lix junkab’al laj Lehi naq yookeb’ chi b’eek sa’ li chaqi ch’och’

Laj Lehi nab’eek nach’ rik’in li Kaqi Palaw, xb’aan laj Gary Smith

6–12 enero

1 Nefi 1–7

“Tinxik ut tinb’aanu”

Naq yooqat chirilb’al ru 1 Nefi 1–7, k’oxlaheb’ raqal, numsihom, patz’om ut wankeb’ xkomon chik li na’leb’ nakaweek’a naq naru taawoksi re xtzolb’aleb’ li kok’al. Eb’ li kok’ k’anjel re li tusleb’ aatin a’in naru neke’oksiman choq’ reheb’ li kok’al toj ka’ch’ineb’ xyu’am malaj li ak ninqeb’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Maare junjunq reheb’ li kok’al sa’ laa tzoleb’aal ak rab’ihomeb’ malaj rilomeb’ ru li resilal lix junkab’al laj Nefi li wan sa’ 1 Nefi 1–7. Kanab’eb’ chixwotzb’al li k’a’ru neke’xnaw. Wi moko mas k’i ta li neke’xnaw li kok’al chirix lix numsihom laj Nefi, k’eheb’ xhoonal sa’ xraqik li tzolok re te’xwotz li k’a’ru xe’xtzol.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

1 Nefi 2:16

Tento naq taawanq lix nawom inch’ool.

Laj Nefi kixpaab’eb’ li raatin lix yuwa’ xb’aan naq kiraj xnawb’al xjunes rib’ ut kitijok chiru li Qaawa’. Tenq’aheb’ li kok’al chi tzolok rik’in lix b’aanuhom laj Nefi.

Kok’ k’anjel naru chi b’aanumank

• K’am jun ch’ina tz’aptz’ookil kaxon rik’in jun xjalam-uuch li Kolonel chi sa’ ut kanab’eb’ li kok’al chirilb’al xjuneseb’ li k’a’ru wan sa’ li ch’ina kaxon. Ye reheb’ li kok’al naq laj Nefi kiraj xtawb’al lix nawom xch’ool chirix naq li Qaawa’ kixtaqla lix junkab’al chi elk aran Jerusalen. Naq yookat chirilb’al ru 1 Nefi 2:16, k’e xb’oqb’aleb’ li kok’al chi ab’ink chi us re xk’eeb’al reetal k’a’ru kixb’aanu laj Nefi re xtawb’al xnawom xch’ool. Ch’olob’ xyaalal naq jo’ naq li junjunq toj tento naq kixte li ch’ina kaxon re xnawb’al k’a’ru wan chi sa’, chiqajunilo tento taqapatz’ re li Dios re naq taqataw xnawom qach’ool.

• K’ameb’ jalam-uuch malaj k’a’aq re ru li neke’reetali li k’a’aq re ru naru neke’xsik’ wi’ xnawom xch’ooleb’ li kok’al, jo’ jun xjalam-uuch li Jesukristo, lix Hu laj Mormon, malaj xjalam-uuch li yo’yookil profeet. Kanab’eb’ li kok’al chixsik’b’al ru jun li jalam-uuch malaj k’a’aq re ru ut chixwotzb’al lix nawom xch’ool chirix a’an sa’ li tzoleb’aal.

1 Nefi 2:2–4; 3–4

Li Dios tinixtenq’a chixpaab’ankileb’ lix taqlahom.

Chan ru naru nakawoksiheb’ li seraq’ a’in re xtenq’ankileb’ li kok’al chixtawb’al ru naq li Dios nokoxtenq’a chixpaab’ankileb’ lix taqlahom, us ta chanchan naq jwal ch’a’aj xpaab’ankileb’?

Kok’ k’anjel naru chi b’aanumank

• Il ru 1 Nefi 2:2–4 choq’ reheb’ li kok’al ut k’ut junjunqeb’ xjalam-uuch k’a’aq re ru li maare kixk’am chaq lix junkab’al laj Lehi sa’ li yamyookil ch’och’, jo’ jun li muheb’aal t’ikr, isb’, ut li tzimaj ut li roq li tzimaj. Kanab’eb’ chixk’oxlankil k’a’ raj ru te’reek’a wi ta tento te’xkanab’ li rochocheb’ ut te’xik raj sa’ li yamyookil ch’och’. K’a’ru naxpatz’ qe li Qaawa’ naq taqab’aanu re ab’ink chiru sa’ li kutan a’in?

• Tenq’aheb’ li kok’al chixb’onb’aleb’ ut chixsetb’aleb’ li kok’ eetalil chiru hu sa’ li perel re kok’ k’anjel re li xamaan a’in; chirix a’an kanab’eb’ chiroksinkil re xk’osb’al ru li seraq’ naq laj Nefi ut eb’ li ras ke’xxok chaq li perel ch’iich’ bronce (chi’ilmanq 1 Nefi 3–4). Li b’ich “Kaw lix ch’ool laj Nefi” (B’ichleb’aal choq’ reheb’ li Kok’al, 64) ut “Ch’ol 4: Eb’ li perel ch’iich’ bronce” (Eb’ li Esilal sa’ lix Hu laj Mormon, 8–12; chi’ilmanq ajwi’ li video sa’ ChurchofJesusChrist.org) naru nakate’xtenq’a chixseraq’inkil li esil.

• Oksiheb’ li jalam-uuch 103–115 re li Libro de obras de arte del Evangelio re xtenq’ankileb’ li kok’al chixk’oxlankil li k’a’ru xooxtaqla chaq li Qaawa’ chixb’aanunkil. Chan ru naq noko’osob’tesiik naq noko’ab’in chiru? Tenq’aheb’ chixyiib’ankileb’ kok’ utz’u’ujinb’il hu li naru neke’xk’e chiruheb’ lix t’ikr li te’xye Tinxik ut tinb’aanu li k’a’aq re ru xtaqla li Qaawa’ (1 Nefi 3:7). Yaab’asihomaq naab’al sut li ch’ol aatin sa’ komonil.

1 Nefi 3:19–21; 5:19–22

Eb’ li loq’laj hu a’aneb’ xnimal b’ihomal.

Chan ru naru nakatenq’aheb’ chi musiq’aak li kok’al re xraab’aleb’ li loq’laj hu, malaj li raatin li Dios?

Kok’ k’anjel naru chi b’aanumank

• K’ut chiruheb’ li kok’al k’a’ruhaq (malaj xjalam-uuch k’a’ruhaq) li jwal nim xloq’al choq’ aawe. Aatinan chirix chan ru naq nakawil ut chan ru nakak’aak’ale. Ch’olob’ naq choq’ re lix junkab’al laj Lehi, eb’ li loq’laj hu jwal ninqeb’ chaq xloq’al, jo’ jun b’ihomal.

• Kanab’eb’ li kok’al chatenq’ankil chixseraq’inkil malaj chixk’utb’esinkil li k’a’ru ke’xb’aanu laj Nefi ut eb’ li ras re xxokb’aleb’ chaq li perel ch’iich’ bronce: jwal najt ke’b’eek, ke’xkanab’ chaq lix oor ut lix plaateb’, ut ke’xmuq rib’ sa’ jun li ochoch pek re xkolb’al rix lix yu’ameb’. Il ru 1 Nefi 5:21. K’a’ut naq jwal nim chaq xloq’aleb’ li loq’laj hu choq’ re lix junkab’al laj Lehi? Chan ru naru naqileb’ li loq’laj hu jo’ jun li b’ihomal?

laj Lehi naxtzoleb’ ru li perel ch’iich’ bronce

Laj Lehi naxk’ul li perel ch’iich’ bronce, xb’aan laj Clark Kelley Price

reetalil li k’utuk

Xk’utb’al li tzol’leb’: Kok’al ak ninqeb’

1 Nefi 2:16, 19–20

Naru nawan xnawom inch’ool.

K’a’ru nakatzol rik’in lix b’aanuhom laj Nefi chirix xsik’b’al jun xnawom aach’ool? Chan ru naru nakatenq’aheb’ li kok’al chi tzolok rik’in lix b’aanuhom laj Nefi?

Kok’ k’anjel naru chi b’aanumank

• Kanab’eb’ li kok’al chixsik’b’al sa’ 1 Nefi 2:16, 19 chan ru naq laj Nefi kixtaw xnawom xch’ool chirix li raatin lix yuwa’. Kanab’eb’ chixtz’iib’ankil li k’a’ru kixb’aanu laj Nefi chiruheb’ kok’ kaaxukuut malaj chiru jalan chik k’a’aq re ru ut chixkab’lankil k’a’ruhaq li taareetali chan ru naq eb’ li na’leb’ a’an nokohe’xtenq’a chixwaklesinkil jun xnawom ch’oolej.

• Seraq’i choq’ reheb’ li kok’al chan ru naq laa’at xataw lix nawom aach’ool chirix li evangelio. Kanab’eb’ chixwotzb’al xnumsihomeb’ chanchan ajwi’ a’an ut waklesiheb’ xch’ool chixtaaqenkil lix b’aanuhom laj Nefi re xkawob’resinkil lix nawom xch’ooleb’. Chan ru nokoxtenq’a naq wan tz’aqal xnawom qach’ool laa’o?

1 Nefi 3:1–8

Naru ninsumeheb’ rik’in paab’aal lix taqlahom li Qaawa’.

Lix chaab’ilob’resinkil xna’leb’eb’ jo’ li re laj Nefi tixtenq’aheb’ li kok’al naq li Qaawa’ tixpatz’ reheb’ xb’aanunkil k’a’aq re ru li maare ch’a’ajaq.

Kok’ k’anjel narub’aanumank chi b’aanumank

• Jach ru li tzoleb’aal sa’ wiib’ ch’uut. Kanab’eb’ jun ch’uut chirilb’al ru chan ru naq laj Laman ut laj Lemuel ke’xsume laj Lehi (chi’ilmanq 1 Nefi 3:2–5), ut li ch’uut jun chik chirilb’al ru chan ru kisumen laj Nefi (chi’ilmanq 1 Nefi 3:2–4, 7). Kanab’ jun li ch’ina al chixk’oxlankil naq a’an laj Lehi ut kanab’eb’ xkomoneb’ li kok’al chixk’oxlankil naq neke’q’aj aran Jerusalen re xxokb’aleb’ chaq li perel ch’iich’ bronce. Kanab’eb’ li junjunq chi ch’uut chi sumenk rik’ineb’ li raatin chanchan ta wi’ naq a’aneb’ li kristiaan neke’aatinak wi’ li raqal xe’ril ru. K’a’ruheb’ junjunq reheb’ li k’a’aq re ru nokoxtaqla li Dios chixb’aanunkil? Chan ru naru nokowan jo’ laj Nefi?

• B’ichahomaq sa’ komonil jun li b’ich chirix li paab’ank, jo’ “Kaw lix ch’ool laj Nefi” malaj “Paab’eb’ li taqlahom” (B’ichleb’aal choq’ reheb’ li Kok’al, 64, 68), ut k’e xb’oqb’aleb’ li kok’al chirab’inkil chi us re naq te’xtaweb’ ch’ol aatin li neke’xk’ut chan ru toosumenq chiru li Qaawa’.

1 Nefi 3–4

Li Santil Musiq’ej tinixb’eresi naq tinyal inq’e chixb’aanunkil li rajom li Qaawa’.

Laj Nefi kixtaaqe li Musiq’ej, “chi moko kixnaw ta chirub’eetal k’a’ru li tento tixb’aanu” (1 Nefi 4:6). Chan ru naru nakatenq’aheb’ li kok’al nakatzoleb’ chixsik’b’al lix b’eresihom li Santil Musiq’ej?

Kok’ k’anjel naru chi b’aanumank

• Kanab’eb’ li kok’al chixk’utb’esinkil li resilal naq laj Nefi ut eb’ li ras ke’xyal xxokb’aleb’ chaq li perel ch’iich’ bronce (chi’ilmanq 1 Nefi 3–4). Kanab’ jun li ch’ina al chirilb’al ru 1 Nefi 4:6 ut k’e xb’oqb’aleb’ lix komon chi ab’ink chi us re te’xk’e reetal k’a’ru kixb’aanu laj Nefi li kitenq’an re chi elk chi uub’ej.

• Wotz rik’ineb’ li kok’al junjunqeb’ reetalil li k’a’ru naraj li Dios naq te’xb’aanu, jo’ li wank choq’ ramiiw anihaq sa’ li tzoleb’aal li nareek’a naq xjunes nawan, xkuyb’aleb’ xmaak li riitz’in malaj li ras, malaj xyeeb’al li yaal chirix naq xe’xb’aanu li ink’a’ us. Kanab’eb’ li kok’al chixwotzb’al chan ru naq li Santil Musiq’ej naru chixtenq’ankileb’ chiruheb’ li hoonal a’an. Chan ru naru naqab’oq li Santil Musiq’ej chiqatenq’ankil chi ab’ink chiru li Dios?

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixwotzb’al lix numsihomeb’ rik’ineb’ lix junkab’al b’ar wi’ xe’osob’tesiik xb’aan ab’ink chiruheb’ li taqlahom. Waklesiheb’ xch’ool chixpatz’b’al reheb’ li komon sa’ lix junkab’aleb’ naq te’xwotz ajwi’ xnumsihomeb’.

Xchaab’ilob’resinkil li qak’utum

Tenq’aheb’ li kok’al toj ka’ch’ineb’ xyu’am chi tzolok sa’eb’ li loq’laj hu. Re xtenq’ankileb’ li kok’al toj ka’ch’ineb’ xyu’am chi tzolok sa’eb’ li loq’laj hu, k’e aach’ool chixch’olob’ankil jun ajwi’ li raqal reheb’ li loq’laj hu malaj jun ajwi’ li ch’ol aatin. Naru nakakanab’eb’ li kok’al chi xaqliik malaj chixtaqsinkil li ruq’ naq te’rab’i li aatin a’an malaj li ch’ol aatin. (Chi’ilmanq ajwi’ Li k’utuk jo’ li Kolonel, 21).

perel re kok’ k’anjel: li Dios nikinixtenq’a chixpaab’ankileb’ lix taqlahom