“30 diciembre–5 enero. Eb’ li perel sa’ xtiklajik lix Hu laj Mormon: “Jun chik ch’olob’anb’il esil chirix li Jesukristo,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“30 diciembre–5 enero. Eb’ li perel sa’ xtiklajik lix Hu laj Mormon,” Kim, Taaqehin—Choq’ reheb’ li komon ut li junkab’al: 2020
30 diciembre–5 enero
Eb’ li perel sa’ xtiklajik lix Hu laj Mormon
“Jun chik chʼolobʼanbʼil esil chirix li Jesukristo”
Naru taanimob’resiiq laa tzolb’al chirix lix Hu laj Mormon wi nakatikib’ rilb’aleb’ ru li perel li neke’tawman rub’elaj 1 Nefi. K’a’ru nakataw li naxkawob’resi lix nawom aach’ool?
Xtz’iib’ankil li nakak’oxla
Rub’elaj naq nakatwulak sa’ li xb’een ch’ol re li hu 1 Nefi, ak saqen ru naq q’axal jalan lix Hu laj Mormon. Eb’ li perel sa’ xtiklajik neke’xch’olob’ jun esilal maak’a’ xjuntaq’eetankil—jo’ li rula’anihomeb’ li anjel, jun najteril tz’iib’anb’il esil li muqb’il sa’ jun li tzuul chiru k’iila cient chihab’, ut jun aj k’aleb’aal moko nawb’il ta ru li kixjaltesi ru li esil rik’in lix wankil li Dios. Lix Hu laj Mormon maawa’ ka’ajwi’ resilal jun li najter tenamit sa’ li ch’och’ America. Wan chi sa’ “lix tz’aqalil li evangelio li junelik nakana” (Xtikib’ankil lix Hu laj Mormon), ut li Dios ajwi’ kixk’e chi uxmank lix k’utunik—chan ru kitz’iib’aman, chan ru kik’uulaman, ut chan ru naq kipuktesiman sa’ li qakutankil. Sa’ li chihab’ a’in, naq nakawil ru lix Hu laj Mormon, naq nakattijok chirix, ut naq nakayu’ami lix tzol’leb’, taab’oq lix wankil sa’ laa yu’am, ut taawaj tana’ raj xyeeb’al, jo’ ke’xye li oxib’ chi aj yehol nawom sa’ lix ch’olob’ahomeb’, “A’an sachol ch’oolej sa’ wilob’aal.”
Li na’leb’ re xtzolb’aleb’ li loq’laj hu aajunes
Perel re xjolomil li aatin saʼ lix Hu laj Mormon
Lix Hu laj Mormon naru tixkawob’resi inpaab’aal chirix li Jesukristo.
Sa’ li perel re xjolomil li aatin saʼ lix Hu laj Mormon ink’a’ ka’ajwi’ natawman lix k’ab’a’ li hu. Sa’ xyanq junjunq chik li na’leb’, a’an naxk’ut chi tzoltzo junjunqeb’ li rajom li santil esil a’in. Sik’eb’ li ajom a’in, ut naq taatz’il rix lix Hu laj Mormon chiru li chihab’ a’in, k’e reetaleb’ li raqal li nakak’oxla naq neke’xtz’aqob’resi ruheb’ li ajom a’in. Qayehaq, b’ar wankeb’ li raqal li neke’xq’unob’resi aach’ool naq “li Jesus a’an li Kristo, li Junelik Dios”?
Xtikib’ankil lix Hu laj Mormon
Lix Hu laj Mormon “naxk’ut chi tzoltzo li k’uub’anb’il na’leb’ re li kolb’a-ib’.”
Li k’uub’anb’il na’leb’ re li kolb’a-ib’, a’an lix k’uub’anb’il na’leb’ li Dios re xtenq’ankileb’ li ralal xk’ajol chi wulak chi taqenaq xloq’aleb’, jo’ chanru wan a’an, ut chixk’ulb’al li sahil ch’oolejil nareek’a a’an (chi’ilmanq 2 Nefi 2:25–26). Lix tojb’al rix li maak xb’aan li Jesukristo naxk’e chi ruhank li k’uub’anb’il na’leb’ a’in, ut chixjunil li tzol’leb’, li k’ojob’anb’il k’anjel, li sumwank, ut li taqlahom li k’eeb’ileb’ xb’aan li Dios neke’k’anjelak re xtz’aqob’resinkil ru li k’uub’anb’il na’leb’ a’an.
Wi taawaj xtawb’al ru li k’uub’anb’il na’leb’ re li kolb’a-ib’, maajun chik hu chaab’ilaq wi’chik chiru lix Hu laj Mormon re xtzolb’al. Na’aatinak chirix lix k’uub’anb’il na’leb’ li Dios—rik’in jalan jalanq k’ab’a’ej—numenaq 20 sut. Naq nakattzolok chiru li chihab’ a’in, k’e reetal rajlal sut naq yeeb’il resil lix k’uub’anb’il na’leb’ li Dios ut li k’a’ru naxye lix Hu laj Mormon chirix.
A’in jun ch’ina k’anjel re aatenq’ankil chixtikib’ankil a’an. Ileb’ ru li raqal a’in, ut tz’iib’a chi tzoltzo li k’ab’a’ej k’eeb’ileb’ re lix k’uub’anb’il na’leb’ li Dios: 2 Nefi 9:13; 11:5; ut Alma 12:32–34; 24:14; 41:2; 42:15–16. K’a’ru naxye li junjunq chi k’ab’a’ej a’in chirix lix k’uub’anb’il na’leb’ li Yuwa’b’ej?
“Lix Ch’olob’ahomeb’ li Oxib’ chi aj Yehol Nawom“; “Lix Ch’olob’ahomeb’ li Waqxaqib’ chi aj Yehol Nawom“
Naru tinwanq jo’ aj yehol nawom chirix lix Hu laj Mormon.
Li Santil Musiq’ej naru tixch’olob’ xyaalal chawu naq tz’aqal yaal lix Hu laj Mormon, us ta ink’a’ aawilomeb’ li perel ch’iich’ oor jo’ ke’xb’aanu li oxib’ chi aj yehol nawom ut li waqxaqib’ chi aj yehol nawom. Chan ru naq nakawob’resiik lix nawom aach’ool rik’in lix ch’olob’ahomeb’ a’an? Chan ru naru “taak’e aak’ab’a’ re li ruchich’och’, re xk’utb’al xyaalal chiru li ruchich’och’ ” li k’a’ru nakanaw chirix lix Hu laj Mormon? (chi’ilmanq “Lix Ch’olob’ahomeb’ li Waqxaqib’ chi aj Yehol Nawom“).
“Lix Ch’olob’ahom li Profeet aj Jose Smith“
Lix k’utunik lix Hu laj Mormon, a’an chaq jun sachb’a-ch’oolej.
Wi ta anihaq tixpatz’ raj aawe b’ar kichal wi’ lix Hu laj Mormon, k’a’ raj ru taaye re? Chan ru taach’olob’ raj li ruq’ li Qaawa’ sa’ xk’eeb’al chi k’utmank lix Hu laj Mormon? Chan ru naq laj Jose Smith kixye xyaalal lix k’utunik lix Hu laj Mormon?
“Lix Ch’olob’ahom li Profeet aj Jose Smith“
Chan ru kijaltesiik ru lix Hu laj Mormon?
Lix Hu laj Mormon kijaltesiik ru “xb’aan lix maatan ut lix wankilal li Dios.” Ink’a’ mas naqanaw chirix lix sachb’a-ch’oolejil jaltesinkil ru li hu, a’b’an naqanaw naq laj Jose Smith a’an aj ilol na’leb’, tenq’anb’il xb’aaneb’ li k’anjeleb’aal kawresinb’ileb’ xb’aan li Dios: wiib’ li pek chanchan saq ruhil lem, li Urim ut Tumin nayeeman reheb’, ut jun chik li pek li nawb’il ru jo’ jun li ilob’aal pek. Laj Jose kiril sa’eb’ li pek a’in li k’a’ru tz’iib’anb’il chiruheb’ li perel ch’iich’, chi jaltesinb’il ru sa’ li aatinob’aal Ingles, ut kixyaab’asi lix jaltesinkil ru naq jun aj tz’iib’ kitz’iib’an re. Chixjunjunqaleb’ aj tz’iib’ re laj Jose ke’xch’olob’ xyaalal naq k’utb’esinb’il lix wankil li Dios sa’ lix jaltesinkil ru li santil esilal a’in.
Chi’ilmanq “La traducción del Libro de Mormón“ (Temas del Evangelio, topics.ChurchofJesusChrist.org).
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Perel re xjolomil li aatin saʼ lix Hu laj Mormon
Maare jo’ junkab’al taaruuq teetikib’ xtz’iib’ankil jun xtusulal ruheb’ li raqal sa’ lix Hu laj Mormon li neke’kawob’resink re lee paab’aal “naq Jesus a’an li Kristo” ut teetiq xkomoneb’ chik li raqal chiru li chihab’. Jo’kan ajwi’, maare a’an jun chaab’il hoonal re xyiib’ankil jun k’uub’anb’il na’leb’ jo’ junkab’al re rilb’al ru lix Hu laj Mormon: Jo’q’e ut b’ar teech’utub’ eerib’ re rilb’al ru? Chan ru naq taa’okenq li junjunq komon sa’ li junkab’al? Re xtawb’al junjunq li tenq’anel na’leb’, chi’ilmanq “Li na’leb’ re xchaab’ilob’resinkil lix tzolb’aleb’ li loq’laj hu jo’ junkab’al” sa’ xtiklajik li hu a’in.
Xtikib’ankil lix Hu laj Mormon
Jun li taqenaqil pek a’an li pek ch’ikch’o sa’ xb’een jun okeb’aal, li an’ookeb’ wi’ li jun siir chik chi pek, ut li neke’kana wi’ chi xaqxo. Re xtenq’ankil laa junkab’al chixtawb’al ru chan ru naq lix Hu laj Mormon a’an “li taqenaqil pek li xaqab’anb’il wi’ li qapaab’aal,” naru taakab’la malaj taayiib’ xjalam-uuch jun li q’otq’o rik’in jun taqenaqil pek toj chi tzuul. K’a’ru nak’ulman wi na’isiman li taqenaqil pek? K’a’ raj ru taak’ulmanq wi ta maak’a’ qik’in lix Hu laj Mormon? Chan ru naru taqak’e lix Hu laj Mormon choq’ li taqenaqil pek re li qapaab’aal chirix li Jesukristo?
Lix Hu laj Mormon a’an li taqenaqil pek li xaqab’anb’il wi’ li qapaab’aal.
“Lix Ch’olob’ahomeb’ li Oxib’ chi aj Yehol Nawom“; “Lix Ch’olob’ahomeb’ li Waqxaqib’ chi aj Yehol Nawom“
Eb’ li komon sa’ laa junkab’al taaruuq te’xtz’iib’a lix nawomeb’ xch’ool chirix lix Hu laj Mormon, te’xjuch’ xk’ab’a’eb’ sa’ li hu, ut te’xk’oxla chan ru xwotzb’al lix nawomeb’ xch’ool rik’in anihaq chik.
“Lix Ch’olob’ahom li Profeet aj Jose Smith“
Sa’ li esil kixtz’iib’a laj Jose Smith, k’a’ru naqataw li naxk’ut xyaalal naq kiwan li ruq’ li Dios sa’ xk’eeb’al chi k’utmank lix Hu laj Mormon?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Jun profeetil yeechi’ihom. Li Awa’b’ej Russell M. Nelson xye, “Ninyeechi’i naq wi teek’oxla sa’ eech’ool li k’a’ru neketzol [sa’ lix Hu laj Mormon], te’tehe’q li rilob’aal li choxa, ut teek’ul xsumehomeb’ lee patz’om ut xb’eresinkil lee yu’am” (“Lix Hu laj Mormon: K’a’ru raj xjalanil laa yu’am chi maak’a’ li hu a’an?“ Jolomil ch’utub’aj-ib’ re octubre 2017).
Laj Moroni naxq’axtesiheb’ li perel ch’iich’ oor, xb’aan laj Gary L. Kapp