Li loq’laj na’ajej re li k’ojob’ank wi’chik

Xb’aan li Elder Jairo Mazzagardi

Re li Setenta

Palmyra a’an li na’ajej re li k’ojob’ank wi’chik, b’ar wi’ taa’ab’imanq li xyaab’ xkux li Yuwa’b’ej chirix xnumik wiib’ mil chihab’.

Jun lin chaab’il amiiw, jun komon sa’ li Iglees, kixyal xq’e chiru naab’al chihab’ chixk’utb’al chiwu li evangelio chirix li junkab’al maak’a’ roso’jik. Laa’in ink’a’ kintaw ru li tzol’leb’ chirix li junkab’al maak’a roso’jik ut ink’a’ ki’ok sa’ inch’ool toj reetal naq kinwulak sa’ jun k’anjel b’ar wi’ k’utb’il li Santil Ochoch re Sao Paulo sa’ li po Octubre re 1978 ut naq tz’aqal kin’ok sa’ li na’ajej re tz’ape’k sa’ junajil, ut chiru k’iila kutan kintijok re xnawb’al ma tz’aqal yaal li Iglees a’in.

Laa’in moko wan ta lin paab’aal, a’b’an kink’iresiik chaq xb’aan chaab’il na’b’ej yuwa’b’ej li neke’ril li chaab’ilal sa’ jalan chik paab’aaleb’. Sa’ li kutan a’an re lin yu’am, kink’oxla naq chixjunileb’ li paab’aal k’ulub’anb’ileb’ xb’aan li Dios.

Chirix naq kin’ula’aniin re k’anjel re xk’utb’al li santil ochoch, kinsik’ jun sumehom rik’in li tijok, rik’in paab’aal ut tz’aqal xkawil inch’ool naq li Dios tinixsume chaq, b’arwan lix Iglees tz’aqal yaal sa’ li ruchich’och’.

Chirix jun nimla musiq’ejil yalok, kink’ul jun li sumehom saqen ru. B’oqb’ilin chaq chi kub’eeq inha’. Kinkub’e inha’ sa’ li 31 xb’e li po Octubre re 1978, sa’ li q’ojyin rub’elaj naq taak’ojob’aaq li Santil Ochoch re Sao Paulo.

Kink’e reetal naq li Qaawa’ naxnaw anihin ut naq nim xk’a’uxl chiwix naq kixsume intij.

Sa’ eq’la jun li wixaqil ut laa’in koowulak chaq Sao Paulo re naq toowanq sa’ jun ch’utam re xk’ojob’ankil li santil ochoch.

Wanko chaq aran, a’b’an relik chi yaal maji’ kinnaw chanru b’antioxink chirix li sachol ch’oolej hoonal a’an. Sa’ li kutan jun chik kootz’aqon sa’ jun ch’utub’aj-ib’ re sutam.

Tikib’anb’il li qab’e sa’ li Iglees, ut kiqataw li chaab’il amiiw li ke’xk’e jun sahil k’ulunik qe chiru xjalajik li qayu’am.

Q’axal chaab’ileb’ li tzoleb’aal choq’ reheb’ li ak’ komon li koowulak wi’ rajlal Domingo. Ke’xnujob’resi li qanawom ut koxk’e chiroyb’eninkil naq sa’ junpaat taanume’q li xamaan re naq sa’ Domigno toruuq chixk’ulb’al xkomon chik li musiq’ejil tzakemq.

Li wixaqil ut laa’in kiqoyb’eni chi anchal qach’ool li ok sa’ li santil ochoch re xtz’apb’al sa’ junajil li qajunkab’al chi junelik; a’an kik’ulman naq kinume’ jun chihab’ rik’in wuqub’ kutan, ut jun sachb’a ch’oolejil li hoonal a’an. Kiwek’a jo’ chiru li artal eb’ li junelik q’e kutan kixjach rib’ li junxilaj ut chirix li tz’ape’k sa’ junajil.

Xb’aan naq kiwan li qochoch chixk’atq li palaw sa’ li releb’aal saq’e re li Estados Unidos chiru junjunqeb’ chihab’, kinnaweb’ b’ayaq ru li tenamit a’an, ut ka’ch’ineb’ lix k’ihaleb’.

Naq nawil sa’ li hu ut nawab’i resil li k’a’ru kik’ulman sa’ xq’ehil li Xb’een K’utb’esink, nayeeman resileb’ li ch’uut chi kristiaan, li sachenaq wi’ inch’ool.

Ki’ok li patz’om sa’ lin k’a’uxl. K’a’ut naq li Iglees kik’ojob’aman wi’chik sa’ li tenamit Estados Unidos ut ink’a’ Brasil malaj Italia, li ch’och’ re lin xe’toonil?

B’ar wankeb’ li ch’uut chi kristiaan li ke’xnumsi li ki’uxman aran rik’in xwaklijik li jar paay chi paab’aal ut li sacho’k ch’oolej xb’aan—chixjunil a’in li yoo chi uxmank sa’ jun na’ajej jwal tuqtu ut ch’anch’o?

Kinpatz’ reheb’ naab’aleb’ li kristiaan a’b’an ink’a’ kintaw xsumehom inpatz’om. Kiwil ruchixjunil li tz’iib’anb’il sa’ portugues ut jo’kan ajwi’ sa’ ingles, a’b’an ink’a’ kintaw li k’a’ru tixch’anab’ li waam. Toj yookin chi sik’ok.

Sa’ li po octubre re 1984, kinwan sa’ jun jolomil ch’utub’aj-ib’ jo’ aj tenq’ aj k’ehol na’leb’ re jun awa’b’ejil re oqech. Naq kiraqe’, xkohin sa’ Palmyra, Nueva York, k’a’jo’ naq nawataw xtawb’al li sumehom.

Naq kinwulak aran, kinyal inq’e chixtawb’al ru: K’a’ut naq li k’ojob’ank wi’chik kik’ulman arin, ut k’a’ut naq kiwan li nimla musiq’ejil choqink? B’ar ke’chal chixjunileb’ li kristiaan yeeb’ileb’ chaq resil? K’a’ut naq aran?

Sa’ li hoonal a’an, li sumehom jwal tz’aqal li kichal wik’in a’an xb’aan naq lix chaq’rab’il li tenamit Estados Unidos naxteneb’ li ach’ab’aak.

Sa’ li eq’la a’an, kin’ula’anin re li nimla kab’l Grandin xk’ab’a’, b’ar wi’ kipuktesiik li xb’een xk’uub’lajik lix Hu laj Mormon. Xkohin sa’ li Loq’laj K’iche’, b’ar wi’ kintijok chi naab’al.

Moko naab’aleb’ ta li kristiaan kintaweb’ sa’eb’ lix b’e li ch’ina tenamit Palmyra. B’ar wankeb’ li ch’uut chi kristiaan yeeb’ileb’ chaq resil xb’aan laj Jose?

Sa’ li ewu a’an kink’e inch’ool chi xik sa’ li rochoch laj Peter Whitmer, ut naq kinwulak aran, kintaw jun li winq chixk’atq jun li rilob’aal ochoch. K’a’jo’ naq nalemtz’un sa’ li ru. Kink’e xsahil xch’ool toja’ ut naq kin’ok chixpatz’bal re li patz’om a’in.

Toja’ naq kixpatz’ we, “Ma wan aahoonal?” Hehe’ chankin re.

Kixch’olob’ we naq eb’ li kok’ palaw Erie ut Ontario ut, b’ayaq chi rub’el, li nima’ Hudson, wankeb’ sa’ li ch’och’ a’an.

Sa’ xb’eenil li chihab’ 1800, ke’xk’e xch’ool chixpikb’al jun lix b’e li ha’ te’nume’q wi’ li jukub’, lix nimal ru numenaq 483 km toj taawulaq sa’ li nima’ Hudson. K’a’jo’ xnimal ru li k’anjel sa’ lix q’ehil kutan a’an, ut ka’ajwi’ rik’in lix metz’ew li winq ut lix wankilal li xul ke’ru chixb’aanunkil.

Li Palmyra kiwan sa’ xyi li na’ajej a’an b’ar wi’ te’k’anjelaq. Eb’ laj k’anjel ke’raj li wankeb’ xna’leb’ chi k’anjelak, eb’ li wankeb’ xseeb’al chi k’anjelak, li junkab’aleb’, ut li ramiiweb’. Naab’aleb’ ke’ok chi wulak chalen chaq li rech tenamit, li najtil tenamit, jo’ li tenamit Irlanda, re k’anjelak sa’ lix b’e li ha’.

Jwal loq’ ut musiq’anb’il li hoonal a’an xb’aan naq anajwan kintaweb’ li ch’uut chi kristiaan. eb’ Ke’xk’am chaq lix na’leb’eb’ ut xpaab’aaleb’. Naq li winq ki’aatinank chirixeb’ lix paab’aleb’, kisaqob’resiik lin k’a’uxl ut li Dios kixte musiq’ejil xnaq wu.

Sa’ li hoonal a’an, kintaw ru chanru li ruq’ li Dios li qaYuwa’, sa’ li xnimal ru xchaab’ilal xna’leb’, kixkawresi sa’ lix k’uub’anb’il na’leb’ jun na’ajej b’ar taak’ame’q chaq li saaj Jose Smith, xk’eeb’al sa’ xyi li sachok ch’oolej chirix li paab’aal, xb’aan naq aran, sa’ li tzuul Kumorah, muqb’ileb’ li perel ch’iich ninqeb’ xtz’aq re lix Hu laj Mormon.

A’an lix na’aj li K’ojob’ank wi’chik, b’ar taa’ab’imanq qi’ lix yaab’ xkux li Yuwa’b’ej chirix xnumik haye’ wiib’ mil chihab’ sa’ jun sachol ch’oolej k’utb’esinb’il matk’, raatinankil li saaj Jose Smith, naq xko’o sa’ li Loq’laj K’iche’ chi tijok ut kirab’i: “A’in li Walal Raaro Inb’aan. Chawab’i a’an!”¹

Aran kirileb’ wiib’ chi winq, li ink’a’ naru chi yeemank chanru xlemtz’unkileb’ ru ut xloq’aleb’. Relik chi yaal, li Dios kixk’ut rib’ wi’chik chiru li winq. Li q’ojyin li naxmuhela chaq li ruchich’och’ ki’ok chi elk.

Eb’ li profeetil aatin chirix li K’ojob’ank wi’chik ke’ok chi tz’aqob’resiik ru. “Ut kiwil jun chik li anjel yoo chi xik’ank sa’ xyi li choxa, wan chaq rik’in jun li chaab’il esilal li maak’a’ roso’jik: a’an tento xpuktesinkil rik’ineb’ li wankeb’ sa’ ruchich’och’ jo’ ajwi’ rik’ineb’ chixjunil amaq’ ut tenamit.”²

Sa’ junjuqeb’ ajwi’ chihab’, laj Jose kik’ame’ sa’ lix na’aj li tz’iib’anb’il esil re profeetil aatin, Sumwank, ut k’ojob’anb’il k’anjel ke’xkanab’ chaq li najter profeet, li qaraarookil lix Hu laj Mormon.

Lix Iglees li Jesukristo moko naru ta xk’ojob’ankil wi’chik chi maak’a’ li evangelio maak’a’ roso’jik k’utb’il sa’ lix Hu laj Mormon jo’ jun chik ch’olob’anb’il esil chirix li Jesukristo, relik chi yaal, li Ralal li Dios, lix Karneer li Dios, li narisi lix maak li ruchich’och’.

Li Kristo kixye reheb’ lix tenamit aran Jerusalen: “

“Wankeb’ ajwi’ jalan chik inkarneer li moko wankeb’ ta sa’ li korral a’in.”³

“Laa’in li chaab’il aj k’aak’alenel, ut neke’b’innaw ru lin karneer, ut eb’ li we neke’xnaw wu.”⁴

Naq kin’el chaq sa’ li rochoch laj Whitmer, ink’a’ najultiko’ we xyeeb’al inwan. Yal najultiko’ we naq moko ramb’il ta xya’al li we chi t’ane’k chaq sa’ li wu. Li saq’e yoo chixmuqb’al rib’ sa’ li chaq’al ru choxa.

Sa’ li waam wan jun nimla sahil ch’oolejil. Nujob’resinb’ilin chaq rik’in b’antioxink.

Anajwan kintaw ru chi saqen k’a’ut. Sa’ jun sut chik, li Qaawa’ kixk’e we li nawom ut saqen.

Chiru lin xikik sa’ wochoch, toj yookeb’ chi k’ulunk sa’ lin k’a’uxl li kok’ esil reheb’ li loq’laj hu; eb’ li yeechi’ihom kiyeeman chaq re li Yuwa’b’ej Abraham naq sa’ li riyajil taa’osob’tesiiq chixjunileb’ li junkab’al re li ruchich’och’.⁵

Ut jo’kan naq, te’waqlesiik li santil ochoch re naq li choxahil wankilal taaruuq taak’eemanq reheb’ li winq jun sut chik sa’ li ruchich’och’ re naq li junkab’al te’ruuq chixjunajinkil rib’, moko toj ta naq li kamk toxjach qib’, a’b’an chiru chixjunil li maak’a’ rosojik.

“Chiruheb’ li kutan chaalel li tzuul wan wi’ li rochoch li Qaawa’ taawakliiq chi nimaq xwankil sa’ xb’eeneb’ chixjunileb’ li b’ool, ut q’axal nimaq xteram chiruheb’ chixjunil li tzuul. Chixjunileb’ li tenamit te’chalq aran.”⁶

Wi eb’ li yookeb’ inraab’inkil nawiib’an xch’ooleb’, me’xkanab’ sik’ok!

Nekexinb’oq chixb’aanunkil li k’a’ru kixk’ut qe li Profeet aj Jose Smith, naq kiril sa’ lix hu laj Santiago 1:5: “Wi wank junaq eere yo chi majelo’k xna’leb’, chixtz’aamaq re li Dios, ut taak’ehe’q re, xb’aan naq li Dios nak’ehok chi anchal xch’ool ut chi chaab’il reheb’ chixjunileb’.”

Aajel ru li kik’ulman chaq Kumorah sa’ li K’ojob’ank wi’chik, naq laj Jose Smith kixk’ul li perel ch’iich’ tz’iib’anb’il wi’ lix Hu laj Mormon. Li hu a’in nokoxtenq’a chi nach’ok rik’in li Kristo q’axal wi’chik chiru yalaq hu sa’ ruchich’och’ a’in.⁷

Ninch’olob’ xyaalal naq li Qaawa’ kixwaklesiheb’ li profeet, aj ilol na’leb’, ut aj k’utb’esinel re xk’amb’al xb’e lix awa’b’ejihom sa’ li roso’jikeb’ li kutan a’in ut naq sa’ lix k’uub’anb’il na’leb’ maak’a’ rosojik, eb’ li junkab’al te’wanq chi junelik q’e kutan. A’an wan xk’a’uxl chiruheb’ li ralal xk’ajol. Xaxsume chaq li qatij.

Xb’aan li xnimal ru rahok, li Jesukristo kixtoj rix li qamaak, A’an laj Kolol re li ruchich’och’. Chirix a’in ninch’olob’ xyaalal sa’ lix santil k’ab’a’ li Jesukristo, amen.