“18–24 mayo. Mosiah 25–28: “A’aneb’ xtenamit li Dios neke’yehe’ re,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“18–24 mayo. Mosiah 25–28,” Kim, Taaqehin—Choq’ reheb’ li komon ut li junkab’al: 2020
Lix jalajik xch’ool laj Alma li alalb’ej, xb’aan laj Gary L. Kapp
18–24 mayo
Mosiah 25–28
“A’aneb’ xtenamit li Dios neke’yehe’ re”
Chirix naq “kichal lix yaab’ xkux li Qaawa’ rik’in” laj Alma, a’an kixtz’iib’a li k’a’ru yeeb’il re xb’aan li Qaawa’ “re naq taawanq rik’in” (Mosiah 26:13, 33). Chan ru taataaqe lix b’aanuhom laj Alma?
Xtz‘iib‘ankil li nakak‘oxla
Chirix haye’ oxib’ tasal tenamit chi jachb’il ru sa’ wiib’ li ch’och’, ke’junajiman wi’chik ru li tenamit aj Nefita., Lix tenamit li rey aj Limhi, lix tenamit laj Alma, ut lix tenamit laj Mosiah—jo’kan ajwi’ lix tenamit laj Tzarahemla, li maawa’eb’ ralal xk’ajol laj Nefi—k’eeb’ileb’ chik chixjunileb’ “sa’ ajl rik’ineb’ laj Nefita” (Mosiah 25:13). Naab’al reheb’ ke’raj ajwi’ ok choq’ komon sa’ li Iglees li k’ojob’anb’il xb’aan laj Alma. Jo’kan naq eb’ li “ke’ajok re xk’ulb’al sa’ xb’eeneb’ lix k’ab’a’ li Kristo” ke’kub’e xha’, “ut a’aneb’ xtenamit li Dios neke’yehe’ re” (Mosiah 25:23–24). Chirix k’iila chihab’ re pleetik-ib’ ut preexil, chanchan ta wi’ naq eb’ laj Nefita ak okeb’ re chi wank sa’ tuqtuukilal.
A’b’an moko najt ta chirix a’an, eb’ li maawa’eb’ aj paab’anel ke’ok chixrahob’tesinkileb’ laj santil paab’anel. Q’axal ra a’in xb’aan naq naab’al reheb’ li ink’a’ chik neke’paab’an, a’aneb’ li ralal xk’ajoleb’ laj paab’anel—li “tasal tenamit li toj yookeb’ chi ninqank” (Mosiah 26:1), jo’eb’ li ralal laj Mosiah ut jun ralal laj Alma. Toja’ naq kik’ulman jun sachb’a-ch’oolej, ut li resil li sachb’a-ch’oolej a’an xk’e xyo’onihomeb’ li na’b’ej yuwa’b’ej li raheb’ xch’ool chiru k’iila tasal tenamit. A’b’an, li resil lix jalajik xch’ool laj Alma, ink’a’ ka’ajwi’ wan choq’ reheb’ lix na’ xyuwa’eb’ li alalb’ej li sachenaqeb’. Li tz’aqal jalok ch’oolej a’an jun sachb’a-ch’oolej li tento taak’ulmanq sa’ li qaam chiqajunjunqal.
Li na’leb’ re xtzolb’aleb’ li loq’laj hu aajunes
Laa’in li tento tin’iloq re lin paab’aal ut lix nawom inch’ool.
Eb’ li ke’ab’ink re li raatin li rey aj Benjamin ke’xk’ul jun xnimal ru xjalajik xch’ooleb’ (chi’ilmanq Mosiah 5:1–7), a’b’an re li junjunq li jalok ch’oolej, ut ink’a’ naru nanumsiman re jalan, jo’ li k’a’ru eechaninb’il xb’aaneb’ li alal k’ajolb’ej. Tento naq taajale’q qach’ool chiqajunjunqal rik’in lix evangelio li Jesukristo. Naq nakawil xsa’ Mosiah 26:1–6 chirix “li tasal tenamit toj yookeb’ chi ninqank” li ink’a’ neke’paab’an, k’e reetal li kik’ulman xb’aan xmaak’a’il lix paab’aaleb’. Naru taak’oxlaheb’ ajwi’ li ani taawaj raj xk’amb’al rik’in li Kristo. Us ta ink’a’ naru taak’e lix jalajik aach’ool laa’at reheb’, li Musiq’ej naru tixhasb’a aawe li k’a’ru nakatru chixb’aanunkil re xtenq’ankileb’ chixtawb’al xpaab’aaleb’. Naq nakawil xsa’ Mosiah 25–28 chirix chan ru naq laj Alma ut xkomoneb’ chik li komon re li Iglees ke’tenq’ank reheb’ li tasal tenamit li toj yookeb’ chi ninqank, maare te’chalq xkomoneb’ chik aana’leb’.
Chi’ilmanq ajwi’ Tzol’leb’ ut Sumwank 68:25–29.
Eb’ lix moos li Dios li tiikeb’ xch’ool neke’xsik’ xb’aanunkil li rajom a’an.
Wan naq maare taqak’oxla naq jun jolominel re li Iglees, jo’ laj Alma, junelik naxnaw li k’a’ru us xb’aanunkil. Sa’ Mosiah 26 naqil resil jun ch’a’ajkilal sa’ li Iglees li maajun sut rilom laj Alma, ut a’an “kixxuwa naq tixb’aanu li k’a’ru ink’a’ us sa’ rilob’aal li Dios” (Mosiah 26:13). K’a’ru kixb’aanu laj Alma sa’ li hoonal a’an? (chi’ilmanq Mosiah 26:13–14, 33–34, 38–39). K’a’ru naxk’ut lix numsihom laj Alma chirix li k’a’ru naru taab’aanu naq wan jun ch’a’ajkilal sa’ laa junkab’al malaj sa’ laa k’anjel sa’ li Iglees?
Maare naru taak’anjelaq aawe xtz’iib’ankil xtusulaleb’ li yaalil na’leb’ kixk’ut li Dios chiru laj Alma, li neke’tawman sa’ Mosiah 26:15–32. K’e reetal naq junjunq reheb’ li yaalil na’leb’ a’an moko k’eeb’ileb’ ta jo’ xsumenkil lix patz’om laj Alma. K’a’ru naxk’ut a’in chawu chirix li tijok ut xk’ulb’al li k’utb’esinb’il na’leb’ sa’ junesal?
Chixjunileb’ li winq ut ixq tento naq te’yo’laaq wi’chik.
Relik chi yaal naq ki’ajman ru naq taa’yo’laaq wi’chik sa’ musiq’ej laj Alma li alalb’ej, xb’aan naq a’an ut eb’ li ralal laj Mosiah, “a’aneb’ chaq laj maak li q’axal yib’eb’ ru,” li neke’xik yalaq b’ar “chixsachb’al lix iglees li Dios” (Mosiah 28:4; 27:10). A’b’anan, moko najt ta chirix lix jalajik xch’ool, laj Alma kixch’olob’ xyaalal naq wan li jalok ch’oolej—ut aajel ru a’an—choq’ re chixjunil: “Misach aach’ool,” chan, “naq chixjunileb’ li winq … tento te’yo’laaq wi’chik” (Mosiah 27:25; k’eeb’il xkawil li aatin). Laa’at ajwi’ tento taab’aanu a’an.
Naq nakawil ru resil li k’a’ru kixnumsi laj Alma, li natawman sa’ Mosiah 27:8–37, naru taayal xk’eeb’al aawib’ sa’ xna’aj a’an. Ink’a’ yookat chixsik’b’al xsachb’al li Iglees, a’ut nakatru chixk’oxlankil li k’a’ru tento taajal sa’ laa yu’am. Ani, jo’ lix yuwa’ laj Alma, yoo chatenq’ankil ut yoo chi tijok chawix “rik’in nimla paab’aal”? K’a’ru li xak’ul li xtenq’an aawe re “xq’unb’esinkil aach’ool chirix lix wankil li Dios ut li wankilal k’eeb’il xb’aan a’an”? (Mosiah 27:14). K’a’ru li “xnimal ru k’a’aq re ru” xb’aanu choq’ aawe li Qaawa’ malaj choq’ re laa junkab’al li tento taajultiko’q aawe? (Mosiah 27:16). K’a’ru nakatzol rik’in li raatin ut lix b’aanuhom laj Alma li alalb’ej chirix li naraj naxye li yo’laak wi’chik? Eb’ li patz’om jo’ a’in maare tate’xtenq’a chixtz’ilb’al rix chan ru naq wankat sa’ li k’anjel re yo’laak wi’chik.
Chi’ilmanq ajwi’ Mosiah 5:6–9; Alma 36; “Conversión” (Temas del Evangelio, topics.ChurchofJesusChrist.org).
Kisaho’ xch’ool lix yuwa’, xb’aan laj Walter Rane
Li Dios narab’iheb’ lin tij ut tixsumeheb’ a’ yaal jo’ chanru li rajom a’an.
Maare nakanaw ru jun yuwa’b’ej li yoo chixnumsinkil li kixnumsi laj Alma li yuwa’b’ej, li wan li ralal malaj xrab’in li yoo chixsik’b’al ru li ink’a’ us. Malaj ut maare laa’at li na’b’ej malaj yuwa’b’ej a’an. K’a’ru nakataw sa’ Mosiah 27:14, 19–24 li naxk’e aayo’onihom? Chan ru naq eb’ li raqal a’an neke’xjaleb’ laa tij chirixeb’ laa komon?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Mosiah 25:5–11
Chan ru naq ke’reek’a lix tenamit laj Mosiah chirix naq a’an kixyaab’asi li resil lix tenamit laj Tzeniff ut li resil lix tenamit laj Alma chiruheb’? Ma wan junaq tz’iib’anb’il esil re laa junkab’al li naru nakawil ru? Maare naru taatiq laa na’leb’ sa’ li esil a’an malaj taatikib’ xtz’iib’ankil jun ak’ esil. K’a’ru taatz’iib’a li naru tixtenq’a laa junkab’al (jo’eb’ ajwi’ li tasal tenamit toj te’chalq) chi “nujak rik’in sahil ch’oolejil q’axal nim” ut chi tzolok chirix “xnach’il lix chaab’ilal li Dios”? (Mosiah 25:8, 10).
Mosiah 25:16
K’a’ut naq aajel ru choq’ re lix tenamit li rey aj Limhi naq taajultiko’q reheb’ naq a’ li Dios li ki’ach’ab’ank reheb’ chiru li preexil? K’a’ru xb’aanuhom li Qaawa’ choq’ qe li tento taajultiko’q qe?
Mosiah 26:29–31; 27:35
Jo’ yeeb’il sa’eb’ li raqal a’in, k’a’ru tento tixb’aanu junaq re xk’ulb’al xkuyb’al lix maak?
Mosiah 27:21–24
Naq nakawileb’ ru li raqal a’an, k’oxla anihaq sa’ laa junkab’al li naru tattijoq chirix ut taakuy aasa’ chirix.
Mosiah 27–28
Re xtenq’ankil laa junkab’al chirilb’aleb’ sa’ xk’a’uxleb’ li esil sa’eb’ li ch’ol a’in, maare naru taab’oqeb’ chixyiib’ankil xjalam-uucheb’ li tenamit li yeeb’ileb’ resil ut chiroksinkileb’ li jalam-uuch re xseraq’inkil wi’chik li esil. Malaj maare taawulaq chiruheb’ xk’utb’esinkil li esil; chan ru naq te’ruuq chixk’utb’esinkil li jalaak li ke’xnumsi laj Alma ut eb’ li ralal laj Mosiah?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Oksiheb’ li jalam-uuch. “Sa’ li hu Libro de obras de arte del Evangeliout li Biblioteca multimedia SUD sa’ ChurchofJesusChrist.org wankeb’ k’iila jalam-uuch ut video li te’ruuq chixtenq’ankil laa junkab’al chixtawb’al ru li na’leb’ malaj li k’a’ru kik’ulman” (Li k’utuk jo’ li Kolonel, 22
B’onb’il jalam-uuch re lix k’utb’esinkil rib’ jun li anjel chiru laj Alma li alalb’ej xb’aan laj Kevin Keele