“Roksinkil Kim, Taaqehin—Choq’ reheb’ li komon ut li junkab’al,” Kim, Taaqehin— Choq’ reheb’ li komon ut li junkab’al: Lix Hu laj Mormon 2020 (2020)
“Roksinkil Kim, Taaqehin—Choq’ reheb’ li komon ut li junkab’al,” Kim, Taaqehin— Choq’ reheb’ li komon ut li junkab’al: 2020
Roksinkil Kim, Taaqehin—Choq’ reheb’ li komon ut li junkab’al
Ani aj-e li hu a’in?
Li hu a’in, a’an choq’ reheb’ chixjunil li komon ut li junkab’al sa’ li Iglees. Yiib’anb’il re aatenq’ankil chixtzolb’al li evangelio—maak’a’ naxye wi aajunes malaj rik’in laa junkab’al. Wi ink’a’ ak wanjenaqat chixtzolb’al li evangelio chi kok’ aj xsa’, li hu a’in tatxtenq’a chixtikib’ankil. Wi ak yookat chixtzolb’al li evangelio, li hu a’in tatxtenq’a chixtawb’al chik aana’leb’ sa’ xb’aanunkil.
Chan ru naq tinwoksi li hu a’in?
Taawoksi li hu a’in yalaq chan ru nakak’oxla naq tatxtenq’a. Naru nakatxtenq’a jo’ jun aj k’amol b’e re xtzolb’aleb’ li loq’laj hu aajunes ut rik’in laa junkab’al. Naru ajwi’ taawoksi choq’ re li q’ojyin re junkab’al. Eb’ li tusleb’ aatin neke’xk’ut junjunq li xninqal ru na’leb’ neke’tawman sa’ lix Hu laj Mormon, neke’xye resil li tzolok ut li k’a’ chik ru naru neke’xb’aanu li komon ut li junkab’al, ut wan ajwi’ chik sa’ li na’ajej re taatz’iib’a li k’a’ru nakak’oxla.
Maare laa’at ut laa junkab’al ak yookex chixtzolb’al li evangelio chi kok’ aj xsa’. Qayehaq, maare ak yookat chirilb’aleb’ ru jalaneb’ chik li hu chiru lix Hu laj Mormon choq’ re li seminario malaj instituto.. Kim, Taaqehin—Choq’ reheb’ li komon ut li junkab’al ink’a’ tixk’ul xna’aj malaj tixram li k’a’ru chaab’il ak yookat chixb’aanunkil. Naru taataw chan ru naq tattzoloq sa’ lix Hu laj Mormon chi kok’ aj xsa’, ut toj taab’aanu ajwi’ li tzolok sa’eb’ li loq’laj hu li ak yookat chixb’aanunkil. Qayehaq, naru tatwanq chirilb’al xsa’ jun chik hu sa’ li tzolok nakab’aanu aajunes, ut taawil ru lix Hu laj Mormon rik’in laa junkab’al (malaj chi jaljo xna’aj). Kanab’ li Musiq’ej chixk’amb’al aab’e re xnawb’al chan ru naq taatzol li raatin li Dios.
Chan ru nak’anjelak li hu a’in sa’ li k’a’ru na’uxman sa’ li Iglees?
Eb’ li tusleb’ aatin sa’ li hu a’in wan chi tustu re taatzolmanq jun jachal rajlal xamaan. Kim, Taaqehin—Choq’ re li Tzoleb’aal reheb’ li Kok’al ut Kim, Taaqehin—Choq’ re li Dominkil Tzoleb’aal neke’xtaaqe ajwi’ li tusleb’ kutan a’an. Re aatenq’ankil chixtzolb’al ut chixyu’aminkil li evangelio sa’ laa wochoch, eb’ laa k’utunel sa’ li iglees tate’xkanab’ chixwotzb’al li k’a’ru xak’ul ut xak’oxla, ut eb’ laa patz’om chirixeb’ li raqal reheb’ li loq’laj hu li yookat chixtzolb’al sa’ laa wochoch.
Xb’aan naq taa’uxmanq li Dominkil Tzoleb’aal yal wiib’ sut chiru li po, eb’ laj k’utunel sa’ li Dominkil Tzoleb’aal naru te’xsik’ xjunajinkil wiib’ li tusleb’ aatin malaj ink’a’ te’xk’ut jun reheb’ re naq ink’a’ te’xsach xna’ajeb’ sa’ li tusleb’ kutan. Wan naq tento xb’aanunkil ajwi’ a’in sa’eb’ li xamaan naq ink’a’ na’uxman li Dominkil Tzoleb’aal sa’ Iglees xb’aan naq wanq li ch’utub’aj-ib’ re oqech malaj k’a’ruhaq chik. Chiruheb’ li xamaan a’an, toj b’oqb’ilat chixtzolb’al lix Hu laj Mormon sa’ ochoch.
Ma aajel ru naq tintaaqe li tusleb’ kutan?
Li tusleb’ kutan tatxtenq’a chixchoyb’al rilb’al ru lix Hu laj Mormon sa’ xraqik li chihab’. Jo’kan ajwi’, xtaaqenkil li tusleb’ kutan jo’ chixjunileb’ chik li komon sa’ laa teep naru tixchaab’ilob’resi li tzolok sa’ iglees. A’b’an, maak’oxla naq tento xtaaqenkil chi tz’aqal tz’aqal; a’an yal jun aj k’amol b’e re aatenq’ankil chi tzolok sa’ xyaalalil chiru li chihab’. Li k’a’ru aajel ru, a’an naq yookat chixtzolb’al li evangelio aajunes ut aawochb’een laa junkab’al.