jun yuwa’b’ej ut eb’ lix kok’al neke’xk’e chi wa’ak jun karneer

Li jalok ch’oolej, a’an li qajayalihom

Li na’ajman ru sa’ chixjunil li tzolok ut li k’utuk li na’uxman sa’ li evangelio, a’an xnimob’resinkil lix jalajik qach’ool, ut qatenq’ankil chi wank chi mas wi’chik jo’ li Jesukristo. Xb’aan a’in, naq naqatzol li evangelio, ink’a’ yal yooko chixsik’b’al li ak’ na’leb’, naqaj wank choq’ “ak’ yo’ob’tesihom” (chi’ilmanq 2 Korintios 5:17). A’in naraj naxye xkanab’ankil qib’ chiru li qaChoxahil Yuwa’ ut li Jesukristo re toohe’xtenq’a chixjalb’al li qach’ool, li qak’oxlahom, li qab’aanuhom, ut tz’aqal li qawanjik.

A’b’anan, li tzolok chirix li evangelio li naxkawob’resi li qapaab’aal ut naxk’e chi uxmank li sachb’a-ch’oolejil jalaak sa’ qach’ool, ink’a’ sa’ junpaat na’uxman. Ink’a’ ka’ajwi’ na’uxman sa’ li tzoleb’aal, a’b’an sa’ rochoch ut sa’ xch’ool junaq. Na’ajman ru naq taqayal qaq’e rajlal ut wulaj wulaj re xtawb’al ru ut xyu’aminkil li evangelio. Re taa’uxq li tz’aqal jalok ch’oolej, na’ajman ru lix wankil li Santil Musiq’ej.

Li Santil Musiq’ej naxk’am qab’e rik’in li yaal, ut naxk’ut xyaalal li yaal a’an (chi’ilmanq Jwan 16:13). A’an naxkutanob’resi li qak’a’uxl, naxseeb’ob’resi li qana’leb’, ut naxtoch’ li qach’ool rik’in lix k’utb’esihom li Dios, a’an laj k’ehol re chixjunil li yaal. Li Santil Musiq’ej naxsaqob’resi ru li qach’ool. A’an nokoxmusiq’a re naq taqaj xyu’aminkil li yaal, ut naxhasb’a qe chan ru naq naru taqab’aanu a’in. Relik chi yaal naq “li Santil Musiq’ej … tooxtzol chirix chixjunil” (Jwan 14:26).

Xb’aan a’in, naq naqayal qaq’e chixyu’aminkil, chixtzolb’al, ut chixk’utb’al li evangelio, tento xb’een taqasik’ naq taawanq qik’in li Musiq’ej. Li ajom a’in tento naq tixb’eresi li k’a’ru naqasik’ ru, ut tixk’am xb’e li k’a’ru naqak’oxla ut naqab’aanu. Tento taqasik’ chixjunil li naxb’oq chaq lix wankil li Musiq’ej, ut taqatz’eqtaana chixjunil li nanajtob’resink re li wankilal a’an—xb’aan naq naqanaw naq wi k’ulub’ejo re naq li Santil Musiq’ej taawanq qik’in, naru ajwi’ naq k’ulub’ejaqo re wank chiru li qaChoxahil Yuwa’ ut li Jesukristo, li Ralal.