Kim, Taaqehin
25–31 mayo. Mosiah 29–Alma 4: “Ke’wan chi xaqxo junelik ut chi ink’a’ neke’eek’an”


“25–31 mayo. Mosiah 29–Alma 4: “Ke’wan chi xaqxo junelik ut chi ink’a’ neke’eek’an,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)

“25–31 mayo. Mosiah 29–Alma 4,” Kim, Taaqehin—Choq’ reheb’ li komon ut li junkab’al: 2020

Jalam-uuch
laj Alma li alalb’ej najultikan aatin

Laj Alma li alalb’ej najultikan aatin, xb’aan laj Gary L. Kapp

25–31 mayo

Mosiah 29–Alma 4

“Ke’wan chi xaqxo junelik ut chi ink’a’ neke’eek’an”

Rilb’aleb’ ru li loq’laj hu naxk’e xb’oqb’al li k’utb’esinb’il na’leb’. Chiwanq chi teeto aach’ool re xk’ulb’al li na’leb’ li naraj li Qaawa’ xk’eeb’al aawe.

Xtz’iib’ankil li nakak’oxla

Wankeb’ li ani maare te’ril lix na’leb’ li rey aj Mosiah naq te’wanq aj raqol aatin li sik’b’ileb’ ru xb’aan li tenamit ruuchileb’ li rey jo’ yal jun chaab’il jalok sa’ xjolominkil li tenamit. A’b’anan, choq’ reheb’ laj Nefita, ut q’axal wi’chik choq’ reheb’ li wanjenaqeb’ chaq rub’el xwankil li maa’us aj rey Noe, li jalok a’in kiwan ajwi’ xyaalalil sa’ musiq’ej. Ak rilomeb’ chaq chan ru naq xmaak jun li maa’us aj rey, “k’a’jo’ li maa’usilal” ut “k’a’jo’ xnimal li sache’k” kiwan sa’ xyanqeb’ lix tenamit (Mosiah 29:17), ut “q’axal anchaleb’ chik xch’ool” naq ach’ab’anb’ilaqeb’ chiru li maa’usilal a’an. Li jalok a’in tixk’e naq teneb’anb’ilaq sa’ xb’een li junjunq lix tiikilal xch’ool ut naq taawanq xch’ool li junjunq “chixsumenkil ru tz’aqal lix maak” (Mosiah 29:38; chi’ilmanq ajwi’ Tzol’leb’ ut Sumwank 101:78).

A’b’an, lix raqik li rawa’b’ejileb’ li rey maawa’ xraqikeb’ li ch’a’ajkilal sa’ xyanqeb’ li tenamit aj Nefita. Eb’ li winq q’axal seeb’eb’ xb’alaq’ jo’ laj Nehor ut laj Amlici ke’xjultika li b’alaq’il na’leb’, eb’ li maawa’eb’ aj paab’anel ke’xrahob’tesiheb’ laj santil paab’anel, ut k’iila komon re li Iglees ke’xq’etq’eti rib’ ut ke’risi rib’. A’ut eb’ li “neke’taaqen re li Dios chi tuulaneb’ xch’ool” ke’kana “chi xaqxo junelik ut chi ink’a’ neke’eek’an,” maak’a’ naxye li k’a’ru yoo chi k’ulmank chixsutameb’ (Alma 1:25). Ut xb’aan li jalok li kixtikib’ laj Mosiah, ke’ru “chixk’eeb’al xyaab’eb’ xkux” re xchaab’ilob’resinkil li tenamit wankeb’ wi’ (Alma 2:6).

Jalam-uuch
reetalil li tzolok aajunes

Li na’leb’ re xtzolb’aleb’ li loq’laj hu aajunes

Mosiah 29:11–27; Alma 2:1–7

Naru tinwanq jo’ aj b’aanuhom chaab’ilal sa’ li tenamit wankin wi’.

Yal oob’ chihab’ chaq xtiklajik li rawa’b’ejileb’ laj raqol aatin naq kichal jun nimla ch’a’ajkilal li tixyal rix lix na’leb’ laj Mosiah naq chi kok’ aj xsa’ lix yaab’ xkux li tenamit tixsik’ ru li k’a’ru tiik (chi’ilmanq Mosiah 29:26). Li ch’a’ajkilal a’in, a’an chirix li ach’ab’anb’il paab’ank: jun li winq, laj Amlici xk’ab’a’, kixsik’ “xmaq’b’al raj chiruheb’ [li tenamit] li k’a’ru xk’ulub’eb’ ut li k’anab’anb’ileb’ chixb’aanunkil sa’ li iglees” (Alma 2:4). Ma aak’eehom reetal naq yoo chi sachmank li ach’ab’anb’il paab’ank sa’ li tenamit malaj k’aleb’aal wankat wi’? K’a’ru nakatzol rik’in li ke’xb’aanu laj Nefita chiru li ch’a’ajkilal a’an? (chi’ilmanq Alma 2:1–7).

Naru naq wankatqeb’ k’iila ch’a’ajkilal sa’ li tenamit wankat wi’. Chan ru nakatru, jo’eb’ laj Nefita, chixk’eeb’al chi ab’imank lix yaab’ aakux sa’ “lix yaab’ xkux li tenamit”? Maare wankat sa’ jun na’ajej b’ar wi’ maak’a’ xwankil lix yaab’ xkux li tenamit sa’ xjolomil li tenamit; wi yaal a’an, ma wan chik chan ru naq naru tatwanq jo’ aj b’aanuhom chaab’ilal sa’ li tenamit wankat wi’?

Alma 1

Naru nink’e reetal ut tintz’eqtaana li b’alaq’il tzol’leb’.

Us ta naq sa’ xraqik laj Nehor kixch’olob’ naq moko yaal ta li k’a’ru kixk’ut, toj kiwan xwankil li raatin sa’ xyanqeb’ laj Nefita chiru k’iila chihab’ (chi’ilmanq Alma 1:15–16; 2:1–2; 14:14–18; 15:15; 21:4; 24:28). K’a’ut naq lix k’utum laj Nehor kiwulak chiruheb’ li kristiaan? Naq nakawil ru Alma 1:2–4, k’e reetal ma naru xtawb’al li b’alaq’il na’leb’ sa’ lix k’utum laj Nehor; maare taak’e reetal naq k’utb’ileb’ rochb’eeneb’ li na’leb’ wan b’ayaq lix yaalalil.

Laj Gideon kixxaqab’ rib’ chiru laj Nehor “rik’in li raatin li Dios” (Alma 1:7, 9). Ma naru taak’oxlaheb’ li raqal sa’eb’ li loq’laj hu li neke’xk’ut xb’alaq’il lix na’leb’ laj Nehor? Wahe’ junjunqeb’, a’ut toj wankeb’ naab’al chik: Mateo 7:21–23; 2 Nefi 26:29–31; Mosiah 18:24–26; ut Helaman 12:25–26. Chan ru naq eb’ li raqal a’an neke’ru chatenq’ankil chixk’utb’al xb’alaq’ileb’ li na’leb’ li neke’k’utman sa’ li kutan a’in?

Jun chik na’leb’ naru taab’aanu naq taatzol Alma 1, a’an rilb’al chan ru naq jalan laj Nehor ut li ke’taaqen re (eb’ li raqal 3–9, 16–20) rik’in “lix tenamit li Dios” (eb’ li raqal 25–30; chi’ilmanq ajwi’ 2 Nefi 26:29–31). Chan ru naq nakatru chi wank jo’ lix tenamit li Dios? Ma nakak’e reetal li “tijok chi tojb’il” sa’ li k’anjel nakab’aanu laa’at?

Alma 1:27–31; 4:6–15

Eb’ lix tz’aqal tzolom li Jesukristo ink’a’ neke’xk’e xch’ooleb’ chirix li b’ihomal.

Sa’eb’ li ch’ol 1 ut  4 re li hu Alma yeeb’il resileb’ li hoonal b’ar wi’ naq yoo chi usaak li iglees, a’ut jalan li ke’xb’aanuhatq li komon chiruheb’ li hoonal a’an. K’a’ru li jalan li nakawil? A’ yaal li k’a’ru nakataw, chan ru lix na’leb’eb’ li “neke’taaqen re li Dios chi tuulaneb’ xch’ool” (Alma 4:15) chirix li b’ihomal ut li usaak? K’a’ru eek’asinb’ilat chixjalb’al sa’ aana’leb’ laa’at?

Alma 4

Li “raatin li Dios” ut li “saqen ruhil yaal chi ch’olob’anb’il” naru te’xk’e chi jalaak li ch’oolej.

K’a’ru li kixk’e laj Alma chi “raho’k xch’ool” (Alma 4:15) sa’ Alma 4? Wankeb’ li maare te’xye naq li opiis re xb’eenil aj raqol aatin tixk’e laj Alma sa’ li na’ajej q’axal chaab’il re xtuqub’ankileb’ li ch’a’ajkilal li kiril sa’ xyanqeb’ lix tenamit. A’b’an laj Alma kireek’a naq wan jun b’e chaab’il wi’chik chiru a’an. K’a’ru naxtoch’ aach’ool chirix chan ru kixsik’ xtenq’ankil lix tenamit? Naq nakattzolok, maare taachalq aana’leb’ chirix chan ru naru taatenq’aheb’ sa’ tiikilal li ani wankeb’ chasutam; wi jo’kan, b’aanu li naxye.

Jalam-uuch
reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.

Alma 1:19–25

Maare usaq choq’ re laa junkab’al xk’eeb’al reetal li ke’xb’aanu li komon re li Iglees naq ke’xk’ul li rahob’tesink sa’eb’ li raqal a’in. Maare texruuq chi aatinak chirix li k’a’ru us xb’aanunkil wi wan ani nasachok xwankil li k’a’ru naqapaab’. Maare naru te’tenq’anq eere li video sa’ ChurchofJesusChrist.org/religious-freedom/examples.

Alma 3:4

K’a’ru li na’leb’ ke’raj xk’utb’al laj Alimcita naq “xe’xb’on rib’ chi kaq sa’ xpekemeb’ ”? (chi’ilmanq Alma 3:4, 13). K’a’ru li na’leb’ li maare naqak’ut—chi nawb’il malaj chi ink’a’ nawb’il qab’aan—rik’in chan ru naqtiqib’ qib’? Maare usaq li hoonal a’in re xtz’ilb’al rix “El modo de vestir y la apariencia” sa’ Para la Fortaleza de la Juventud (2011), 14–16.

Alma 4:2–3

K’a’ru li na’leb’ malaj qanumsihom li “x’ajsink qu sa’ xjultikankil li k’a’ru teneb’anb’il sa’ qab’een” chiru li Dios? (Alma 4:3). Maare usaq xwotzb’aleb’ li raqal a’in chirix rajsinkileb’ ru laa junkab’al sa’ eq’la. Sa’ li hoonal a’an naru tex’aatinaq chirix chan ru naq li ch’a’ajkilal re ajk chirix li wark nokoxtenq’a chixtawb’al ru li ch’a’ajkilal re ajk sa’ musiq’ej.

Alma 4:10–11

K’a’ru naru taqab’aanu re naq ink’a’ toowanq choq’ “tichk’ob’aal chiruheb’ li moko neke’wan ta sa’ li iglees”? (Alma 4:10). Maare usaq ajwi’ li aatinak chirix chan ru naq ink’a’ taqakanab’ naq lix b’aanuhomeb’ jalaneb’, jo’eb’ li qakomon sa’ li Iglees, te’ok choq’ tichk’ob’aal chiru li qak’iijik sa’ musiq’ej.

Alma 4:19

Re xtenq’ankil laa junkab’al chixtawb’al ru lix wankil li xnawom ch’oolej, naru taapatz’ reheb’ naq te’xk’oxla jun sut naq ke’toche’ xch’ool chi kaw xb’aan rab’inkil lix nawom xch’ool anihaq chik. K’a’ut naq laj Alma kixsik’ roksinkil li xnawom ch’oolej ut li raatin li Dios re xtoch’b’aleb’ xch’ool li tenamit? (chi’ilmanq ajwi’ Alma 31:5). K’a’ut naq chaab’il wi’chik a’an chiru jalaneb’ chik li na’leb’ neke’roksi li kristiaan re xq’unb’esinkileb’ xch’ool jalaneb’ chi jalok? Ma wankeb’ li kristiaan li naru taqakawob’resi xpaab’aaleb’ rik’in xwotzb’al lix nawom qach’ool rik’ineb’?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li tzolok aajunes

Juntaq’eetaheb’ li loq’laj hu rik’in laa yu’am. K’oxla chan ru naq li esil ut li k’utum sa’eb’ li loq’laj hu neke’k’anjelak sa’ laa yu’am. Qayehaq, maare taataw naq li ruchich’och’ wanko wi’ anajwan chanchan lix ch’a’ajkilaleb’ li tenamit aj Nefita sa’ Alma 1–4.

Jalam-uuch
eb’ laj Nefita neke’pleetink reheb’ laj Amlicita

Laj Alma ut laj Amlici, xb’aan laj Scott M. Snow

Isi reetalil