jun li anjel naxk’utb’esi rib’ chiru laj Alma ut eb’ li ralal laj Mosiah

Lix jalajik xch’ool laj Alma li alalb’ej, xb’aan laj Gary L. Kapp

18–24 mayo

Mosiah 25–28

“Ut aʼanebʼ xtenamit li Dios nekeʼyeheʼ re”

Li qaChoxahil Yuwa’ naxnaw k’a’ru tento te’xtzol li kok’al sa’ laa tzoleb’aal ut chan ru wulak sa’ xch’ooleb’. Sik’ aab’eresinkil naq yooqat chirilb’al ru Mosiah 25─28 ut il ru li tusleb’ aatin a’in.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

K’ut li jalam-uuch natawman sa’ li tusleb’ aatin re li xamaan a’in re Kim, Taaqehin—Choq’ reheb’ li komon ut li junkab’al, ut kanab’eb’ li kok’al chixch’olob’ankil k’a’ru yoo chi k’ulmank sa’ li jalam-uuch. Wi eb’ li kok’al neke’xnaw ru li esil chirix laj Alma li alalb’ej ut eb’ li ralal laj Mosiah, kanab’eb’ chixwotzb’al li neke’xnaw.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Mosiah 26:30–31

Li Qaawa’ naraj naq tinkuyuq maak.

Li Qaawa’ kixk’ut chiru laj Alma naq a’an naxkuyeb’ xmaak li neke’xjal xk’a’uxl. Tento taqataaqe lix b’aanuhom naq naqakuyeb’ xmaak li neke’maakob’k chiqu.

Kok’ k’anjel naru chi b’aanumank

• Il ru rik’ineb’ li kok’al li ch’ol aatin a’in re Mosiah 26:31: “Laa’ex ajwi’ teekuy eemaak cherib’il eerib’.” Kanab’eb’ li kok’al chixtzolb’al xyeeb’al “Ninkuy aamaak” wiib’ oxib’ sutaq, ut patz’ ma neke’xnaw k’a’ru naraj naxye li kuyuk maak. Seraq’i jun aanumsihom laa’at b’ar wi’ xakuy xmaak anihaq malaj b’ar wi’ xe’xkuy aamaak laa’at.

• Kanab’eb’ li kok’al chixk’utb’esinkil xkuyb’aleb’ xmaak chirib’ileb’ rib’. Kanab’ jun li ch’ina al chixk’oxlankil naq xrahob’tesi xch’ool malaj xhob’ junaq chik li ch’ina al. K’a’ru naru naxye malaj naru naxb’aanu li ch’ina al jun chik re xk’utb’al li kuyuk maak?

• Kanab’eb’ li kok’al chixyiib’ankil jun xnaq’ uhej ra xch’ool chiru jun li hu, ut jun sa xch’ool junpak’al chik. Kanab’eb’ chixchapb’al chi kutankil li xnaq’ uhej ra xch’ool naq yooqeb’ chixseraq’inkil jun numsihom b’ar wi’ xe’k’ehe’ xjosq’il xb’aan jun li raseb’ malaj jun ramiiweb’. Kanab’eb’ chixchapb’al chi kutankil li xnaq’ uhej sa xch’ool naq yooqeb’ chixseraq’inkil chan ru naq xe’xk’uy xmaak malaj te’xkuy raj xmaak li kristiaan a’an.

Mosiah 27:8–37

Li evangelio naxtenq’aheb’ li kristiaan chi jalaak ut chi wulak mas wi’chik jo’ li Jesus.

Lix jalajik laj Alma li alalb’ej ut eb’ li ralal laj Mosiah naxk’ut naq, sa’ xk’ab’a’ li Jesukristo ut lix evangelio, chixjunileb’ li kristiaan naru neke’jala ut naru neke’wulak mas wi’chik jo’ li Jesus.

Kok’ k’anjel naru chi b’aanumank

• Seraq’i sa’ junpaat lix jalajik laj Alma li alalb’ej ut eb’ li ralal laj Mosiah, jo’ ch’olob’anb’il sa’ Mosiah 27:8─37. Wi nakawaj aatenq’ankil, sik’ sa’ li “Ch’ol 18: Laj Alma, alalb’ej, naxjal xk’a’uxl” (Eb’ li Esilal sa’ lix Hu laj Mormon, 49─52, malaj li video sa’ ChurchofJesusChrist.org). Chirix a’an seraq’i wi’chik li esil ut kanab’eb’ li kok’al chixwotzb’al k’a’ru najultiko’ reheb’. Kanab’eb’ chixk’utb’esinkil li esil ut tenq’aheb’ chirilb’al lix jalanileb’ laj Alma ut eb’ li ralal laj Mosiah naq maji’ neke’xjal xk’a’uxl ut chirix naq ke’xjal xk’a’uxl.

• Tenq’aheb’ li kok’al chiroksinkil li perel re kok’ k’anjel re li xamaan a’in re xseraq’inkil li esil chirix laj Alma ut eb’ li ralal laj Mosiah. Il ru Mosiah 27:24 ut tenq’aheb’ li kok’al chixtawb’al ru naq laj Alma ut eb’ li ralal laj Mosiah ke’jala xb’aan naq ke’xjal xk’a’uxl chirixeb’ lix maak ut ke’xk’ulub’a lix evangelio li Jesukristo.

  neke’xk’am laj Alma li alalb’ej sa’ rochoch lix yuwa’

  Lix yuwa’ kisaho’ sa’ xch’ool, xb’aan laj Walter Rane

Mosiah 28:1–8

Naru ninwotz li evangelio.

Chirix lix jalajikeb’ xch’ool, eb’ li ralal laj Mosiah ke’reek’a jun xnimal ratawal xwotzb’al li evangelio rik’ineb’ chixjunil li kristiaan, jo’ ajwi’ rik’ineb’ li xik’ neke’ilok reheb’, eb’ laj Lamanita.

Kok’ k’anjel naru chi b’aanumank

• Oksi Mosiah 28:1─8 re xseraq’inkil reheb’ li kok’al naq eb’ li ralal laj Mosiah ke’xsik’ ru xjultikankil li evangelio reheb’ laj Lamanita. Wi nakawaj aatenq’ankil, il sa’ li “Ch’ol 19: Eb’ li ralal laj Mosiah ke’ok choq’ aj k’amol aatin” (Eb’ li Esilal sa’ lix Hu laj Mormon, 53, malaj li video sa’ ChurchofJesusChrist.org). K’a’ut naq ke’rataw xwotzb’al li evangelio? (chi’ilmanq li raqal 3).

• Tenq’aheb’ li kok’al chixk’oxlankil anihaq li naraj xtawb’al xkomon xna’leb’ chirix li evangelio. Tenq’aheb’ li kok’al chixk’uub’ankil k’a’ru te’xye re li kristiaan xe’xk’oxla.

• B’ichahomaq sa’ komonil jun li b’ich na’aatinak chirix xwotzb’al li evangelio, jo’ “Nawaj tinwanq choq’ jun li misioneer” (B’ichleb’aal choq’ reheb’ li Kok’al, 90). K’uteb’ li ch’ol aatin re li b’ich li neke’xkut chan ru naru naqawotz li evangelio rik’ineb’ li qas qiitz’in.

reetalil li k‘utuk

Xk’utb’al li tzol’leb’: Kok’al ak ninqeb’

Mosiah 26:22–23, 29–30; 27:8–37

Li Dios naxkuyeb’ xmaak li neke’xjal xk’a’uxl.

Wi anihaq sa’ laa tzoleb’aal naxpatz’ ma tz’aqal naru nakuye’ xmaak, li raatin li Dios choq’ re laj Alma li yuwa’b’ej ut lix numsihom laj Alma li alab’ej naru neke’oksiman.

Kok’ k’anjel naru chi b’aanumank

• K’e xb’oqb’aleb’ li kok’al chixk’oxlankil naq yookeb’ chi aatinak rik’in anihaq li ink’a’ naxpaab’ naq li Dios tixkuy lix maak. Kanab’eb’ chirilb’al ru li raatin li Dios choq’ re laj Alma li yuwa’b’ej sa’ Mosiah 26:22─23, 29─30. K’a’ru xe’xtaw li naru naxtenq’a li kristiaan a’an?

• K’a’ru xe’xtaw li naru naxtenq’a li kristiaan a’an? Rub’elaj li tzolok, kanab’ jun li ch’ina al chirilb’al ru lix jalajik xch’ool laj Alma li alalb’ej li natawman sa’ Mosiah 27:8─37, ut chi wulak chi kawresinb’il re xseraq’inkil li esil sa’ li tzoleb’aal chanchan ta wi’ naq a’an laj Alma li alalb’ej. (Wi na’ajman ru, ye re naq naru naxpatz’ xtenq’ankil reheb’ lix na’ xyuwa’.) Naq li ch’ina al yooq chixseraq’inkil li esil, yeheb’ li patz’om jo’eb’ a’in: “K’a’ru xaweek’a naq … ?” malaj “K’a’ru xk’ulman chirix a’an?”

• Kanab’eb’ li kok’al chixyiib’ankil jun xtusulaleb’ aatin wankeb’ sa’ Mosiah 27:8–10 li neke’reetali chan ru chaq laj Alma ut eb’ li rajal laj Mosiah naq maji’ neke’jala. Chirix a’an kanab’eb’ chixyiib’ankil jun chik xtusulal li wan sa’ Mosiah 27:32─37 li tixch’olob’ chankeb’ chik ru chirix a’an. Jo’ neke’xye li raqal 24─29, k’a’ru kixk’e chi uxmank lix nimla jalajik xch’ool laj Alma?

Mosiah 26:29–31

Re naq taakuye’q inmaak, tento tinkuyuq maak.

Tenq’aheb’ li kok’al chirilb’al k’a’ru rilom lix kuyb’al xmaakeb’ li ras riitz’in rik’in lix kuyb’al xmaakeb’ neke’royb’eni a’an.

Kok’ k’anjel naru chi b’aanumank

• Kanab’eb’ li kok’al chirilb’al ru Mosiah 26:29─31 ut chirajlankil jarub’ sut wan li aatin “kuyuk maak” aran. K’a’ru neke’xk’ut li raqal a’an chirix xkuyb’al xmaakeb’ li qas qiitz’in? Chan ru naq li kuyuk maak naxtenq’a li kristiaan li xb’aanu k’a’ruhaq ink’a’ us jo’ ajwi’ li kristiaan nakuyuk maak?

• Kanab’ jun li ch’ina al chiyiib’ankil xjalam-uuch jun li q’a chiru li pizarron ut wotz li aatin a’in kixwotz li Awa’b’ej Thomas S. Monson: “Ani ink’a’ naxkuy xmaak li ras riitz’in naxt’an li q’a li tento taanume’q wi’ re taawulaq sa’ choxa, xb’aan naq chiqajunilo naqaj ru li kuyuk maak” (George Herbert, wotzb’il sa’ “Cuñas escondidas,” Liahona, julio 2002, 21). Sach ru jun jachal xjalam-uuch li q’a ut kanab’eb’ li kok’al chixyiib’ankil wi’chik, chi kok’ ch’uyul, naq yooqeb’ chixwotzb’al chan ru naru neke’xk’uy xmaakeb’ li ras riitz’in. K’e xb’oqb’aleb’ chixk’oxlankil anihaq li tento te’xkuy xmaak.

Mosiah 27:8–24

Naru nintijok ut ninkuy insa’ re xpatz’b’al re li Dios naq taarosob’tesiheb’ li raab’ileb’ inb’aan.

K’e reetal chan ru naru nakatenq’aheb’ li kok’al chixtawb’al ru naq li kuyuk sa’ naru naxkawob’resi lix paab’aaleb’ naq neke’tijok chirixeb’ li kristiaan raab’ileb’ xb’aaneb’.

Kok’ k’anjel naru chi b’aanumank

• Ilomaq ru sa’ komonil Mosiah 27:8─24 ut kanab’eb’ li kok’al chixtawb’al k’a’ru ke’xb’aanu laj Alma ut lix tenamit re xtenq’ankil laj Alma li alalb’ej. Seraq’i junaq aanumsihom laa’at b’ar wi’ xakuy aasa’ ut xattijok chirix anihaq, ut waklesiheb’ xch’ool li kok’al chixwotzb’al xnumsihomeb’ ajwi’ a’an.

• K’e xb’oqb’aleb’ li kok’al chixk’oxlankil anihaq neke’xnaw ru li naraj ru xtenq’ li Dios sa’ xyu’am. Ch’olob’ xyaalal naq eb’ li kok’al naru neke’tijok ut naru neke’xkuy xsa’ rik’in paab’aal re xpatz’b’al re li Dios naq taarosob’tesi li kristiaan a’an. K’e xb’oqb’aleb’ li kok’al re te’tijoq chirix li kristiaan xe’xk’oxla ut, wi naru, te’xkuy xsa’ chirix li kristiaan a’an.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixsik’b’al ru k’a’ruhaq xe’xtzol chirix lix numsihom laj Alma li alalb’ej ut eb’ li ralal laj Mosiah li nawulak raj chiruheb’ xwotzb’al rik’ineb’ lix junkab’al.

Xchaab’ilob’resinkil li qak’utum

Tenq’aheb’ li na’b’ej yuwa’b’ej. “Eb’ li na’b’ej yuwa’b’ej a’aneb’ laj k’utunel re li evangelio q’axal aajeleb’ ru choq’ reheb’ li ralal xk’ajol—a’aneb’ li teneb’anb’ileb’ jo’ ajwi’ li wankeb’ xnimaleb’ xwankil chixtenq’ankileb’ li ralal xk’ajol (chi’ilmanq Deuteronomio 6:6–7). Naq nakatzoleb’ li kok’al sa’ iglees, sik’ rik’in tijok chan ru taatenq’aheb’ lix na’ xyuwa’ sa’ lix k’anjeleb’ ” (Li k’utuk jo’ li Kolonel, 25).

perel re kok’ k’anjel: li evangelio nokoxtenq’a chi wulak jo’ li Jesukristo