“11–17 mayo. Mosiah 18–24: “Okenaqo sa’ jun sumwank rik’in a’an,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“11–17 mayo. Mosiah 18–24,” Kim, Taaqehin—Choq’ reheb’ li komon ut li junkab’al: 2020
Li xMinerva K. Teichert (1888-1976), Reelelik li rey aj Limhi ut lix tenamit, 1949-1951, óleo en masonite, 35 7/8 x 48 pulgadas. Museo de Arte, Universidad de Brigham Young, 1969.
11–17 mayo
Mosiah 18–24
Okenaqo sa’ jun sumwank rik’in a’an
Li Awa’b’ej Thomas S. Monson kixye, “Naq naqileb’ ru ut naqak’oxlaheb’ li loq’laj hu, taqak’ul lix ki’il hasb’ li Musiq’ej sa’ li qaam” (“Nunca caminamos solos,” Liahona, noviembre 2013, 122).
Xtz‘iib‘ankil li nakak‘oxla
Li resil laj Alma ut lix tenamit sa’ Mosiah 18; 23–24 naxk’ut li k’a’ru naraj naxye li “ok sa’ lix korral li Dios” (Mosiah 18:8). Naq ke’kub’e xha’, ke’ok sa’ sumwank rik’in li Dios re “k’anjelak chiru ut xpaab’ankil lix taqlahom” (Mosiah 18:10). Us ta naq wan li sumwank a’in choq’ re li junjunq, wan ajwi’ rilom rik’in chan ru naq ke’ril rib’ chirib’ileb’ rib’. Yaal, qajunes qib’ naq noko’beek chiru li b’e re sutq’iik rik’in qaChoxahil Yuwa’, ut maajun chik naru chixpaab’ankil li qasumwank choq’ qe, a’b’an a’an ink’a’ naraj naxye naq qajunes wanko. Aajel ru naq taqatenq’a qib’ chiqib’il qib’. Jo’ komon sa’ lix Iglees li Kristo, noko’ok sa’ sumwank naq took’anjelaq chiru li Dios rik’in xtenq’ankil qib’ chiqib’il qib’ sa’ li b’e, ut “taqak’am li qiiq chiqib’il qib’ ” (Mosiah 18:8–10). Lix tenamit laj Alma tento naq ke’xk’uy li riiq, chanchan ajwi’ laa’o. Ut li Qaawa’ nokoxtenq’a re naq “moko ch’a’aj ta chiqu xk’amb’al li qiiq” (Mosiah 24:15) rik’in xk’eeb’al qe jun xch’utameb’ laj santil paab’anel li wankeb’ sa’ aatin naq te’yaab’aq qik’in ut te’xk’ojob’ qach’ool, jo’ chanru naq laa’o wanko sa’ aatin naq taqab’aanu choq’ reheb’ a’an.
Li na’leb’ re xtzolb’aleb’ li loq’laj hu aajunes
Naq nakub’e qaha’, noko’ok sa’ jun li sumwank re k’anjelak chiru li Dios ut xaqliik jo’ aj yehol nawom chirix.
Sa’ Mosiah 18:8–10 natawman lix k’utum laj Alma chirix li sumwank re li kub’iha’, malaj li k’a’ru naqayeechi’i re li Dios naq nakub’e qaha’. Naq nakawileb’ ru li raqal a’an, k’oxlaheb’ li patz’om a’in:
-
K’a’ru nakatzol sa’eb’ li raqal a’an chirix li k’a’ru xayeechi’i naq xkub’e aaha’? K’a’ru naxyeechi’i aawe li Dios?
-
Chan ru naq li sumwank re k’anjelak chiru li Dios (chi’ilmanq li raqal 10) naxk’am rib’ rik’in li qak’anjel re rilb’aleb’ li qakomon? (che’ilmanq li raqal 8–9).
-
K’a’ru yookat chixb’aanunkil re xpaab’ankil li k’a’ru xayeechi’i?
-
Chan ru naq xb’aanunkil li k’a’ru xayeechi’i naq xkube’ aaha’ nakatxtenq’a “chi nujaak rik’in li Musiq’ej”? (Mosiah 18:14). Chan ru naq li Musiq’ej nakatxtenq’a chixpaab’ankil laa sumwank?
Naq nin’ok sa’ sumwank rik’in li Dios, nink’uleb’ li rosob’tesihom.
Li esil a’in naxk’utb’esi ajwi’ chan ru xb’aanunkil li kub’sink ha’ chi tz’aqal. K’a’ru nakatzol sa’eb’ li raqal 14–17 chirix chan ru naq tento taab’aanumanq li kub’iha’? K’a’ chik ru nakatzol chirix li kub’sink ha’ sa’ Mateo 3:16; Romanos 6:3–5; 3 Nefi 11:21–28; ut Tzol’leb’ ut Sumwank 20:72–74?
Chi’ilmanq ajwi’ Tzol’leb’ ut Sumwank 20:37, 77, 79.
Tento naq eb’ lix tenamit li Dios te’wanq sa’ junajil.
Jo’ ke’xtaw laj Alma ut lix tenamit, wan naq xtaaqenkil li Jesukristo naraj naxye xkanab’ankil k’a’ruhaq li k’aynaqo chixb’aanunkil sa’ li qayu’am re xb’aanunkil li k’a’ru ak’ ut jalan. A’b’anan, lix tenamit laj Alma ke’xk’ul xkawilaleb’ li jun rik’in li jun chik jo’ komoneb’ sa’ “lix iglees li Kristo” (Mosiah 18:17). Chan ru naq li k’a’ru k’utb’il sa’ Mosiah 18:17–30 naxwaklesi aach’ool chi chaab’ilo’k jo’ komon sa’ li Iglees? K’a’ru naru taab’aanu re xtenq’ankileb’ li komon sa’ laa teep malaj uq’ej chi wank “chi kemb’il sa’ komonil lix ch’ooleb’ rik’in junajil ut rik’in rahok”? (Mosiah 18:21).
Chi’ilmanq ajwi’ Henry B. Eyring, “Entrelazados nuestros corazones en uno,” Liahona, noviembre 2008, 68–71.
Te’tz’aqloq ru li raatineb’ li profeet.
Laj Abinadi kixye li profeetil aatin chirix li k’a’ru taak’ulmanq rik’in li rey aj Noe ut lix tenamit wi ink’a’ te’xjal xk’a’uxleb’. A’b’anan, choq’ re junjunq, li profeetil aatin a’an chanchan naq ink’a’ naru chi uxmank (chi’ilmanq Mosiah 12:1–8, 14–15), xb’aan naq eb’ laj Nefita ak ke’xkoleb’ rib’ chiruheb’ laj Lamanita chiru numenaq 50 chihab’ (chi’ilmanq Mosiah 9:16–18; 11:19). A’ut te’tz’aqloq ru chixjunileb’ li raatineb’ li profeet—sa’ li qakutan jo’ ajwi’ sa’ xkutankil laj Abinadi.
K’a’ru nakataw sa’ Mosiah 19–20 li kixk’e laj Gideon chixyeeb’al naq xe’tz’aqlok ru lix profeetil aatin laj Abinadi? (chi’ilmanq Mosiah 20:21). Chan ru naq li esil a’in naxkawob’resi laa paab’aal chirix lix tijomeb’ ut lix na’leb’eb’ lix profeet li Dios ut li rajom aach’ool chixtaaqenkil li raatineb’? Jo’q’e aawilom chi tz’aqlok ru li raatin jun li profeet sa’ li qakutan laa’o?
Li Dios naru tixseeb’ob’resi li wiiq laa’in.
Eb’ lix tenamit li rey aj Limhi jo’ ajwi’ lix tenamit laj Alma ke’ok chi preexil, us ta jalan jalanq li ke’xb’aanu ut li ke’wan wi’. K’a’ru naru taatzol naq taajuntaq’eeta li resil lix tenamit li rey aj Limhi sa’ Mosiah 19–22 rik’in li resil lix tenamit laj Alma sa’ Mosiah 18; 23–24? Naru taak’e reetal li k’a’ru ke’xb’aanu li wiib’ ch’uut a’in naq ke’ok chi preexil ut chan ru naq li junjunq ki’ach’ab’aak. Naq nakab’aanu a’an, sik’eb’ li na’leb’ li naru tate’xtenq’a sa’ laa yu’am. Qayehaq, k’a’ru nakatzol sa’eb’ li esil a’in li tatxtenq’a chixk’amb’al laa wiiq?
Naru tinkanab’ wib’ chiru li Qaawa’.
Us ta ak ke’xjal xk’a’uxl chirix lix maakeb’, laj Alma ut lix tenamit toj ke’ok chi preexil. Li k’a’ru ke’xk’ul naxk’ut naq us ta xqakanab’ qib’ chiru li Qaawa’ ut xqapaab’eb’ li qasumwank, toj te’wanq li ch’a’ajkilal, a’b’anan xb’aanunkil a’an nokoxtenq’a chi numtaak sa’ xb’eeneb’. Naq nakawil ru Mosiah 23:21–24 ut 24:8–17, k’e reetaleb’ li aatin ut ch’ol aatin li naru tate’xtenq’a chixtzolb’al xkanab’ankil aawib’ chiru li Dios, maak’a’ naxye li wankat wi’ sa’ laa yu’am.
Chi’ilmanq ajwi’ Thomas S. Monson, “No te dejaré, ni te desampararé,” Liahona, noviembre 2013, 85–87.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Mosiah 18:1–4
Yeeb’il naq naru rajlankileb’ li iyaj sa’ jun li mansaan, a’b’an ink’a’ naru rajlankileb’ li mansaan li te’uchinq rik’in jun iyaj. Jun ajwi’ li kristiaan li kik’uluk re lix ch’olob’ahom laj Abinadi, a’ut li junaj chi kristiaan a’an—laj Alma—kixjal xyu’ameb’ k’iila tasal tenamit reheb’ laj Nefita. Maare naru taawoksi jun ru che’ wankeb’ wi’ li iyaj re xk’utb’al li na’leb’ a’in. Chan ru naq nak’anjelak choq’ re laa junkab’al li na’leb’ a’in? K’a’ru naru taqab’aanu re xwotzb’al lix nawom qach’ool li jun rik’in li jun chik?
Mosiah 18:8–10
K’a’ru naru tintzol chirix li sumwank re li kub’iha sa’eb’ li raqal a’in? (chi’ilmanq ajwi’ Tzol’leb’ ut Sumwank 20:73, 77–79). K’a’ru yooko chixb’aanunkil re xkawresinkil qib’ re xk’ulb’al malaj re xpaab’ankil li qasumwank re li kub’iha’?
Mosiah 18:30
K’a’ruheb’ li na’ajej ninqeb’ xloq’al choq’ qe xb’aan li musiq’ejil hoonal xqanumsi aran?
Mosiah 21:11–16; 24:10–15
K’a’ru naqatzol naq naqajuntaq’eeta li preexil ke’wan wi’ lix tenamit laj Alma rik’in li preexil ke’wan wi’ lix tenamit li rey aj Limhi?
Mosiah 21:15; 24:11–15
K’a’ru neke’xk’ut li raqal a’in chirix chan ru naq li Qaawa’ naxsumeheb’ li tij?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Taw jun hoonal li nak’anjelak choq’ aawe laa’at. Wan naq us wi’chik tzolok naq nakatru chixtzolb’aleb’ li loq’laj hu naq maa’ani taa’aatinanq aawe. K’oxla jun hoonal li taak’anjelaq aawe, ut k’e aach’ool chi tzolok sa’ li hoonal a’an wulaj wulaj.
Li ha’ Mormon, xb’aan laj Jorge Cocco