jun li junkab’al yookeb’ chixtzolb’aleb’ li loq’laj hu

Li na’leb’ re xchaab’ilob’resinkil li tzolok sa’ junkab’al

Xtzolb’aleb’ li loq’laj hu jo’ junkab’al k’a’jo’ naq naru chixtenq’ankil laa junkab’al chixtzolb’al li evangelio. Maak’a’ naxye jo’ nimal ut jo’ najtil nekextzolok jo’ junkab’al, a’ut aajel ru naq teeb’aanu rajlal. Naq nakak’e chi tzole’k li loq’laj hu chi rajlal sa’ laa junkab’al, taatenq’aheb’ li komon sa’ laa junkab’al chi nach’ok rik’in li Jesukristo, ut chixk’ojob’ankil lix nawomeb’ xch’ool sa’ xb’een li raatin a’an.

K’oxlaheb’ li patz’om a’in:

• Chan ru naru taawaklesiheb’ xch’ool li komon sa’ laa junkab’al re te’xtzol li loq’laj hu xjuneseb’ rib’?

• K’a’ru naru nakab’aanu re xtenq’ankileb’ li komon sa’ laa junkab’al chixwotzb’al li k’a’ru yookeb’ chixtzolb’al?

• Chan ru naru taak’e xwankileb’ li na’leb’ li yookex chixtzolb’al sa’ lix Hu laj Mormon sa’ lee yu’am re wulaj wulaj?

Chijultiko’q aawe naq li ochoch a’an li na’ajej q’axal chaab’il re taatzolmanq li evangelio. Naru taatzol ut taak’ut li evangelio sa’ laa wochoch jo’ ink’a’ naru xb’aanunkil sa’ jun tzoleb’aal re li Iglees. K’e aach’ool chixk’oxlankil chan ru xtenq’ankileb’ li wankeb’ sa’ laa junkab’al chi tzolok rik’ineb’ li loq’laj hu. K’oxla roksinkil junjunq reheb’ li na’leb’ a’in re xchaab’ilob’resinkil li tzolok nekeb’aanu jo’ junkab’al.

Oksiheb’ li b’ich

B’ichahomaqeb’ li b’ich li neke’xka’jultikaheb’ li na’leb’ k’utb’ileb’ sa’eb’ li loq’laj hu. Sa’ Xtiqb’al li aatin D sa’ li k’anjeleb’aal a’in wankeb’ li b’ich wankeb’ rilom rik’ineb’ li tzol’leb’ re li junjunq tusleb’ aatin re li xamaan.

jun winq ut xqa’al neke’xtzoleb’ li loq’laj hu

Wotzeb’ li raqal sa’ li loq’laj hu

Kanab’eb’ li komon sa’ li junkab’al chixwotzb’aleb’ li raqal sa’ li loq’laj hu li xwulak chiruheb’ naq yookeb’ chi tzolok xjuneseb’.

Oksi tz’aqal aawaatin

Patz’ reheb’ li komon sa’ li junkab’al naq te’xye rik’in tz’aqal raatineb’ li k’a’ru xe’xtzol sa’eb’ li loq’laj hu li yookex chixtzolb’al.

Yu’amiheb’ li loq’laj hu

Chirix rilb’al jun raqal sa’eb’ li loq’laj hu, patz’ reheb’ li komon sa’ li junkab’al chan ru naq nak’anjelak li aatin a’an sa’ xyu’ameb’.

Oksi jun li patz’om

K’e xb’oqb’aleb’ li komon sa’ li junkab’al chixyeeb’al jun xpatz’omeb’ chirix li evangelio, ut sik’eb’ li raqal li te’tenq’anq chixsumenkil li patz’om.

K’ut jun raqal reheb’ li loq’laj hu

Sik’ ru jun raqal li xwulak chawu, ut k’ut chi tz’iib’anb’il b’ar wi’ eb’ li komon sa’ li junkab’al te’ril chi kok’ aj xsa’. Kanab’eb’ chixjunjunqaleb’ laa komon chixsik’b’al jun raqal reheb’ li loq’laj hu re xk’utb’al.

Tz’iib’a xtusulaleb’ li raqal

Jo’ junkab’al, sik’omaq ru junjunq raqal li teeraj aatinak wi’ chiru li xamaan.

Tzoleb’ raatinuleb’ li loq’laj hu

Sik’ ru jun raqal sa’eb’ li loq’laj hu li nawulak chiru laa junkab’al, ut k’e xb’oqb’aleb’ li komon sa’ li junkab’al naq te’xtzol sa’ xk’a’uxl rik’in xyeeb’al wulaj wulaj, malaj rik’in xb’aanunkil jun b’atz’unk re tzolok.

K’ut li k’a’aq re ru

Taw k’a’aq re ru li naxk’ut xyaalalileb’ li ch’ol ut raqal yookex chixtzolb’al jo’ junkab’al. Kanab’eb’ li komon sa’ li junkab’al chi aatinak chirix chan ru naq li k’a’ru xak’ut naxk’ut xyaalal li k’utb’il sa’eb’ li raqal.

Sik’ ru jun na’leb’

Kanab’eb’ chixjunqaleb’ li komon sa’ li junkab’al chixsik’b’al ru jun na’leb’ li teetzol sa’ junkab’al. Oksi li K’utul Raqal reheb’ li Loq’laj Hu re xtawb’aleb’ li raqal sa’eb’ li loq’laj hu li neke’aatinak chirix li na’leb’ a’an.

Tz’iib’a jun jalam-uuch

Ilomaq ru jo’ junkab’al junjunq raqal, ut kanab’eb’ li komon sa’ li junkab’al chixb’aanunkil jun jalam-uuch chirix li k’a’ru xeril ru. Naru tex’aatinaq sa’ komonil chirix lix jalam-uuch li junjunq.

K’utb’esihomaq li yeeb’il

Chirix rilb’al jun seraq’, naru taab’oqeb’ li komon sa’ li junkab’al chixk’utb’esinkil li seraq’inb’il. Chirix a’an, naru tex’aatinaq chirix chan ru naq li seraq’ wan choq’ reetalil li k’a’ru yoo chixk’ulb’al li junjunq, jo’ ajwi’ li junkab’al.

Li Elder David A. Bednar kixk’ut: “Chixjunjunqal li tijok jo’ junkab’al, chixjunjunqal hoonal re xtzolb’aleb’ li loq’laj hu jo’ junkab’al, ut chixjunjunqal q’ojyin re junkab’al yoo chixb’onb’al lix jalam-uuch li qaam. Li junjunq k’anjel xjunes rib’ maare ink’a’ nak’utun chi q’axal chaab’il malaj taajultikamanq. A’b’an jo’ chanru naq chixjunqaleb’ li b’onol neke’xjunaji rib’ re taak’utmanq jun jalam-uuch q’axal chaab’il, li kok’ k’anjel li neke’b’aanuman chi rajlal te’ruuq chixk’eeb’al chi k’utmank jun musiq’ejil b’aanuhom li q’axal chaab’il” (Más diligentes y atentos en el hogar,” Liahona, noviembre 2009, 19–20).