Kanab’anb’il sa’ qab’een li k’a’ru loq’
Li loq’laj maatan a’in re xwankil li tijonelil naxk’am li anchal ch’oolejil teneb’ank jo’ ajwi’ li osob’tesink tz’aqal choq’ qe ut reheb’ jalan.
Ex was wiitz’in, nintz’aama naq li Musiq’ej tixb’eresi li waatin anajwan. Wan jun laq’leb’ li nokoxb’ak’ sa’ junajil. Xookanab’aak chixk’amb’al lix tijonelil li Dios ut chi k’anjelak sa’ xk’ab’a’. Kanab’anb’il sa’ qab’een li k’a’ru loq’. Naab’al li patz’b’il qik’in.
Naxye sa’ li Tzol’leb’ ut Sumwank, tasal 121, raqal 36, “Li xk’ulub’il li tijonelil chi junajwa wan chi b’ak’b’il rik’in lix wankilal li choxa.” Jwal chaqal ru li maatan k’eeb’il qe. Qe laa’o li teneb’ank re rilb’al ut xk’uulankil li tijonelil a’an ut kanaak jo’ k’ulub’ej chixk’ulb’al chixjunil li nimajwal osob’tesink li kawresinb’il xb’aan qaYuwa’ choq’ qe—ut choq’ reheb’ jalan qab’aan.
Yalaq ta b’ar nakatxik, naxik laa tijonelil aawochb’een. Ma xaqxookat sa’ li na’ajej sant? Naq ok aawe chixk’eeb’al aawib’ ut laa tijonelil sa’ junaq na’ajej malaj jun li k’anjel li xiwajel malaj moko k’ulub’ej ta choq’ aawe malaj choq’ re li tijonelil, xaqab’ aawib’ ut tz’il rix li taak’ulmanq. Chijultiko’q aawe anihat ut chanru naraj li Dios naq toj tatwanq. Laa’at jun alalb’ej re li yeechi’ink. Laa’at jun winq re wankilal. Laa’at jun ralal li Dios.
Li loq’laj maatan a’in re xwankil li tijonelil naxk’am li anchal ch’oolejil teneb’ank jo’ ajwi’ li osob’tesink tz’aqal choq’ qe ut reheb’ jalan. Choowanq taxaq, yalaq ta b’ar nokotaliman, chi k’ulub’ejo re xb’oqb’al chaq lix wankilal, xb’aan naq ink’a’ naqanaw jo’q’e taa’ajmanq naq taqab’aanu.
Sa’ li Guerra Mundial II, jun li wamiiw yoo chi k’anjelak sa’ li Pacifico Sur naq lix avion kipub’aak sa’ xb’een li palaw. A’an ut li rochb’een ke’piskok chaq rik’in paracaídas sa’ xxamlel li avion, ke’xkawresi xjukub’, ut ke’xchap rib’ sa’ li jukub’ a’an chiru oxib’ kutan.
Sa’ rox kutan ke’ril jun li nimla jukub’ li ke’xnaw ru jo’ jun koleb’aal jukub’. Kixkanab’eb’. Wulajaq chik kixkanab’eb’ wi’chik. Ke’ok chi raho’k xch’ool xb’aan naq ke’xnaw naq ink’a’ chik taachalq li jukub’ sa’ li na’ajej a’an.
Toja’ naq li Santil Musiq’ej kixye re wamiiw: “Wan li tijonelil aawik’in. K’e xtaqlankileb’ naq te’xokoq eere.”
Kixb’aanu jo’ yeeb’il re: “Sa’ lix k’ab’a’ li Jesukristo ut xb’aan xwankil li tijonelil, q’ajsihomaq chaq eerib’ ut xoko chaq.”
Sa’ yal wiib’ oxib’ k’asal, li jukub’ wan chixk’atqeb’ chixxokb’aleb’. Jun laj k’amol re li tijonelil aj paab’anel ut aj k’ulub’ej, sa’ xch’a’ajkilal, kixk’anjela li tijonelil, ut kirosob’tesi lix yu’am ut xyu’ameb’ jalan.
Chiqaye chi junajwa, arin ut anajwan, naq kawresinb’ilaqo junelik choq’ re xhoonalil li tz’aamank, li tenq’ank, ut li osob’tesink.
Naq naqachoy anajwan li jolomil ch’utam a’in re tijonelil, ninye eere naq laa’ex “jun tasal tenamit sik’b’il eeru, jun reyil tijonelil” (1 Pedro 2:9). K’ulub’ejaqo taxaq rajlal re li choxahil yehom a’in chiqix, nintz’aama chi anchal inch’ool sa’ xk’ab’a’ li Jesukristo, laj Kolol qe, amen.