“Ngaahi Maʻuʻanga Tokoni Kehé,” Haʻu, ʻo Muimui ʻIate Au—Maʻá e Lautohi Faka-Sāpaté: Tokāteline mo e Ngaahi Fuakava 2021 (2020)
“Ngaahi Maʻuʻanga Tokoni Kehé,” Haʻu, ʻo Muimui ʻIate Au—Maʻá e Lautohi Faka-Sāpaté: 2021
Ngaahi Maʻuʻanga Tokoni Kehé
ʻE ala maʻu ʻa e ngaahi maʻuʻanga tokoni ko ʻení ʻi he polokalama Gospel Library mo e ChurchofJesusChrist.org.
Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí
Te ke lava ʻo liliu ha faʻahinga ʻekitivitī pē mei he maʻuʻanga tokoni ko ʻení ke fakaʻaongaʻi ʻi hoʻo kalasi Lautohi Faka-Sāpaté. Kapau kuo fakaʻaongaʻi ʻe he kau mēmipa ʻo e kalasí e ngaahi ʻekitivitī ko ʻení ʻi heʻenau ako folofola fakatāutahá pe fakafāmilí, poupouʻi kinautolu ke vahevahe ʻenau ngaahi aʻusiá mo e ngaahi fakakaukaú.
Ngaahi Himí mo e Tohi Hiva ʻa e Fānaú
ʻOku fakaafeʻi ʻe he hiva māʻoniʻoní ʻa e Laumālié mo akoʻi e tokāteliné ʻi ha founga fakangalongataʻa. Makehe mei he Ngaahi Himí mo e Tohi Hiva ʻa e Fānaú kuo pulusí, te ke lava ʻo mau ha ngaahi himi mo ha ngaahi hiva ʻa e fānaú kuo hikitepi ʻi he music.ChurchofJesusChrist.org pea mo e ongo polokalama Sacred Music mo e Gospel Media.
Ngaahi Tohi Lēsoni ʻo e Seminelí mo e ʻInisititiutí
ʻOku ʻomi ʻe he ngaahi tohi lēsoni ʻa e seminelí mo e ʻinisititiutí ha puipuituʻa fakahisitōlia mo ha fakamatala fakatokāteline ki he ngaahi tefitoʻi moʻoni ʻoku maʻu ʻi he ngaahi folofolá. Te nau ala fakatupu foki ha ngaahi fakakaukau fakafaiako maʻá e ngaahi kalasi Lautohi Faka-Sāpaté.
Ngaahi Makasini ʻa e Siasí
ʻOku ʻomi ʻe he makasini Liahona ha ngaahi talanoa mo ha ngaahi meʻa kehe ʻe lava ke tānaki atu ki he ngaahi tefitoʻi moʻoni ʻokú ke akoʻi mei he Tokāteline mo e Ngaahi Fuakavá.
Malanga ʻAki ʻEku Ongoongoleleí
ʻOku ʻomi ʻe he fakahinohino ko ʻeni ki he kau faifekaú ha vakai fakalūkufua ki he ngaahi tefitoʻi moʻoni ʻo e ongoongoleleí.
Ki Hono Fakamālohia ʻo e Toʻu Tupú
ʻOku fakamatalaʻi ʻi he maʻuʻanga tokoni ko ʻení ʻa e ngaahi tuʻunga moʻui ʻo e Siasí ʻa ia ʻoku tokoni ki he toʻu tupú mo e niʻihi kehé ke nau hoko ko e kau ākonga faivelenga ʻa Sīsū Kalaisi. Fakakaukau ke faʻa fakaʻaongaʻi maʻu pē ia, tautautefito kapau ‘okú ke akoʻi ʻa e toʻu tupú.
Ngaahi Vitioó mo e Fakatātaá
ʻE lava ʻe he ʻū fakatātaá mo e ngaahi vitioó ʻo tokoni kiate kinautolu ʻokú ke akoʻí, ke nau sioloto ki he tokāteline mo e ngaahi talanoa ʻoku felāveʻi mo e ngaahi folofolá. ʻOku lahi ʻa e ʻū fakatātā ʻoku maʻu ʻi he Tohi Fakatātā ʻo e Ongoongoleleí.
Kau Māʻoniʻoní
Ko e Kau Māʻoniʻoní ko ha voliume kehekehe ia ʻo e fakamatala ki he hisitōlia ʻo e Siasí. ʻOku kātoi ʻi he voliume 1, Ko e Fuka ʻo e Moʻoní, mo e voliume 2, ʻIkai ha Nima Taʻemaʻa, ʻa e vahaʻataimi tatau ki he hisitōlia ʻo e Siasí mo e Tokāteline mo e Ngaahi Fuakavá. ʻE lava ke ʻoatu ʻe he ngaahi hisitōlia ko ʻení ha ngaahi ʻilo ki he kakano ʻo e ngaahi fakahā ʻokú ke ako ʻi he Tokāteline mo e Ngaahi Fuakavá.
Ngaahi Tefito ʻi he Hisitōlia ʻo e Siasí
ʻOku lava ke maʻu ʻa e fakamatala lahi fekauʻaki mo e kakai, ʻū koloa fakameaʻa, siokālafi, mo e ngaahi meʻa ne hoko ʻi he hisitōlia ʻo e Siasí ʻi he ChurchofJesusChrist.org/study/history/topics.
Ko e Faiako ʻi he Founga ʻa e Fakamoʻuí
ʻE lava ke tokoni ʻa e maʻuʻanga tokoni ko ʻení ke ke ako mo fakaʻaongaʻi e ngaahi tefitoʻi moʻoni ʻo e faiako faka-Kalaisí. ʻOku aleaʻi mo akoako fakahoko ʻa e ngaahi tefitoʻi moʻoni ko ʻení ʻi he ngaahi fakataha alēlea fakafaiakó.