“4–10 mayo. Mosiah 11–17: “Jun li saqen … li maajo’q’e naru xq’ojyinob’resinkil,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“4–10 mayo. Mosiah 11–17,” Kim, Taaqehin—Choq’ reheb’ li komon ut li junkab’al: 2020
Laj Abinadi chiru li rey aj Noe, xb’aan laj Andrew Bosley
4–10 mayo
Mosiah 11–17
“Jun li saqen … li maajo’q’e naru xq’ojyinob’resinkil”
Li raatin laj Abinadi kixk’e chi uxmank jun nimla jalaak sa’ xch’ool jun reheb’ laj tij re li rey aj Noe (chi’ilmanq Mosiah 17:2–4). Il ru Mosiah 11–17 rik’in jun tij sa’ laa waam naq taak’ul li musiq’anb’il na’leb’ chirix chan ru naru tatjalaaq.
Xtz’iib’ankil li nakak’oxla
Eb’ li ninqi xam naru neke’tikla rik’in yal jun ch’ina raq’ xam. Laj Abinadi a’an li junaj chi winq yoo chixch’olob’ankil li yaal chiru jun xnimal ru rey ut eb’ lix komon. Kikana li raatin chi tz’eqtaananb’il, ut kijite’ ut kiteneb’aak li kamsiik sa’ xb’een. A’b’anan, lix nawom ch’ool chirix li Jesukristo, li wan jo’ “li saqen … li maajo’q’e naru xq’ojyinob’resinkil” (Mosiah 16:9), kixloch li raam jun saaj aj tij, laj Alma. Ut chi timil timil kiniman li jalok ch’oolej li lochb’il sa’ li raam laj Alma naq a’an kixk’ameb’ jalaneb’ chik chixjalb’aleb’ xk’a’uxl ut chi paab’ank chirix li Jesukristo. Eb’ li raq’ xam li ke’xkamsi laj Abinadi ke’chup rik’in xnumik li hoonal, a’b’an lix xamlel li paab’aal li kiloche’ xb’aan li raatin kikana rik’ineb’ laj Nefita—jo’eb’ ajwi’ li ani neke’ril ru li raatin a’an anajwan. Naab’al qe laa’o maajo’q’e taqak’ul li kixk’ul laj Abinadi xb’aan lix nawom qach’ool, a’b’an chiqajunilo wan naq taayale’q rix lix kawilal qach’ool ut li qapaab’aal xb’aan naq naqataaqe li Jesukristo. Maare xtzolb’al lix nawom xch’ool laj Abinadi tixnimob’resi xxamlel li xnawom ch’oolej ut li kawil ch’oolej sa’ laa waam ajwi’ laa’at.
Li na’leb’ re xtzolb’aleb’ li loq’laj hu aajunes
Naru ninkol rix li yaal, us ta xaqxookin injunes.
K’oxla chan ru naq maare kika’ch’ino’ xch’ool laj Abinadi rik’in naq kixjap re chixjultikankil li jalb’a’-k’a’uxlej chiru jun li tenamit li maak’a’ rajomeb’ chi jalaak sa’ li maa’usilal wankeb’ wi’. K’iila sut kitz’eqtaanaak li raatin. A’b’anan, laj Abinadi ink’a’ kixkanab’ xb’aanunkil.
Jo’q’e xaweek’a naq junes xaqxookat sa’ xkolb’al rix li yaal? Naq nakawil ru Mosiah 11–13 ut 17, k’a’ru nakatzol li naru chatenq’ankil chi wank chi kawresinb’il naq li Qaawa’ naraj naq taaxaqab’ aawib’ choq’ re lix evangelio. K’a’ chik li ru nakatzol rik’in lix b’aanuhom laj Abinadi?
Tento tink’e inch’ool re xtawb’al ru li raatin li Dios.
Eb’ laj tij re li rey aj Noe ke’xnaw ru li raatin li Dios—ke’ru chixyeeb’al li aatin wankeb’ sa’eb’ li loq’laj hu ut ke’xye naq neke’xk’uteb’ li taqlahom. A’b’anan, eb’ li taqlahom a’an “moko tz’iib’anb’ileb’ ta sa’ xch’ooleb’,” ut “ink’a’ xe’xk’e xch’ooleb’ chixtawb’al xyaalal” (Mosiah 13:11; 12:27). Jo’kan ut naq moko ke’jala ta xyu’ameb’.
Naq nakawil ru Mosiah 12:19–30, k’oxla li k’a’ru naraj naxye xk’eeb’al aach’ool chixtawb’al xyaalal li raatin li Dios. Ma eek’asinb’ilat xb’aan a’in chixjalb’al chan ru nakatzol li evangelio?
Li Qaawa’ tixtenq’aheb’ lix moos sa’ lix k’anjel.
Chi junpak’al, sa’ lix numsihom laj Abinadi neke’tawman naab’al li reetalil chan ru naq li Qaawa’ naxtenq’aheb’ lix moos—naru taataweb’ li eetalil a’an sa’ Mosiah 13:1–9. Chi junpak’al chik, li Qaawa’ kixkanab’ naq laj Abinadi taarahob’tesiiq, naq taak’ehe’q sa’ tzalam, ut naq taakamsiiq xb’aan lix nawom xch’ool. K’a’ru nakataw sa’eb’ li raqal a’in li naxk’utb’esi naq laj Abinadi kixkanab’ rib’ chiru li Qaawa’? Chan ru naq lix b’aanuhom laj Abinadi naxjal chan ru nakawileb’ laa b’oqb’al ut eb’ laa teneb’ankil?
Li Jesukristo kixk’ul li rahilal sa’ ink’ab’a’ laa’in.
Li rey aj Noe ut eb’ lix tij ke’xpaab’ naq li kolb’a-ib’ nachal xb’aan lix chaq’rab’ laj Moises. Laj Abinadi kiraj naq te’xnaw naq li kolb’a-ib’ nachal ka’ajwi’ rik’in li Mesias, li Jesukristo. Sa’ Mosiah 14–15, k’e reetaleb’ li aatin ut li ch’ol aatin li neke’xye resil li Kolonel ut li rahilal kixk’ul sa’ aak’ab’a’ laa’at. B’ar wankeb’ li raqal li neke’xnimob’resi laa rahom ut laa b’antioxihom choq’ re a’an?
Chan ru naq li Jesukristo a’an li Yuwa’b’ej jo’ ajwi’ li K’ajolb’ej?
Wan naq ch’a’aj xtawb’aleb’ ru li raqal a’in xb’aan naq chanchan naq laj Abinadi yoo chixk’utb’al naq junajeb’ ajwi’ li qaChoxahil Yuwa’ ut li Jesukristo, a’ut naqanaw naq moko junajeb’ ta. K’a’ru yoo chixyeeb’al laj Abinadi? A’an kixk’ut naq li Dios K’ajolb’ej—li Jehova—a’anaq laj Tojol-ix (chi’ilmanq Mosiah 15:1), naq kiwan sa’ li tz’ejwalej, kiwan jo’ jun winq ut kiwan ajwi’ jo’ jun Dios (eb’ li raqal 2–3). A’an kixkanab’ rib’ chi tz’aqal chiru li rajom li Dios li Yuwa’b’ej (eb’ li raqal 5–9). Xb’aan a’in, li Jesukristo a’an li Ralal li Dios jo’ ajwi’ li tz’aqal reetalil li Dios Yuwa’b’ej sa’ ruchich’och’ (chi’ilmanq Jwan 14:6–10).
Laj Abinadi kixch’olob’ ajwi’ naq li Jesukristo a’an ajwi’ li Yuwa’b’ej rik’in naq sa’ xk’ulub’ankil li tojb’al-ix naxk’e, noko’ok choq’ “li riyajil” (Mosiah 15:11–12). Sa’ jalan chik aatin, nokoyo’la chi ak’il sa’ musiq’ej sa’ xk’ab’a’ a’an (chi’ilmanq Mosiah 5:7).
Chi’ilmanq ajwi’ Jwan 5:25–27; 8:28–29; 17:20–23.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Mosiah 11–13; 17
Lix b’aanuhomeb’ laj Abinadi ut laj Alma neke’xk’ut chi chaab’il chan ru wank chi xaqxo sa’ li yaal, us ta lix k’ihaleb’ li kristiaan ink’a’ neke’xb’aanu. Maare wankeb’ li komon sa’ laa junkab’al li yookeb’ chi q’unb’esiik xch’ool chixq’etb’al li chaq’rab’. K’a’ru naru te’xtzol rik’in laj Abinadi ut laj Alma chirix li xaqab’ank-ib’ choq’ re li yaal? Eb’ li jalam-uuch sa’ li tusleb’ aatin a’in naru chixtenq’ankil laa junkab’al chirilb’al li esil. Chirix xtzolb’aleb’ li ch’ol a’in, k’oxla xb’aanunkil jun k’utb’esink chirix li k’a’ru nak’ulman sa’ li qayu’am re naq eb’ li wankeb’ sa’ laa junkab’al te’ruuq chixyalb’al xsumenkil naq te’q’unb’esiiq xch’ool chixq’etb’al li chaq’rab’. Malaj naru teewotz cherib’il eerib’ resil naq xexaqab’ eerib’ choq’ re li yaal.
Mosiah 12:33–37; 13:11–24
K’a’ru naraj naxye naq “tz’iib’anb’il sa’ qach’ool” lix chaq’rab’ li Dios? (Mosiah 13:11). Maare naru taatz’iib’a junjunq na’leb’ (malaj taayiib’ xjalam-uucheb’ laa na’leb’) sa’ jun nimla aamej hu. K’a’ut naq ninqeb’ xloq’al li chaq’rab’ choq’ qe? Chan ru naru taqatz’iib’aheb’ sa’ qach’ool?
Xtzolb’aleb’ li loq’laj hu naru chiqatenq’ankil chixtz’iib’ankileb’ li taqlahom sa’ qach’ool.
Mosiah 14
Sa’ li ch’ol a’in taataw junjunq li aatin ut ch’ol aatin li neke’xye resil li Jesukristo. Maare jo’ junkab’al naru teetz’iib’aheb’ naq neketaweb’. K’a’ru li nareek’a li junjunq komon sa’ li junkab’al chirix li Kolonel naq naqatzoleb’ li aatin ut ch’ol aatin a’an?
Mosiah 15:26–27; 16:1–13
Eb’ li raqal a’in neke’xch’olob’ li taak’ulmanq raj rik’ineb’ li ralal xk’ajol li Dios wi ta li Jesus “ink’a’ kichal sa’ li ruchich’och’ ” (Mosiah 16:6) malaj wi ta ink’a’ te’xtaaqe. K’a’ruheb’ li chaab’ilal li xe’k’ulman xb’aan naq a’an kichal ut kixtoj rix li qamaak laa’o? Chi’ilmanq ajwi’ li video “Por qué necesitamos un Salvador” (ChurchofJesusChrist.org).
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Oksiheb’ li seraq’ ut li na’leb’ re xk’utb’aleb’ li jar raqal re li evangelio. Li Kolonel k’iila sut kixk’uteb’ li na’leb’ chirix li evangelio rik’in roksinkileb’ li seraq’ ut li jaljookil ru aatin. K’oxla li na’leb’ ut li esilal chirix tz’aqal aayu’am li taaruuq chixtenq’ankileb’ li wankeb’ sa’ laa junkab’al chixtawb’al ru jun na’leb’ chirix li evangelio (chi’ilmanq Li k’utuk jo’ li Kolonel, 22
Kilemtz’un li rilob’aal chi q’axal lemtz’ ru, xb’aan laj Jeremy Winborg