Xtzolb’aleb’ li kok’al

Wi wankeb’ kok’al sa’ laa junkab’al, a’in junjunq li na’leb’ naru xb’aanunkil re xtenq’ankileb’:

• B’ichan. Eb’ li B’ich ut li B’ichleb’aal choq’ reheb’ li Kok’al neke’xk’ut li tzol’leb’ rik’in wankilal. Oksi li tusleb’aal na’leb’ li natawman sa’ xraqik li B’ichleb’aal choq’ reheb’ li Kok’al re xtawb’aleb’ li b’ich li neke’aatinak chirix li na’leb’ re li evangelio li yookat chixk’utb’al. Tenq’aheb’ li kok’al chixjuntaq’eetankil li esil sa’ li b’ich rik’in lix yu’ameb’ a’an. Qayehaq, naru taawoksiheb’ li patz’om chirix junaq li aatin malaj ch’ol aatin sa’ li raatinul li b’ich. Rochb’een b’ichank, eb’ li kok’al neke’ru chireek’asinkil rib’ naq yookeb’ chi b’ichank, malaj naru neke’rab’i xyaab’ li b’ich naq yookeb’ chixb’aanunkil li k’a’aq chik re ru.

• Ab’i malaj k’utb’esi jun seraq’. Eb’ li kok’al neke’wulak chiruheb’ li seraq’—chirix li wan sa’eb’ li loq’laj hu, chirix laa yu’am, chirix li resilal li Iglees, malaj eb’ li seraq’ sa’eb’ lix huhil li Iglees. Sik’ chan ru te’ruuq chi tz’aqonk sa’ xk’utb’al li seraq’. Neke’ru chixchapb’al li k’anjeleb’aal malaj li jalam-uuch, naru te’xyiib’ jun li jalam-uuch chirix li yookeb’ chirab’inkil, neke’ru chixb’aanunkil li na’uxman sa’ li seraq’, ut te’ruuq ajwi’ chixyeeb’al li seraq’. Tenq’aheb’ laa kok’al chixtawb’aleb’ ru li yaalil na’leb’ chirix li evangelio sa’eb’ li seraq’ nakawotz rik’ineb’.

• Yaab’asi jun raqal sa’eb’ li loq’laj hu. Eb’ li kok’al maare ink’a’ neke’xnaw chi us ilok ru hu, a’ut naru taatenq’aheb’ chi tz’aqonk sa’ li tzolok sa’eb’ li loq’laj hu. Maare taa’ajmanq naq teeril yal jun raqalaq, jun aatin, malaj jun ch’uut chi aatin. Te’ruuq ajwi’ chixtzolb’al sa’ xch’ooleb’ jun ch’ina jachal reheb’ li loq’laj hu wi te’xye jarub’aq sut. Naq neke’rab’i li raatin li Dios, te’reek’a li Musiq’ej.

• Il jun jalam-uuch malaj jun video. Naq nakak’ut chiruheb’ laa kok’al jun jalam-uuch malaj jun video chirix jun na’leb’ sa’ li evangelio malaj jun seraq’ sa’eb’ li loq’laj hu, oksiheb’ li patz’om li taatenq’anq reheb’ chi tzolok rik’in li k’a’ru yookeb’ chirilb’al. Qayehaq, taaruuq taapatz’, ”K’a’ru yoo chi k’ulmank sa’ li jalam-uuch a’in, malaj sa’ li video a’in? K’a’ru naxk’e chaweek’a?” Naru taataweb’ li jalam-uuch ut eb’ li video sa’ li aplicación Biblioteca del Evangelio, sa’ medialibrary.ChurchofJesusChrist.org, ut sa’ children.ChurchofJesusChrist.org.

• Yiib’ k’a’ruhaq. Eb’ li kok’al neke’ru chixyiib’ankil k’a’ruhaq, chixyiib’ankil xjalam-uuch, malaj chixb’onb’al reetalil li seraq’ malaj li na’leb’ li yookeb’ chixtzolb’al.

• Oksiheb’ li k’anjeleb’aal re k’utuk. Jun ch’ina k’anjeleb’aal naru chixtenq’ankileb’ laa kok’al chixtawb’al ru jun na’leb’ chirix li evangelio li ch’a’aj xtawb’al ru. Naq nakawoksiheb’ li k’anjeleb’aal, k’oxla chan ru naq te’ruuq chi tz’aqonk li kok’al. Eb’ a’an mas wi’chik naq te’tzoloq rik’in xb’aanunkil k’a’ruhaq chiru yal rilb’al.

• B’aanu li yeeb’il sa’ li seraq’. Naq eb’ li kok’al neke’xb’aanu li k’a’ru naru neke’xk’ul sa’ lix yu’ameb’, mas wi’chik naq te’ruuq chixtawb’al ru chan ru naq jun na’leb’ re li evangelio nak’anjelak sa’ xyu’ameb’.

• B’aanuheb’ li kok’ k’anjel k’iila sut. Wan naq taa’ajmanq ru naq eb’ li kok’al te’rab’i k’iila sut jun li na’leb’ re te’ruuq chixtawb’al ru. Matk’oxlak wi yookat chiroksinkil chi kok’ aj xsa’ junaq seraq’ malaj junaq ch’ina k’anjel. Qayehaq, naru taawotz jun esilal sa’eb’ li loq’laj hu k’iila sut chi k’iila paay ru—rik’in rilb’al sa’eb’ li loq’laj hu, rik’in xyeeb’aal rik’in tz’aqal aawaatin, rik’in xk’utb’al jun li video, rik’in xkanab’ankileb’ li kok’al chatenq’ankil chixyeeb’al li seraq’, rik’in xb’aanunkil li k’a’ru na’uxman sa’ li seraq’, ut xkomoneb’ chik li na’leb’.

  jun junkab’al naq yookeb’ chi tzolok