Li perel chʼiichʼ oor

30 diciembre–5 enero

Eb’ li perel sa’ xtiklajik lix Hu laj Mormon

“Jun chik chʼolobʼanbʼil esil chirix li Jesukristo”

Re xtikib’ankil lix kawresinkil aawib’ re k’utuk, il ru li perel re xjolomil li aatin ut li Xtikib’ankil lix Hu laj Mormon, jo’ ajwi’ lix ch’olob’ahomeb’ li oxib’ chi aj yehol nawom, eb’ li waqxaqib’ chi aj yehol nawom ut li profeet aj Jose Smith; il ajwi’ ru “Jun Ch’ina Ch’olob’anb’il Aatin chirix lix Hu laj Mormon.” K’oxlan chirix chan ru naru nakamusiq’aheb’ li kok’al chi tzolok sa’ lix Hu laj Mormon.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixwotzb’aleb’ kok’ esil neke’xnaw sa’ lix Hu laj Mormon, rik’in roksinkileb’ li jalam-uuch 67–86 re li Libro de obras de arte del Evangelio malaj jalaneb’ chik li jalam-uuch wankeb’ aawik’in.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Perel re xjolomil li aatin saʼ lix Hu laj Mormon

Lix Hu laj Mormon naru nikinixtenq’a chi wank inpaab’aal chirix li Jesukristo.

Tenq’aheb’ li kok’al chixk’eeb’al reetal naq li rajom lix Hu laj Mormon a’an xk’utb’al xyaalal li Jesukristo.

Kok’ k’anjel naru chi b’aanumank

• Chap chi kutankil jun lix Hu laj Mormon ut k’ut chawuq’ li aatin, Jun chik ch’olob’anb’il esil chirix li Jesukristo. Kanab’eb’ li kok’al chixk’eeb’aleb’ xhoonal re xyeeb’al: “Jun chik ch’olob’anb’il esil chirix li Jesukristo.” Seraq’i reheb’ li kok’al chan ru naq lix Hu laj Mormon naxkawob’resi laa paab’aal chirix li Jesukristo.

• Seraq’i jun esil re lix Hu laj Mormon li nak’utuk chirix li Jesukristo, jo’ li seraq’ naq laj Samuel aj Lamanita kixye profeetil aatin chirix li Kristo (chi’ilmanq Helaman 14–16), naq li Kolonel kirosob’tesiheb’ li kok’al (chi’ilmanq 3 Nefi 17), malaj naq li riitz’in laj Jared kiril ru li Jesukristo (chi’ilmanq Eter 2─3). Eb’ li ch’ol re Eb’ li Esilal sa’ lix Hu laj Mormon (ut eb’ li video sa’ ChurchofJesusChrist.org) naru neke’oksiman. K’ut chiruheb’ li kok’al k’a’ru naqatzol chirix li Jesus sa’eb’ li seraq’ a’an. Ye reheb’ naq te’xtzol naab’al k’a’aq re ru chirix li Jesukristo sa’ lix Hu laj Mormon chiru li chihab’ a’in.

• B’ichahomaq jun li b’ich chirix lix Hu laj Mormon, jo’ li “Lix Hu laj Mormon naxk’ut” (B’ichleb’aal choq’ reheb’ li Kok’al, 62). B’ichahomaq li b’ich sa’ komonil naab’al sut ut kanab’eb’ li kok’al chixk’eeb’aleb’ xhoonal chixchapb’al jun xjalam-uuch li Kolonel naq yooqeb’ chi b’ichank.

Xtikib’ankil lix Hu laj Mormon

Lix Hu laj Mormon a’an li taqenaqil pek li xaqab’anb’il wi’ li qapaab’aal.

Li Awa’b’ej Thomas S. Monson kixch’olob’: “Wi yaal [lix Hu laj Mormon]—ut ninch’olob’ xyaalal naq yaal a’an—jo’kan b’i’ laj Jose Smith kiwan choq’ jun profeet … , Lix Iglees li Jesukristo reheb’ laj Santil Paab’aanel sa’ Roso’jikeb’ li Kutan a’an lix Iglees li Qaawa’ sa’ xb’een li ruchich’och’, ut li santil tijonelil re li Dios k’ojob’anb’il wi’chik” (“Lix wankil lix Hu laj Mormon,” Jolomil ch’utub’aj-ib’ re abril 2017).

Kok’ k’anjel naru chi b’aanumank

• Il ru choq’ reheb’ li kok’al li raatin laj Jose Smith wan sa’ li Xtikib’ankil lix Hu laj Mormon: “Lix Hu laj Mormon a’an li taqenaqil pek li xaqab’anb’il wi’ li qapaab’aal.” Ch’olob’ naq jo’ chanru naq li taqenaqil pek a’an li xaqab’anb’il wi’ xkomon li q’otq’ookil pek, lix nawom qach’ool chirix lix Hu laj Mormon naxxaqab’ ut naxkawob’resi lix nawom qach’ool chirix xkomoneb’ li k’a’aq re ru, jo’ chirix laj Jose Smith ut li evangelio.

• B’oq xyuwa’ malaj xna’ junaq li ch’ina al chixwotzb’al sa’ li tzoleb’aal chan ru naq kixtaw xnawom xch’ool chirix lix Hu laj Mormon. Il ru rik’ineb’ li kok’al li b’oqom natawman sa’ xraqik li Xtikib’ankil lix Hu laj Mormon ut tenq’aheb’ chixk’utb’esinkil li naru neke’xb’aanu re te’xtaw ajwi’ xnawomeb’ xch’ool.

“Lix Ch’olob’ahom li Profeet aj Jose Smith”

Lix Hu laj Mormon kik’eeman qe rik’in lix wankil li Dios.

Lix ch’olob’ahom laj Jose Smith naru naxtenq’aheb’ li kok’al chixtawb’al ru lix choxahil ajom lix Hu laj Mormon.

Kok’ k’anjel naru chi b’aanumank

• Seraq’i reheb’ li kok’al li esil chirix li relik chi kutankil lix Hu laj Mormon, jo’ chanru ch’olob’anb’il sa’ “Lix Ch’olob’ahom li Profeet aj Jose Smith.” Naru ajwi’ nakawoksi “Ch’ol 1: Chan ru xqak’ul lix Hu laj Mormon” (Eb’ li Esilal sa’ lix Hu Laj Mormon,, 2─4, malaj li video sa’ ChurchofJesusChrist.org). Tenq’aheb’ li kok’al chixk’utb’esinkil li esil junq sutaq naq laa’at yooqat chixseraq’inkil.

• K’ut chiruheb’ li kok’al jun xjalam-uucheb’ li tz’iib’ wankeb’ chiru li perel ch’iich’ oor. Ch’olob’ naq li Dios kixtenq’a laj Jose chixjaltesinkil ruheb’ li tz’iib a’an choq’ aatin re naq tooruuq chirilb’al ru ut chixtawb’al ru.

  Wiib’ li perel ch’iich’ oor rik’ineb’ tz’iib’.

  Laj Jose Smith kixjaltesi ruheb’ li tz’iib’ tz’iib’anb’ileb’ chiru li perel ch’iich oor.

reetalil li k’utuk

Xk’utb’al li tzol’leb’: Kok’al ak ninqeb’

Perel re Xjolomil li Aatin saʼ lix Hu laj Mormon

Lix Hu laj Mormon nikinixtenq’a chi wank inpaab’aal chirix li Jesukristo.

Chijultiko’q aawe naq li ajom sa’ xtzolb’aleb’ li kok’al chirix lix Hu laj Mormon a’an xwaklesinkil lix paab’aaleb’ chirix li Kolonel.

Kok’ k’anjel naru chi b’aanumank

• Jacheb’ ru laa tzolonel sa’ ka’kab’il. Kanab’eb’ sa’ ka’kab’il chirilb’al ru li xkab’ raqal sa’ li Perel re xjolomil li aatin saʼ lix Hu laj Mormon re xsik’b’al k’a’ruhaq li tixk’ut chiruheb’ k’a’ru li rajom lix Hu laj Mormon. Chirix a’an kanab’eb’ sa’ ka’kab’il chixwotzb’al rik’ineb’ lix komon li k’a’ru neke’xtaw.

• Tenq’aheb’ li kok’al chixtawb’al sa’ li perel re xjolomil li aatin li ch’ol aatin “re te’q’unb’esiiq xch’ool laj Judio ut laj Gentil naq li Jesus a’an li Kristo.” Chan ru naq lix Hu laj Mormon naru naxq’unb’esi qach’ool chirix naq li Jesus a’an li Kristo? Kanab’eb’ chixwotzb’al jun esil sa’ lix Hu laj Mormon li xkawob’resi lix paab’aaleb’ chirix li Kristo, malaj wotz laa we laa’at.

Xtikib’ankil lix Hu laj Mormon

Lix Hu laj Mormon a’an li taqenaqil pek li xaqab’anb’il wi’ li qapaab’aal.

Lix tawb’al jun xnawom xch’ooleb’ chirix lix Hu laj Mormon tixtenq’aheb’ li kok’al chixnawb’al naq Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an li Iglees tz’aqal yaal re li Dios.

Kok’ k’anjel naru chi b’aanumank

• Kanab’eb’ li kok’al chixk’oxlankil naq laa’at maajun wa aawab’ihom chirix lix Hu laj Mormon. Kanab’eb’ chi k’anjelak sa’ ka’kab’il re xk’oxlankil chan ru naru neke’xch’olob’ chawu k’a’ru a’an ut b’ar kichal chaq, rik’in roksinkileb’ lix ch’olob’ankil wankeb’ sa’ lix tiklajik. Chirix a’an kanab’eb’ sa’ ka’kab’il chixk’eeb’aleb’ xhoonal chixk’utb’al chawu. Li jalam-uuch La Biblia y el Libro de Mormón testifican de Cristo (ChurchofJesusChrist.org) naru ajwi’ na’oksiman.

• Kanab’ jun li ch’ina al chirilb’al ru li raatin laj Jose Smith sa’ xwaq li raqal re li xtikib’ankil. Oksi li perel re kok’ k’anjel re li xamaan a’in re xch’olob’ankil chan ru naq li taqenaqil pek naxxaqab’ li q’otq’ookil pek. Jo’ chanru naxye li xraqikil li raqal sa’ li xtikib’ankil, k’a’ru xkomoneb’ li k’a’aq re ru naqanaw naq ak wan chik xnawom qach’ool chirix naq tz’aqal yaal lix Hu laj Mormon?

“Lix Ch’olob’ahomeb’ li Oxib’ chi aj Yehol Nawom”; “Lix Ch’olob’ahomeb’ li Waqxaqib’ chi aj Yehol Nawom”

Naru ninwan jo’ aj yehol nawom chirix lix Hu laj Mormon.

Chan ru naru nakatenq’aheb’ li kok’al chixtawb’al ut chixwotzb’al lix nawom xch’ooleb’ chirix lix Hu laj Mormon?

Kok’ k’anjel naru chi b’aanumank

• Kanab’eb’ li kok’al chixch’olob’ankil k’a’ruhaq rilomeb’ li maa’ani chik junaq sa’ li tzoleb’aal rilom. Ch’olob’ naq sa’ lix Hu laj Mormon wan lix ch’olob’ahomeb’ 11 li kristiaan, jo’ ajwi’ li re laj Jose Smith, li ke’ril li perel ch’iich’ oor b’ar wi’ kijaltesiman ru lix Hu laj Mormon. Ilomaqeb’ ru li ch’olob’ahom sa’ komonil. K’a’ut naq eb’ laj yehol nawom a’an ke’raj naq naab’aleb’ li kristiaan te’xnaw chirix lix ch’olob’ahomeb’?

• Patz’ wi junaq reheb’ li kok’al naraj xwotzb’al chan ru naxnaw naq tz’aqal yaal lix Hu laj Mormon. Ilomaq ru sa’ komonil Moroni 10:3─5 ut k’e xb’oqb’aleb’ li junjunq chi kok’al chirilb’al ru lix Hu laj Mormon chiru li chihab’ a’in ut chixtawb’al malaj chixkawob’resinkil lix nawom xch’ooleb’ chirix naq tz’aqal yaal. Seraq’i reheb’ li kok’al chan ru naq xataw lix nawom aach’ool chirix lix Hu laj Mormon.

reetalil li tzolok

Xb’oqb’aleb’ chi tzolok sa’ kab’l

Wi naru, k’e reetal naq li junjunq chi kok’al wanqeb’ jun lix Hu laj Mormon ut k’e xb’oqb’aleb’ chixtikib’ankil rilb’al ru xjuneseb’ ut rik’ineb’ lix junkab’al.

Xchaab’ilob’resinkil li qak’utum

Sik’ laa musiq’ankil aajunes. Sa’ xna’aj rilb’aleb’ li tusleb’ aatin a’in jo’ ch’olob’ahom li tento taab’aanu naq nakatk’utuk, oksiheb’ jo’ tenq’ re xtawb’al aana’leb’ li tatxtenq’a chixk’ulb’al aamusiq’ankil laa’at naq yookat chixk’oxlankil li ajb’il ru choq’ reheb’ li kok’al nakatzoleb’.

perel re kok’ k’anjel: li qaChoxahil Yuwa’ naxsumeheb’ li tij