“27 abril–3 mayo. Mosiah 7–10: “Rik’in lix metz’ew li Qaawa’,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“27 abril–3 mayo. Mosiah 7–10,” Kim, Taaqehin—Choq’ reheb’ li komon ut li junkab’al: 2020
Li xMinerva K. Teichert (1888-1976), Laj Ammon chiru li rey aj Lamoni, 1949-1951, óleo en masonite, 35 15/16 x 48 pulgadas. Museo de Arte, Universidad de Brigham Young, 1969.
27 abril–3 mayo
Mosiah 7–10
“Rik’in lix metz’ew li Qaawa’ ”
Naq yookat chi tzolok, li Musiq’ej naru tatxmusiq’a chixk’eeb’al reetal junaq ch’ol aatin malaj raqal. Tz’iib’a li nakaweek’a chirix chan ru naq naru chatenq’ankil li raqal a’an.
Xtz‘iib‘ankil li nakak‘oxla
Naq eb’ lix tenamit li rey aj Mosiah wankeb’ “rajlal sa’ tuqtuukilal” sa’ li ch’och’ Tzarahemla (Mosiah 7:1), ke’ok chi k’oxlak chirix jun ch’uut chik reheb’ laj Nefita, li k’iila chihab’ chaq xkoheb’ re te’wanq sa’ li ch’och’ Lehi-Nefi. Ak numenaq junjunq tasal tenamit, ut maak’a’ ke’rab’i chaq lix tenamit laj Mosiah chirixeb’. Jo’kan naq laj Mosiah kixpatz’ re laj Ammon naq tixjolomi jun ch’uut chi winq re xsik’b’aleb’ laj Nefita li elenaqeb’ chaq junxil. Eb’ li winq a’an ke’xtaw naq eb’ laj Nefita, “sa’ xk’ab’a’ li maa’usilal” (Mosiah 7:24), ke’wan chi preexil chiruheb’ laj Lamanita. A’b’an, rik’in lix k’ulunik laj Ammon ut eb’ lix komon, ke’ok chixyo’oninkil naq te’ach’ab’aaq.
Wan naq laa’o chanchano eb’ laj preex aj Nefita a’in, yooko chixk’ulb’al rahilal xb’aan li qamaak, ut yooko chixk’oxlankil chan ta wi’ ru taqataw wi’chik li tuqtuukilal. Wan naq jo’ laj Ammon, nokomusiq’aak chixye’b’al li quq’ reheb’ li qas qiitz’in ut timil timil naqataw naq xb’aan li qab’aanuhom neke’ru “chixtaqsinkil lix jolomeb’, ut chi saho’k sa’ xch’ooleb’, ut chixkanab’ankileb’ rib’ chiru li Dios” (chi’ilmanq Mosiah 7:19). Maak’a’ naxye li wanko wi’, chiqajunilo tento taqajal qak’a’uxl ut “toosutq’iiq rik’in li Qaawa’ chi anchal li rajom qach’ool,” rik’in paab’aal naq “tooxkol” (chi’ilmanq Mosiah 7:33).
Li na’leb’ re xtzolb’aleb’ li loq’laj hu aajunes
Wi tinsutq’iiq rik’in li Qaawa’, tinkanab’ wib’ chiru, ut tink’anjelaq chiru, a’an tinixkol.
Rik’in xk’ulunik laj Ammon, jun aj Nefita aj Tzarahemla, kiloche’ xyo’onihom li rey aj Limhi, ut a’an kiraj xk’eeb’al li yo’onihom a’an reheb’ lix tenamit. Naq nakawil ru Mosiah 7:14–33, k’e reetal li kixye li rey aj Limhi reheb’ lix tenamit re xwaklesinkleb’ xch’ool, re xkawob’resinkileb’ xpaab’aal, ut re xk’eeb’aleb’ xyo’onihom naq li Dios tixtenq’aheb’. Us ta moko juntaq’eeteb’ ta laa maak rik’ineb’ lix maak lix tenamit li rey aj Limhi, chan ru naq li raatin a’an naru tatxtenq’a chi sutq’iik rik’in li Qaawa’? Taak’e reetal naq laj Limhi kixjultika reheb’ lix tenamit resileb’ li hoonal naq li Dios kixkoleb’ lix tenamit (che’ilmanq li raqal 18–20). Chan ru naq eb’ li esil a’an, jo’eb’ ajwi’ xkomoneb’ chik li esil sa’eb’ li loq’laj hu malaj sa’ laa yu’am, neke’tenq’ank aawe chixkanab’ankil aawib’ chiru li Dios?
K’a’ruheb’ li kaahib’ xka’k’aal perel chi ch’iich’ li ke’tawe’ xb’aan lix tenami laj Limhi?
Naq junjunqeb’ re lix tenamit li rey aj Limhi yookeb’ chixyalb’aleb’ xq’e chixtawb’al li ch’och’ Tzarahemla, ke’xtaweb’ li kaahib’ xka’k’aal perel chi ch’iich’ oor tz’iib’anb’ileb’ rik’in jun aatinob’aal moko nawb’il ta ru xb’aaneb’. Eb’ li perel ch’iich’ a’an, li moqon ke’jaltesiik ru xb’aan li rey aj Mosiah, ke’xye resil jun tenamit, nawb’ileb’ ru jo’ laj Jaredita, li ke’el chaq sa’ li najt xtermail kab’l re Babel ut ke’k’ulun sa’ li yeechi’inb’il ch’och’ ut moqon ke’sachman (chi’ilmanq Mosiah 28:11–19). Moqon, laj Moroni kixk’os ruheb’ li perel ch’iich’ a’an (chi’ilmanq Eter 1:1–2) li ki’ok choq’ lix hu laj Eter. Sa’ Mosiah 28:18, k’e reetal k’a’ru ke’reek’a lix tenamit laj Mosiah xb’aan li esil a’in.
Li Qaawa’ naxk’eheb’ li profeet, laj ilol na’leb’, ut laj k’utb’esinel choq’ re xchaab’ilaleb’ li winq.
Naq laj Limhi kirab’i lix nawom xch’ool laj Ammon chirix naq li Qaawa’ kixwaklesi jun aj ilol na’leb’, laj Limhi “kisaho’ xch’ool chi numtajenaq, ut kixb’antioxin chiru li Dios” (Mosiah 8:19). K’a’ut kireek’a chi jo’kan naq nakak’oxla? K’a’ru nakatzol chirixeb’ laj ilol na’leb’ sa’ li raatin laj Ammon sa’ Mosiah 8:13–19? Sa’ li qakutan laa’o, “li Xb’eenil Awa’b’ejil ut lix Ch’utameb’ li Kab’laju neke’xaqab’aak xwankil jo’ profeet, aj ilol na’leb’, ut aj k’utb’esinel” (K’utul Raqal reheb’ li Loq’laj Hu, “Aj ilol na’leb’ ”). Ma nanaq sa’ aach’ool jo’q’e xatk’oxlak chirix li osob’tesink naq wankeb’ li profeet, laj ilol na’leb’, ut aj k’utb’esinel sa’ li ruchich’och’? Maare naru taatz’iib’a chan ru naq eb’ li profeet, laj ilol na’leb’, ut aj k’utb’esinel wanjenaqeb’ choq’ “nimla chaab’ilal” sa’ laa yu’am (Mosiah 8:18).
Li Profeet aj Jose Smith a’an li nimla aj ilol na’leb’ li xaxqo sa’ xjolomil li jun k’ojlajik a’in (chi’ilmanq Tzol’leb’ ut Sumwank 21:1124:125Jose Smith—Resilal 1:62). Chan ru naq a’an kixyu’ami li kixye laj Ammon chirix jun aj ilol na’leb’ sa’ lix k’anjel?
Naru teb’ink’ul inch’a’ajkilal “rik’in lix metz’ew li Qaawa’.”
Laj Tzeniff kixnaw naq wan li ink’a’ us xb’aanu. A’an numtajenaq ratawom chi jo’q’ehaq, ut kixk’eheb’ lix tenamit—a’aneb’ lix xe’ xtooneb’ lix tenamit li rey aj Limhi—sa’ jun ch’a’ajkilal naq ki’ok sa’ aatin rik’in li rey aj Laman. A’b’an moqon, naq xko’o chi pleetik rik’ineb’ laj Lamanita, a’an kixtenq’a lix tenamit chixk’ulb’aleb’ lix ch’a’ajkilal rik’in paab’aal. Naq nakawil ru Mosiah 9–10, sik’ li ke’xb’aanu lix tenamit laj Tzeniff re xk’utb’al xpaab’aaleb’. Chan ru naq li Dios kixkawob’resiheb’? K’a’ru naraj naxye choq’ aawe li xik “rik’in lix metz’ew li Qaawa’ ”? (Mosiah 9:17; 10:10–11).
Li k’a’ru ninsik’ ru xb’aanunkil, naru taakanaaq chiru k’iila tasal tenamit.
Jo’ yeeb’il sa’ Mosiah 10:11–17, chan ru naq lix b’aanuhomeb’ ut lix k’oxlahomeb’ lix xe’ xtooneb’ laj Lamanita ke’ramok reheb’ laj Lamanita chixnawb’al ru li yaal? Chan ru naq li ke’xsik’ ru xb’aanunkil lix xe’ xtooneb’ laj Lamanita kiwan xwankil sa’ xyu’ameb’ li tasal tenamit li chalel? K’oxlan chirixeb’ li kristiaan li maare te’tenq’aaq xb’aan li k’a’ru nakapaab’ ut li k’a’ru nakasik’ ru laa’at; k’a’ru yookat chixkb’aanunkil re xtenq’ankileb’ chixnimob’resinkil lix paab’aaleb’ chirix li Kristo?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Mosiah 7:19–20
K’e reetaleb’ li na’leb’ kixye laj Limhi re xwaklesinkileb’ xch’ool lix tenamit re te’wanq xpaab’aaleb’. B’ar wankeb’ li esil sa’eb’ li loq’laj hu li nokohe’xmusiq’a chixkanab’ankil qib’ chiru li Dios? K’a’ru naraj naxye xkanab’ankil qib’ chiru li Dios? (chi’ilmanq ajwi’ Mosiah 9:17; 10:19). K’a’ruheb’ li seraq’ sa’ li qayu’am malaj xyu’ameb’ li qaxe’ qatoon li naru naqawotz re taawanq qach’ool chixkanab’ankil qib’ chiru li Dios?
Mosiah 7:26–27
K’a’ru naqatzol chirix li Kolonel sa’eb’ li raqal a’in? (chi’ilmanq ajwi’ Tzol’leb’ ut Sumwank 130:22). K’a’ut naq nokob’antioxink xb’aan xnawb’aleb’ li k’a’aq re ru a’an?
Mosiah 8:13–18
Re xtenq’ankileb’ li komon sa’ laa junkab’al chixtawb’al ru k’a’ru jun aj ilol na’leb’, maare naru taak’ut chiruheb’ xjalam-uucheb’ li k’anjeleb’aal li nokoxtenq’a chirilb’al li ink’a’ naru rilb’al chi maak’a’eb’, jo’eb’ li binoculares, jun li telescopio, malaj jun li microscopio. Chan ru naq eb’ li k’anjeleb’aal a’in chanchaneb’ jun aj ilol na’leb’? (chi’ilmanq Moises 6:35–36). K’a’ru naru naril jun aj ilol na’leb’ li ink’a’ naqil laa’o? K’a’ru li eetalil wan choq’ qe li naxk’ut xyaalalil naq laj Jose Smith kiwan jo’ aj ilol na’leb’?
Naru taak’uteb’ xjalam-uucheb’ li qayo’yookil profeet, aj ilol na’leb’, ut aj k’utb’esinel ut taapatz’ re laa junkab’al k’a’ru neke’xnaw chirixeb’. Chan ru naq yooko chixtaaqenkileb’?
Mosiah 9:14–18; 10:1–10
Naq ke’chal chaq laj Lamanita re pleetik, ak kawresinb’ileb’ lix tenamit laj Tzeniff sa’ tz’ejwalej jo’ ajwi’ sa’ musiq’ej. K’a’ru naru taqatzol rik’in laj Tzeniff ut lix tenamit chirix li kawresink-ib’ choq’ reheb’ li ch’a’ajkilal?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Sik’ aamusiq’ejil na’leb’. Li tusleb’ aatin a’in naxye k’a’ruheb’ li raqal ut na’leb’ li taajayali wi’ aawib’, a’b’an maakanab’ naq a’an taaramoq re li k’a’ru taatzol. Maare te’wulaq chawu jalaneb’ chik li raqal malaj taataw li na’leb’ li moko yeeb’ileb’ ta resil arin. Kanab’ naq li Musiq’ej taab’eresinq aawe.
Xk’utb’esinb’il matk’ laj Jose Smith, xb’aan laj Clark Kelley Price