’ xch’ool chixwotzb’al lix k’uub’anb’il na’leb’eb’ ut lix numsihomeb’ rik’ineb’ lix junkab’al.

Xchaab’ilob’resinkil li qak’utum

Tzol xk’eeb’al reetal li k’utb’esinb’il na’leb’. “Li k’utb’esinb’il na’leb’ nak’ulun “chi junjunqil li raqal” (2 Nefi 28:30), ut ink’a’ chixjunil sa’ jun sut ajwi’. … Naq nakatk’oxlak chirix chan ru naq eb’ li raqal chi na’leb’ re li evangelio te’rosob’tesiheb’ li komon sa’ laa tzoleb’aal, taachalq li na’leb’ aawik’in sa’ laa yu’am re wulaj wulaj—naq yookat chi xik sa’ trab’aaj, naq yookat chi k’anjelak sa’ kab’l, malaj naq yookat chi aatinak rik’ineb’ laa junkab’al malaj laa wamiiw (Li k’utuk jo’ li Kolonel, 12).

perel re kok’ k’anjel: laj Alma ut laj Amulek wankeb’ xpaab’aal