O Le Faaaogaina o le Sau, Mulimuli Mai ia te Au—Mo Le Aoga Sa

Saunia e Aooa Atu i le Aoga Sa

E tatau ona avea suesuega patino ma faaleaiga i le fale ma nofoaga autu o le aoaoina o le talalelei. E moni lenei mea mo oe ma i latou e te faiaoga ai. A o e saunia e aoao atu, amata i le i ai o ou lava aafiaga i tusitusiga paia. O lau tapenaga aupito taua lava o le a tupu a o e sailia musumusuga a le Agaga Paia.

O le Sau, Mulimuli Mai ia te Au—Mo Tagata Taitoatasi ma Aiga o se vaega taua o lau suesuega patino faapea lau tapenaga e aoao atu. O le a fesoasoani ia te oe e maua ai se malamalama loloto atu o mataupu faavae e maua i tusitusiga paia. O le a mafai foi e oe ona musuia ma valaaulia tagata o le vasega e faaaoga le Sau, Mulimuli Mai ia te Au—Mo Tagata Taitoatasi ma Aiga e faalautele ai a latou suesuega faaletusipaia faaletagata lava ia ma faaleaiga (mo se fesoasoani e faia lea mea, tagai “Manatu mo le Faamalosiauina o Suesuega a le Tagata Lava Ia ma Faaleaiga” i le punaoa lenei). A o e faia, manatua e nofouta i tagata o le vasega atonu o tulaga o o latou aiga e le lagolagoina ai suesuega faaleaiga o tusitusiga paia ma afiafi faaleaiga.

I le taimi o au tapenapenaga, o le a oo mai mafaufauga ma lagona uunai ia te oe e uiga i tagata e te faiaoga ai, pe faapefea ona faamanuiaina o latou olaga i mataupu faavae o loo i mau, ma pe mafai faapefea ona e musuia i latou e sue na mataupu faavae a o latou suesueina tusitusiga paia e i latou lava.

Manatu e Aoao Atu

A o e tapenapena e aoao atu, e mafai ona e maua se musumusuga faaopoopo i le suesueina o otootoga e aoao atu i lenei punaoa. Aua e te mafaufau i nei manatu faapea o ni faatonuga o lea sitepu ma lea sitepu, ae o ni fautuaga e uunai ai au lava musumusuga. E te iloaina tagata o lau vasega, ma o le a e iloaina atili i latou ao outou aoao faatasi i le vasega. E silafia foi i latou e le Alii, ma o le a Ia musuia oe i auala sili e fesoasoani ai i tagata o le vasega e atinae i luga o aoaoga faaletalalelei o loo latou faia i o latou fale.

E tele isi punaoa o loo maua mo oe e faaaoga a o e tapenapena, e aofia ai manatu o i le Sau, Mulimuli Mai ia te Au—Mo Tagata Taitoatasi ma Aiga ma mekasini a le Ekalesia. Mo nisi faamatalaga e uiga i nei punaoa ma isi, tagai i le vaega e faaautu “Punaoa Faaopoopo” i lenei punaoa.

O Ni Mea e Teu i le Mafaufau

• O le aiga o le nofoaga sili lea mo le aoaoina o le talalelei. I le avea ai ma faiaoga, ua ia te oe se tiutetauave taua e lagolago ai, faamalosiau, ma atinae i luga o aoaoga faaletalalelei a tagata o le vasega i le aiga.

• O le a loloto atu le liua o tagata o le vasega i le talalelei a Iesu Keriso pe a latou malamalama ma faaaoga aoaoga faavae moni. Fautuaina i latou e faatino lagona uunai latou te maua mai le Agaga Paia.

• O le aoao atu e sili atu nai lo le lauga atu, ae e sili atu foi i le na ona faatautaia o se talanoaga. O se vaega o lau matafaioi o le faamalosiauina lea o le auai lea e faamalamalamaina ai ma e faavae i luga o tusitusiga paia. E tatau foi ona e faasoa atu manatu musuia e te maua ao e suesueina tusitusiga paia.

• E finagalo le Tama Faalelagi ia e manuia o se faiaoga. Ua Ia saunia le mau punaoa e fesoasoani ia te oe, e aofia ai ma fonotaga faaleaufono a faiaoga. I nei fonotaga e mafai ai e oe ona fefautuaai ma isi faiaoga e uiga i soo se luitau atonu e feagai ma oe. E mafai foi ona e talanoaina ma faata’ita’i ia mataupu faavae o le aoao atu e faapei o Keriso.

• E sili ona aoaoina tagata pe a latou maua avanoa e aoao atu ai. E i ai taimi, mafaufau e faataga tagata o le vasega, e aofia ai ma le autalavou e aoao atu se vaega o le lesona. Ia faavae lenei faaiuga i luga o manaoga ma tomai o tagata o le vasega. Afai e te valaauliaina se tagata o le vasega e faiaoga, faaalu se taimi e fesoasoani ai ia te ia e vave saunia ai e ala i le faaaogaina o manatu o loo maua i lenei punaoa ma i le Sau, Mulimuli Mai ia te Au—Mo Tagata Taitoatasi ma Aiga. Manatua i le avea ai ma faiaoga ua valaauina, ua ia te oe le tiutetauave atoa mo mea e aoao atu i le vasega.

• O lenei punaoa ua aofia ai otootoga e aoao atu mo vaiaso taitasi o le tausaga sei vagana ai Aso Sa e lua e fai ai konafesi aoao. O Aso Sa e le faia ai le Aoga Sa, ona o konafesi a le siteki po o isi mafuaaga, e mafai e aiga ona faaauau le faitauina o le Tusi a Mamona i le fale e tusa ai ma le faasologa ua otooto atu i le Sau, Mulimuli Mai ia te Au—Mo Tagata Taitoatasi ma Aiga. Ina ia tausisia e lau vasega le faasologa, e mafai ona e filifili e faamisi se lesona pe tuufaatasi ni lesona se lua. Ina ia aloese mai le fenumiai, e ono mananao peresitene o le Aoga Sa e vave fautuaina ia faiaoga o le Aoga Sa e uiga i nei fetuunaiga.