laj Abinadi nach’olob’ank chiru li rey aj Noe

Laj Abinadi chiru li rey aj Noe, xb’aan laj Andrew Bosley

4–10 mayo

Mosiah 11–17

“Jun li saqen … li maajo’q’e naru xq’ojyinob’resinkil”

K’oxlan ut tijon re xnawb’al chan ru naru nakawoksi li esil chirix laj Abinadi ut lix k’utum sa’ Mosiah 11─17 re xtenq’ankileb’ li kok’al nakatzoleb’. Tz’iib’a li na’leb’ nakak’ul.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixwotzb’al li neke’xnaw chirix li esil chirix laj Abinadi ut li rey aj Noe. Li jalam-uuch sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naru nak’anjelak aawe.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Mosiah 11–13; 17

Naru ninkol rix li yaal, us ta injunes wanqin.

Laj Abinadi ut laj Alma ajwi’ ke’xkol rix li yaal rik’in kawil ch’oolej. Chan ru naru nakawoksi li esil a’an re xk’eeb’al xkawil xch’ooleb’ li kok’al re xkolb’al rix lix paab’aaleb’ naq na’ajman ru?

Kok’ k’anjel naru chi b’aanumank

• K’os ru li esil chirix laj Abinadi, li rey aj Noe, ut laj Alma li natawman sa’ Mosiah 11─13 ut 17. Naru nakawoksi li “Ch’ol 14: Laj Abinadi ut li rey aj Noe” (Eb’ li Esilal sa’ lix Hu laj Mormon, 38─42, malaj li video sa’ ChurchofJesusChrist.org). Kanab’eb’ li kok’al chixk’utb’esinkil li seraq’ ut kanab’eb’ chixk’eeb’aleb’ xhoonal chixk’utb’esinkil jalan jalanq chi kristiaan.

• B’eenqex sa’ lee na’aj rik’ineb’ li kok’al naq yooqex chixb’ichankil jun li b’ich li naxmusiq’a kawil ch’oolej, jo’ “Kawaq inch’ool” (B’ichleb’aal choq’ reheb’ li Kok’al, 85). Ilomaq ru sa’ komonil raatinul li b’ich ut tenq’aheb’ li kok’al chixk’eeb’al reetal k’a’ru naxb’aanu junaq li kristiaan kaw xch’ool. Sik’ ru junjunqeb’ li raqal sa’ Mosiah 11─13 ut 17 re rilb’al ru rik’ineb’ li kok’al re xk’utb’al chan ru naq laj Abinadi ut laj Alma ke’wan chi kaweb’ xch’ool (chi’ilmanq, jo’ eetalil Mosiah 13:1─4, 9).

Mosiah 12:33–36; 13:11–24

Tento tinpaab’eb’ li Lajeeb’ chi Taqlahom.

Eb’ laj tij re li rey aj Noe neke’xnaw li taqlahom, a’b’an ink’a’ neke’xpaab’. Eb’ li raatin laj Abinadi naru naxtenq’aheb’ li kok’al chixtawb’al ru lix aajelil ru xpaab’ankileb’ li taqlahom.

Kok’ k’anjel naru chi b’aanumank

• Kanab’eb’ li kok’al chi ajlank toj sa’ lajeeb’. Malaj, k’e reheb’ lajeeb’ kok’ hu wankeb’ rajlil ut kanab’eb’ chixtusb’aleb’ ru li hu. Ch’olob’ naq li qaChoxahil Yuwa’ kixk’e qe li Lajeeb’ chi Taqlahom re qatenq’ankil chi q’ajk rik’in a’an. Tenq’aheb’ li kok’al chixyaab’asinkileb’ aawochb’een junjunq reheb’ li Lajeeb’ chi Taqlahom wankeb’ sa’ Mosiah 12:33─36 ut 13:11─24.

• K’ut jun xjalam-uuch laj Moises rik’in li lajeeb’ chi taqlahom (jo’ Libro de obras de arte del Evangelio, ajl 14), ut ch’olob’ chan ru naq laj Moises kixk’ul lix taqlahom li Dios (chi’ilmanq Exodo 19─20). Chirix a’an k’ut jun xjalam-uuch laj Abinadi (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al), ut ye reheb’ li kok’al naq laj Abinadi kixjultika re li rey aj Noe ut reheb’ laj tij chirix li Lajeeb’ chi Taqlahom. Sik’ ru junjunq reheb’ li taqlahom yeeb’ileb’ sa’ Mosiah 12:33─36 ut 13:11─24 li nakak’oxla naq aajelaqeb’ ru choq’ reheb’ li kok’al nakatzoleb’, ut aatinanqex chirix li osob’tesihom nak’ulman naq neke’paab’aman li taqlahom a’an.

• B’ichahomaq sa’ komonil jun li b’ich na’aatinak chirixeb’ li taqlahom, jo’ “Paab’eb’ li taqlahom” (B’ichleb’aal choq’ reheb’ li Kok’al, 68─69). K’a’ut naq neke’qapaab’ li taqlahom?

Mosiah 14:5; 15:7–9

Eb’ li profeet neke’xch’olob’ xyaalal li Jesukristo rik’in kawil ch’oolej.

Laj Abinadi kixk’ut chiru li rey aj Noe ut xkomoneb’ chik li kristiaan chirix li Jesukristo, us ta jwal xiw xiw a’an. Chan ru naru li seraq’ chirix laj Abinadi chixkawob’resinkil xnawom xch’ooleb’ li kok’al chirixeb’ li profeet?

Kok’ k’anjel naru chi b’aanumank

• Wotz rik’ineb’ li kok’al k’a’ruhaq kixk’ut laj Abinadi chirix li Jesukristo li wan sa’ Mosiah 14:5 ut 15:7─9. Tenq’aheb’ li kok’al chixtawb’al ru naq laj Abinadi kiraj naq li rey aj Noe ut lix tenamit te’xtaaqe raj li Jesus re naq sahaqeb’ raj xch’ool. Sa’eb’ li kutan a’in, eb’ li yo’yookil profeet neke’k’utuk chiqu chirix li Kolonel. Il ru jun raqalaq li jolomil ch’utub’aj-ib’ malaj wotz xcha’al jun li video re jun reheb’ li yo’yookil profeet naq yookeb’ chixwotzb’al xnawom xch’ool chirix li Jesukristo (che’ilmanq, jo’ eetalil, li video re “Testigos especiales de Cristo” sa’ ChurchofJesusChrist.org).

• K’uteb’ malaj yiib’eb’ xjalam-uuch li kadeen, jun li tz’alam, ut li xam. K’ut chiruheb’ li kok’al naq laj Abinadi kixkanab’ rib’ chi b’ak’e’k, chi tz’ape’k sa’ tz’alam, ut ajwi’ chi k’ate’k rik’in xam re xwotzb’al lix nawom xch’ool chirix li Jesukristo. Us ta maare ink’a’ te’qanumsi li xiw xiw a’an, chan ru naru naq kawaq qach’ool jo’ laj Abinadi chixwotzb’al lix nawom qach’ool rik’ineb’ li qaatin ut rik’in ajwi’ li k’a’ru naqasik’ ru?

reetalil li k‘utuk

Xk’utb’al li tzol’leb’: Kok’al ak ninqeb’

Mosiah 11–13; 17

Naru ninkol rix li k’a’ru us, us ta injunes wanqin.

Chan ru naru nakakawresiheb’ li kok’al nakatzoleb’ chixkolb’al rix li k’a’ru us rik’in kawil ch’oolej, us ta tento te’xb’aanu xjuneseb’?

Kok’ k’anjel naru chi b’aanumank

• Kanab’eb’ li kok’al chixyiib’ankileb’ xjalam-uuch jalan jalanq xcha’alil li seraq’ chirix laj Abinadi, li rey aj Noe, ut laj Alma li neke’tawman sa’ Mosiah 11─13 ut 17. Tenq’aheb’ chiroksinkileb’ lix jalam-uuch re xseraq’inkil wi’chik li esil, malaj, oksi li “Ch’ol 14: Laj Abinadi ut li rey aj Noe” (Eb’ li Esilal sa’ lix Hu laj Mormon, 38─42, malaj li video sa’ ChurchofJesusChrist.org). Chan ru naq laj Abinadi ut laj Alma ke’xkol rix li k’a’ru us? K’a’ut naq li rey aj Noe ink’a’ kixkol rix li k’a’ru us? (chi’ilmanq Mosiah 17:11–12). Tenq’aheb’ li kok’al chixjultikankileb’ hoonal b’ar wi’ xe’xkol rix li k’a’ru us.

• Tenq’aheb’ chixk’oxlankileb’ hoonal b’ar wi’ naru te’xkol rix li k’a’ru us ut kanab’eb’ chixk’utb’esinkil junjunq reheb’ a’an. Qayehaq, k’a’ raj ru te’xb’aanu naq junaq tixyal xk’eeb’al chirileb’ jun li yib’ aj kax mu malaj naq eb’ li ramiiw ink’a’ te’raj xk’ulb’al anihaq sa’ li b’atz’unk yookeb’ chixb’aanunkil?

• K’ut li video “Atrévete a lo correcto aunque solo estés” (ChurchofJesusChrist.org). Chan ru naq li Awa’b’ej Thomas S. Monson kiwan jo’ laj Abinadi?

Mosiah 12:33–36; 13:11–24

Tento tinpaab’eb’ li Lajeeb’ chi Taqlahom.

Laj Abinadi kik’utuk chiru li rey aj Noe ut chiruheb’ laj maa’us aj tij chirix li Lajeeb’ chi Taqlahom. Ma neke’xtaw ru li kok’al nakatzoleb’ k’a’ut naq tento te’qara ut too’ab’inq chiruheb’ lix taqlahom li Dios?

Kok’ k’anjel naru chi b’aanumank

• Kanab’eb’ li junjunq chi kok’al chirilb’al ru jun reheb’ li taqlahom sa’ Mosiah 12:35 ut 13:11─24. Tenq’aheb’ li kok’al chixk’oxlankil chan ru naru neke’xtenq’a rib’eb’ chixjultikankil li junjunq chi taqlahom (maare rik’in junaq ch’ol aatin ch’ina-us taa’eek’anq, junaq ch’ina eek’asink-ib’, malaj ch’ol aatin yeeb’il sa’ jun ajwi’ aatin). Naru ajwi’ na’oksiman li b’ich “Eb’ li taqlahom” (B’ichleb’aal choq’ reheb’ li Kok’al, 144). Ke’ reheb’ li kok’al kok’ huhil aamej ut kanab’eb’ chixtz’iib’ankil jun malaj wiib’ oxib’ reheb’ li Lajeeb’ chi Taqlahom sa’ li aamej (chi’ilmanq Mosiah 13:11)—maare jun li tento tixyal xq’e xpaab’ankil.

• B’ichahomaq sa’ komonil jun li b’ich na’aatinak chirixeb’ li taqlahom, jo’ “Paab’eb’ li taqlahom” (B’ichleb’aal choq’ reheb’ li Kok’al, 68─69). K’a’ruheb’ li osob’tesihom neke’chal xb’aan xpaab’ankileb’ li taqlahom?

jun yuwa’b’ej ut alalb’ej neke’ril ru li loq’laj hu

Eb’ li loq’laj hu neke’xk’ut chiqu lix taqlahom li Dios.

Mosiah 14:6; 16:4–9

Naq ninmaakob’k, nikinsach; sa’ xk’ab’a’ li Jesukristo naru nintawe’.

Re k’utuk chirix li Jesukristo, laj Abinadi kiroksi li raatin li profeet aj Isaias, li kooxjuntaq’eeta rik’ineb li karneer sachsookeb’. Chan ru naru nakawoksi li jutaq’eetank a’an re k’utuk chiruheb’ li kok’al chirix li Kolonel?

Kok’ k’anjel naru chi b’aanumank

• Kanab’eb’ li kok’al chixwotzb’al xnumsihomeb’ b’ar wi’ xsach k’a’ruhaq chiruheb’ malaj a’aneb’ ajwi’ xe’sach. K’a’ru xe’reek’a? K’a’ru xe’xb’aanu? Ilomaq ru sa’ komonil Mosiah 14:6 ut 16:4–9. Chan run naq jo’q’ehaq “naqasach li qab’e” chiru li Dios? Chan ru nokoxtenq’a li Jesukristo chi sutq’iik?

• Kanab’eb’ li kok’al chixk’oxlankil jun ch’uut li karneer. K’a’ut raj naru nasach junaq reheb’ li karneer? Tz’iib’aheb’ lix sumenkil chiru li pizarron. Chan ru naq chanchano li karneer li yookeb’ chixb’eeninkileb’ rib’? K’a’ raj ru taareek’a li qaChoxahil Yuwa’ naq “nokotawe’ ” rik’in li jalb’a-k’a’uxlej ut lix tojb’al rix li maak xb’aan li Kolonel? (chi’ilmanq Tzol’leb’ ut Sumwank 18:10─13). Wotz xnawom aach’ool chirix li Kolonel ut li jalb’a-k’a’uxlej.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixpatzb’al reheb’ li komon sa’ lix junkab’aleb’ naq te’xwotz xnumsihomeb’ b’ar wi’ xe’xkol rix li yaal, malaj waklesiheb’ xch’ool li kok’al chixwotzb’al lix numsihomeb’ a’an.

Xchaab’ilob’resinkil li qak’utum

Li ka’sutink tz’aqal chaab’il re li tzolok. Eb’ li kok’al te’tenq’aaq xb’aan rab’inkil jun li na’leb’ re li evangelio malaj naq neke’xb’aanu jun li ch’ina k’anjel chi k’iila sut. Ka’sutiheb’ li kok’ k’anjel chi naab’al paay ru.

perel re kok’ k’anjel: laj Abinadi kixkol rix li yaal