Junelik taakanaaq eerik’in li risinkil lee maak

Xb’aan li Elder David A. Bednar

Re lix Molameb’ li Kab’laju chi Apostol

Rik’in li wankilal aj santob’resinel re li Santil Musiq’ej jo’ qochb’een rajlal, naru naq junelik taakanaaq qik’in li risinkil qamaak.

Jun xchamal ru aatin li kixye li rey aj Benjamin sa’ lix k’utum chirix li Kolonel ut lix Tojb’al rix li Maak junelik nanaq wi’chik sa’ li tzolok ut li k’oxlak ninb’aanu chalen k’iila chihab’ chaq.

Sa’ li aatin kixye re xchaq’rab’inkil li tenamit li kik’anjela chiru ut li kixra, li rey aj Benjamin kixch’olob’ naq aajel ru xnawb’al lix loq’alil li Dios ut xyalb’al lix rahom, xk’ulb’al risinkil li maak, xk’oxlankil junelik lix nimal ru li Dios, ut li tijok wulaj wulaj ut xxaqab’ankil qib’ chi kaw sa’ li paab’aal.¹ Kixye ajwi’ naq rik’in xb’aanunkil a’in, “junelik taasaho’q eech’ool, ut texnujaq rik’in lix rahom li Dios, ut junelik taakanaaq eerik’in li risinkil lee maak.”²

Li waatin laa’in anajwan na’aatinak chirix xk’uulankil junelik li risinkil li qamaak. Li yaal yeeb’il sa’ li aatin a’in naru xkawob’resinkil qapaab’aal chirix li Jesukristo ut li qawanjik jo’ tzolom. Nintz’aama naq li Santil Musiq’ej toxmusiq’a ut toxwaklesi naq sa’ komonil naqatz’il rix li k’a’ru yaal ut aajel ru sa’ musiq’ej.

Yo’lak wi’chik sa’ musiq’ejil

Sa’ li yu’am a’in nokoyo’la ut naru tooyo’laq wi’chik sa’ musiq’ejil.³ Tijb’ilo xb’aaneb’ li profeet ut li apostol naq taa’ajq qu choq’ re li Dios,⁴ naq “[tooyo’laq] wi’chik,”⁵ ut naq ak’ yo’ob’tesinb’ilaqo rik’in li Kristo⁶ rik’in xk’ulb’al sa’ qayu’am li osob’tesink li naru nachal rik’in lix Tojb’al rix li Maak kixb’aanu li Jesukristo. Lix “k’ulub’ejil, li ruxtaan, ut li rusilal li Santil Mesias”⁷ naru toxtenq’a chixq’axb’al ru lix raab’al qib’ qajunes jo’ naraj li ruchich’och’il winq, re naq jwal aj k’ehonelaqo ut aj paab’anelaqo. Tijb’ilo chixb’eresinkil qayu’am re “[tooxaqliiq] chi maak’a’ [qatz’ajnil] [chiru li Qaawa’] sa’ roso’jik li kutan.”⁸

Li Santil Musiq’ej ut li k’ojob’anb’il k’anjel re li tijonelil

Li Profeet aj Jose Smith kixye sa’ k’osb’il ru aatin naq aajel ru xk’anjel li k’ojob’anb’il k’anjel sa’ lix evangelio li Kristo: “Li yo’lak wi’chik nachal xb’aan lix Musiq’ li Dios rik’ineb’ li k’ojob’anb’il k’anjel.”⁹ Li aatin a’in naxye naq aajel ru li Santil Musiq’ej rochb’eeneb’ li k’ojob’anb’il k’anjel choq’ re li yo’lak wi’chik sa’ musiq’ejil.

Li Santil Musiq’ej, a’an roxil li komon sa’ roxichal li Dios. A’an jun xaqalil re musiq’ej ut naxch’olob’ chixjunil li k’a’ru yaal. Sa’ loq’laj hu nayeeman resil jo’ laj K’ojob’anel Ch’oolej,¹⁰ laj k’utunel,¹¹ ut laj k’utb’esinel.¹² A’an ajwi’ jun aj santob’resinel¹³ li naxch’aj ut naxk’at li k’a’ru tz’aj ut ink’a’ us sa’ li aamej jo’ chanru rik’in xam.

Aajeleb’ ru li k’ojob’anb’il k’anjel sa’ lix evangelio li Kolonel ut sa’ li b’e li nawulak rik’in li Kristo ut sa’ xsik’b’al li yo’lak wi’chik sa’ musiq’ejil. A’aneb’ loq’laj eek’asink-ib’ li wan xmusiq’ejil k’anjel, xjunelikil xyaalal, ut li neke’xk’am rib’ rik’in xchaq’rab’ li Dios.¹⁴ Chixjunileb’ li k’ojob’anb’il k’anjel re qakolb’al ut re li loq’laj wa’ak tento te’k’eemanq xb’aan li ani naxk’am xlawil li tijonelil.

Eb’ li k’anjel re li kolb’a-ib ut li taqenaqil loq’al li k’anjelanb’ileb’ sa’ lix Iglees li Qaawa’ k’ojob’anb’il wi’chik neke’xq’ax li k’a’ru yal b’aanunb’il jo’ eetalil. A’aneb’ b’an li numleb’ k’eeb’ileb’ xwankil sa’ wi’ naru te’ok li osob’tesink re choxa sa’ qayu’am chiqajunjunqal.

“Ut li xnimal ru tijonelil a’in naxk’anjela li evangelio ut naxk’am xlawil li muqmuukil na’leb’ re li awa’b’ejihom, a’an ajwi’ xlawil li nawom re li Dios.

“Jo’kan naq sa’ li k’ojob’anb’il k’anjel re a’an, nak’utman li wankilal re choxahilal.

“Ut naq maak’a’ li k’ojob’anb’il k’anjel re a’an, ut li wankilal k’eeb’il sa’ li tijonelil, ink’a’ nak’utman li wankilal re choxahilal chiruheb’ li winq sa’ li tz’ejwalej.”¹⁵

Li k’ojob’anb’il k’anjel k’ulb’ileb’ ut paab’anb’ileb’ qab’aan, aajeleb’ ru re xtawb’al li wankilal re choxahilal ut chixjunil li osob’tesink sa’ lix Tojb’al rix li Maak kixb’aanu li Kolonel.

Xk’ulb’al ut xk’uulankil jun risinkil li maak rik’ineb’ li k’ojob’anb’il k’anjel

Re xtawb’al ru chi us chanru naru xk’ulb’al ut xk’uulankil junelik jun risinkil li qamaak, tento naq xb’eenil taqanaw naq chapchookeb’ rib’ chi junajwa oxib’eb’ li k’ojob’anb’il k’anjel li neke’xte chiqu lix wankilal li choxa: li kub’iha’ chi sub’b’il, lix k’eeb’aleb’ li uq’ej choq’ re li maatan re li Santil Musiq’ej, ut li loq’laj wa’ak.

Li kub’iha’ chi sub’b’il choq’ re risinkil li maak, a’an “li k’ojob’anb’il k’anjel sa’ xtiklajik li evengelio”¹⁶ re li Jesukristo ut tento rub’elanb’ilaq xb’aan xpaab’ankil li Kolonel ut xb’aan li jalb’a-k’a’xulej. Li k’anjel a’in “a’an jun eetalil ut jun taqlahom li xaqab’anb’il xb’aan li Dios re naq li ralal xk’ajel te’ok sa’ lix awa’b’ejihom.”¹⁷ Nab’aanuman li kub’iha’ sa’ xwankil li Tijonelil re Aaron. Sa’ li b’e li naxik rik’in li Kolonel ut li yo’lak wi’chik sa’ musiq’ejil, li kub’iha’ naxk’e jun li aajel ruxb’een xch’ajb’al li qaam chirix li maak.

Sa’ li sumwank re li kub’iha’ wankeb’ oxib’ li teneb’ank: (1) taawanq qach’ool chixk’ulb’al sa’ qab’een lix k’ab’a’ li Jesukristo, (2) junelik taqajultika li Kristo, ut (3) taqapaabeb’ lix taqlahom. Li osob’tesink yeechi’inb’il sa’ li sumwank a’in, a’an naq “taawanq junelik lix Musiq’ [qik’in].”¹⁸ Chi jo’kan, li kub’iha’ a’an jun kawresink-ib’ aajel ru re taaruuq taak’eemanq qaleseens chixk’ulb’al qochb’eeninkil rajlal xb’aan rox li komon sa’ roxichal li Dios.

“Li kub’iha’ rik’in ha’ … tento ochb’eninb’ilaq xb’aan li kub’iha’re li Musiq’ej re naq tz’aqalaq xk’anjel.”¹⁹ Jo’ kixye li Kolonel re laj Nicodemo, “Ani ink’a’ taayo’laq rik’in ha’ ut Musiq’ej moko truuq ta taa’ok sa’ lix nimajwal awab’ejihom li Dios.”²⁰

Oxib’eb’ lix yehom laj Jose Smith neke’xye naq aajel ru naq te’rochb’eeni rib’ li k’ojob’anb’il k’anjel re kub’iha’ chi sub’b’il choq’ re risinkil li maak, ut xk’eeb’aleb’ li uq’ej re xk’eeb’al li maatan re li Santil Musiq’ej.

Xb’een li yehom: “Li kub’iha’ a’an jun loq’laj k’ojob’anb’il k’anjel aj kawresinel re xk’ulb’al li Santil Musiq’ej; a’an li numleb’ ut li laaw li taak’anjelamanq wi’ li Santil Musiq’ej.”²¹

Xkab’ li yehom: “Taaruuq raj ajwi’ taakub’si xha’ jun li b’oolx nujenaq chi samahi’, wi ta ink’a’ nab’aanuman choq’ re risinkil li maak ut xk’ulb’al li Santil Musiq’ej. Li kub’iha’ rik’in ha’ a’an yal xyijach li kub’iha’, ut maak’a’ na’ok wi’ chi maak’a’ jun li xyijach chik—a’an li kub’iha’ re li Santil Musiq’ej.”²²

Rox li yehom: “Li kub’iha’ rik’in ha’, chi maak’a’ li kub’iha’ re xam ut li Santil Musiq’ej rochb’een, maak’a’ xk’anjel. Aajel ru xlaq’b’aleb’ ut ink’a’ naru xjachb’al.”²³

Lix junajileb’ li na’leb’ re li jalb’a-k’a’uxlej, li k’ojob’anb’il k’anjel re kub’iha’ ut xk’ulb’al li maatan re li Santil Musiq’ej, ut li nimajwal osob’tesink re risinkil li maak nayeeman resil k’iila sut sa’eb’ li loq’laj hu.

Laj Nefi kixye, “Xb’aan naq li okeb’aal li tento tex’ok wi’ a’an li jalb’a-k’a’uxlej ut li kub’iha’ rik’in ha’; ut chirix a’an nachal li risinkil lee maak xb’aan xam ut xb’aan li Santil Musiq’ej.”²⁴

Li Kolonel ajwi’ kixye, “Anajwan a’in li taqlahom: Chejal eek’a’uxl, chejunilex xmaril li ruchich’och’, ut chalqex wik’in ut chikub’eeq eeha’ sa’ lin k’ab’a’, re naq texruuq chi santob’resiik rik’in xk’ulb’al li Santil Musiq’ej, re naq texxaqliiq chi maak’a’ eetz’ajnil chiwu sa’ roso’jik li kutan.”²⁵

Li xk’eeb’aleb’ li uq’ej choq’ re li maatan re li Santil Musiq’ej, a’an jun li k’ojob’anb’il k’anjel li nak’anjelaman sa’ xwankil li Tijonelil re Melkisedek. Sa’ li wulak rik’in li Kolonel ut li yo’lak wi’chik sa’ musiq’ejil, xk’ulb’al li wankilal aj santob’resinel re li Santil Musiq’ej naxk’e naq taaruuq xch’ajb’al rajlal li qaam chirix li maak. Aajel ru li osob’tesink a’in re sahil ch’oolejil xb’aan naq “maak’a’ k’a’ru tz’aj naru nawan rik’in li Dios.”²⁶

Jo’ komon sa’ lix Iglees li Qaawa’, osob’tesinb’ilo xb’aan li xb’een qach’ajb’al chirix li maak li wan rik’in li kub’iha’, jo’ ajwi’ xb’aan naq naru taawanq qach’ajb’al rajlal chirix li maak rik’in lix wanjik ut lix wankilal li Santil Musiq’ej qik’in—a’an ajwi’ rox li komon sa’ roxichal li Dios.

K’oxlahomaq chanru naq laj awinel naroyb’eni naq junelik taawanq li awk rochb’en li q’olok. Rik’in naq naxk’e reetal xwanjik li awk rochb’een li q’olok, junelik naxnaw k’a’ru aj-e xk’anjel, ut lix b’aanuhom naxk’ul xb’eresinkil sa’ chixjunil xq’ehil li chihab’. Chi jo’kan ajwi’, lix wanjikeb’ li k’ojob’anb’il k’anjel re kub’iha’ chi sub’b’il choq’ re risinkil li maak ut lix k’eeb’aleb’ li uq’ej re li mataan re li Santil Musiq’ej tento raj te’xk’e xb’eresinkil chixjunil li naqab’aanu jo’ tzolom sa’ chixjunileb’ li xq’ehil li qayu’am.

Li loq’laj wa’ak, a’an rox li k’ojob’anb’il k’anjel li na’ajman re xk’ulb’al lix wankilal li choxahilal. Re naq q’axal wi’chik tooruuq chixk’uulankil qib’ chi maak’a’ qatz’ajnil xb’aan li ruchich’och’, taqlanb’ilo naq toowulaq sa’ rochochil li tijok ut taqaq’axtesi li qaloq’laj k’anjel chiru li santil kutan re li Qaawa’.²⁷ Chek’e reetal naq eb’ li eetalil re lix tib’el ut lix kik’el li Qaawa’, a’an li wa ut li ha’, neke’xk’ul rosob’tesinkil jo’ ajwi’ xsantob’resinkil. “At Dios, li Junelik Yuwa’b’ej, naqatz’aama chawu sa’ lix k’ab’a’ laa Walal, li Jesukristo, naq chawosob’tesi ut chasantob’resi li kaxlan wa a’in choq’ re li raameb’ chixjunil li te’k’uluq [malaj te’uk’aq] re.”²⁸ Li santob’resink naraj naxye xk’eeb’al xsaqalil ru malaj xsantilal. Li eetalil re li loq’laj wa’ak neke’santob’resiik re xjultikankil naq saq ru li Kristo, naq tenq’anb’ilo junes xb’aan lix tojb’al rix li maak, ut naq teneb’anb’ilo chiroxloq’inkil li qak’ojob’anb’il k’anjel ut sumwank toj reetal naq naru “[tooxaqliiq] chi maak’a’ [qatz’ajnil] [chiru li Qaawa’] sa’ roso’jik li kutan.”²⁹

Li k’ojob’anb’il k’anjel re li loq’laj wa’ak, a’an jun qab’oqb’al k’iilasutinb’il naq taqajal qak’a’uxl ut too’ak’ob’resiiq sa’ musiq’ej. Li xketb’al li loq’laj wa’ak, yal xjunes, ink’a’ narisi li maak. A’b’anan naq naqakawresi qib’ chi tz’aqonk sa’ li loq’laj k’ojob’anb’il k’anjel a’in chi yotb’il qach’ool ut chi tuulan qamusiq’, aran wan li yeechi’ihom naq junelik taawanq lix Musiq’ li Qaawa’ qik’in. Ut rik’in li wankilal aj santob’resinel re li Santil Musiq’ej jo’ qochb’een rajlal, naru naq junelik taakanaaq qik’in li risinkil qamaak.

Chi yaal, osob’tesinb’ilo rajlal xamaan naq tooruuq chixtz’ilb’al rix qayu’am sa’ xk’anjel li loq’laj wa’ak, chirak’ob’resinkil li qasumwank, ut chixk’ulb’al li yeechi’ihom a’in.³⁰

Kub’sinb’il qaha’ wi’chik

Wan naq eb’ laj Santil Paab’anel neke’xye naq te’raj raj xk’ulb’al wi’chik li kub’iha’—ut chi jo’kan naq te’wanq xch’ajob’resinkil ut xk’ulub’ejil jo’ kiwan sa’ li kutan naq ke’xk’ul xb’een lix k’ojob’anb’il k’anjel re li kolb’a-ib’. Maare tineekuy wi tinye naq li qaChoxahil Yuwa’ ut li Raarookil Alal ink’a’ neke’raj naq taqeek’a li musiq’ejil ak’ob’resiik, li kawob’resiik, ut li k’ojob’aak yal jun sut sa’ qayu’am. Li osob’tesink re xk’ulb’al ut xk’uulankil junelik li risinkil qamaak rik’in li k’ojob’anb’il k’anjel nokoxtenq’a chixnawb’al naq li kub’iha’ a’an lix tiklajik li qamusiq’ejil yu’am arin; maawa’ jun na’ajej taqaj raj rula’aninkil k’iila sut.

Li k’anjel re kub’iha’ chi sub’b’il, li xk’eeb’aleb’ li uq’ej re li mataan re li Santil Musiq’ej, ut li loq’laj wa’ak ink’a’ neke’ux yal xjuneseb’ chi junjunqal; a’aneb’ b’an junjunq raqal li laq’lookeb’ rib’ sa’ jun li b’e li nataqsin chi ub’ej. Li jun k’anjel chirix li jun chik naxwaklesi ut naxnimob’resi rajb’al qayu’am, rajom qach’ool, ut li qak’anjel. Lix na’leb’ qaYuwa’, lix Tojb’al rix li Maak kixb’aanu li Kolonel, ut eb’ li k’ojob’anb’il k’anjel neke’xk’e li usilal ajb’il qab’aan re tooxik chi ub’ej chi junjunqil li raqal, chi junjunqil li na’leb’, sa’ xjayalil li junelik q’e kutan.

Lin yeechi’ihom ut lix nawom inch’ool

Winqo ut ixqo li wan qamajelal ut naqayal qaq’e chixb’eresinkil qayu’am jo’ chanru lix na’leb’ li qaChoxahil Yuwa’ re li qachaab’ilob’resinkil. Li k’a’ru ajb’il sa’ lix na’leb’ wan xloq’al, wan ruxtaan, ut naraj qametz’ew. Wan naq anchal qach’ool, ut wan ajwi’ naq maak’a’ li qametz’ew. Wan naq maare ink’a’ taqanaw ma tooruuq chixb’aanunkil li taqlahom naq tooxaqliiq chi maak’a’ qatz’ajnil chiru sa’ roso’jik li kutan.

Chi tenq’anb’ilo xb’aan li Qaawa’ ut rik’in lix wankil lix Musiq’ li toxtzol chixjunil,³¹ naru chi yaal naq too’osob’tesiiq chi wulak sa’ xnimal qawankil. Li k’ojob’anb’il k’anjel neke’xk’e xk’anjel ut xwankil qayu’am naq naqayal qaq’e chi yo’lak wi’chik ut chi wank jo’ winq ut ixq re li Kristo.³² Xq’unal qametz’ew naru tixk’ul xkawilal, ut naru te’q’axe’q ru qamejelal.

Us ta maajun qe taaruuq taatz’aqlo’q re ru sa’ li yu’am a’in, naru taatamq qak’ulub’ejil ut xsaqalil qu naq “[ch’ajob’resinb’ilo] xb’aan lix kik’el li Karneer.”³³ Ninch’olob’ xyaalal naq too’osob’tesiiq rik’in xnimob’resinkil qapaab’aal chirix li Kolonel ut xk’ojob’ankil qach’ool naq naqasik’ xk’uulankil junelik li risinkil qamaak, ut, sa’ xraqik, naq tooxaqliiq chiru li Qaawa’ sa’ roso’jik li kutan. Ninch’olob’ a’in sa’ xk’ab’a’ li Jesukristo, amen.