Eb’ li profeetil yeechi’ihom

Xtzolb’al lix Hu laj Mormon tatxjal. Tixjal laa junkab’al. Eb’ li profeet sa’ roso’jikeb’ li kutan xe’xk’e xyeechi’ihomeb’ chirix lix wankil lix Hu laj Mormon chalen chaq naq kitikla xk’ojob’ankil wi’chik Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. K’oxlaheb’ li raqal aatin a’in, ut tz’ileb’ rix chi kok’ aj xsa’. B’arwan reheb’ li osob’tesink a’in taawaj raj xk’ulb’al? Naq nakawil ru lix Hu laj Mormon, k’oxla xtz’iib’ankil ut xwotzb’al rik’ineb’ jalan chan ru neke’tz’aqob’resiik ru li yeechi’ihom a’in sa’ laa yu’am.

Li profeet aj Jose Smith:: “Kebʼinye re li komon naq lix Hu laj Mormon aʼan li hu qʼaxal chʼolchʼo ru wan saʼ li ruchichʼochʼ, ut aʼan li taqenaqil pek li xaqabʼanbʼil wiʼ li qapaabʼaal, ut jun li winq qʼaxal wiʼchik taaruuq chixjilosinkil ribʼ rikʼin li Dios rikʼin xpaabʼankil li naʼlebʼ wan chi saʼ, chiru kʼaʼruhaq chik chi hu” (Enseñanzas de los Presidentes de la Iglesia: José Smith [2007], 67).

Li Awa’b’ej Ezra Taft Benson: “Lix Hu laj Mormon ink’a’ ka’ajwi’ naxk’ut li yaal chiqu, us ta naxb’aanu a’an ajwi’. Lix Hu laj Mormon ink’a’ ka’ajwi’ naxch’olob’ xyaalal li Kristo, us ta naxb’aanu a’an ajwi’. A’b’an wan xkomon chik. Wan jun li wankilal saʼ li hu li taaʼok chi numeʼk saʼ lee yuʼam aʼ yaal saʼ junpaat joʼ nekexʼok chixtzolbʼal li hu chi tiik. Teetaw chik lee wankil chixyalbʼal eeru rikʼin li aaleek. Teetaw chik lee wankil chixtzʼilbʼal rix li bʼalaqʼil naʼlebʼ. Teetaw lee wankil chi kanaak saʼ li laatzʼ ut kaʼchʼin ruhil bʼe. Nayeeman naq ebʼ li loqʼlaj hu aʼanebʼ “li aatin re li yuʼamej” (Tzol’leb’ ut Sumwank 84:85), ut maajun chik hu naqʼaxok re lix Hu laj Mormon saʼ xkʼutbʼal xyaalal li naʼlebʼ aʼin. Naq nakat-ok chi tz’okaak ut chi chaqik aawe chirixeb’ li aatin a’an, taataw xnaab’alil chik aayu’am (Enseñanzas de los Presidentes de la Iglesia: Ezra Taft Benson [2014], 153).

Li Awa’b’ej Gordon B. Hinckley: “Chi maak’a’ li wiib’ank ch’oolej ninye eere naq wi chejunjunqalex teeril ru lix Hu laj Mormon, maak’a’ naxye jarub’aq sut ak xeril, taachalq sa’ lee yu’am ut sa’ lee rochoch xkomon chik lix Musiq’ li Qaawa’. Taachalq xkawilal chik eech’ool chixpaab’ankileb’ lix taqlahom, ut taachalq jun xnawom eech’ool kawaq chik chirix lix yaalalil li Ralal li Dios” (Enseñanzas de los Presidentes de la Iglesia: Gordon B. Hinckley [2016], 246).

Li Awa’b’ej Russell M. Nelson: “Ex was wiitz’in, ninyeechi’i eere naq wi teetzol lix Hu laj Mormon wulaj wulaj rik’in jun tij sa’ eech’ool, chaab’ilaq chiq li teesik’ ru xb’aanunkil sa’ lee yu’am—wulaj wulaj. Ninyeechi’i naq wi teek’oxla sa’ eech’ool li k’a’ru neketzol, te’tehe’q li rilob’aal li choxa, ut teek’ul xsumenkileb’ lee patz’om ut xb’eresinkil lee yu’am. Ninyeechi’i naq wi teetz’il rix lix Hu laj Mormon wulaj wulaj, taaruuq teekawob’resiiq re xtz’eqtaanankil li maa’usilal re li kutan a’in, jo’ li yajel re pornografia ut xkomon chik li xuwajel k’aytesink-ib’ ” (“Lix Hu laj Mormon: K’a’ru raj xjalanil laa yu’am chi maak’a’ li hu a’an?” Jolomil ch’utub’aj-ib’ re octubre 2017).