eb’ li kristiaan yookeb’ chixk’uxb’al li ru li che’ re li yu’am

Ki’ wi’chik chiru chixjunil li ki’, xb’aan laj Miguel Ángel González Romero

20–26 enero

1 Nefi 11–15

“Kawresinb’il rik’in tiikilal, ut rik’in lix wankil li Dios”

Tikib’ xkawresinkil aawib’ re k’utuk rik’in rilb’al ru 1 Nefi 11–15. Tz’iib’a li nakak’oxla ut li musiq’anb’ilat wi’ chirixeb’ li ch’ol aatin ut li na’leb’ li taakawresi xch’ooleb’ li komon sa’ laa tzoleb’aal chixseraq’inkil. Eb’ li na’leb’ tz’iib’anb’ileb’ arin naru nakate’xtenq’a.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Sa’eb’ li ch’ol a’in, wankeb’ li na’leb’ li us raj naq te’xk’oxla li komon sa’ laa tzoleb’aal naq neke’xwotz li evangelio rik’ineb’ li ras riitz’in. Naru taak’oxla xtz’iib’ankileb’ li patz’ok jo’ a’in chiru li pizarron, ut taakanab’eb’ li komon sa’ li tzoleb’aal chixwotzb’al li k’a’ru xe’xtaw sa’ rilb’al ru li hu chiru li xamaan a’in, li natenq’an chixsumenkileb’ li patz’ok a’in:

• K’a’ru li q’etok paab’ank ut li k’ojob’ank wi’chik?

• K’a’ut naq aajel ru lix Hu laj Mormon?

• Chan ru naru tinnaw injunes li yaal chirix li Dios?

reetalil li k‘utuk

Xk’utb’al li tzol’leb’

3 Nefi 11:1–5, 13–33

Li Dios kixtaqla li Jesukristo jo’ jun xk’utb’al lix rahom.

• Jun li anjel kixk’ut chiru laj Nefi eb’ li eetalil ut li k’a’aq re ru taak’ulmanq sa’ lix yu’am li Kolonel, li naxk’ut xyaalal lix rahom li Dios. Maare us raj choq’ eere xtz’ilb’al rix jo’ tzoleb’aal eb’ li eetalil ut numsihom a’in, ut tex’aatinaq chirix chan ru naq neke’xk’ut lix rahom li Dios choq’ qe. Ma wankeb’ li jalam-uuch, li video, ut xkomon chik li k’a’ru taaruuq taak’ut re xk’utb’al xyaalal li k’a’ru kik’ulman sa’eb’ li raqal a’in? (chi’ilmanq, jo’ eetalil, biblevideos.ChurchofJesusChrist.org). Chan ru naq lix yu’am li Kolonel ut lix tojb’al rix li maak nakatxtenq’a chixtawb’al ru lix rahom li Dios choq’ aawe?

1 Nefi 12–15

Li Dios tooxtenq’a chixtz’eqtaanankil lix wankil laj Satanas.

• Maare wan naq eb’ li komon sa’ laa tzoleb’aal neke’reek’a naq chanchaneb’ li ani wankeb’ sa’ lix matk’ laj Nefi, li yookeb’ chi b’eek sa’ li q’ojyinal choql, malaj chi eetz’uuk xb’aaneb’ li ani wankeb’ sa’ li kab’l nim ut paapo xsa’. Naru taapatz’ re li tzoleb’aal k’a’ut naq li q’ojyinal choql a’an jun chaab’il eetalil chirix li aaleek (chi’ilmanq 1 Nefi 12:17) ut k’a’ut naq li kab’l li nim ut paapo xsa’ a’an jun chaab’il eetalil chirix lix jo’maajo’il k’oxlahomeb’ ut lix q’etq’etil li ruchich’och’ (chi’ilmanq 1 Nefi 12:18). Chirix a’an, naru taajach ru eb’ li ch’ol 12–15 sa’ xyanqeb’ li komon sa’ li tzoleb’aal, ut taaye reheb’ naq te’xsik’eb’ li raqal li neke’xk’ut chan ru naq li Dios tooxtenq’a chi numtaak sa’ xb’een li aaleek, li k’a’ru jo’maajo’, ut li q’etq’etil (chi’ilmanq, jo’ eetalil, 1 Nefi 13:34–40; 14:14).

• Chan ru naru taatenq’aheb’ li komon sa’ laa tzoleb’aal chixtawb’al ru chi us li wankilal li nachal rik’in li raatin li Dios? (chi’ilmanq 1 Nefi 15:24). Naru taakanab’eb’ chi aatinak chirix li patz’om jo’ a’in: K’a’ru kixtzol laj Nefi chirix lix wankil li raatin li Dios? Chan ru naq laj Satanas naxyal xq’e chixsachb’al xwankil li raatin li Dios? (chi’ilmanq 1 Nefi 13:26–29). K’a’ru kixb’aanu li Dios ut eb’ lix profeet re xkolb’al rix li raatin? Jo’ xkomon lee seraq’, maare tatruuq chixpatz’b’al re junjunq komon sa’ li tzoleb’aal naq te’xwotz chan ru naq neke’xtzoleb’ li loq’laj hu, ut k’a’ru neke’xb’aanu re naq li raatin li Dios taawanq xna’aj sa’ lix yu’ameb’ wulaj wulaj.

1 Nefi 13

Li Qaawa’ kixkawresi li b’e re xk’ojob’ankil wi’chik lix Iglees.

• Maare jun li juch’ li nareetali xnumikeb’ li chihab’ tixtenq’aheb’ li komon sa’ li tzoleb’aal chixtawb’al ru lix k’utb’esinb’il matk’ laj Nefi chirix lix k’ojlajik wi’chik li evangelio. Naru taaye reheb’ li komon sa’ li tzoleb’aal naq te’xyiib’ jun juch’ chiru li pizarron, sa’ li taawanq wi’ li k’a’ru neke’xtaw chi tz’iib’anb’il resil sa’ 1 Nefi 13. B’arwan reheb’ li na’leb’ a’in ak xe’k’ulman? K’a’ru li yoo chi k’ulmank anajwan? Naru taawotz li raatin laj George Washington, li xb’een awa’b’ej re li tenamit Estados Unidos, li wan sa’ “Xkomon chik li k’anjeleb’aal,” li naxk’ut naq a’an kixk’e reetal lix wankil li Dios sa’ li Revolucion Americana, li kikawresink re li b’e re taak’ojob’amanq wi’chik li evangelio.

• Chan raj ru naq eb’ li komon sa’ li tzoleb’aal te’roksi 1 Nefi 13 re xk’utb’al chiru junaq li jalan chik xpaab’aal k’a’ut naq ki’ajman jun k’ojob’ank wi’chik? (chi’ilmanq, jo’ eetalil, 1 Nefi 13:26–29, 35–42). K’a’ chik ru chi raqal taaruuq te’roksi li komon sa’ li tzoleb’aal re xtawb’al ru k’a’ut naq ki’ajman ru lix k’ojob’ankil wi’chik li evangelio? (re xtawb’al junjunq na’leb’, chi’ilmanq li K’utul Raqal reheb’ li Loq’laj Hu, “Xk’ojob’ankil wi’chik li Evangelio”). Eb’ li komon sa’ li tzoleb’aal maare te’raj xk’utb’esinkil chan raj ru naq te’xch’olob’ chiru anihaq k’a’ut naq aajel ru lix k’ojob’ankil wi’chik li evangelio, ut chan ru naq xe’osob’tesiik xb’aan.

1 Nefi 13:20–41

Lix Hu laj Mormon naxk’uteb’ li yaalil na’leb’ saqen ru ut loq’eb’.

• Maare us raj roksinkil 1 Nefi 13:20–41 re xtikib’ankil li aatinak chirix k’a’ut naq aajel ru choq’ qe lix Hu laj Mormon. Eb’ li komon te’ruuq chixtz’iib’ankil xtusulaleb’ junjunq li “na’leb’ saqen ru ut loq’eb’ ” li ke’sach chaq sa’ li Santil Hu ut ke’k’ojob’aman wi’chik rilk’in lix Hu laj Mormon (re xtawb’al junjunq, che’ilmanq li raqal 26 ut 39, malaj eb’ li tusleb’ sa’ “Xkomon chik li k’anjeleb’aal”). Naru ajwi’ taapatz’ reheb’ li komon sa’ li tzoleb’aal naq te’xwotz chan ru naq eb’ li “na’leb’ saqen ru ut loq’eb’ ” xe’xtenq’aheb’ chixjilosinkil rib’ rik’in li Dios.

  junkab’al li yoo chirilb’aleb’ ru li loq’laj hu

  Li Musiq’ej naru chiqatenq’ankil chixtawb’al qajunes eb’ li “na’leb’ saqen ru ut loq’eb’.”

• Naru taak’oxla xk’utb’al li video “El Libro de Mormón: un libro proveniente de Dios” (ChurchofJesusChrist.org), ut taakanab’eb’ li komon sa’ li tzoleb’aal chixwotzb’al k’a’ru naxk’ut li video a’in chirix k’a’ut naq aajel ru choq’ qe lix Hu laj Mormon. Malaj ut taaruuq taapatz’ re jun komon sa’ li tzoleb’aal naq tixyiib’ chiru li pizarron li jalam-uuch yeeb’il resil sa’ li raatin li Elder Tad R. Callister sa’ “Xkomon chik li k’anjeleb’aal.” Chirix a’an, eb’ li komon sa’ li tzoleb’aal te’ruuq chixwotzb’al chan ru naq xe’tenq’aak xb’aan lix Hu laj Mormon chixtawb’al ru chi us wi’chik lix evangelio li Jesukristo.

reetalil li tzolok

Xb’oqb’aleb’ chi tzolok sa’ kab’l

Re xwaklesinkileb’ xch’ool li komon sa’ li tzoleb’aal re te’ril ru 1 Nefi 16–22 chiru li xamaan li chal re, naru taaye naq wan aran jun esil li naru chixtenq’ankileb’ naq taa’ajmanq xb’aanunkil k’a’ruhaq li chanchan ink’a’ naru chi b’aanumank.

reetalil li k’anjeleb’aal

reetalil li k’anjeleb’aal

Eb’ li video chirix lix Hu laj Mormon.

Sik’eb’ li video li neke’xk’ut li yeeb’il sa’ 1 Nefi 11–15 sa’eb’ li video chirix lix Hu laj Mormon sa’ ChurchofJesusChrist.org, malaj sa’ li aplicación Biblioteca del Evangelio.

Li ruq’ li Dios sa’ xtiklajik li tenamit Estados Unidos.

Laj George Washington kixye: “Jun winq ink’a’ us chi yaal wi naru chirilb’al li k’a’ru kik’ulman sa’ li Revolucion Americana ut ink’a’ nareek’a xb’antioxinkil chiru laj Yiib’ahom re li choxa ch’och’, rik’in naq k’iila sut kik’utman lix choxahil uq’ sa’ qatenq’ankil (hu taqlanb’il re laj Samuel Langdon, 28 septiembre, 1789, foundersarchives.gov/documents/Washington/05-04-02-0070).

Eb’ lix tusleb’ aatin li Awa’b’ej Russell M. Nelson chirix lix Hu laj Mormon.

Sa’ “Lix Hu laj Mormon: K’a’ru raj xjalanil laa yu’am chi maak’a’ li hu a’an?” (Jolomil ch’utub’aj-ib’ re octubre 2017).

Lix Hu laj Mormon naxk’ut naq moko yaal ta li na’leb’ a’in:

• Naq kiraqe’ li k’utb’esinb’il na’leb’ sa’ xkutankil li Santil Hu.

• Naq na’ajman ru xkub’sinkileb’ xha’ li k’uula’al.

• Naq natawman li sahil ch’oolejil rik’in li maa’usilal.

• Naq yal wank chi chaab’il qayu’am tz’aqal re taqak’ul li taqenaqil loq’al (neke’ajman ajwi’ ru li k’ojob’anb’il k’anjel ut li sumwank).

• Naq kikana jun maak sa’ xb’een chixjunileb’ li winq sa’ xk’ab’a’ lix t’anik laj Adan.

Lix Hu laj Mormon naxkutanob’resiheb’ li na’leb’ a’in:

• Li qawanjik naq maji’ nokoyo’la.

• Li kamk. A’an jun na’leb’ aajel ru sa’ lix k’uub’anb’il na’leb’ li Dios re sahil ch’oolejil.

• Li qawanjik chirix li kamk, li natikla sa’ li hilob’aal na’ajej.

• Chan ru naq li tz’ejwalej li waklesinb’il wi’chik chi yo’yo ut ch’utub’anb’il rik’in li Musiq’ej, na’ok choq’ jun aamej li ink’a’ chik nakam.

• Chan ru naq taaraqe’q aatin chiqix xb’aan li Qaawa’ a’ yaal chan ru li qab’aanuhom ut li rajom li qach’ool.

• Chan ru naq tento te’b’aanumanq li k’ojob’anb’il k’anjel, jo’ li kub’iha’, li loq’laj wa’ak, ut xk’eeb’al li maatan re li Santil Musiq’ej.

• Lix tojb’al rix li maak xb’aan li Jesukristo.

• Li wakliik chi yo’yo.

• Lix aajel ruhil k’anjeleb’ li anjel.

• Chan ru naq taawanq chi junelik li tijonelil.

• Chan ru naq k’a’jo’ wi’chik eek’asinb’ileb’ li winq xb’aan lix wankil li aatin chiru lix wankil li yok’leb’ ch’iich’.

Aajel ru choq’ qe lix Hu laj Mormon.

Li Elder Tad R. Callister kixk’ut:

“Li Santil Hu a’an jun xk’utb’al xyaalal li Jesukristo; lix Hu laj Mormon a’an jun chik. K’a’ut naq q’axal aajel ru li xkab’ xk’utb’al xyaalal a’in? Li eetalil a’in maare taatenq’anq eere: Jarub’eb’ li juch’ naru taayiib’ li nanume’ chiru jun ch’ina tz’uqul tz’iib’anb’il sa’ jun li hu? Maajo’ k’ihal li juch’. Chiru junpaat, k’oxlahomaq naq li ch’ina tz’uqul, a’an li Santil Hu, ut naq li k’iila juch’ li neke’xq’ax ru li tz’uqul a’aneb’ li jalanq jalanq chi na’leb’ chirix li Santil Hu, ut li junjunq chi na’leb’, a’an jalan chik chi iglees.

“A’ut k’a’ru nak’ulman wi sa’ li hu a’an wan jun chik tz’uqul, reetalil lix Hu laj Mormon? Jarub’ chi juch’ naru nakayiib’ li nanume’ chiru xkab’ichal li tz’uqul a’in: li Santil Hu ut lix Hu laj Mormon? Jun ajwi’. Jun ajwi’ li na’leb’ chirix li Kristo nakana naq wankeb’ wiib’ lix k’utb’al xyaalal” (“El Libro de Mormón: un libro proveniente de Dios,” Liahona, noviembre 2011, 75).

Xchaab’ilob’resinkil li qak’utum

B’eresi li musiq’anb’il aatinak. Chixjunileb’ wan k’a’ru naru neke’xye sa’ li tzoleb’aal, a’ut wan naq moko chixjunil ta wan xhoonal. Sik’ chan ru naq eb’ li komon sa’ li tzoleb’aal te’wanq xhoonal chixwotzb’al lix nawomeb’ xch’ool. (Ch’ilmanq Li k’utuk jo’ li Kolonel, 33.)