“1–7 junio. Alma 5–7: “Ma xeyal li nimla jalaak a’in sa’ lee ch’ool?”” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“1–7 junio. Alma 5–7,” Kim, Taaqehin—Choq’ reheb’ li komon ut li junkab’al: 2020
Moko sachb’ilex ta sa’ xch’ool, xb’aan laj Jon McNaughton
1–7 junio
Alma 5–7
“Ma xeyal li nimla jalaak a’in sa’ lee ch’ool?”
Alma 5–7 naru tatxtenq’a chixk’oxlankil chan ru naq yoo chi jale’k aach’ool xb’aan li Jesukristo. Nak yookat chirilb’al ru, tz’iib’a li naxk’ut li Musiq’ej chawu.
Xtz’iib’ankil li nakak’oxla
Laj Alma maak’a’ xnawom chirix li cho’ok re xnumsinkil li aamej nab’aanuman sa’ li qakutan, sa’ li nanumsiman wi’ jun chaab’il aamej sa’ xna’aj jun aamej li po’jenaq malaj wan xyajel. A’b’an, a’an wan xnawom chirix jun sachb’a-ch’oolejil “xjalajik li ch’oolej” li nimaq xwankil chiru a’an (Alma 5:26)—b’ar wi’ li Kolonel naxk’e chi ak’ob’resiik li qamusiq’ejil yu’am, jo’ chanchan li yo’laak wi’chik (chi’ilmanq Alma 5:14, 49). Laj Alma kiru chixk’eeb’al reetal naq li jalaak a’in sa’ ch’oolej, a’an tz’aqal li ki’ajman ru choq’ re naab’al reheb’ laj Nefita. Ke’wan li b’ihomeb’ ut ke’wan li neb’a’eb’, li q’etq’eteb’ ut li tuulaneb’ xch’ool, li ke’rahob’tesink ut li ke’rahob’tesiik (chi’ilmanq Alma 4:6–15). A’ut chixjunileb’ ke’raj ru li chalk rik’in li Jesukristo re te’k’irtesiiq—jo’ chanru naq ajb’il ru choq’ qe chiqajunjunqal. Maak’a’ naxye ma yooko chixyalb’al qaq’e chi numtaak sa’ xb’een li q’etq’etil malaj chi kuyuk chiru li ch’a’ajkilal, juntaq’eet li raatin laj Alma: “Chalqex ut mexxuwak” (Alma 7:15). Kanab’ naq li Kolonel tixjal jun aamej li kawujenaq, aj maak, malaj toch’enaq, choq’ jun li aamej li tuulan, saq ru, ut ak’.
Li na’leb’ re xtzolb’aleb’ li loq’laj hu aajunes
Tento naq tink’ul—ut naq ink’a’ tinkanab’ reek’ankil—jun nimla jalaak sa’ inch’ool.
Eb’ lix patz’om laj Alma choq’ reheb’ laj Tzarahemla, li neke’tawman sa’ Alma 5:14–33, naru tate’xtenq’a chi sik’ok sa’ laa waam ut chixtawb’al ru li naraj naxye xk’ulb’al jun “nimla jalaak sa’ aach’ool” chiru xnajtil laa yu’am. Li Awa’b’ej M. Russell Ballard kixch’olob’ k’a’ru lix chaab’ilaleb’ li patz’om jo’ a’an: “Tento naq chi kok’ aj xsa’ tink’oxlaq b’ayaq ut tinpatz’ wib’, “Chan ru wankin?” A’an chanchan naq yooko chixb’aanunkil jun ch’ina xtz’ilb’al qix qajunes qib’. … Jo’ jun aj k’amol inb’e sa’ li tz’ilok-ix injunes wib’, nawulak chiwu rilb’al ru ut xk’oxlankil li aatin sa’ li ch’ol 5 re Alma” (“Li sutq’iik ut li k’uluk,” Jolomil ch’utub’aj-ib’ re abril 2017).
K’oxla rilb’aleb’ ru lix patz’om laj Alma jo’ chanchan naq laa’at yookat chixtz’ilb’al aawix ut chixtz’ilb’al rix aach’ool. Maare taak’anjelaq aawe xtz’iib’ankil lix sumehomeb’ li patz’om a’an. K’a’ru eek’asinb’ilat chixb’aanunkil xb’aan li tz’ilok-ix a’in?
Chi’ilmanq ajwi’ Dale G. Renlund, “Cómo conservar el gran cambio en el corazón,” Liahona, noviembre 2009, 97–99.
Li junjunq xtzolom li Kristo tento tixk’ul jun “nimla jalaak sa’ xch’ool.”
Naru tink’ul xnawom inch’ool chirix li Kolonel ut lix evangelio rik’in li Santil Musiq’ej.
Rik’in nimla wankilal, laj Alma kixch’olob’ xyaalal li Kolonel ut lix evangelio, ut kixch’olob’ ajwi’ chan ru naq kixk’ul lix nawom xch’ool. Naq kixch’olob’ li yaal, ink’a’ ki’aatinak chirix lix numsihom naq kiril jun li anjel ut kirab’i xyaab’ xkux (chi’ilmanq Mosiah 27:10–17), kixch’olob’ b’an li tz’aq li kixtoj re xnawb’al xjunes li yaal. K’a’ru nakatzol sa’ Alma 5:44–51 chirix chan ru naq laj Alma ki’ok chixnawb’al li yaal? Chan ru naq laa’at naru taab’aanu li kixb’aanu a’an sa’ lix yalb’al aaq’e chixk’ulb’al malaj chixkawob’resinkil lix nawom aach’ool? K’a’ru nakatzol chirix li Kolonel sa’ li raatin laj Alma li wan sa’ Alma 5:33–35, 48–50, ut 57–60?
Li ab’ink chiru li Dios chi anchal inch’ool tinixtenq’a chi kanaak sa’ li “b’e li naxik sa’ li rawa’b’ejihom li Dios.”
Moko juntaq’eeteb’ ta lix ch’a’ajkilal li ani wankeb’ Gideon rik’ineb’ lix ch’a’ajkilal li wankeb’ Tzarahemla, jo’kan naq li Musiq’ej kixtenq’a laj Alma chixk’eeb’al reetal li rajomeb’ li junjunq ut chi k’utuk chiruheb’ a’ yaal jo’ chanru li ki’ajman ru chiruheb’ (chi’ilmanq Alma 7:17, 26). Maare naru taak’e reetal lix jalanil li raatin laj Alma sa’ Tzarahemla (chi’ilmanq Alma 5) rik’in li kixye sa’ Gideon. Jo’ eetalil, laj Alma kixk’e reetal naq li wankeb’ Gideon ke’wan “sa’ li b’e li naxik sa’ li rawa’b’ejihom li Dios” (Alma 7:19). Sa’ li raatin choq’ reheb’, laj Alma kixk’ut naab’al li na’leb’ chiruheb’ chirix chan ru te’kanaaq sa’ li b’e a’an (chi’ilmanq Alma 7). K’a’ru li na’leb’ kixk’e reheb’? K’a’ru naru taawoksi sa’ laa yu’am anajwan?
Li Kolonel kixk’ul sa’ xb’een lin maak, lin rahilal, ut lin ch’a’ajkilal.
Ma aaweek’ahom junaq sut naq maa’ani naxtaw ru laa ch’a’ajkilal malaj lix yalb’al aawix? Wi ut jo’kan, naru tate’xtenq’a li yaalil na’leb’ k’utb’ileb’ sa’ Alma 7:7–16. Elder David A. Bednar kixye: “Li Ralal li Dios naxnaw ut naxtaw ru chi tz’aqal re ru, xb’aan naq a’an xreek’a ut xriiqa li qiiq chiqajunqal. Ut sa’ xk’ab’a’ lix junelikil mayej li maak’a’ roso’jik (chi’ilmanq Alma 34:14), a’an nareek’a chi tz’aqal li qeek’ahom, ut naru chixyeechi’inkil qe li ruq’ aj uxtaan” (“Moko ch’a’aj ta chiruheb’ xk’amb’al li riiqeb’,” Jolomil ch’utub’aj-ib’ re abril 2014).
Naq nakawil ru Alma 7:7–16, k’oxlan chirix li k’a’ru nokohe’xtenq’a li raqal a’in chixtawb’al ru chirix li rajb’al lix mayej li Kolonel. Chan ru naqak’ul lix wankil a’an sa’ li qayu’am? K’oxla xtz’iib’ankil li k’a’ru nakak’oxla.
Chi’ilmanq ajwi’ Isaias 53:3–5.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Alma 5:6–13
K’a’ut naq laj Alma kiraj naq lix tenamit taajultiko’q reheb’ li ruxtaan li Kolonel choq’ reheb’ lix xe’toonileb’? K’a’ruheb’ li esil sa’ li resilal laa junkab’al laa’at li neke’xk’ut chawu li ruxtaan a’an? Maare naru tatxik sa’ familysearch.org/myfamily re xtz’iib’ankileb’ li esil a’an.
Alma 5:14–33
Maare eb’ li komon sa’ laa junkab’al ak neke’xnaw chan ru neke’reek’a naq kawresinb’ileb’—malaj ink’a’ kawresinb’ileb’—re xik chi b’eek, re jun li examen sa’ li tzoleb’aal, malaj re jun tz’ilok-ix re xk’ulb’al jun trab’aaj. K’a’ru li toje’ xe’nume’ wi’ li naru te’xwotz re xk’utb’al xyaalalil lix aajelil ru li wank chi kawresinb’il? Naru taab’oqeb’ li komon sa’ laa junkab’al chixtz’ilb’al rix Alma 5:14–33 ut chixtawb’aleb’ li patz’om kixpatz’ laj Alma re xkawresinkil lix tenamit chixk’ulb’al li Dios. Maare li junjunq komon sa’ li junkab’al naru tixsik’ ru jun patz’om ut tixwotz chan ru naq naru nokoxtenq’a chixkawresinkil qib’ chixk’ulb’al li Dios. Eb’ li komon sa’ laa junkab’al taaruuq ajwi’ te’xk’e chi k’utb’esimank junjunqeb’ lix patz’om laj Alma sa’ li ochoch re naq te’xk’oxlaheb’.
Alma 6:4–6
K’a’ru aj-e naq nokoch’utla jo’ aj santil paab’anel? Chan ru naq naru taqachaab’ilob’resi li qahoonal sa’ iglees re naq mas wi’chik tootenq’aaq laa’o ut eb’ li qakomon?
Alma 7:9–16
K’a’ru naqatzol sa’eb’ li raqal a’in li nokoxtenq’a re naq ink’a’ tooxuwaq (chi’ilmanq Alma 7:15) naq na’ajman ru naq taqajal qak’a’uxl ut toojalaaq? K’a’ru neke’xk’ut li raqal a’in chirix li sutq’iik rik’in li Kolonel naq naqaj ru tenq’aak? K’a’ chik ru qab’aanuhom re xk’ulb’al qatenq’ankil rik’in a’an? Chan ru naq a’an xooxtenq’a?
Alma 7:23
Ani naqanaw ru li naxyu’ami chi chaab’il jun malaj wiib’ oxib’ reheb’ li na’leb’ li tz’iib’anb’ileb’ sa’ li raqal a’in? K’a’ut naq aajel ru xtawb’aleb’ li chaab’ilal a’in?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Xpatz’b’aleb’ li patz’om li neke’xb’oqeb’ li komon sa’ li tzoleb’aal chi k’anjelak Patz’eb’ li patz’om li neke’xb’oqeb’ li komon sa’ laa junkab’al chi k’oxlak chirix chan ru naq te’ruuq chik chixyu’aminkil li evangelio. “Chi kok’ aj xsa’, ink’a’ te’sumeeq li patz’om a’in; a’aneb’ b’an re naq li junjunq tixtz’il rix sa’ xch’ool ” (Li k’utuk jo’ li Kolonel, 31).
Laj Aatinanel chiqix, xb’aan laj Jay Bryant Ward