laj Alma ut laj Amulek neke’el chaq sa’ li tz’alam

B’onb’il jalam-uuch naq ke’kole’ laj Alma ut laj Amulek sa’ li tz’alam, xb’aan laj Andrew Bosley

15–21 junio

Alma 13–16

“Ok sa’ xhilob’aal li Qaawa’ ”

Ninqeb’ xloq’al li musiq’anb’il na’leb’ nakak’ul naq nakak’oxla sa’ aach’ool eb’ li loq’laj hu. Naru taak’ut naq nakab’antioxiheb’ rik’in xtz’iib’ankileb’ ut xk’anjelankileb’ li na’leb’ a’an.

Xtz’iib’ankil li nakak’oxla

Chi naab’al paay ru, sa sa xyu’ameb’ laj Amulek ut laj Tzeesrom sa’ li tenamit Ammonihah. Laj Amulek a’an chaq “jun winq li maak’a’ch’in li chaab’ilal k’oxlanb’il chirix,” rik’in “naab’al li rech alal ut li rochb’een” ut “naab’al li b’ihomal” (Alma 10:4). Laj Tzeesrom a’an chaq “jun reheb’ li q’axal seeb’ ” sa’ xyanqeb’ laj ch’olob’anel chaq’rab’ ut “k’a’jo’ li k’anjel” li kixb’aanu (Alma 10:31). Laj Alma kiwulak sa’ li tenamit Ammonihah rik’in jun xchoxahil b’oqom re jalok-k’a’uxlej ut “ok sa’ xhilob’aal li Qaawa’ ” (Alma 13:16). Choq’ reheb’ laj Amulek, laj Tzeesrom, ut xkomoneb’ chik, re xk’ulb’al li b’oqok a’an ki’ajman ru li mayejak ut kik’amok ajwi’ sa’eb’ li ch’a’ajkilal q’axaleb’ ch’a’aj xnumsinkil.

A’b’an, ink’a’ naraqe’ li esil aran. Sa’ Alma 13–16, naqatzol li k’a’ru taak’ulmanq sa’ roso’jik rik’ineb’ li ani neke’paab’ank re “lix wankil li Kristo choq’ re li kolb’a-ib’ ” (Alma 15:6). Wan naq na’ux li kole’k, wan naq li k’iraak—ut wan naq na’ux naq ink’a’ neke’seeb’ob’resiik li ch’a’ajkilal re li yu’am a’in. A’ut junelik, “li Qaawa’ naxk’uleb’ [lix tenamit] rik’in a’an, sa’ li loq’alil” (Alma 14:11). Junelik, li Qaawa’ naxk’e “wankilal qe, jo’ chanru li qapaab’aal li wan rik’in li Kristo” (Alma 14:28). Ut junelik, “xpaab’ankil li Qaawa’ ” naxk’e “xyo’oninkil naq taqak’ul li junelik yu’am” (Alma 13:29). Naq nakawileb’ ru li ch’ol a’in, naru taak’ojob’aaq aach’ool rik’ineb’ li yeechi’ihom a’in, ut naru tat-ok chixtawb’al ru chi chaab’il chik li naraj naxye li raatin laj Alma naq ki’aatinak chirix “xhilob’aal li Qaawa’.”

reetalil li tzolok aajunes

Li na’leb’ re xtzolb’aleb’ li loq’laj hu aajunes

Alma 13:1–19

Eb’ li k’ojob’anb’il k’anjel re li tijonelil naru tine’xtenq’a chixk’ulb’al lix tojb’al wix xb’aan li Jesukristo.

Maare jultik aawe naq sa’ Alma 12, laj Alma kik’utuk chirix lix k’uub’anb’il na’leb’ li Dios re li tojb’al-ix (chi’ilmanq Alma 12:24–27). Sa’ li ch’ol 13, ki’aatinak chirixeb’ laj tij li k’ojob’anb’ileb’ xb’aan li Dios “re te’xk’ut li k’a’aq re ru a’in chiruheb’ li tenamit” (Alma 13:1). Li raatin laj Alma naxk’utb’esi k’iila xninqal ru yaalil na’leb’ chirix li tijonelil. Maare naru taayal xtawb’al jun, malaj wiib’ oxib’ reheb’ li yaalil na’leb’ a’an sa’ li junjunq raqal sa’ Alma 13:1–9. Wahi’eb’ junjunq na’leb’ li te’tenq’anq aawe chixtikib’ankil:

Raqal 1:Li tijonelil k’ab’a’inb’il ajwi’ “li Santil Tijonelil jo’ chanru Xk’anjelil li Ralal li Dios” (chi’ilmanq ajwi’ Tzol’leb’ ut Sumwank 107:1–4).

Raqal 2:Li Dios kixk’ojob’eb’ laj tij re xtenq’ankileb’ li kristiaan chi ilok wan wi’ li Ralal re te’toje’q rix.

Raqal 3:Eb’ laj k’amol re li tijonelil ak kawresinb’ileb’ choq’ re lix teneb’ankileb’ “chalen chaq sa’ xk’ojlajik li ruchich’och’.”

K’a’ chik ru nakataw laa’at? K’a’ru li nakaweek’a chirix li tijonelil naq nakak’oxlaheb’ li yaalil na’leb’ a’an? Chan ru naq eb’ li k’ojob’anb’il k’anjel re li tijonelil xate’xtenq’a chi ilok wan wi’ li Kristo re taatoje’q aawix?

K’e reetal naq naab’al reheb’ li kristiaan sa’ li tenamit Ammonihah neke’xtaaqe laj Nehor (chi’ilmanq Alma 14:18; 15:15). Chan ru naq jalan wi’ eb’ laj tij sa’ xk’anjelil laj Nehor (chi’ilmanq Alma 1:3–6) rik’ineb’ laj tij li k’ojob’anb’ileb’ “jo’ chanru Xk’anjelil li Ralal li Dios” (Tzol’leb’ ut Sumwank 107:3), li ch’olob’anb’ileb’ xb’aan laj Alma? (chi’ilmanq Alma 13:1–19).

Chi’ilmanq ajwi’ Dale G. Renlund, “Li tijonelil ut lix wankil aj tojol-ix li Kolonel,” Jolomil ch’utub’aj-ib’ re octubre 2017.

eb’ li saaj winq sa’ xmeexul li loq’laj wa’ak

Eb’ li k’ojob’anb’il k’anjel re li tijonelil nokohe’xtenq’a chi ilok wan wi’ li Kristo re taatoje’q qix.

Alma 13:3

Ma ka’ajeb’ wi’ li xe’k’uluk re li tijonelil “ak b’oqb’ileb’ ut kawresinb’ileb’ chalen chaq sa’ xk’ojlajik li ruchich’och’ ”?

Yaal naq li raatin laj Alma sa’ Alma 13:3 na’aatinak chirix ka’ajwi’ li neke’k’amok re li tijonelil. A’b’anan, li na’leb’ li kixk’ut—naq chi junjunqil li kristiaan ke’xk’ul xb’oqb’aleb’ ut ke’kawresiik re xb’aanunkil “chalen chaq sa’ xk’ojlajik li ruchich’och’ ”—na’aatinak chiqix chiqajunil. Li Awa’b’ej Spencer W. Kimball kixye: “Sa’ li ruchich’och’ rub’elaj naq koochal arin, kik’eeman xb’oqb’aleb’ li ixq tiikeb’ xch’ool ut ke’k’ojob’aak li winq tiikeb’ xch’ool re k’anjelak sa’ li tijonelil. Us ta ink’a’ chik najultiko’ qe chixjunil li kik’ulman, a’an ink’a’ naxjal li chaq’al ru xyaalalil li k’a’ru kiqak’ulub’a chaq junxil” (Enseñanzas de los Presidentes de la Iglesia: Spencer W. Kimball [2006], 239; chi’ilmanq ajwi’ Tzol’leb’ ut Sumwank 138:55–56).

Alma 14

Wan naq li Dios naxkanab’ naq te’rahob’tesiiq li tiikeb’ xch’ool.

Sa’ Alma 14, na’aatinak chirixeb’ li kristiaan tiikeb’ xch’ool li ke’rahob’tesiik ut ke’kam ajwi’ xb’aan lix paab’aaleb’. Maare taapatz’, jo’ neke’xb’aanu naab’al, k’a’ut naq li k’a’ru xuwajel na’ux sa’ xyu’ameb’ li kristiaan li yookeb’ chixyalb’aleb’ xq’e chi wank sa’ tiikilal. Maare ink’a’ taataw chixjunileb’ lix sumenkil li ch’a’ajkil patz’om a’in sa’ Alma 14, a’b’an wan naab’al li naru natzolman rik’in li ke’xb’aanu laj Alma ut laj Amulek sa’ li k’a’ru ke’wan wi’. K’a’ru neke’xk’ut li raatineb’ ut lix b’aanuhomeb’ chawu chirix k’a’ut naq li Qaawa’ wan naq naxkanab’eb’ li tiikeb’ xch’ool chixk’ulb’al rahilal? K’a’ru nakatzol rik’ineb’ chirix xnumsinkil li rahob’tesiik?

Chi’ilmanq ajwi’ Mateo 5:43–44; Markos 14:55–65; Romanos 8:35–39; 1 Pedro 4:12–14; Tzol’leb’ ut Sumwank 122:5–9.

Alma 15:16, 18

Li wank choq’ tzolom naraj ru li mayejak.

Maare taak’anjelaq aawe xtz’iib’ankil xtusulal li k’a’aq re ru kixkanab’ laj Amulek re xpaab’ankil li evangelio (chi’ilmanq Alma 10:4–5; 15:16) ut chi junpak’al, jun xtusulal li k’a’ru kixk’ul (chi’ilmanq Alma 15:18; 16:13–15; 34:8). K’a’ru li taawanq aach’ool chixmayejankil re tat-ok choq’ jun tzolom li tiik wi’chik xch’ool?

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.

Alma 13

Maare taak’anjelaq choq’ re laa junkab’al xk’eeb’al reetal rajlal sut naq natawman li aatin “hilob’aal” sa’ Alma 13. K’a’ chik li aatin ut na’leb’ li neke’rochb’eeni? Chan ru naq a’in natenq’ank qe chixtawb’al ru li k’a’ru naraj naxye “xhilob’aal li Qaawa’ ”? Chan ru naq jalan wi’ a’in rik’in li hilank re tz’ejwalej?

Alma 13:10–12

Re xtenq’ankil laa junkab’al chixtawb’al ru li nak’utman sa’eb’ li raqal a’in, maare naru teech’aj k’a’ruhaq sa’ komonil—jo’ li saqi t’ikr. K’a’ru li naqeek’a naq tz’ajo? K’a’ru li naqeek’a naq noko’ch’ajob’resiik wi’chik? Chan ru naq li eek’ahom a’an chanchaneb’ li eek’ahom naqeek’a naq nokomaakob’ ut chirix a’an naqajal qak’a’uxl ut nokoch’ajob’resiik rik’in lix tojb’al rix li maak xb’aan li Kolonel?

Alma 15:1–12

K’a’ru naqatzol rik’in lix numsihom laj Tzeesrom chirix lix wankil li Qaawa’ re qakawob’resinkil ut qak’irtesinkil, us ta wan k’a’ru ink’a’ us xqab’aanu? Chan ru naru taak’anjelaq qe li tijonelil sa’ xk’ulb’al lix kawilal li Qaawa’ ut li k’iraak naxk’e?

Alma 16:1–10

Chirix rilb’aleb’ ru li raqal a’in, naru taawil ru Alma 9:4. K’a’ru naqatzol rik’in rilb’al chan ru kireek’a laj Tzoram chirix li raatin li profeet, ut chi junpak’al, chan ru ke’reek’a li wankeb’ aran Ammonihah? K’a’ru yooko chixb’aanunkil re xpaab’ankil li raatin li qayo’yookil profeet?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li qak’utum

Yo’oon wanqat junelik. Eb’ li hoonal re k’utuk neke’nume’ sa’ junpaat, jo’kan naq aajel ru roksinkileb’ chi us naq neke’chal. Qayehaq, naq nak’ulman jun nimla rahilal sa’ ruchich’och’, a’anaq jun chaab’il hoonal re xwotzb’al li na’leb’ sa’ Alma 14 chirix k’a’ut naq li Qaawa’ wan naq naxkanab’ naq li maak’a’eb’ xmaak neke’rahob’tesiik. (Chi’ilmanq Li k’utuk jo’ li Kolonel, 16.)

laj Alma ut laj Amulek sa’ tz’alam

Laj Alma ut laj Amulek sa’ tz’alam, xb’aan laj Gary L. Kapp